15–21 ni Julai

Cakacaka 10–15

“Sa Tubu Ga na Vosa ni Kalou me Levu Sara Mai”

Na kena vulici ena masumasu na Cakacaka 10–15 ni bera ni wiliki na ituvatuva oqo ena vukei iko mo ciqoma na veivakauqeti ni Turaga. Na vakasama e tarava sa vakatutu walega.

Vola na Veika o Uqeti Kina

Sureta na Veiwasei

Sureta na lewe ni kalasi mera wasea vua e dua e dabe tikivi koya tiko, na cakacaka ni kaulotu mai na Cakacaka 10–15 e veivakauqeti vei ira. Sureta e vica mera wasea na nodra veivakararamataki ki na kalasi.

Vakavulica na iVunau

Cakacaka 10; 11:1–18; 15:1–25

E vakavulici keda na Tamada Vakalomalagi ena vosa ena vosa mai na ivakatakila.

• Eso na lewe ni kalasi era rawa ni nanuma cala tiko baleta na ivakarau ni kena ciqomi na ivakatakila. Ena veivukei vei ira mera veivosakitaka na sala a yaco kina vei Pita na ivakatakila kei na nodra rawa ni toso ki liu, ka “kakua ni veileti na lomamu” (Cakacaka 10:20), ni vaka me sega ni taucoko se sega ni matata na ivakatakila. Sa rawa mo vola e dua na laini ena vava ka vola ena tutuna e muri Sa dodonu me vunautaki na kosipeli vei ira na kai Matanitu Tani. Taleva lesu vakalasi, na Cakacaka 10 kei na 11:1–18, ka qai toqa na poidi ena laini ni sa vakaraitaka tiko ni sa vakatakila na Turaga vei Pita ena veikalawa yadua ni sa kena gauna me sa vunautaki yani na kosipeli vei ira na kai Matanitu Tani. Me vakataka, ni sa rawa mo tekivutaka na poidi ena kena volai kina “Sa raica na raivotu o Konilio” (Cakacaka 10:1–6) se tekivu ena ivakaro ni iVakabula vei iratou na Nona tisaipeli mera “vakalotutaki ira na lewe ni veivanua kece ga” ena Maciu 28:19. Na cava e rawa ni da vulica baleta na ivakatakila mai na ka a sotava o Pita? Na cava e vakuri ki na veivosaki mai na ivakavuvuli nei Nifai baleta na ivakatakila ena 2 Nifai 28:30 kei na ivakavuvuli nei Elder David A. Bednar kei Elder Dallin H. Oaks ena “iKuri ni iVurevure.” ikuri ni veitalanoa taki?

• O na vukea vakacava na lewe ni kalasi mera vakasamataka vakatitobu cake na sala era ciqoma kina na ivakatakila? Sa rawa mo vulica na gauna eso ena ivolanikalou a vakavulici ira kina na tamata na Turaga ena vosa ena vosa. Me ikuri ni ka a sotava o Pita ena Cakacaka 10, mera na taleva lesu na kalasi na veika a sotava o Nifai (1 Nifai 18:1–3); Alama (Alama 7:8; 16:20); kei Momani (3 Nifai 28:17, 36–40). Na ivakaraitaki cava tale era vakasamataka rawa na lewe ni kalasi era ciqoma kina na tamata na veidusimaki vakayalo “vakalailai eke ka vakalailai e kea”? (2 Nifai 28:30). Na cava na vuna e dau vakatakila mai kina na Turaga na veika eso ena sala oqo ka sega ni solia kece ga mai na isaunitaro ena dua vata ga na gauna? (raica na V&V 50:40; 98:12). Na vosa vakaibalebale vakaoqo ena rawa me veivuke: Raitayaloyalotaka edua sa vakatura mo taura e dua na kalasi ni fika ni o bera mada ga ni vulica na alijebira se jiometeri. Mo na cakava vakacava? E tautauvata vakacava oqo ki na nona vakatakila mai na Turaga na dina?

• Eso na gauna era dau taroga se kauwai na lewenilotu baleta na veisau ni lawatu kei na parokaramu ni Lotu. Ena vukei ira mera na veivosakitaka na ivakatakila me sa tekivu vunautaki na kosipeli vei ira na kai Matanitu Tani (raica na Cakacaka 10) sa mai sosomitaka na ivakaro ni Turaga taumada vei ira na Nona tisaipeli (raica na Maciu 10:1, 5–6). Na cava era na cakava na lewe ni kalasi ki vua e dua ena gauna nei Pita a sega ni kauwai ki na veidusimaki nei Pita baleta ni saqata na lawa ena gauna e liu? E na vukei keda vakacava na ivakatakila ena Cakacaka 10 meda muria na tomani tiko mai ni ivakatakila ni Turaga maivei ira na Nona parofita?

• Ena ka talei me talevi lesu na nodra veivakasalataki vakai ira na Apositolo, e tukuni tiko ena Cakacaka 15:1–22, kei na ivola era a vola vei ira na Yalododonu (raica na tikina e 23–29). Sa rawa mo vakaraitaka na vidio “The Jerusalem Conference” (LDS.org). Na cava era a taroga na tisaipeli? Era a vakasaqara vakacava na kena isau? Na itukutuku nei Peresitedi Gordon B. Hinckley ena “iKuri ni iVurevure” ena rawa me veivakararamataki baleta na sala e liutaka tiko kina na Turaga na Nona Lotu ena ivakatakila kivei ira na apositolo kei na parofita.

Cakacaka 10:9–48

“Na Kalou sa sega ni digitaka vakailoa na tamata.”

• Ena yaga cake beka vei ira na nomu lewe ni kalasi mera veivosakitaka na ibalebale ni “sega ni digitaka vakailoa na tamata”? Sa rawa mo tekivu ena nomu sureta na kalasi mera wilika na ivolanikalou e vakavulica ni Kalou e sega ni digitaka vakailoa na tamata, me vakataka na Roma 2:1–11; 1 Nifai 17:34–40; 2 Nifai 26:32–33; Alama 5:33; Moronai 8:12; kei na Vunau kei na Veiyalayalati 1:34–35. Kerei ira na lewe ni kalasi mera vola na ibalebale ni “sega ni digitaka vakailoa na tamata,” yavutaki ena ka era sa wilika, ka qai wasea na ka era sa vola. Sa rawa mo vukei ira na lewe ni kalasi mera kila vinaka ni “sega ni digitaka vakailoa na tamata” e sega ni kena ibalebale ni sa dau vakalougatataki keda vakatautauvata na Kalou se cava ga na noda ivalavala. Sa gadrevi ira taucoko na Luvena mera ciqoma na Nona kosipeli, ia na taucoko ni veivakalougatataki ni kosipeli sa nodra o ira era cakava ka maroroya na veiyalayalati kei Koya. E vakaraitaka vakacava na veika a yaco kei na ivakavuvuli ena Cakacaka 10:34–48 ni Kalou sa sega ni digitaki ira vakailoa na tamata? Ena rawa vakacava vei ira sa yalododonu mera “ciqomi” ka “vakadonui” mai vua na Kalou dina ga ni sa sega ni digitaki ira vakailoa na tamata o Koya? (raica na Cakacaka 10:34–35; 1 Nifai 17:35).

Cakacaka 12:1–17

Na nodra masu na ivalavala dodonu ena rawa me kauta mai na cakamana cecere.

• Ena rawa me vukei ira na lewe ni kalasi na italanoa ni nona sereki o Pita mai valeniveivesu ena Cakacaka 12:1–17 mera tara cake kina na nodra vakabauta ena kaukauwa ni masu. Sa rawa vua e dua na lewe ni kalasi me na mai wasea na matata ni italanoa oqo kei na nona ivakadinadina baleta na masu. Se sa rawa mo sureta e dua se rua na lewe ni tabanalevu mera mai wasea na gauna era a vakila se vakadinadinataka kina na kaukauwa ni nodra masumasu lomavata na lewenilotu. Sa rawa talega mo ni lagata na serenilotu baleta na masu (me vakataka na “Did You Think to Pray?” Serenilotu, naba 140) ka veivosakitaka na ka e vakavulica na serenilotu me baleta na kaukauwa ni masu.

Vakayaloqaqataka na Vuli e Vale

Sureta na lewe ni kalasi mera tugana na vuna eda guce kina meda wasea na kosipeli vei ira na tamata. Vakatura ni kena vulici na Cakacaka 16–21 ena rawa me vukei ira mera vorata rawa na veivakataotaki e rawa ni dau tarova nodra wasea na kosipeli.

iKuri ni iVurevure

Cakacaka 10–15

Ciqomi ni ivakatakila ena vosa ena vosa.

A kaya vakaoqo o Elder David A. Bednar me baleta na ivakarau ni soli ivakatakila na Turaga: “E vuqa vei keda era nanuma ni da na ciqoma e dua na isau se dua na veivakauqeti ki na noda masu kei na vakatakekere yalodina. Ka sa matau meda namaka tiko na isau se veivakauqeti me na yaco ga oqo ka duavata ga na gauna. Koya gona, eda sa vakabauta tiko ni na solia vei keda vakatotolo na Turaga na kena isau levu ena dua vata ga na gauna. Ia, na kena ivakarau sa tukuni wasoma tiko ena ivolanikalou e vakatura tiko ni da na ciqoma ena ‘vosa ena vosa, vunau ena vunau,’ se sa kena ibalebale, ena vuqa na kena isau lalai ni toso tiko na gauna. Na kena vakadeitaki ka kilai vinaka na ivakarau oqo sa idola bibi ni kena ciqomi na veivakauqeti vakayalo kei na veivuke mai vua na Yalo Tabu” (“Line upon Line, Precept upon Precept,” New Era, Sept. 2010, 3–4).

Ena dau yaco mai na ivakatakila ki na tamata yadua ena kena gauna ena sasaga gugumatua.

A vakasalataka vakaoqo o Elder Dallin H. Oaks: “E dodonu meda dikeva taumada ena noda vakasama, ni da vakayagataka na inaki kaukauwa nei Dauveibuli ni sa vakatikora e loma vei keda. Meda sa qai masuta na veidusimaki ka cakacakataka kevaka eda sa ciqoma. Kevaka eda sa sega ni ciqoma na veidusimaki, e dodonu meda na vakatulewa vakadodonu sara” (“Our Strengths Can Become Our Downfall,” Ensign, Oct. 1994, 13–14).

E wasea vakaoqo na nona rai o Peresitedi Gordon B. Hinckley ni a veiqaravi tiko ena matabose vakatulewa ni Lotu:

“Na kena ivakarau ni vakasamataki na veika eso, ena duidui beka na vakasama. Oqo me na dau namaki. E duidui na ituvaki ni bula era dui cavutu mai kina o ira na turaga oqo. O ira na turaga oqo era dau vakatulewa matau vakataki ira. …

“… Mai na ituvatuva oqo ni nodra vakaraitaka na vakatulewa matau ka dei o ira na turaga sa dau tauvuloni ka uvuraki kina na veivakasama kei na ivakavuvuli eso. Ia au se bera vakadua ni bau raica me dua na duidui levu se veimecaki vei iratou na nodatou Turaga. Ia au sa raica ga e dua na ka totoka ka vakasakiti—nodra vakasotari vata mai, ena kaukauwa ni veidusimaki ni Yalo Tabu kei na mana ni ivakatakila, na duidui ni rai me yacova ni ra sa duavata kece ka vakadonuya vata. Sa na qai rawa me tauyavutaki. Au sa vakadinadinataka oqori, ni sa matataka na yalo ni ivakatakila sa vakaraitaki mai ka vakaraitaki tale ena kena dusimaki na cakacaka ni Turaga” (“God Is at the Helm,” Ensign, May 1994, 54, 59).

Vakatorocaketaki Noda Veivakavulici

Tekivu ena ivolanikalou. Ni bera ni ko gole ki na ivurevure veitokoni, vulica vagumatua na ivolanikalou makawa kei na kena ena gauna oqo. Na vulici ena masumasu na vosa ni Kalou ena vakatara na Yalo me vukei iko mo tugana na veika o sa vulica ni ko veivakavulici (raica na Veivakavulici ena iVakarau ni iVakabula, 12).