Korinica

Korinica, Ceva kei Kirisi, na Foramu kei na Vale ni Soqo, droini mai vei Balage Balogh

19–25 ni Okosita

1 Korinica 1–7

“Mo Dou Veivinakati Sara”

E vakavulica o Elder Jeffrey R. Holland ni vuqa na tamata era “lako [mai ki lotu] mera na sotavi vakayalo” (“A Teacher Come from God,” Ensign, Me 1998, 26). Ni ko wilika na 1 Korinica 1–7, mo masulaka na ka mo cakava me yaco na gauna vakayalo ena nomu kalasi.

Vola na Veika o Uqeti Kina

ivakatakilakila ni veiwasei

Sureta na Veiwasei

Sa rawa mo sureta na kalasi mera vola na ka era sa cakava baleta na veika era sa vulica mai na ivolanikalou. Sureta e vica na lewe ni kalasi me wasea na ka era vola.

ivakatakilakila ni veivakavulici

Vakavulica na iVunau

1 Korinica 1:10–17; 3

Sa dodonu sara vei ira na lewe ni lotu i Karisito mera sa duabau.

• Na kena veivosakitaki na imatai ni vica na wase ni 1 Korinica sa madigi vinaka ni kena tarai cake na nodra duavata na lewe ni tabanalevu. Sa rawa me tekivu ena nodra tukuna na lewe ni kalasi na kalavo, ilawalawa, se timi era lewena tiko sa tu kina e dua na duavata cecere sara. Cava na vuna sa lomadra tu kina na ilawalawa oqo na duavata? Me qai vakadikevi mada eso na ivakavuvuli nei Paula baleta na duavata ena 1 Korinica 1:10–13; 3:1–11. Na cava e vakavulica na veitikina oqo, kei na ka eda sotava, ena vukea me tauyavutaki na duavata kei na cava ena via vakarusa? Na veivakalougatataki cava e yaco mai vei ira sa duavata tiko? Na italanoa e wasea tiko o Peresitedi Henry B. Eyring ena “iKuri ni iVurevure” ena vukea talega na veivosaki oqo.

• E vakayagataka o Paula na iyaloyalo ni dua na valelevu me vakayaloqaqataka kina na duavata ena 1 Korinica 3:9–17. E rawa vakacava ki na vosa vakaibalebale oqo me vukea na nomu kalasi mera kila vinaka kina na duavata? Me vakataka, ni wiliki oti vata na veitikina oqo, sa rawa mo solia ki na lewe yadua ni kalasi e dua na buloko ka cakacaka vata me tara kina e dua na ka. Ena vakasama cava eda sa “vale ni Kalou” kina? (1 Korinica 3:9). Sa tarai keda cake tiko vakayadudua vakacava na Kalou? Na cava eda sa tara cake tiko na veiwekani Yalododonu? Na cava eda rawa ni cakava vaka-tabanalevu duavata na veika eda a sega ni cakava rawa vakai-keda yadudua?

1 Korinica 1:17–31; 2; 3:18–20

Ni gadrevi me vakayacori na cakacaka ni Kalou, eda na gadreva na vuku ni Kalou.

• Eso na tamata era nanuma ni ra tawavuku mera veiqaravi ena Lotu baleta ni takiveiyaga nodra kila-ka se vuli cecere. Eso tale era nanuma ni ra sa vakaitagedegede vakavuku baleta ni ra sa vuli se kila-ka cecere. Na vakasama ruarua oqo e nanumi cala kina na ivakatagedegede vakavuku dina cava meda cakava kina na cakacaka ni Kalou. Oqo e dua na vakasama me vukea nomu kalasi mera vakararavi ga vua na Kalou: Wasea na kalasi ki na vica na ilawalawa ka kerea mera vakasaqara ena 1 Korinica 1:17–31; 2; se 3:18–20 na vosa me vakataka na vuku kei na lialia. Mera qai wasea ena nodra ilawalawa na cava era vakavulica na tikina oqo me baleta na vuku e gadrevi ena cakacaka ni Turaga. Na veika cava baleta na kosipeli e vaka me ka lialia ki na so na tamata? Era vakaraitaka vakacava na veika oqo na vuku ni Kalou? Sa rawa talega mera wasea na lewe ni kalasi na gauna era a vakararavi ga ki na vuku ni Kalou, ka segai vei ira, mera cakava kina na Nona cakacaka.

1 Korinica 6:9–20

Sa ka tabu na yagoda vakatamata.

• Me tekivutaki e dua na veivosaki baleta na tikina oqo, mo vola ena vava na taro vakaoqo: E raica vakacava na Turaga na yagoda? E duidui vakacava oqo mai na ka e vinakata o Setani meda vakasamataka kina na yagoda? Na cava na kena ibalebale ni yagoda sa vale ni Yalo Tabu? Sureta na lewe ni kalasi mera raica na isaunitaro oqo ena 1 Korinica 6:9–20 (raica talega na V&V 88:15; Mosese 6:8–9).

• Na nomuni veivosaki baleta na savasava ni yagoda ena oka kina na veivosakitaki na lawa ni tiko savasava. Oqo e rawa talega me veivuke baleta ni vuqa na madigi vei keda na Yalododonu Edaidai, eda vakamacalataka kina na noda vakabauta baleta na tiko savasava kivei ira eso era sega ni duavata ena vakabauta oqori. Sa rawa mo kerea nomu kalasi na cava era sa vulica maivei Paula—vakakina mai na ivurevure tale eso ni Lotu—ka na vukei ira mera vakamacalataka kivei ira eso na vuna e bibi kina na tiko savasava. Eso vei ira na ivurevure oqo e rawa ni oka kina na kena e tiko ena “iKuri ni iVurevure.”

ivakatakilakila ni vuli

Vakayaloqaqataka na Vuli e Vale

Vakamacalataka ki na nomu kalasi kevaka era gadreva na ikuri ni vakasama mera na duavata vakalevu cake kina kei na watidra, matavuvale, se tabanalevu, e tomani tiko na itoko ni duavata ena 1 Korinica 8–11.

ivakatakilakila ni ivurevure

iKuri ni iVurevure

1 Korinica 1–7

iVakaraitaki ni duavata.

E vakavulica o Peresitedi Henry B. Eyring:

“Au a sureti meu masu vata kei na dua na matavuvale ena gauna ni moce ena noqu a vulagi tiko ki nodratou vale. E a kerei me cabora na masu o gone lailai duadua. E a masu me vaka e dua na peteriaki ni masulaki ira kece na lewe ni matavuvale ena yacadra yadua. Au a mani rai meu raica mada na matadra na vo ni gone kei rau na itubutubu. Au raica ni ra a duavata ena vakabauta ka lomavata ena nona masu na gonetagane lailai o ya.

“Eso na lewe ni iSoqosoqo ni Veivukei era masumasu ena nodra vakarau laki sikova ena imatai ni gauna e dua na marama yada a mate vakasauri o watina. Era via kila se cava mera cakava kei na sala era rawa ni ra cakacaka vata kina me vakarautaki na vale me baleti ira na matavuvale kei na itokani era na lako tiko mai ki na soqoni ni veibulu. … Sa qai basika na isau ni nodra masu. Ni ra sa yaco yani ki vale, era sa dui yavala sara na marama mera vakacavara yadua e dua na itavi. E totolo sara na samaki ni vale ka ra a veivutunitaka eso na marama na nodra sega ni vakaitavitaki ira vakalevu. Na veivosa ni veivakacegui ka ra a wasei era a veisotari vinaka sara ga. Era a duavata ena veiqaravi ni Turaga ena duavata ni yalodra” (“Me Duavata na Yaloda,” Ensign se Liaona, Nove. 2008, 68–69).

Na veivakalougatataki ni veidauci savasava.

Ena dua na Lotu e Vuravura ni iTabagone Qase Cake, a kaya kina o Sister Wendy W. Nelson:

“Na bula savasava ni tamata yadua sa idola ki na dodomo dina. Na levu cake ga ni nomu vakasama kei na nanuma e savasava, na nomu vosa kei na itovo, na levu cake ni nomu gumatua mo solia ka ciqoma na dodomo dina. …

“Me sa tiki bibi ni nodrau vakaraitaka na nodrau veidomoni, e vinakata na Turaga e dua na tagane kei na yalewa veiwatini me rau vakayagataka na totoka kei na reki ni veidomoni vakaveiwatini. …

“… Na ka cava ga e sureta na Yalo ki na nomu bula, kei na bula nei watimu kei na nomu bula vakamau, ena vakalevutaka nomu guta mo bulataka na veidomoni vakaveiwatini. … Ena dua tale na yasana, na ka cava ga ena vakacacana na Yalo tabu ena vakalailaitaka nomu gadreva mo duabau kei na watimu. …

“Na veidomoni vakaveiwatini e vakadeitaki ena Yalo tabu sa vakalougatataki mai vua na Turaga kei na kena savsava” (“Love and Marriage,” Lotu e Vuravura Raraba ni iTabagone Qase Cake, Jan. 8, 2017, broadcasts.lds.org).

E vakavulica o Elder Jeffrey R. Holland:

“Meu vakamatatataka mada ni gagano vakatamata e maroroi tu me baleti rau e dua na veiwatini baleta ni oqori na ivakatakarakara cecere ni duavata e taucoko, na veivakataucokotaki kei na vakaduavatataki e vakavuna ka lewa na Kalou. …

“Ia na duavata sa vakaoqo, na yalodina qaqa ni dua na tagane kei na dua na yalewa, ena yaco ga ena dina kei na tudei e tiko ena veiyalayalati ni vakamau, ena veiyalayalati dokai kei na bubuluitaki ni veika kece sa nodrau—na yalodrau sara ga kei na vakasama, na nodrau veisiga taucoko kei na nodrau tatadra kece sara” (“Personal Purity,” Ensign, Nov. 1998, 76).

E vakamacalataka o Elder David A. Bednar: “Na mataqali veimaliwai [vakaveidauci] vaqo e sega ni dua tu ga na dikevi ni vakatataro, dua na gagano me vakamamautaki, se dua na mataqali vakayagataki gauna galala se veivakalasai me vakayacori tiko ena nanumi koya ga vakaikoya. E sega talega ni dua na veiraravui meda qaqa kina se dua ga na itavi me qaravi wale tu ga yani. Ia, era dua na ivakaraitaki cecere ni keda ituvaki ka ivakarau vakalou ni bula vakatamata ka dua na sala ni vaqaqacotaki ni kaukauwa ni ivau ni vakasama kei na yalo ena kedrau maliwa na veiwatini. Eda ibulibuli vakatamata ka vakalougatataki tu ena galala ni digitaki ni ivakarau vinaka, ka da ivakaraitaki ni noda kawa Vakalou—ka sega ni, veivakarau kei na lawa ni veiyacovi kei na ivalavala ni gauna oqo” (“Eda Vakabauta na Tiko Savasava,” Ensign se Liaona, Me 2013, 42).

Na sala meda na veidauci savasava tiko kina.

• “Na Tiko Savasava: Na Cava na Kena iYalayala?” “I Choose to Be Pure” (vidio), LDS.org

• Tiko Savasava Me iSakisaki ni iTabagone, 26–28

Vakatorocaketaki Noda Veivakavulici

Cavuta na ivakadinadina kei Jisu Karisito Ni ko sa veivakavulici, nanuma na ivakaraitaki nei Paula: a “sega ni lako e na vosa vinaka se na vuku, niu sa vunautaka … na vosa sa tukuni kina na Kalou” (1 Korinica 2:1). Na nomu vakadinadinataka na iVakabula sa rawa ni veivakauqeti bibi sara.