E vosa tiko o Jisu vei Pita

Vakatawani Ira na Noqu Sipi, mai vei Kamille Corry

24–30 ni June.

Maciu 28; Marika 16; Luke 24; Joni 20–21

“Sa Tu Cake Tale ko Koya”

Ni bera ni vakadikevi na veivakavulici e tiko ena ituvatuva oqo, wilika na Maciu 28; Marika 16; Luke 24; kei na Joni 20–21, ka vakasamataka vakatitobu me vakayagataki vakacava na wase oqo me vakaqaqacotaka nodra vakabauta oira o vakavulica tiko.

Vola na Nomu Nanuma

ivakatakilakila ni veiwasei

Sureta na Veiwasei

Me vukei nodra wasea na lewe ni kalasi na ka era sa vulica yadua kei na vakamatavuvale, kerea mera vola e dua na dina mai na wiliwili ni macawa oqo era nanuma me wasei yani ki “vuravura taucoko” (raica na Marika 16:15). Ni vakarau oti na kalasi, taroga kera sa kunea e dua tale na dina era gadreva mera wasea.

ivakatakilakila ni veivakavulici

Vakavulica na iVunau

Maciu 28; Marika 16; Luke 24; Jon 20

Baleta ga ni sa tucake tale o Jisu, eda na tucake talega.

• Ni gadrevi me soli vakalevu na gauna mera wasea kina na veika era sa vulica baleta na Tucake Tale, mo solia e vica na miniti veira na lewe ni kalasi mera taleva lesu na wiliwili ni macawa oqo kei na “Tucake Tale” ena Bible Dictionary ka vola na dina era sa vulica baleta na Tucake Tale. Mera wasea na veika era sa vola, ka vakayaloqaqataka mera laveliga ni dua e wasea e dua na dina e tautauvata ki na kena era sa vola. Na cava e bibi kina vei ira na dina oqo? Ena vakauqeta vakacava na nomu nanuma baleta na Tamada Vakalomalagi kei Jisu Karisito mai na noda kila ni da na tucake tale? Ena veivuke na kena vakaraitaki na vidio “He Is Risen” (LDS.org) me sureta na Yalo ena veivosaki oqo.

Luke 24:13–35

Eda rawa ni sureta na iVakabula me “tiko ga vei keda.”

• Me vukea na lewe ni kalasi mera raica na isema ni veika era sotava kei na ka rau sotava na tisaipeli ena sala ki Emeo, droinitaka e dua na gaunisala ena vava ni volavola, ka sureti ira na lewe ni kalasi mera vola na itukutuku ena Luke 24:13–35 dua na yasani gaunisala. Ka vola na veibasai e yasana kadua ni gaunisala na veika era sa dui sotava ni ra sa daumuri Jisu Karisito. Kena ivakaraitaki, mera vola A sa matabuawataki na matadrau (Luke 24:16) ena dua na yasa ni gaunisala kei na Eso na gauna eda sega ni kila na veivakauqeti ni Turaga ki na noda bula ena yasana ka dua.

• E rua na serenilotu e yavutaki tiko ena Luke 24:13–35: “Abide with Me; ’Tis Eventide” kei na “Abide with Me!” Serenilotu, naba 165, 166. O na vakayagataka vakacava na serenilotu oqo mo vukea na lewe ni kalasi mera kunea na ibalebale titobu ni itukutuku vakaivolanikalou oqo?

Maciu 28:16–20; Marika 16:14–20; Luke 24:44–53

Eda sa vakaroti meda vunautaka yani na kosipeli ki vuravura taucoko.

• Na ivakaro a solia na iVakabula sa tucake tale vei ira na Nona iApositolo mera vunautaka na Nona kosipeli sa tau talega vei keda nikua. O na vukea vakacava na nomu lewe ni kalasi mera raica na nodra itavi ni vunautaka na kosipeli? Sa rawa mo sureta mera raitayalotaka ni ra sa vakasalataka tiko e dua na lewe ni matavuvale se itokani sa vakarau laki kaulotu tiko. Na cava eda na wasea mai na vosa ni iVakabula vei iratou na Nona iApositolo? Eda na vakayagataka vakacava na vosa vata oqo ni da saga meda wasea na kosipeli vei ira na tamata?

Joni 20:19–28

“Sa kalougata ko ira era sa sega ni raica, ka ra sa vakadinata.”

• Era na tiko eso na lewe ni kalasi era vakasama vata kei Tomasi, ni a gadreva me raica na Turaga sa tucake tale ni bera ni qai vakadinata. Sa rawa ki na nomu kalasi ni Matawilivola ni Siga Tabu me vanua ni nodra vakaukauwataki ni vakabauta ena veika era sega ni raica. Sa rawa mo tekivu ena nomu kerea e dua me vakalekalekataka na ka a sotava o Tomasi ena Joni 20:19–28 Sa rawa mo vakaraitaka talega na vidio “Blessed Are They That Have Not Seen, and Yet Have Believed” (LDS.org). Sa rawa mera vola na lewe ni kalasi ena vava ni volavola na veika e kerea tiko vei keda na Kalou meda vakadinata ni da sega ni raica. Mo qai kerea mera wasea na gauna a vaqaqacotaki kina na nodra ivakadinadina ni veika oqo. Na veivakalougatataki cava sa yaco vei ira na lewe ni kalasi ni ra vakabauta tiko?

Sa rairai na Karisito vei iratou na iApositolo

E vakavulici Tomasi o Jisu “Mo kakua ni vakatitiqa, mo vakadinata ga” (Joni 20:27).

Joni 21:3–17

Sa sureti keda tiko na iVakabula meda vakania na Nona sipi.

• Na cava e rawa ni vukei ira na nomu lewe ni kalasi mera ciqoma na veisureti ni iVakabula mera “vakani ira na [Nona] sipi”? Tekivu ena nomu sureta mera wilika e ra na Joni 21:15–17 ka sosomitaka na yaca i Saimoni ena yacadra kei na “noqu lami” kei na “noqu sipi” ena yaca ni tamata era nanuma ni vinakata na Turaga mera qarava—me ivakaraitaki, ira era tubera se sikova e vale, neiba, se ra kila e vale ni cakacaka se koronivuli. Ni oti e vica na miniti, mera wasea na lewe ni kalasi na nodra nanuma. Na cava na ibalebale ni vakania na lami kei na sipi ni iVakabula? Ena rawa ni veivuke na itukutuku nei Peresitedi Russell M. Nelson kei Elder Marvin J. Ashton ena “iKuri ni iVurevure” me sauma na taro oqo.

ivakatakilakila ni vuli

Vakayaloqaqataki na Vuli ena iTikotiko

Ni gadrevi mera vakauqeti na lewe ni kalasi mera wilika na Cakacaka 1–5 ena macawa oqo, kerea mera raica matua na nona yaco e dua na gonedau tawavuli me iliuliu kaukauwa ni Lotu i Karisito ena kena tete yani ki vuravura raraba. Ni ra vulica na wase oqo, era na raica na veisau vou a yaco kina.

ivakatakilakla ni ivurevure

iKuri ni iVurevure

Maciu 28; Marika 16; Luke 24; Joni 20–21

Na cava na ibalebale ni vakania na sipi ni iVakabula?

E wasea o Peresitedi Russell M. Nelson na veivakararamataki oqo mai na ivola va-Kiriki makawa ni Joni 21:

“Ena [Joni 21:15], na vosa vakania e tadu mai na vosa va-Kiriki na bosko, e kena ibalebale ‘mo vakabulabulataka se vakania.’ Na vosa na lami e tadu mai na vosa daulomani anioni, kena ibalebale na ‘lami lailai.’ …

“Ena [Joni 21:16], na vosa vakania e tadu mai na duatale na vosa, poimaino, e kena ibalebale ‘mo ivakatawa, mo qarava, se mo karona.’ Na vosa na sipi e tadu mai na vosa probaton, e kena ibalebale na ‘sipi matua.’ …

“Ena [Joni 21:17], na vosa na vakania e tadu tale mai na vosa va-Kiriki na bosko, e tukuna tiko na vakabulabulataka. Na vosa na sipi e vakadewataki tale mai na vosa va-Kiriki na probaton, e tukuna tiko na sipi matua.

“Na tolu na tikina oqo, e vaka me ratou tautauvata ena vosa Vakavalagi, ia e tolu dina na tukutuku duidui va-Kiriki:

• E dodonu mera vakabulabulataki na lami lalai mera na tubu;

• E gadrevi mera qaravi na sipi;

• E gadrevi mera vakabulabulataki na sipi” (“Shepherds, Lambs, and Home Teachers,” Ensign, Aug. 1994, 16).

Eda na “vakania vakacava na [Nona] sipi”?

E vakamacalataka o Elder Marvin J. Ashton na sala eda rawa ni vakayacora kina na ivakaro ni Turaga meda vakania na Nona sipi:

“A kaya ko Jisu, ‘Vakatawana na noqu sipi.’ Joni 21: 16 O na sega ni vakani ira rawa ke o sega ni kila na vanua era tiko kina. O na sega ni vakani ira rawa ke o vakavuna mera vorati iko. O na sega ni vakani ira rawa ke sega vei iko na kakana. O na sega ni vakani ira rawa ke sega vei iko na loloma. O na sega ni vakani ira rawa ke o sega ni via cakacaka ka veiwasei. …

“O ira era gadreva mera vukei era lako mai ena veiyabaki ni bula taucoko. Eso na Nona sipi era gone, galili, ka yali tu. Eso era sa oca, rarawa, ka qase na nodra yabaki. Eso era tiko ena noda matavuvale, ena noda itikotiko voleka, se ena vanua yawa kei vuravura, meda veivuke yani ena isolisoli ni lolo. Eso era walokai tu ena via kana. Eso era walokai tu ena via lomani kei na kauwaitaki.

“Kevaka eda vakavuna vei ira na Nona sipi mera vorati keda, ena dredre na cakacaka ni veivakani, se sega ni rawa vakadua. Sega ni dua e rawa me veivakavulici se veivukei ena veicavilaki se veivakacacani. Na dauveivakasaurarataki se ‘Au dina ka cala o iko’ ena vakacala na sasaga kece ni vakani e dua na sipi veilecayaki. Ena tara cake e dua na ilati, ka sega ni dua ena kune vinaka. …

“Na noda cakacaka e vakaraitaka na noda loloma. Na vakamacalataki ni loloma ena tawayaga ke veicalatai na itovo. Ira kece na Nona sipi era gadreva na ligai ivakatawa sa dauveikaroni” (“Give with Wisdom That They May Receive with Dignity,” Ensign, Nov. 1981, 91).

Vakatorocaketaki ni Noda Veivakavulici

Me tiko na nodra gauna ni veiwasei na vuli tiko. “Ni ra wasea na vuli tiko na veika era sa vulica, e sega walega ni ra vakila na Yalotabu ka vaqaqacotaka na nodra dui ivakadinadina, ia era vakayaloqaqataki ira talega na vo ni lewe ni kalasi me ra raica vakataki ira na dina. … Dau solia eso na gauna ni veiwasei vei ira na gonevuli ena veilesoni yadua—ena so na gauna, o na raica beka ni veivosaki sara ga oqo na lesoni.” (Veivakavulici ena Sala ni iVakabula, 30).