A Sa Qai Bogi, maivei Benjamin McPherson

10–16 ni June

Maciu 26; Marika 14; Luke 22; Joni 18

“Me Kakua Ga ni Vaka na Noqu Lewa, Me Vaka Ga na Nomuni Lewa”

Wilika na Maciu 26; Marika 14; Luke 22; kei na Joni 18, ka vakasamataka ka vakananuma vakatitobu. Na itukutuku cava era gadreva na nomu lewe ni kalasi mera vulica?

Vola toka na Nomu Nanuma

Sureta na Veiwasei

Sureti ira na lewe ni kalasi mera wasea na ka era sa vulica ena macawa oqo a vukea me vakaibalebale cake vei ira na sakaramede. Na cava era a cakava kei na sala cava e veisautaka kina na nodra vakayagataka na sakaramede?

Vakavulica na iVunau

Maciu 26:26–29; Luke 22:19–20

Na sakaramede sa madigi meda dau vakananuma tikoga kina na iVakabula.

• Na cava na vuna a tekivutaka kina na iVakabula na sakaramede? Na cava eda vakayagataka kina na sakaramede ena veimacawa? Na isaunitaro cava era na kunea na lewe ni kalasi ena Maciu 26:26–29; Luke 22:7–20; Vunau kei na Veiyalayalati 20:75–79; kei na Tudei ena Vakabauta, 147–49? Me vakataka na, Tudei ena Vakabauta e vakavulica ni sakaramede sa vakananumi kina na solibula i Karisito, sa mai vakayacori kina na lawa i Mosese. Sa rawa talega me wiliki vakalasi na masu ni sakaramede ka mera raica na veiyalayalati eda sa cakava me tiki ni cakacaka vakalotu. Eda na vukea vakacava e dua me kila vinaka na ibalebale ni iyalayala oqo? Me na veisautaka vakacava na noda vakaitavi ena sakaramede na noda digidigi ena loma ni macawa?

  

  Ni da vakayagataka na sakaramede, eda sa vakavouia tiko kina na noda veiyalayalati.

• Ena yaga sara vakavinaka vei ira na lewe ni kalasi ni ra veirogoci vakai ira ena sala mera nanuma kina na iVakabula ena gauna ni sakaramede kei na loma ni macawa (raica na V&V 6:36–37). Sa rawa mo sureti ira mera wasea na veika ena vukei ira kei na nodra matavuvale mera nanuma kina na iVakabula ka maroroya na nodra veiyalayalati. Na veitikini ivolanikalou cava soti mai na wiliwili ni macawa oqo e vakatitobutaka na noda rokova na sakaramede? Me baleta na vei vakasama meda nanuma tikoga kina na iVakabula, raica na Gerrit W. Gong, “Dau Nanumi Koya Tikoga,” Ensign se Liaona, Me 2016, 108–11.

• Na veivosaki oqo ena rawa ni yaco me gauna vinaka vei ira na lewe ni kalasi mera dikeva kina na kena bibi na vei ivakatakilakila ni sakaramede. Ena vukei keda vakacava na vei ivakatakilakila oqo meda raica matua kina na iVakabula ena gauna ni cakacaka vakalotu oqo? Na cava e vakavulica vei keda na ivakatakilakila oqo me baleti Koya kei na noda veimaliwai kei Koya?

• Ena icavacava ni veivosaki me baleta na sakaramede, sa rawa mo solia vei ira na lewe ni kalasi na gauna mera vakasamataka kina vakatitobu ka vola na veivakauqeti cava mera vakavakarautaki ira kina ki na sakaramede mai oqo. Me ikuri ki na yalo e sotavi oqo, sa rawa mo vakatagitaka e dua na serenilotu ka mera vakasamataka vakatitobu na lewe ni kalasi.

Maciu 26:36–46

Eda sa yaco meda sa Vakarisito cake ni da digitaka meda soli keda ki na lewa nei Tamada.

• Na ivakaraitaki ni iVakabula ni a soli koya ki na lewa nei Tamana ena vukei ira na lewe ni kalasi ni ra via cakava vakakina. Me tekivutaki e dua na veivosaki, e rawa mo sureti ira yadua na lewe ni kalasi mera wasea na gauna era a soli ira kina ki na veika era kila ni gadreva na Kalou mera na cakava. Na cava a vakauqeti ira mera cakava na veika o ya? Sureti ira na kalasi mera wilika na Maciu 26:36–42 ka vakasamataka vakatitobu na vuna a solia kina na iVakabula na Nona lewa ki na lewa nei Tamana. Ena vakalougatataki keda vakacava ni da solia noda lewa vua na Kalou?

• Ni dikevi na ivakavuvuli ni soli keda vua na Kalou, mo kerei ira e veimama ni lewe ni kalasi mera wilika na Mosaia 3:19 kei na ikarua ni veimama me wilika na 3 Nifai 9:20. Na cava era vakavulica na veitikina oqo me baleta na ibalebale ni noda soli keda vua na Kalou? Eda na soli keda vakacava? Mera vakasamataka vakatitobu na lewe ni kalasi na nodra rawa ni solia nodra lewa vua na Kalou ena macawa mai oqo. Ena ikuri talega ni vakasama ki na nomudou veivosaki na itukutuku nei Elder Neal A. Maxwell ena “iKuri ni iVurevure.”

Maciu 26:20-22, 31-35

E dodonu meda dui dikeva tiko noda bula me vakadeitaki na kena vakayagataki vei keda na vosa ni Turaga.

• Eda sa rogoca e vuqa na lesoni ni kosipeli ena noda bula, ia eso na gauna eda temaki meda nanuma ni lesoni oqori sa baleti ira vakalevu eso tani tale. E rawa ni vukei keda na veivosakitaki ni Maciu 26 meda uabaleta na itovo oqo. Me tekivutaki na veivosaki oqo, mera veisa yarurua na lewe ni kalasi ka kerea e dua na isa mai na veisa yadua me wilika na Maciu 26:20–22 o kena ikarua me wilika na tikina e 31–35. Sureti ira mera veidutaitaka na nodra dui nanuma na tisaipeli ena rua na itukutuku oqo. Na lesoni cava eda rawa ni vulica ena nodra vakayagataka na tisaipeli ki na nodra bula na vosa ni iVakabula? Me ikuri ni vuli, raica na tikina nei Peresitedi Dieter F. Uchtdorf’ ena Maciu 26:21–22 ena nona vosa “Lord, Is It I?” (Ensign se Liaona, Nove. 2014, 56--59).

Maciu 26:36–46

Sa mai vakayacora vei keda ko Jisu Karisito e dua na Veisorovaki tawayalani.

• Mo sureti ira na lewe ni kalasi mera wasea na veivakararamataki era sa kunea baleta na Veisorovaki i Jisu Karisito ena nodra vuli vakayadua ka vakamatavuvale.

• NaMaciu 26 e vakamacalataka na ka a yaco mai Kecisemani, ia era sa kila vinaka tiko beka na lewe ni kalasi na kena bibi ki na nodra bula? Me vukei ira, e rawa mo vola ena vava ni volavola na taro vakaoqo Na cava a yaco mai Kecisemani? kei na Cava na vuna e bibi kina vei au? Sa rawa mera cakacaka yadua na lewe ni kalasi se vakailawalawa lalai me kunei na isaunitaro ena Maciu 26:36–46; Alama 7:11–13; kei na Vunau kei na Veiyalayalati 19:16–19. Era na kunea talega na isaunitaro ena itukutuku nei Elder C. Scott Grow “Na Mana ni Veisorovaki” (Ensign se Liaona, Me 2011, 108–10).

• Ena iVola i Momani, e vakatoka o Jekope na Veisorovaki i Jisu Karisito me “dua na veisorovaki tawayalani” (2 Nifai 9:7). Mera vukei na lewe ni kalasi mera kila vakavinaka na ibalebale ni veika oqo, mo wasea na veivakavulici i Peresitedi Russell M. Nelson ena “iKuri ni iVurevure” ka kerea mera vola na sala ni veivakauqeti ni solibula ni iVakabula e rawa me vakatokai me tawayalani. Mera na wilika talega na veivolanikalou oqo ka mera vola talega: Iperiu 10:10; Alama 34:10–14; Vunau kei na Veiyalayalati 76:24; kei na Mosese 1:33. Meda vakavinavinakataka vakacava na veika sa cakava vei keda na iVakabula?

Vakayaloqaqataki na Vuli ena iTikotiko

Ni gadrevi mera tomana na lewe ni kalasi nodra wiliwili, e rawa mo tarogi ira kera kila na vitu na ka a kaya ko Jisu ni sa rube tu ena kauveilatai. Tukuna vei ira ni rawa mera na kunea na veika a kaya na iVakabula ni ra wilika na Maciu 27; Marika 15; Luke 23; kei na Joni 19.

iKuri ni iVurevure

Maciu 26; Marika 14; Luke 22; Joni 18

Vidio ni iVola Tabu (LDS.org).

“The Last Supper,” “The Savior Suffers in Gethsemane”

Me sa lewai keda ga na Tamada.

E vakavulica o Elder Neal A. Maxwell: “Ni ko sa solia me lewai iko na Kalou, o sa solia tiko Vua na ka duadua ga o na rawa mo solia dina Vua na ka sara ga e nomu. Kakua ni wawa vakabalavu mo kunea na icabocabo se tekivu mo biuta kina na isolisoli ni nomu lewa!” (“Remember How Merciful the Lord Hath Been,” Ensign se Liaona, Me 2004, 46).

Na Veisorovaki tawayalani.

E vakavulica o Peresitedi Russell M. Nelson:

“Sa tawayalani na Veisorovaki i [Jisu Karisito]—ka sega na kena itinitini. Sa tawayalani talega na nodra na vakabulai na kawatamata kecega mai na mate tawa-oti rawa. Sa yaco me tawayalani ena vuku ni Nona rarawa levu. Sa tawayalani na kena gauna, sa mai oti kina na kena dau cabori taumada na manumanu. Sa tawayalani na kena inaki—me a sa caka ga vakadua. Sa sega ni soli duadua ga na Veisorovaki, ki na dua na iwase ni wiliwili tawayalani ni tamata, ia ki na dua na wiliwili tawayalani ni vuravura taucoko ka bulia o Koya. Sa tawayalani e uabaleta yani na veigauna e vakarautaka na tamata se kina iyalayala ni gauna e kila rawa na tamata.

“O Jisu duadua ga a rawa me solia e dua na veisorovaki tawayalani vakaoqo, baleta ni sucu mai vua e dua na tina e vuravura ka tawamudu na Tamana. Ena vuku ni ituvaki cecere e mai sucu kina, sa yaco kina me Tamata tawayalani ko Jisu” (“The Atonement,” Ensign, Nov. 1996, 35).

E vakavulica o Peresitedi Heber J. Grant: “A sega walega ni tadu mai o Jisu ni sa dua na isolisoli vakalomalagi taucoko, ia a tadu mai ni sa isolisoli ga vakai koya. … Ena vukuda yadua a mai mate kina o Koya e Kalivari ka vakabulai keda vakailavaki na Nona dra. E sega ni vakamatanitu vata, itikotiko raraba, se ilawalawa, ia e vaka tamata yadua” (“A Marvelous Growth,” Juvenile Instructor, Dec. 1929, 697).

Vakatorocaketaki ni Noda Veivakavulici

Raica yani ena mata ni Kalou. Saga mo raici ira na lewe ni nomu kalasi me vaka e raici ira tiko mai na Kalou, ka na vakatakila vei iko na Yalo na kedra yaga vakalou kei na gugumatua. Ni ko cakava oqo, o na dusimaki ena nomu sasaga mo na vukei ira kina (raica na Veivakavulici ena iVakarau ni iVakabula, 6).