na siga ni Penitiko

Siga ni Penitiko, mai vei Sidney King

1–7 ni Julai

Cakacaka 1–5

“Dou na Qai Dautukuni Au”

Kevaka o na wilika na Cakacaka 1–5 ka vakasaqara na veidusimaki ni Yalo tabu, o na ciqoma na veivakauqeti me baleta na dina cava ena wase ena vukei ira na lewe ni kalasi mera vakararavi vakalevu cake ki vua na Yalo Tabu ka mera dautukuna ena yalodina na Turaga o Jisu Karisito.

Vola na Veika o Uqeti Kina

ivakatakilakila ni veiwasei

Sureta na Veiwasei

E vuqa sara tu na itukutuku kei na ivakavuvuli e vakaibalebale cake e tiko ena Cakacaka 1–5. Dua na sala cecere me kunei kina na ka cava e yaga vakalevu duadua ka gadrevi vei ira na lewe ni kalasi o ya mera tukuna vei iko na ka e taleitaki ena nodra vuli ivolanikalou. O na sureta vakacava na mataqali veiwasei vakaoqo? Ena rawarawa sara ke o solia e vica na miniti mera raica ka wasea e dua na tikina mai na Cakacaka 1–5 era a vakila na domo ni Turaga ni a vosa tiko vei ira.

ivakatakilakila ni veivakavulici

Vakavulica na iVunau

Cakacaka 1:1–8; 2:37–39; 4:1–16, 31–33

E liutaka na Nona Lotu o Jisu Karisito mai vua na Yalo Tabu.

• Na wiliki ni veika era a sotava na Apositolo ena vukea na lewe ni kalasi mera raica na sala era na rawata kina na kaukauwa kei na veidusimaki mai vua na Yalo Tabu ena nodra veiqaravi ena itavi ena loma ni Lotu. Dua na sala me talevi lesu kina na veika a yaco ena Cakacaka 1–5 o ya me volai ena vava Sa rawa ni vukei au na Yalo Tabu ena noqu veikacivi ena: ka sureta na lewe ni kalasi mera vakasaqara ena Cakacaka 1:1–8; 2:36–39; kei na 4:1–16, 31–33, na sala me vakacavari kina na yatuvosa oqo. Na cava era gadreva kina na Yalo Tabu o ira na Apositolo?

• Sa rawa mo dou dikeva vakalasi, na sala e liutaka kina o Jisu Karisito na Nona Lotu mai vua na Yalo Tabu ena noda gauna oqo. Me vakayacori oqo, sa rawa mo lesia taumada e vica na lewe ni kalasi mera na taleva lesu tiko mai na itukutuku ena Cakacaka 1:1–8; 2:37–39; 4:1–16, 31–33 ka mai wasea eso na ka era sa sotava e tautauvata kei ira na Apositolo. Me vakataka, sa rawa mera wasea na gauna a vukei ira kina na Yalo Tabu mera vakadinadinataka kina e dua na ivakavuvuli ni kosipeli se sauma na taro ni dua na tamata. Na cava era sa cakava mera vakasaqara kina na veidusimaki ni Yalo Tabu?

Cakacaka 1:15–26

Era sa kacivi na Apositolo i Jisu Karisito mai vua na Kalou ena vuku ni vakatakila.

• Ena rawa ni vukea na nomu kalasi mera kila tiko ni o ira na Kuoramu ni Le Tinikarua ena Lotu ena gauna makawa era a kacivi ena ivakatakila, me vaka ga nikua. Sa rawa mo sureti ira na lewe ni kalasi mera vakamacalataka na sala ni kena sosomitaka e dua na bisinisi o koya me veiliutaki kina, ni na raica na ivakatagedegede ni vuli, kila vakacakacaka, kei na so tale. Kerea mera veidutaitaka vata oqo ena sala a kacivi kina o Apositolo Mataiasa ena Cakacaka 1:15–26 (raica talega na 1 Samuela 16:1–13). Ena semati vakacava na vosa nei Peresitedi Gordon B. Hinckley ena “iKuri ni iVurevure” mera kila vinaka cake kina na lewe ni kalasi? (raica talega na Russell M. Nelson, “Tokoni Ira na Parofita,” Ensign se Liaona, Nove. 2014, 74–77). Ena vakayaco-ka vakacava na kila oqo ki na noda vakabauti ira na iliuliu sa kacivi ira na Turaga? O a rawata vakacava na nomu ivakadinadina baleti ira na iapositolo kei na parofita ni gauna oqo?

Cakacaka 2:22–47; 3:13–26; 4:5–12

Eda sa ciqoma na veivakalougatataki ni Veisorovaki ni da bulataka tiko na imatai ni ivakavuvuli kei na cakacaka vakalotu ni kosipeli.

• Ena rawa beka vakacava vei ira iko vakatavulica me ra kunea na Kaukauwa kei na ibalebale ni dina a vakatavulica o Pita kei Joni (vakabauti Jisu Karisito, veivutuni, papitaiso, isolisoli ni Yalo Tabu, kei na vosota me yacova ki na ivakataotioti)? Dua na sala o ya me dikevi na kedra bibi na ivakavuvuli kei na cakacaka vakalotu oqo, ka dau vakatokai tu ena so na gauna me vunau i Karisito (raica na 2 Nifai 31). Sa rawa mo kauta mai ki na kalasi e lima na posita (ivola kabi lalaga) ka vola ena deladra e cake ni posita yadua na ituvaki oqo ni vunau i Karisito: Vakabauti Jisu Karisito, Veivutuni, Papitaiso, iSolisoli ni Yalo Tabu, Vosota ki na iVakataotioti. Wasea na kalasi ki na lima na ilawalawa, ka solia ki na ilawalawa yadua e dua vei ira na posita (ivola kabi lalaga). Sureti ira na ilawalawa mera raica na ibalebale ni ulutaga e tiko ena nodra posita (ivola kabi lalaga) iDusidusi ki na iVolanikalou se Vunautaka na Noqu Kosipeli. Sa rawa mera qai taleva lesu na ivakavuvuli nei Pita ena Cakacaka 2:22–47; 3:13–26; kei na 4:5–12 ka vola ena nodra posita (ivola kabi lalaga) na ivakaraitaki ni nodra ulutaga mai na ivolanikalou. Ena vukei keda vakacava na ivakavuvuli kei na cakacaka vakalotu oqo ni kosipeli meda rawata kina na veivakalougatataki ni Veisorovaki ni iVakabula? Na cava na itavi ni ivakavuvuli kei na cakacaka vakalotu oqo ena ituvatuva ni veivakabulai nei Tamada Vakalomalagi?

• Sa rawa mo kerea e vica na daukaulotu tiko, ira se qai lesu ga mai, se daukaulotu ni tabanalevu mera vakamacalataka ena vica na miniti na sala era a vakavulica kina eso baleta na vunau i Karisito ena nodra vakayagataka na lesoni 3 ena Vunautaka na Noqu Kosipeli. E cava na vuna sai koya na Vunau ni Karisito na uto ni nodra itukutuku na daukaulotu? Ena vakayagataka tikoga vakacava na vunau i Karisito e dua sa papitaiso oti ka sa ciqoma na isolisoli ni Yalo Tabu?

Cakacaka 2:37–47

Sa dau vakauqeti keda na Yalo Tabu meda cakacakataka na veika eda sa vulica.

• Ni ra vulica tiko na ivolanikalou mai vale na lewe ni kalasi vakakina ena kalasi ena veimacawa, sa na rawa me ra vakila me vaka e “laucoka na yalodra” (Cakacaka 2:37). Ena veivakauqeti sa rawa mo vukei ira mera toso yani ki liu ena nomu taroga na taro, “Na cava meda cakava?” (Cakacaka 2:37). Me wiliki vata na Cakacaka 2:37–47 ka sureta na kalasi mera vakasaqara na veika era a cakava na lewe 3,000 na tamata ni oti na veisureti nei Pita. Sa rawa mera wasea talega na sala eso era a cakacakataka kina na veivakauqeti ni ra vulica na vosa ni Kalou. Sa rawa mo solia na gauna ni vakarau oti na kalasi ki na tamata yadua me tarogi koya vakai koya “Na cava meu na cakava?” ka vola na nodra nanuma.

Sa vunau tiko o Pita ni oti na nona mokulaki

Dina ga ni a vesu ka mokulaki, a vunautaka vakadoudou o Pita na kosipeli.

Cakacaka 3; 4:1–21; 5:12–42

Ni da sa vakasinaiti ena Yalo Tabu, sa rawa meda vunautaka vakadoudou na kosipeli.

• Na itukutuku i Pita kei Joni ni rau vakadinadinataki Jisu ena rawa mera vakauqeti kina na nomu kalasi mera kakua ni rerevaka na ka era tukuna na tamata ni ra wasea ka vakadinadinataka tiko na kosipeli. Na cava era qoroya na lewe ni kalasi me baleta na nodrau doudou o Pita kei Joni ena Cakacaka 3; 4:1–21; kei na 5:12–42? Na isema cava e tiko ena gauna eda ciqoma kina na isolisoli ni Yalo Tabu kei na noda rawa ni vakadinadina doudou kina? Na itukutuku ni veiwase oqo era sa dramataki tiko ena vidio “Peter Preaches and Is Arrested,” “Peter and John Are Judged,” kei na “Peter and John Continue Preaching the Gospel” (LDS.org). Sa rawa mera wasea talega na lewe ni kalasi na gauna era a taqomaka vakadoudou kina se vakadinadinataka kina na kosipeli o ira se dua tale era kila.

ivakatakilakila ni vuli

Vakayaloqaqataka na Vuli e Vale

Kerea na lewe ni kalasi me ra vakasamataka se na vakacava na nodra ivalavala kevaka era a kila ni rawa ni vakavuna na vakayali ni nodra bula na bulataki na kosipeli. Tukuna vei ira ni ra na wilika ena Cakacaka 6–9 e dua sa bolea tu me mate ena vuku ni nona vakabauta.

ivakatakilakila ni ivurevure

iKuri ni iVurevure

Cakacaka 1–5

Na nodra kacivi na lewe ni Tinikarua.

A wasea o Gordon B. Hinckley na veivakararamataki oqo me baleta na ivakarau ni kena kacivi e dua na Apositolo vou: “Na kena ivakarau sa matata vinaka tu ena Lotu ni Turaga. E sega kina na vakasaqarai ni itutu, se cicivi ni ilesilesi, se vunautaki na savasava ni dua na tamata. Sa veibasai kina na sala ni Turaga mai na sala ni vuravura. Sa vakanomodi na sala ni Turaga, sa sala ni vakacegu, e sega kina na veiqoroqoroi se veika vakailavo. E sega kina na dokadoka se ka vakavuravura se gu vakatamata. Ena ituvatuva ni Turaga, o ira sa nodra ilesilesi mera digitaka na vakailesilesi era sa liutaki mai na dua na taro e veiuabaleti: ‘O cei ena vinakata na Turaga?’ E dau yaco na vakanananu vakanomodi kei na kena vakasamataki. Sa yaco kina na masumasu vagumatua me ciqomi kina na veivakadeitaki ni Yalo Tabu ni sa dodonu na digidigi” (“God Is at the Helm,” Ensign, Me 1994, 53).

Vakatorocaketaki Noda Veivakavulici

Vakabauti ira na nomuni iliuliu “O ira na nomu iliuliu vaka matabete kei na veimataisoqosoqo era gadreva tu mera vukei iko mo rawaka. Kerea na nodra veivakasalataki ni ko tovolea mo vakavinakataka na itavi vaka qasenivuli kei na nomu vakasamataki ira o vakavulici ira tiko” (Veivakavulici ena iVakarau ni iVakabula, 5).