5–11 ni Okosita

Roma 1–6

“Na Kaukauwa ni Kalou Me Veivakabulai”

Wilika ena masumasu na Roma 1–6 ka vakananumi ira tiko na nomu lewe ni kalasi. Oqo ena vukei iko mo yadrava tiko na veivakauqeti ni Yalo ni ko vakarau veivakavulici.

Vola na Veika o Uqeti Kina

Sureta na Veiwasei

Solia ki na kalasi e vica na miniti mera vakasaqara ena Roma 1–6 e dua na tikina era taleitaka. Mera qai wasea vua e dua e voleka na tikina era sa digitaka.

Vakavulica na iVunau

Roma 1:16–17

“Niu sa sega ni maduataka na itukutuku vinaka kei Karisito.”

• Era sa bau vakasewasewani mada na lewe ni nomu kalasi ena vuku ni nodra vakabauta? Sureti ira mera wilika na Roma 1:16–17 ka vakananuma na gauna eso ena ivola ni Cakacaka a vakaraitaka kina o Paula ni sa sega ni madualaka na kosipeli. Na cava eso na ka e vakavuna meda madualaka kina ni da lewe ni Lotu i Jisu Karisito ni Yalododonu Edaidai?. Sureta na lewe ni kalasi mera wasea na gauna era sega kina ni madualaka o ira se so tale na kosipeli i Jisu Karisito.

Roma 1:16–17; 2:28–29; 6:1–11

Na bula vakatisaipeli dina sa kunei ga e lomada dina, sega walega ena noda cakacaka.

• Eda na dikeva vakacava na noda dui bula vakatisaipeli? Ena rawa me vukei keda na ivakasala nei Paula vei ira na kai Roma meda raicamatua meda kakua ni cakava vakaivola na noda sasaga ia me sa “ka ni yalo” (Roma 2:29). Me vukea nomu kalasi mera kila vinaka na ivakasala nei Paula, mo vola ena vava na itukutuku mai na Roma 2:28–29 . Sosomitaka na vosa Jiu ena Yalododonu Edaidai kei na vosa cili ena veiyalayalati. E kuria vakacava na veisau oqo ki na noda kila vinaka na ivakavuvuli nei Paula? Sa rawa me veivosakitaki talega na veika eda cakava tiko na lewe ni Lotu era sa vakaibalebale ka kaukauwa cake ni da vakayacora me “ka ni yalo” (Roma 2:29). Me vakataka, raica na vosa nei Elder Jeffrey R. Holland me baleta na veituberi ena vuvale, “Mata ki na Lotu” (Ensign se Liaona, Nove. 2016, 61–67), se vosa nei Elder Neil L. Andersen me baleta na kaulotu, “Dua na iVakadinadina Bula ni Kalou” (Ensign se Liaona, Nove. 2016, 35–38).

Roma 3–6

“Ia ni sa uasivi mai na ivalavala ca, sa qai uasivi cake vakalevu sara na loloma.”

• Era na tiko beka eso ena nomu kalasi era gadreva na veivuke mera kila vinaka na ivakavuvuli nei Paula ena veiwase oqo me baleta na vakabauta, cakacaka, kei na loloma (raica talega na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale kei na iVakadewa i Josefa Simici ni wase oqo ena kena ivakamacala e botona kei na ituvatuva ena iVola Tabu). O na vukei ira vakacava mera veivakavulici vakai ira? Sa rawa mo vakaraitaka e rua na ivakaraitaki oqo mera vukei na kalasi mera kila vinaka ni sega ni dodonu meda raica na noda cakacaka vinaka me vakatorocaketaki kina noda bula kilikili, se meda raica na loloma veivueti i Karisito me ulubale ni noda caka cala se ivalavala ca. Sureta na lewe ni kalasi mera vakasaqara na dina ena Roma 3:20–31; 5:1–2; 6:1–2, 21–23 a rawa me vukei Gloria kei Justin. Na dina vakaivunau cava tale ena “iKuri ni iVurevure” ena vukei ira mera kila vinaka na bibi ni cakacaka dodonu kei na nuitaki ni loloma veivueti i Karisito? Sa rawa mo kerei ira na lewe ni kalasi mera wasea na veika era sa kunea se dramataki e dua na veitalanoa.

iVakaraitaki 1

E dua na nomu itokani o Gloria ka sa kurabui voli ena nona sasaga me dua na tisaipeli yalodina. A cakacaka vakaukauwa me cakava na veika kece a nanuma me vakayacora, ia e dau lomaleqataka ni takiveiyaga na nona sasaga. “Au sa vinaka cake beka?” a vakasamataka. “Ena ciqomi au beka na Turaga?”

iVakaraitaki 2

E dua na nomu itokani o Justin e sega ni daulomaleqataka vakalevu me digidigi dodonu. E vakabauti Jisu Karisito, ka dau tiko ena soqoni ni Lotu, ka dua na tama dauloloma ka veiwekani vinaka. Ia, a sega ni digitaka me bulataka na ivakatagedegede me rawata kina e dua na ivolatara ni valetabu. Ni ra sa saga na matavuvale kei na itokani mera vakayaloqaqataki koya me vakavakarau yani ki valetabu, a sauma mai, “Au tamata vinaka. Au vakabauta na Karisito. Sa sauma oti o Koya na isau ni noqu ivalavala ca, kau sega ni vakabauta ni na kauti au tani mai na matanitu silesitieli ena vuku ga ni so na cala lalai.”

Vakayaloqaqataka na Vuli e Vale

Ni gadrevi mera vakayaloqaqataki na kalasi mera wilika na Roma 7–16, mo vakamacalataka ni a kaya o Paula e dua na ivalu e yaco tiko e loma vua—kei keda kece sara. Ena Roma 7–16 eda raica kina na ivalu cava o ya kei na sala meda qaqa kina.

iKuri ni iVurevure

Roma 1–6

Na vakabauta, loloma soliwale, kei na cakacaka.

Ni da sa saga tiko meda muria na ivakaro, na noda talairawarawa ki na lawa ni Kalou ena sega walega ni vakabulai keda vakatabakidua (raica na Roma 3:27–31). Ena noda sasaga vinaka duadua, “O keda kece e tiko noda malumalumu, ka sega ni da kilikili ena serau ni Kalou” (Roma 3:23). Ena vuku ni veika oqo, eda sa gadrevi Jisu Karisito kece kina, ena nona loloma soliwale me rawa ni vosoti kina na noda ivalavala ca ka rawa meda tomana tiko na noda cakacaka vinaka. Me vaka a vakavulica o Paula, “Ia ni sa uasivi mai na ivalavala ca, sa qai uasivi cake vakalevu na loloma” (Roma 5:20).

A wasea o Peresitedi David O. McKay e dua na talanoa vakaibalebale me baleta e dua na cauravou lailai ka luvu ena gauna ratou sisili voli kina kei ratou nona itokani: “E kalougata, ni dua veiratou na gone a yalodei ka totolo nona vakasama kei na nona cakacaka , ka dodoka yani kina e dua na kau balavu mai na dua na bai ka dedeka yani na muana kadua vei koya na cauravou ka sa luvu tiko ka a [qumia] vakaukauwa o koya ka yaco me vakabulai koya kina.

“Era a kaya kece na cauravou vei koya na gone a luvu o ya ni sa bula dinau tu o koya vei koya na cauravou a vaka bulai koya.

“Sa sega ni vakabekataki eke; dina ga ni a cakava na veivueti, ke a sega beka ni taura na madigi o ya o cauravou, ke a sega beka ni saga vakataucoko sara ena nona ivakaro, ke a sa luvu, ka sega ni guilecavi eke na yaloqaqa nei nona itokani” (David O. McKay, “The Gospel of Work,” Instructor, Jan. 1955, 1).

Ni vakamacalataka tiko na taro me baleta eda sa vakabulai ena vakabauta se cakacaka, a vola kina na daunivola Vakarisito o C. S. Lewis: “E [vaka] vei au ni tarogi tiko na i-sa ni yame ni ikoti cava e vinaka cake sara” (Mere Christianity, 148).

iVakaraitaki 1

• Ica 12:27

• Moronai 10:32–33

• J. Devn Cornish, “Au sa Vinaka Cake Beka? Au na Rawata Li?” Ensign se Liaona, Nove. 2016, 32–34

“Ena sega ni rawa me voli na veivakabulai ena ilavo ni talairawarawa; e voli ena nona dra na Luve ni Kalou [raica na Cakacaka 20:28]. …

“Sa isolisoli ni Kalou na loloma vakalou, kei na noda gagadre meda talairawarawa ki na ivakaro yadudua ni Kalou, sai koya na dolea yani ni ligada vakatamata meda ciqoma na isolisoli vakalou oqo mai vei Tamada Vakalomalagi.” (Dieter F. Uchtdorf, “Na iSolisoli ni Loloma Vakalou ni Kalou,” Ensign se Liaona, Me 2015, 109–10).

iVakaraitaki 2

• Jemesa 2:17–26

• Ilamani 12:23–24

• D. Todd Christofferson, “Tiko Ga ena Noqu Loloma,” Ensign se Liaona, Nove. 2016, 48–51

“Kevaka me sa isolisoli ni Kalou na loloma vakalou, na cava na vuna e sa rui bibi kina na talairawarawa ki na ivunau ni Kalou? Cava meda kauwaitaka kina na ivunau ni Kalou—se veivutuni, ena ka oya? …

“Koya gona, na noda talairawarawa ki na ivakaro ni Kalou, sa vuabale kina na noda loloma tawayalani kei na vakavinavinakataka na vinaka ni Kalou. Na ivakarau loloma dina vakaoqo kei na vakavinavinaka ena vakavuna na cakacakamana ka sema vata na noda cakacaka vua na Kalou kei na nona loloma” (Dieter F. Uchtdorf, “Na iSolisoli ni Loloma Vakalou ni Kalou,” Ensign se Liaona, Me 2015, 109).

Na noda gadreva tikoga na loloma soliwale.

“Me ikuri ni kena gadrevi na loloma me baleta na itinitini ni nomu vakabulai, ena veisiga vakayadua ni nomu bula o na gadreva kina na kaukauwa ka rawati kina na ka vakaoqo. Ena nomu sa toro voleka tiko yani vei Tamamu Vakalomalagi ena yalodei, yaloraramusumusu, yalomalumalumu, ena laveti iko cake o Koya ka vakaukauwataki iko ena Nona loloma (raica na Vosa Vakaibalebale 3:34; 1 Pita 5:5; V&V 88:78; 106:7–8). Ni o vakararavi ena Nona loloma e rawa kina vei iko mo toso ki liu ka tubu cake na nomu bula savasava” (Tudei ena Vakabauta, 78).

Vakatorocaketaki Noda Veivakavulici

Sa veivakauqeti vakayalo na nomu veikacivi. Vaka-qasenivuli, o sa kacivi mai vua na Turaga mo vakalougatataki ira na Luvena. E gadreva na Turaga mo gugumatua, ni ko qai bula kilikili ena vukei iko, ka na solia o Koya vei iko na ivakatakila o vakasaqara tiko. (Raica na Veivakavulici ena iVakarau ni iVakabula, 5.)