“8–14 ni Julai. Cakacaka 6–9: ‘A Cava Ko ni sa Vinakata Meu Cakava?’” Lako Mai, Mo Muri Au—Me Baleta na Matawilivola ni Siga Tabu: Veiyalayalati Vou 2019 (2019)
“8–14 ni Julai. Cakacaka 6–9,” Lako Mai, Mo Muri Au—Me Baleta na Matawilivola ni Siga Tabu: 2019
Meda sa Qai Bula Tiko, mai vei Sam Lawlor
8–14 ni Julai
Cakacaka 6–9
“A Cava Ko ni sa Vinakata Meu Cakava?”
Vulica na Cakacaka 6–9 ka vola na veika veivakauqeti vei iko. Oqo ena vukea mo ciqoma kina na ivakatakila ka vukea na kalasi mera toro voleka vei Jisu Karisito mai na nodra vulica na veiwase oqo.
Vola na Veika o Uqeti Kina
Sureta na Veiwasei
Vola ena vava, na yacadra eso na tamata era tukuni tiko ena Cakacaka 6–9, me vakataki Sitiveni, Saula, Filipi, Ananaiasa, Pita, kei Tapaica se o Tokasa. Sureta e vica na lewe ni kalasi mera wasea e dua na ka era sa vulica mai na dua vei ira na tamata oqo ni ra vuli tiko ena macawa oqo.
Vakavulica na iVunau
Na cakitaki ni Yalo Tabu ena rawa ni vakavuna me sega ni ciqomi na iVakabula kei ira na Nona parofita.
-
Na dina cava era sa vulica na lewe ni kalasi ni ra wilika na itukutuku nei Sitiveni ena macawa oqo? Sa rawa mera vulica na lewe ni kalasi na ivakavuvuli nei Sitiveni ena Cakacaka 7:37–53, mera raica kina na sala era tautauvata kina na iliuliu ni Jiu kei ira na Isireli e liu ni ra a cati ira na parofita. Sa rawa mo raicamatua na itukutuku nei Sitiveni me baleti ira na iliuliu oqo ena Cakacaka 7:51. Ena veivuke vakacava na 2 Nifai 28:3–6; 33:1–2; Mosaia 2:36–37; Alama 10:5–6; kei na Alama 34:37–38 ki na lewe ni kalasi mera kila vinaka na itukutuku oqo? Na cava beka na vuna eda “vorata kina na Yalo Tabu”? Na cava e rawa ni da cakava meda kila ka muria vakalevu cake kina na veivakauqeti ni Yalo Tabu?
Me sa “dodonu na yalo[da] e na mata ni Kalou.”
-
Na vulici ni itukutuku i Saimoni ena vukea na lewe ni kalasi mera dikeva na vuna era bula voli tiko kina ena kosipeli. Me vulici vata vakalasi na itukutuku oqo, sa rawa mo vola ena vava na taro O cei mada o Saimoni? Na cava a vinakata o koya? kei Na sala cava a saga kina me rawata? Lesia na lewe yadua ni kalasi mera wilika na Cakacaka 8:9–24, me raici kina na isaunitaro kece oqo. Na cava eda sa vulica mai na ka a sotava o Saimoni?
-
Mera vukei na lewe ni nomu kalasi mera kila vinaka na ibalebale me “dodonu na [yalodra] e na mata ni Kalou” (Cakacaka 8:21), mo sureti ira mera vulica na Vunau kei na Veiyalayalati 121:41–46, ka vakasaqara na vosa se malanivosa e vakamacalataka me ituvaki vakacava na yaloda ni da sasagataka meda qarava na Kalou ka ciqoma na Nona isolisoli. Sa rawa mera vakatauvatana na lewe ni kalasi na veivakararamataki oqo ki na itukutuku i Saimoni, e tiko ena Cakacaka 8:9–24. Na dina cava a se bera tu ni kila vinaka o Saimoni? Meda na cakava vakacava me “dodonu na yalo[da] e na mata ni Kalou”?
-
Era a vakatauvatani Sitiveni kei Filipi kivei Saimoni beka na lewe ni kalasi ena nodra vuli vakai ira yadua, e vakaturi tiko ena ituvatuva ni macawa oqo ena Lako Mai mo Muri Au—Me Baleta na Tamata Yadua kei na Matavuvale? Ke vakakina, na cava era sa vulica? Sa rawa mo sureti ira mera vakasaqara na ivakadinadina ena wase oqo me baleta na kena sa tu dodonu na yalodra na tamata tale eso—me vakataki Filipi kei na tagane mai Iciopea (Cakacaka 8:26–40) kei Saula (Cakacaka 9:1–22).
Na Yalo Tabu ena vukei keda meda dusimaki ira vei Jisu Karisito.
-
Mera vukei na lewe ni kalasi mera kila vinaka na sala mera dusimaki ira eso kivei Jisu Karisito (raica na Cakacaka 8:31), sa rawa mo sureta e rua na lewe ni kalasi me rau dabe veidonui ka wilika na veivosaki nei Filipi kei koya na tagane mai Iciopea ena Cakacaka 8:26–39. Na ikatolu ni lewe ni kalasi mena wilika na tikina e sega ni wili ena veivosaki. Na cava eda sa vulica mai na ivakaraitaki nei Filipi baleta na vakavulici ni kosipeli vei ira na tamata?
-
Me dikevi na ivakaraitaki ni gauna oqo ni itukutuku ena Cakacaka 8:26–39, sa rawa vei ira na lewe ni kalasi mera wasea na gauna era a wasea kina na kosipeli se nodra a lewena kina na Lotu. A vukei ira vakacava na Yalo Tabu? A veidusimaki vakacava e dua vei ira? Sureta na lewe ni kalasi mera tugana o cei mera na dusimaka ki na kosipeli.
Ni da sa soli keda ki na lewa ni Turaga, eda sa rawa ni iyaya ni cakacaka ni Ligana.
-
Sa rawa ki na lewe ni kalasi mera vulica na dina kaukauwa me baleta na nodra a saumaki mai ni ra vulica na ka a sotava o Saula, oka kina na dina ni sa rawa ki na tamata yadua mera veivutuni ka veisau kevaka sa lomadra. Sa rawa mo kerea na lewe ni kalasi mera vakatauvatana na ka a sotava o Saula ki na veika a sotava o Alama (raica na Mosaia 17:1–4; 18; 26:15–21) kei Leimani kei Lemueli (raica na 1 Nifai 3:28–31). Na ivakarau cava nei Saula kei Alama a vukea me rau veivutuni ka veisau? Na ivakarau cava nei Leimani kei Lemueli a tarova me rau veisau? Na veivakauqeti cava a yaco vei Saula kei Alama ni oti na nodrau veisau? Na itukutuku cava eda sa raica me noda mai na itukutuku oqo?
-
Me vukei ira na lewe ni kalasi mera taurivaka na ka a sotava o Saula, sa rawa mo sureta e vica mera na mai wasea na veika era sa vulica mai na wase yadua ena vosa nei Peresitedi Dieter F. Uchtdorf “Wawa Toka ena Gaunisala i Tamasiko” (Ensign se Liaona, Me 2011, 70–77). Eda sa dau wawa vakacava ena so na gauna ena noda dui gaunisala ki Tamasiko? Me vaka a kaya o Peresitedi Uchtdorf, na cava ena vukei keda meda rogoca vakavinaka cake kina na domo ni Kalou? Sa rawa talega me saravi na vidio “The Road to Damascus” (LDS.org). Mera vakauqeti na lewe ni kalasi mera muria na ivakaraitaki i Saula ka kerea vua na Turaga, “A cava ko ni sa vinakata meu cakava?” sa rawa me veivosakitaki na veika a sotava o Peresitedi Thomas S. Monson e tiko ena “iKuri ni iVurevure.” Sa rawa talega ki na kalasi mera wasea na gauna era a vakasaqara ka muria kina na lewa ni Kalou.
Vakayaloqaqataka na Vuli e Vale
Mera vakayaloqaqataki na lewe ni kalasi mera wilika na Cakacaka 10–15 ena loma ni macawa mai oqo, sa rawa mo wasea eso na gauna cecere mai na wase oqo—na botei ni valeniveivesu, era kilalecataki na daukaulotu ni ra sa kalou ni Roma, ka virilaki ena vatu e dua na Apositolo ka biu tu me mate—ka bula tale.
iKuri ni iVurevure
“A Cava Ko ni sa Vinakata Meu Cakava?”
Dua na gauna a tiko o Peresitedi Thomas S. Monson ena dua na koniferedi ni iteki, a qai kerei koya o peresitedi ni iteki ke rawa me na sikova mada e dua na goneyalewa lailai yabaki 10 na yacana o Christal Methvin, sa vakarau mate ena kenisa. Na matavuvale nei goneyalewa oqo e 80 na maile mai na itikotiko ni koniferedi. A wasea kina oqo o Peresitedi Monson:
“Au a vakadikeva na veigauna ni soqoni. … Sa sega sara ga na gauna. Au sa qai vakasamataka e dua na ituvatuva. Ena rawa beka me keimami nanumi gonelailai oqo ena neimami masu vakaivavakoso ena koniferedi? …
“… [Ena loma ni dua na soqoni] au a vakaraica tiko na ka au a vola, ka vakarau yani meu tucake ena itutu ni vunau, niu sa rogoca e dua na domo sa vosa mai ki na yaloqu. A lekaleka na itukutuku ka matata na kena vosa: ‘Dou laivi ira na gonelalai mera lako mai vei au, ka mo dou kakua ni tarovi ira, ni sa vakataki ira na lewe ni matanitu ni Kalou.” (Marika 10:14.) Sa buwawa mai na veika au a vola. Sa lako na noqu vakanananu ki na goneyalewa lailai e gadreva tiko me masulaki. Sa tau na lewa. A veisautaki na gauna ni soqoni. …
“… [Ena vale nei Methvin,] au sa raica sobu tu e dua na gonelailai sa dredre sara vua me tucake mai—ka sa malumalumu sara me vosa. Sa buwawa sara mai na matana ena vuku ni mate o ya. Sa kaukauwa kau vakila na yalotabu kau sa tekiduru, taura na ligana malumalumu, ka kaya yani, ‘Christal, o au qo.’ A dolava na gusuna ka vakasolokakana mai, ‘Brother Monson, au kila ni ko na lako mai’” (“The Faith of a Child,” Ensign, Nov. 1975, 20–22).
Ena vica na yabaki a tarava, a wasea kina o Peresitedi Dieter F. Uchtdorf na italanoa oqo ka a sureti keda kina meda “sasagataka meda duavata kei ira sa vakararavi tiko kina na Turaga meda rogoca rawa na nona vosa malua mai ka sauma yani, me vakataka a cakava o Saula ena nona gaunisala ki Tamasiko, ‘Kemuni na Turaga, a cava ko ni sa vinakata meu cakava?” (“Wawa Toka ena Gaunisala i Tamasiko,” Ensign se Liaona, Me 2011, 75).
Vakatorocaketaki Noda Veivakavulici
Dusimaki ira o vakavulica tiko. Vaka-qasenivuli, sa rawa mo dusimaki ira o vakavulica tiko mai na ivolanikalou, me vaka ga nona dusimaka e dua na tagane ni Iciopea o Filipi ena nona vakavulici koya ena Aisea (raica na Cakacaka 8:26–37). Mo cakava oqo, sa gadrevi mo “dou segata na kila ka, io ena vuli kei na vakabauta” (V&V 109:7). Na kilaka o sa rawata ena rawa me dua na kaukauwa dina mera vukei kina na lewe ni kalasi mera gadreva ni kunea vakataki ira na dina ka bulataka.