O Paula ena valeniveivesu

29 ni Julai–4 ni Okosita

Cakacaka 22–28

“Mei Talatala ka Dautukutuku Talega”

Wilika na Cakacaka 22–28 ena yalo masumasu me na vakauqeti iko na Yalo Tabu mo kila na ka mo raicamatua me na vukea nomu lewe ni kalasi. Vola na vakasama e yaco mai; ka sa rairai tekivu ni nomu ituvatuva ni veivakavulici.

Vola na Veika o Uqeti Kina

ivakatakilakila ni veiwasei

Sureta na Veiwasei

Kerea na lewe ni kalasi mera vola e dua na tiki ni ivolanikalou mai na Cakacaka 22–28 a vakauqeti ira ena macawa oqo. Kumuna na nodra saunitaro ka wilika e vica na tikina vei ira. Sureta e vica na lewe ni kalasi mera wasea na vuna e vakaibalebale kina vei ira na veitikina oqo.

ivakatakilakila ni veivakavulici

Vakavulica na iVunau

Cakacaka 22:1–21; 26:1–29

Na ivakadinadina sai koya na kena vakatakilai raraba na dina e yavutaki ena kila ni tamata yadua se vakabauta.

• Sa rawa ki na ivakadinadina nei Paula vei rau o Fesito kei Tui Akaripa me madigi ni kena veivosakitaki kina na ibalebale ni soli ivakadinadina. Sa rawa mo tekivu ena nomu kerei ira na lewe ni kalasi mera taleva lesu na Cakacaka 22:1–21 kei na 26:1–29. Na cava eda sa vulica mai na ivakaraitaki i Paula me baleta na soli ivakadinadina? Na ikuri ni ivakavuvuli cava baleta na soli ivakadinadina eda vulica mai na itukutuku nei Elder M. Russell Ballard ena “iKuri ni iVurevure”? Lagati se vakatagitaki na serenilotu “Testimony” (Serenilotu, naba 137) me sureta mai na Yalo Tabu ki na nomuni veivosaki.

• Era sa rairai ciqoma beka na lewe ni kalasi eso na veivakararamataki ni ra vulica na ivakadinadina i Paula kivei Fesito kei Tui Akaripa. Sureta ira mera na wasea. Na ivakaro cava me noda oi keda nikua baleta na nanuma nei Tui Akaripa ki na ivakadinadina nei Paula? (raica na Cakacaka 26:28). Sa rawa mera vakasamataka talega na lewe ni kalasi na ivakadinadina tale eso mai na ivolanikalou a vakauqeti ira. (Eso talega na ivakaraitaki na Jope 19:25–27; 2 Nifai 33:10–15; Alama 5:45–48; kei na V&V 76:22–24.) Se sa rawa mera wasea na gauna era a vakauqeti kina ena nona ivakadinadina e dua tale.

• A vakatauvatana o Parofita Josefa Simici na gauna a vakadinadinataka kina na iMatai ni Raivotu ki na ka a sotava o Paula vei Tui Akaripa (raica na Josefa Simici—Ai Tukutuku 1:24–25). E rawa mera cakacaka vakayarurua na lewe ni kalasi ka mera vola na cava na veika e rau tautauvata kina o rau italai ni Kalou oqo. Ena vukei keda vakacava na itaviqaravi oqo meda kila vinaka e rawa vakacava me da wasea noda ivakadinadina ka dau dredre beka eso na gauna?

• E dina ga ni a sega ni vakasaqara tiko o Paula na ivakadinadina vakayalo a yaco vua ena gaunisala ki Tamasiko, a vakadeitaka tikoga ena nona bula taucoko me taqomaka na nona ivakadinadina (raica na Cakacaka 22:10, 14–16; 26:19). Na ivakaraitaki nei Paula ena vukea na nomu kalasi mera kila vinaka ni gadrevi ena ivakadinadina na cakacaka kei na solibula. Me tekivutaki na veivosaki oqo, sa rawa me vakamacalataka e dua na lewe ni kalasi na nona sasagataka me dua na kena daunivakatagi, daunidroini, se ko kena dauniqito. E rawa vakacava me tarai cake na taledi ni kila cecere oqo ka vakatautauvatataki ena vuku ni rawati na ivakadinadina ka vaqaqacotaki? Na sasaga cava meda na cakava meda rawata ka vaqaqacotaka kina e dua na ivakadinadina? (raica talega na Alama 5:46).

Cakacaka 26:9–23

Sa noda itavi cecere me da qaravi ira na tamata yadua.

• A kacivi Paula na Turaga me dua na “italatala” (Cakacaka 26:16), ia na cava na ibalebale ni vosa oqo? Me vukei na lewe ni kalasi mera dikeva na sala mera veiqaravi vei ira eso, e rawa ni ko vola ena vava na taro vakaoqo Na cava na ibalebale ni veiqaravi? Sureta na lewe ni kalasi mera vakasaqara na isaunitaro ena ivurevure oqo: Maciu 20:25–28; Cakacaka 26:16–18; 3 Nifai 18:29–32; iDusidusi ki na iVolanikalou, “Minister,” scriptures.lds.org. Ni ra wasea na veika era sa kunea, vakayaloqaqataki ira mera veivosakitaka na sala eda rawa ni qaravi ira kina na tamata, oka kina na veikacivi ena Lotu.

• A vakamacalataka o Brother David L. Beck na nodra itavi na matabete mera veiqaravi vei ira na tamata, ka vuqa nona veivakararamataki sa rawa me taurivaki kivei ira taucoko era veiqaravi tiko ena Lotu (raica na “Na Nomu iTavi Tabu ni Veiqaravi,” Ensign se Liaona, Me 2013, 55–57). Dua na vakaraitaki, na cava e vakavulica vei keda na italanoa nei Chy Johnson me baleta na veiqaravi vei ira eso? Na vidio “The Miracle of the Roof” (LDS.org) sa ivakaraitaki vinaka talega ni veiqaravi. Na ivakaraitaki cava tale era rawa ni wasea na lewe ni kalasi? Solia na gauna ki na lewe ni kalasi mera vakasamataka e dua e rawa ni ra veiqaravi kina ena macawa oqo kei na sala cava mera vakayacora kina.

Cakacaka 27

Kevaka eda vakamuri ira na parofita ni Turaga, ena dusimaki keda o Koya ka taqomaki keda mai na veika butobuto.

• Era a sotava beka na lewe ni kalasi na gauna era a muria kina na nodra ivakasala na parofita e dina ga a duidui mai na nodra ivakasala na kenadau e vuravura se na nodra dui nanuma na tamata era volivoliti ira tu. Sureta e vica na lewe ni kalasi me ra vakavakarau tiko mai ki na kalasi mera mai wasea na gauna vakaoqo. Mo sureti ira na lewe ni kalasi mera wasea na cava era tukuna na tamata era tiko ena waqa ni sa parofisaitaka o Paula na waqa e na rawa ni “ca se mavoa sara vakalevu” (Cakacaka 27:10). Era sa tautauvata vakacava na nodra rai eso ki na ivakasala vakaparofita ena noda gauna oqo?

• Na cava eda vulica mai na Cakacaka 27 me baleta na nodra vakamuri na parofita ni Turaga? Era tiko ena vosa nei Elder Ronald A. Rasband ena “iKuri ni iVurevure” eso na taro me tugani kei na so na veika rerevaki era sa vakasalataki keda tiko kina na parofita nikua meda qarauna. Eda sa kalouagata beka vakacava ena na noda muria nodra ivakasala o ira na parofita bula?

ivakatakilakila ni vuli

Vakayaloqaqataka na Vuli e Vale

Me vukea nodra vakauqeti na kalasi mera tekivu wilika na ivola nei Paula, kerea mera raitayaloyalotaka ni dua na lewe ni Kuoramu Le Tinikarua a volavola mai ki na nodra tabanalevu. Ena vakacava beka na noda nanuma baleta na ivola o ya? Na cava beka ena rawa ni kaya vei keda? Sureta na lewe ni kalasi mera nanuma na veika oqo ni ra wilika na ivola i Paula vei ira na Yalododonu e Roma.

ivakatakilakila ni ivurevure

iKuri ni iVurevure

Cakacaka 22–28

Cavuti ni ivakadinadina

A vosa o Elder M. Russell Ballard baleta na ivakadinadina i Paula kivei Tui Akaripa ka vakavulica na kena ibalebale vei keda meda cavuta na noda ivakadinadina:

“Na noda soqoni ni soli ivakadinadina e dodonu me kena usutu na iVakabula, na ivunau ni kosipeli, na veivakalougatataki ni Vakalesuimai, kei na veivakavulici ni ivolanikalou. E dodonu meda sosomitaka na noda italanoa, veilakoyaki, kei na veivakavulici ena noda ivakadinadina savasava. O ira sa nuitaki mera vosa ka veivakavulici ena noda soqoni e dodonu mera cakava ena kaukauwa vakaivunau ena rogoci ka vakilai, ka vakatatataki cake na yalo ka laveti cake o ira na noda. …

“… Dina ga ni dau ka vinaka na vakaraitaka na loloma kei na vakavinavinaka, ia e sega ni kovuta na mataqali ivakadinadina ena vakacaudreva na bukawaqa ni kena vakabauti ena nodra bula eso. Na kena cavuti na ivakadinadina sai koya ‘na cavuti na ivakadinadina ena kaukauwa ni Yalo Tabu; me vakaraitaki raraba ena vakarokoroko ni dina e yavutaki ena kila ni tamata yadua se vakabauta’ [iDusidusi ki na iVolanikalou, “Testify,” scriptures.lds.org]. Na kena vakaraitaki raraba na dina ena vakayaco veisau ki na nodra bula na tamata. O ya na ka ena veisautaka na yalo ni tamata. Oqo na ka ena vakadeitaka na Yalo Tabu ki na yalodra na Luve ni Kalou” (“Pure Testimony,” Ensign se Liaona, Nove. 2004, 41).

Tucake vata kei ira na iliuliu ni Lotu.

E vakavulica o Elder Ronald A. Rasband:

“Eda sa tokoni ira [na noda iliuliu], era sa kacivi ena veivakauqeti vakalou mera veivakavulici ka veidusimaki ka … ra kaci tiko meda qarauna na veika rerevaki ena veisiga yadua—mai na rokovi vakamamada na Siga ni Vakacecegu, ki na vakarerei na matavuvale, ki na valuti na galala vakalotu, vakakina na veiletitaki ni ivakatakila ni siga nikua. Taciqu kei na ganequ, eda sa rogoca tiko beka nodra ivakasala? …

“Ni da toso ki liu, ka da digitaka meda muria na veidusimaki kei na ivakaro ni noda iliuliu, eda sa digitaka meda muria na Turaga ni gauna e muri tani tiko kina o vuravura. Eda sa digitaka meda kukube matua ki na ititoko kaukamea, meda sa Yalododonu Edaidai, meda sa italai ni Turaga, ka ‘vuabale na noda marau’ [1 Nifai 8:12].

“Sa matata tiko na taro dau tarogi wasoma oqo: o sa tu vata tiko beka kei ira na iliuliu ni Lotu ena vuravura butobuto oqo me rawa ni ko vakatetea na Rarama i Karisito? (“Tu Vata kei Ira na Iliulu ni Lotu,” Ensign se Liaona, Me 2016, 47–48).

Vakatorocaketaki Noda Veivakavulici

Vakavakarau taumada “Ni ko vakasamataka vakatitobu na ivakavuvuli ni kosipeli o veivakatavulici tiko kina ena vakalougatataka na lewe ni kalasi, ena yaco mai na vakasama kei na veivakauqeti ki na nomu bula ena veisiga—ni ko gole ki cakacaka, cakava na cakacaka e vale, se veimaliwai kei ira na matavuvale kei na itokani. Kakua ni nanuma ni vakavakarau vakayalo me dua na ka o solia kina na nomu gauna ia oqo e dua na ka esa tiki ni nomu bula mo dau cakava tikoga” (Veivakavulici ena iVakarau ni iVakabula, 12).