Lako mai, Mo Muri Au
17–23 ni June. Maciu 27; Marika15; Luke 23; Joni 19: ‘Sa Oti’

“17–23 ni June. Maciu 27; Marika 15; Luke 23; Joni 19: ‘Sa Oti’” Lako Mai, Mo Muri Au—Me Baleta na Matawilivola ni Siga Tabu: Veiyalayalati Vou 2019 (2019)

“17–23 ni June. Maciu 27; Marika 15; Luke 23; Joni 19,” Lako Mai, Mo Muri Au—Me Baleta na Matawilivola ni Siga Tabu: 2019

Na Karisito e Matai Pailato

Ecce Homo, maivei Antonio Ciseri

17–23 ni June.

Maciu 27; Marika 15; Luke 23; Joni 19

“Sa Oti”

Tekivuna na nomu vakavakarau mo veivakavulici ena wilika ena masumasu na Maciu 27; Marika 15; Luke 23; and Joni 19. Nanuma tiko ni sa rawa mo vakadinadinataka ena kaukauwa na iVakabula kei na Nona Veisorovaki ni ko bula kilikili kei na Yalo.

Vola na Nomu Nanuma

ivakatakilakila ni veiwasei

Sureta na Veiwasei

Ena veivuke na kena volai ena vava ni volavola na vosa se malanivosa eso me vakavotui tiko ki na kalasi na veika sa yaco a vakamacalataki ena wase eso ena macawa oqo. Kerea na kalasi mera vola ena vava ni volavola na vosa eso e vakamacalataka nodra nanuma ni ra wilika na veika sa yaco oqo. Na cava era nanuma kina vakaoqo?

ivakatakilakila ni veivakavulici

Vakavulica na iVunau

Maciu 27; Marika 15; Luke 23; Joni 19

Na gagadre nei Jisu Karisito me vakararawataki e vakaraitaka ni lomana na Tamana kei keda kece sara.

  • Me vukea na kalasi mera kila vinaka ni nona mate na iVakabula sa vakaraitaka tiko na Nona loloma, cakava e dua na itaviqaravi vakaoqo: Solia ki na lewe ni kalasi yadua e dua na uto pepa, ka sureti ira mera vola ena utodra oqo e dua na malanivosa mai na 1 Korinica 13:4–7 e vakamacalataka na loloma. Mo qai kerei ira mera vakasaqara ena Maciu 27; Marika 15; Luke 23; se Joni 19 ka vola ena yasana kadua ni utodra e vica na tikini ivolanikalou e vakaraitaka na loloma ni iVakabula e vakamacalataki tiko ena malanivosa era sa digitaka. Me ra wasea na veika era kunea. Na veika cava soti era sa sotava na kalasi mera kila vinaka kina na loloma ni iVakabula?

    isala wavakavotona

    O ira na sotia “era sa talia e dua na isala e na veiwa-vakavotona, ka vakaisalataki koya kina” (Marika 15:17).

  • Mo na vakayaloqaqataki ira vakacava na kalasi mera wasea na nodra ivakadinadina ni veika era sa vulica ena macawa oqo? Sa rawa mo sureta na kalasi mera vakasaqara e dua na serenilotu e vakamacalataka na veika era sa wilika se nodra nanuma baleta na vakararawataki kei na Vakakoti e Kauveilatai ni iVakabula. Raica me lagati vakalasi e dua se vica vei ira oqo. Ena vakauqeti keda vakacava na noda vulica na iotioti ni auwa ni iVakabula meda nuitaka ka muri Koya?

  • Na iyaloyalo ena rawa ni vukei ira na kalasi mera raica eso na veika era sa wilika ena macawa oqo (raica na “iKuri ni iVurevure” me baleta na iyaloyalo vakaturi). Sa rawa mo wasea vakailawalawa na kalasi ka solia vei ira yadua e dua na iyaloyalo. Mera wiliwili vata na ilawalawa na tikini ivolanikalou e vakamacalataka na veika e tukuni tiko ena iyaloyalo. Sa rawa mera veivosakitaka na ibalebale ni tikina o ya ka wasea na kena sa vukei ira na iyaloyalo mera kila vinaka na tikina. Mera wasea na ilawalawa yadua na nodra nanuma ki na kalasi. Sa rawa talega mo vakaraitaka na vidio “Jesus Is Condemned before Pilate” kei na “Jesus Is Scourged and Crucified” (LDS.org).

  • E sega ni rawa me veivosakitaki taucoko vakalasi na iotioti ni auwa ni iVakabula, ia oqo e dua na itaviqaravi ena vukei iko me veivosakitaki na kena matata e vakaibalebale cake kivei ira o vakavulica. Sureti ira yadua na lewe ni kalasi mera digitaka e dua na wase mai na wiliwili ni macawa oqo ka vica na miniti me dikevi kina, me kunei e dua na vosa, malanivosa, se dua na ivakaraitaki e vakavulica vei ira na veika vakaibalebale cake baleta na iVakabula kei na Nona ilesilesi. Solia na madigi mera wasea na veika era sa raica ka vakamacalataka na vuna e vakaibalebale cake kina vei ira.

Maciu 27:14–60

Era sa raica oti tu mai na parofita ni gauna makawa na vakararawataki kei na Vakakoti e Kauveilatai ni iVakabula.

  • Ena rawa me vaqaqacotaka na nodra vakabauta o vakavulici ira tiko mera kila ni ra sa tukuna oti tu mai na parofita ni gauna makawa e vuqa na veika ena iotioti ni auwa ni iVakabula. Dua na sala mera raicalesu kina na kalasi na parofisai oqo ka raica ena kena sa mai yaco o ya me soli ki na tamata yadua e dua se sivia na ivolanikalou ena “iKuri ni iVurevure” ka kerea mera raica na tikina ena Maciu 27 e vakaraitaka na kena sa mai yaco na tikini ivolanikalou. Sa rawa mo cakava e dua na jata e veisotari kei na parofisai kei na kena sa mai yaco. Sa rawa mera vola na kalasi na veitikina ni parofisai ena maliwa ni nodra tikini ivolanikalou ena Maciu 27. Na cava eda sa vulica mai na veiparofisai oqo? Ena vaqaqacotaka vakacava na noda vakabauti Jisu Karisito na parofisai oqo?

Maciu 27:27–49; Marika 15:16–32; Luke 23:11, 35–39; Joni 19:1–5

Na veisaqasaqa ena sega ni tarova rawa na cakacaka ni Kalou.

  • Eso na lewe ni kalasi era sa saqati beka—me vaka na vakalewai se vakalialiai—ni ra vakaraitaka na nodra vakabauta se saga mera bulataka na nodra vakabauta. Sa rawa me tekivu na veivosaki ena nodra kerei e vica na lewe ni kalasi mera wasea na gauna a yaco kina oqo. Na cava era a kaya? Sureta na kalasi mera wilika eso na tikina mai na Maciu 27; Marika 15; Luke 23; kei na Joni 19 e tukuna tiko na veivakacacani a sotava na iVakabula. Na mataqali veisaqasaqa cava e sotava tiko nikua na cakacaka ni Kalou? Na cava eda rawa ni vulica mai na veika a sauma na iVakabula ena vukea meda vorata kina na veisaqasaqa ena noda gauna oqo? Na ivolanikalou tale eso e rawa ni vukei keda ni da sotava na veisaqasaqa e oka kina na Maciu 5:10; Roma 12:14; 2 Timoci 3:10–12; Alama 1:19–28; kei na 3 Nifai 12:10–12. Na cava eda sa vulica mai na veitikina oqo?

Luke 23:34–43

E solia vei keda na iVakabula na inuinui kei na veivosoti.

  • Ena vukei beka na nomu kalasi mera wilika na nona sa kerea kina na iVakabula vei Tamana me vosoti ira na sotia ka solia na inuinui vei koya na daubutako e rube tu ena kauveilatai? Sa rawa mo wasea na kalasi ki na rua na ilawalawa ka me dua e wilika na Luke 23:34–38 (oka kina na ivakamacala e botona ni tikina e 34, c, e veivakararamataki tiko kina na iVakadewa ni Josefa Simici) ka me wilika na ikarua ni ilawalawa na Luke 23:39–43. Sa rawa me veivosakitaka na ilawalawa yadua na veika era sa vulica baleta na iVakabula mai na veitikina oqo ka wasea na nodra nanuma ki na kalasi taucoko. E rawa vakacava ni da vakamuria na ivakaraitaki ni Vakabula?

  • Ni gadrevi mo vukea e dua ena nomu kalasi e dredre tiko me veivosoti me vakataki Jisu, mo wasea na itukutuku nei Elder Jeffrey R. Holland ena “iKuri ni iVurevure.”

ivakatakilakila ni veivakavulici

Vakayaloqaqataki na Vuli ena iTikotiko

Ni gadrevi mera vakayaloqaqataki na kalasi mera wilika na Maciu 28; Marika 16; Luke 24; kei na Joni 20–21 ena loma ni macawa mai oqo, kerea mera vakasamataka na ka mera kaya vua e dua ena kaya, “Meu na raica sara au na qai vakabauta.” Tukuna ni iwiliwili ena macawa mai oqo ena vukea mera walia na kauwai oqo.

ivakatakilakila ni ivurevure

iKuri ni iVurevure

Maciu 27; Marika 15; Luke 23; Joni 19

iYaloyalo ni nona vakacacani, vakararawataki, kei na mate i Jisu.

Era a parofisaitaka na parofita ni gauna makawa na nona lewai kei na mate i Jisu Karisito.

Na ivakaraitaki ni Turaga me baleta na veivosoti.

E vakavulica o Elder Jeffrey R. Holland:

“E semati vakavoleka ki na noda ilesilesi meda veivutuni sai koya na yalololoma mera cakava vakakina eso—meda na veivosoti me vaka ni da sa vosoti. Ena ka oqo eda sa vakaitavi ena usutu dina ni Veisorovaki i Jisu Karisito. Sa dina sara ni gauna cecere duadua ni mate ena Vakaraubuka o ya, ni a yavavala ko vuravura ka kasei rua na ilati ni valenisoro, o ya na gauna ni loloma veivueti sega ni vakamacalataki rawa ni a kaya na Karisito, ‘I Tamaqu, kakua ni cudruvi ira; ni ra sa sega ni kila na ka era sa kitaka.’Ni sa noda dauveivakameautaki vei Tamada, sa vakayacora tikoga na kerekere o ya nikua—ena vukumu kei na vukuqu.

“Eke, me vaka ena ka kecega, sa tuvanaka tu o Jisu na ivakatagedegede meda na muria. Sa rui lekaleka na bula meda vakayagataka tu ena maroroi tu ni veivakacacani. … Eda sega ni vinakata me nanuma tikoga na Kalou na noda ivalavala ca, sa tiko kina e dua na cala levu ena noda saga tikoga meda nanuma tiko na nodra cala eso” (“The Peaceable Things of the Kingdom,” Ensign, Nov. 1996, 83).

Vakatorocaketaki ni Noda Veivakavulici

Vakaukauwataki mai vua na iVakabula. “Ni ko sasagataka tiko mo bula ka veivakavulici vakataka na iVakabula, ena dau yaco mo guce ena so na gauna. Kakua ni yalolailai; ia, me muataki iko na nomu caka cala kei na malumalumu oqo ki vua na Tamada Vakalomalagi kei na iVakabula” (Teaching in the Savior’s Way, 14).