O Paula ena Delana o Arisi

22–28 ni Julai

Cakacaka 16–21

“Sa Kacivi Keitou na Turaga me Keitou Vunautaka Vei Ira nai Tukutuku Vinaka”

Ni bera ni ko raica na ituvatuva oqo, wilika ena masumasu na Cakacaka 16–21 ni ko vakasamataki ira tiko na lewe ni nomu kalasi. Na vakasama e tarava ena rawa me tokona na veivakauqeti ni Yalo Tabu kivei iko.

Vola na Veika o Uqeti Kina

ivakatakilakila ni veiwasei

Sureta na Veiwasei

Sa rawa mo sureta na lewe ni kalasi mera wasea e dua na itukutuku mai na Cakacaka 16–21 e vakavotuya vei ira na gauna era a wasea kina na kosipeli.

ivakatakilakila ni veivakavulici

Vakavulica na iVunau

Cakacaka 16–21

Oi keda na lewe ni Lotu, eda sa vakadinadinataki Jisu Karisito ka wasea na Nona kosipeli.

• Me baleta ga ni tukuni tiko ena Cakacaka 16–21 e rua na ilakolako ni kaulotu i Paula, era na rawa ni vuli na lewe ni kalasi mai na wase eso oqo ena sala mera vakadinadinataki Jisu Karisito kina ka wasea vagumatua na Nona kosipeli. Me vakauqeti na veivosakitaki ni ulutaga oqo, sa rawa mera sureti e vica na lewe ni kalasi me ra na mai veivakararamataki ki na kalasi na ka era sa ciqoma mai na Cakacaka 16–21 baleta na wasei ni kosipeli. Me vakatitobutaki na veiwasei oqo, sa rawa mera wasea talega na itukutuku eso mai na koniferedi sa oti me baleta na cakacaka ni kaulotu. Sa rawa mera raica e dua ga na nodra, se vakatututaka e dua na itukutuku ena “iKuri ni iVurevure.”

• Dua vei ira na itukutuku cecere e tiko ena vica na wase oqo sai koya na bibi ni ilesilesi ni Yalo Tabu ni wasea na kosipeli. Me vakataka, mera na raica na lewe ni kalasi na sala a vukei Paula kei Sailasa kina na Yalo Tabu ena Cakacaka 16:6–15. Sa rawa mera wilika talega na 2 Nifai 33:1 kei na Vunau kei na Veiyalayalati 42:14 ka wasea na dina era sa kunea baleta na bibi ni itokani ni Yalo ni wasei na kosipeli (raica talega na itukutuku nei Elder Dallin H. Oaks ena “iKuri ni iVurevure”). Sa rawa mera wasea na lewe ni kalasi na gauna a dusimaka kina na Yalo Tabu na nodra sasaga ni kena wasei na kosipeli. Na gauna cava beka eso eda a wasea kina na kosipeli ki vua e dua sa solia mai na Turaga ena noda salatu? (raica talega na Vunautaka na Noqu Kosipeli 3–4).

• O na vakayagataka vakacava na ka a sotava o Paula mera vakayaloqaqataki kina na nomu kalasi ni ra sa vakauqeti mera wasea na nodra ivakadinadina? Sa rawa me talevi lesu vata e vica na itukutuku vakaivolanikalou era tukuna tiko na soli ivakadinadina i Paula, me vaka ga a yaco vua mai Masitonia (raica na Cakacaka 16:19–34), mai Aceni (raica na Cakacaka 17:16–34), vakakina mai Korinica (raica na Cakacaka 18:1–11). Na ivakadinadina cava eda sa raica kina na yaloqaqa kei na doudou nei Paula? Na ivunau cava a vakavulica o Paula (ka kila vinaka tu) a yalonuidei kina ena nona itukutuku? Na cava na vuna eda rerevaka kina ena so na gauna meda wasea na kosipeli, kei na sala cava meda vorata kina na rere oqo? Sa rawa vei rau na daukaulotu me rau tiko ena nomudou kalasi ka wasea na sala rau a vakayaloqaqataki kina me rau soli ivakadinadina. Vakayaloqaqataki ira na lewe ni kalasi mera vakasamataka e dua na sala era rawa ni muria kina na ivakaraitaki i Paula ka yaloqaqa cake mera wasea nodra ivakadinadina baleti Karisito.

Cakacaka 17:16–34

Eda sa luvena kece na Kalou.

• Ena Delana o Arisi, a vakavulica o Paula baleta na Tamada Vakalomalagi ki na dua na ilawalawa era kila vakatikina tu na ituvaki dina ni Kalou. Me dikevi na ivakavuvuli oqo, sa rawa ki na kalasi mera wilika na Cakacaka 17:24–31 ka vola ena vava na dina era sa kunea baleta na Tamada Vakalomalagi, na noda veiwekani tiko kei Koya, kei na noda veiwekani tiko vakai keda. Na cava era rawa ni wasea na kalasi baleta na gauna era a vakila kina na dina ni itukutuku nei Paula ni Kalou “sa sega ga ni yawa ko koya vei keda yadua”? (tikina e 27).

• Ni vakadikevi vata na veitikina oqo, me na veivosakitaki na dina oqo e vakavulici tiko ena tikina e 29, “Eda luvena kece na Kalou,” sa kena ibalebale ni o Tamada Vakalomalagi sa tama dina ni yaloda. Me caka oqo, sa rawa mo vola ena vava Baleta ga ni da sa luvena kece na Kalou kei na Kevaka eda sega ni kila ni da sa luvena na Kalou. Sureta na lewe ni kalasi mera vakatura eso na sala me vakataucokotaki kina na yatuvosa e rua oqo. Me vakataka, na cava e vakavulica vei keda na dina ni da sa luvena na Kalou me baleta na Kalou? me baleti keda? baleta na sala meda dau veimaliwai kina vakai keda? Ena duatani vakacava na noda bula kevaka eda sega ni kila na dina ni noda sa vuvale vata kei na Kalou? Oqo ena rawa me veivosakitaki kina na sala meda vukei ira na tamata mera kila vinaka ni ra sa luvena na Kalou. Na itukutuku oqo nei Elder Dallin H. Oaks ena “iKuri ni iTukutuku” ena rawa me oka ki na veivosaki oqo.

Cakacaka 19:1–7

E dodonu ni sa oti na papitaiso me na ciqomi na isolisoli ni Yalo Tabu.

• NaCakacaka 19 e tikina vinaka me vakamatatataki kina na bibi ni kena caka na veivakadeitaki ni da sa papitaisotaki oti. Sa rawa me wasei na itukutuku oqo nei Parofita Josefa Simici: “Na papitaiso ena wai sa papitaiso e veimama ga, ka sega na betena ke sega na ikarua ni kena veimama—o ya na papitaiso ena Yalo Tabu.” (Nodra iVakavuvuli na Peresitedi ni Lotu: Josefa Simici, 95). E vakadeitaka vakacava na ivakavuvuli nei Paula ena Cakacaka 19:1–7 na itukutuku nei Josefa Simici? Ena yaga talega vei ira na lewe ni kalasi ni ra vakasaqara ena “Holy Ghost, Baptism of” ena iDusidusi ni Ulutaga mera vulica vakalevu cake kina na veivakalougatataki ni kena ciqomi na isolisoli ni Yalo Tabu.

ivakatakilakila ni vuli

Vakayaloqaqataka na Vuli e Vale

Mera vakayaloqaqataki na kalasi mera wilika na Cakacaka 22–28 ena loma ni macawa mai oqo, tarogi ira kina vakaoqo, “Kevaka e yaco na gauna mo tukuna kina vei iliuliu ni noda vanua me baleta na kosipeli, na cava beka o na kaya?” Tukuna vei ira ni tiko ena Cakacaka 22–28, na veika e kaya o Paula kivei ira eso na iliuliu kaukauwa sara ni nona gauna.

ivakatakilakila ni ivurevure

iKuri ni iVurevure

Cakacaka 16–21

Na itukutuku e baleta na cakacaka ni kaulotu.

• Dallin H. Oaks, “Wasea na Kosipeli Vakalesui Mai,” Ensign se Liaona, Nove. 2016, 57–60.

• David A. Bednar, “Lako Mai ka Raica,” Ensign se Liaona, Nove. 2014, 107–10.

• Neil L. Andersen, “E Dua na iVakadinadina Bula ni Kalou,” Ensign se Liaona, Nove. 2016, 35–38.

• Mervyn B. Arnold, “Ki na Veivueti: E Rawa ni Da Cakava,” Ensign se Liaona, Me 2016, 53–55.

• S. Gifford Nielsen, “Maqusataki na iTuvatuva Qaqa ni Turaga!” Ensign se Liaona, Nove. 2013, 33–35.

Eda luvena kece na Kalou.

“Na Matavuvale: Ai Vakaro ki Vuravura Raraba” e wasei mai kina na dina tawamudu me baleta na noda veiwekani tiko kei na Kalou: “Oi keda yadudua sara na tamata—na tagane kei na yalewa—eda a buli me ucuya na Kalou. Oi keda yadudua eda luvena yalewa se tagane lomani vakayalo na noda itubutubu vakalomalagi, ka tu na keda dui ituvaki kei na icavacava vakalou” (Ensign se Liaona, Nove. 2010, 129).

E kaya o Elder Dallin H. Oaks ena Kuoramu ni iApositolo Le Tinikarua na kena bibi ni noda raici keda taumada ka vakabibi ni da sa luvena vakayalo na Kalou:

“Mo qarauna vakavinaka na ivakarau ni nomu bula. Kakua ni vakarau ni nomu bula se tuvanaki iko ena so na itovo sa takiveiyaga. Na yavubula duadua ga me sa noda ivakarau ni bula ni da sa luvena tagane se luvena yalewa na Kalou. Na dina oqo e cecere cake duadua mai na ituvaki kece tale eso, oka kina noda kawatamata, cakacaka, ituvaki vakayago, itutu dokai, se nomu vakabauta vakalotu mada ga. …

“Eda sa bula galala, ka sa rawa meda digitaka na ituvaki cava ga mena vakaitovotaki keda kina. Ia e dodonu meda kila ni gauna eda sa digitaka kina na noda itovo se meda vakaraitaki keda ena so na ivakarau ni bula e lekaleka wale se tawayaga ki na vakasama tawamudu, eda sa dau luluqa mai na veika bibi duadua sa baleti keda, ka da matata cake sara ena veika sa sega ni bibi. Oqo e rawa ni muataki keda sobu ki na salatu cala ka vakacacana na noda torocake tawamudu” (“Be Wise” [Brigham Young University–Idaho devotional, Nov. 7, 2006], byui.edu).

Vakatorocaketaki Noda Veivakavulici

Sureti ira na itabagone mera mai tiki ni lesoni. Ke o vakavulici ira tiko na itabagone, nanuma tiko ni dau vakavuqa mera rawa ni kila vinaka na veika era curuma tiko na nodra icaba. Ni cavuta na nona ivakadinadina e dua na itabagone se vakavulica na ivunau, era rawa ni uqeti na itabagone ena sala o sega ni vakatotomuria rawa. Solia vei Ira na itabagone na madigi me ra veivakavulici vakataki ira (Raica na Veivakavulici ena iVakarau ni iVakabula 28