“26 ni Okosita–1 ni Sepiteba. 1 Korinica 8–13: ‘Ia Koi Kemudou na Yago i Karisito’” Lako Mai, Mo Muri Au—Me Baleta na Matawilivola ni Siga Tabu: Veiyalayalati Vou 2019 (2019)
“26 ni Okosita–1 ni Sepiteba. 1 Korinica 8–13,” Lako Mai, Mo Muri Au—Me Baleta na Matawilivola ni Siga Tabu: 2019
26 ni Okosita–1 ni Sepiteba
1 Korinica 8–13
“Ia Koi Kemudou na Yago i Karisito”
E vakavulica o Elder Richard G. Scott ni “rawa mo sega ni rogoca na veidusimaki taleitaki duadua, vakayadua ni Yalotabu” kevaka eda sega ni vola se taura “na imatai ni veivakauqeti e lako maivei [keda]” (“Na Rawati ni Veidusimaki Vakayalo,” Ensign se Liaona, Nove. 2009, 8).
Vola na Veika o Uqeti Kina
Sureta na Veiwasei
A vakayagataka o Paula na vosa vakaibalebale kei na raitayaloyalo ena 1 Korinica 8–13, me vakataka na daucici ena dua na veitau, na yago ni tamata, kei na “lali sa tataqiriqiri” (1 Korinica 13:1). Na veivakararamataki cava e tiko vei ira na kalasi me baleta na raitayaloyalo oqo? Ena vukei ira vakacava mera kila vinaka e dua na dina ni kosipeli?
Vakavulica na iVunau
Eda na dau temaki taucoko, ia ena vakarautaka na Kalou na sala meda drotani mai kina.
-
O na vukea vakacava na kalasi mera kunea na dina kaukauwa ena 1 Korinica 10:13? Dua na kena vakasama me wasei na tikina ena malanivosa leleka, ka solia e dua ki na lewe ni kalasi duidui, ka kerea na lewe ni kalasi mera cavuta na malanivosa ena nodra vosa ga Me vakataka, na cava e dua tale na sala meda cavuta kina “ia sa yalodina na Kalou” se “Ni o na temaki o na rawa ni o lako sivita”? Mo qai biuta vata eso na nodra itukutuku na lewe ni kalasi ka vakadikeva na kena bulataki tale eso vakaoqo ki na noda bula. Sa rawa ki na kalasi mera wasea na gauna era a kunea kina ni sa dina na veiyalayala e tiko ena tikina oqo. Na ikuri ni veivakararamataki cava eda sa rawata mai na veitikina oqo ena Alama 13:27–28?
-
Kakua walega ni raica tiko vakatabakidua na nona temaki e dua, ia mo raicamatua mada na kena veivosakitaki na veitemaki e tiko ena 1 Korinica 10:13 ni a cavuta kina o Paula me, “koya ga sa vorata rawa na tamata.” Mera tekivu na lewe ni kalasi ena nodra raica na veitemaki sa veivakaroti tiko kina o Paula ena tikina e 1–12. Sa rawa talega mera tukuna eso na ivakaraitaki ni veitemaki ni gauna oqo, me vaka na veitemaki mo lawaki ca, kakase, se vakalewai ira na tamata. Ena rawa vakacava vua e dua, ena veivuke kina na Kalou me, “drotaka” mai na veitemaki oqo? Sa rawa me dramataki eso na kena ivakaraitaki.
-
Ena vinaka talega me raici na 1 Korinica 10:13 ni sa tukuna kina o Paula na gagadre veiuabaleti me ra duavata na Yalododonu. Na cava eda rawa ni cakava meda veivukei vakai keda yadua meda “dro kina” ka “vosota rawa” na veitemaki eda na rawa ni sotava? Ena vukei keda vakacava na duavata meda vorata rawa na veitemaki?
Na sakaramede ena vakaduavatataki keda na lewe ni Lotu i Karisito.
-
Na veitikina oqo ena vakauqeta na veivosakitaki ni sakaramede ena rawa ni vakaduavatataka na nomuni tabanalevu ena sasaga mo ni vaka na iVakabula. Sa rawa mo ni tekivu ena kena wiliki na 1 Korinica 10:16–17 ka dikeva na ibalebale ni vosa sa noda vata ena itukutuku oqo (me dua e raica na kena ibalebale ena dikisenari). E sa vukei keda vakacava na votai ena sakaramede meda duavata cake kina? Na cava eda rawa ni cakava me susugi kina na duavata ena gauna ni soqoni ni sakaramede? E veisemati vakacava ki na lalawa oqo na ivakasala i Paula “me dikevi koya mada na tamata vakai koya”? (1 Korinica 11:28).
E dodonu meda vakasaqara na vei isolisoli vaka Yalo me yaga vei ira taucoko na luvena na Tamada Vakalomalagi.
-
Mo na vukei ira vakacava na lewe ni kalasi mera taleva lesu na isolisoli vakayalo e tukuna tiko o Paula ka mera kila na levu ni duidui ni isolisoli vakayalo? Mo qai solia e dua na miniti vei ira mera vola na levu ni isolisoli ni Yalo era nanuma rawa. Ni sa oti, sureta na lewe ni kalasi mera wasea na veika era sa vola me yacova ni sa tukuni taucoko na isolisoli yadua. Mera na qai vakasaqara na lewe ni kalasi na isolisoli tale eso me kena ikuri era sa vola ena nodra vakasaqaqara ena 1 Korinica 12 kei na lisi nei Elder Marvin J. Ashton e volai tiko ena “iKuri ni iVurevure.” O cei vei ira na isolisoli oqo era sa raica rawa na lewe ni kalasi vei ira na tamata era kila? Ena vukei keda vakacava na kena tarai cake na isolisoli oqo meda vakataki Jisu Karisito kina?
-
Mera vukei na lewe ni kalasi mera raica na ivakaraitaki ni kena tarai cake na isolisoli oqo me vukea na vakatatataki cake ni Lotu, sureti ira mera vakasamataka na isolisoli vakayalo sa tu vei ira era tukuni tiko ena volanikalou. Baleta na kena vakasama, sa rawa mo lesi ira mera vakasaqara e dua na ivolanikalou e tiko ena “iKuri ni iVurevure” ka wasea na isolisoli vakayalo era nanuma ni tiko vua na tamata o ya. Sa vakalougatataki ira beka vakacava kei ira tale eso na nodra isolisoli vakayalo na tamata o ya? Eda na vakayagataka vakacava na isolisoli vakayalo mera vakalougatataki kina na tamata ka vakatatataki cake kina na yago i Karisito, se na Lotu? (raica na 1 Korinica 12:12–31; raica talega na 1 Korinica 14:12).
-
Mera vukei na lewe ni kalasi mera kila vinaka na sala ni kena tarai cake na isolisoli vakayalo, sureti ira mera wilika na 1 Korinica 12:27–31; Moronai 7:48; 10:23, 30; Vunau kei na Veiyalayalati 46:8; kei na vosa nei Peresitedi George Q. Cannon ena “iKuri ni iVurevure.” Na cava era vakavulica vei keda na ivurevure oqo ena sala mera rawati kina na isolisoli vakayalo? E rawa vakacava ki na noda tara cake na isolisoli vakayalo meda vakataka cake na Karisito? Sureti ira na lewe ni kalasi mera digitaka e dua na isolisoli era gadreva mera rawata ka vakasaqara na veivuke ni Turaga me tauri kina.
Na loloma sai koya na isolisoli vakayalo cecere duadua.
-
Eso na tamata era nanuma ni loloma sai koya na soli-ka vei ira na dravudravua se yalololoma vei ira na tamata. Dina ga ni sa rawa ki na veika oqo me ivakaraitaki dina ni loloma, na ivakamacala i Paula e rabailevu cake. Mera vukei na kalasi mera dikeva oqo, sa rawa mo kerea mera tugana vakanomodi na 1 Korinica 13 ka vakasamataka e dua na tamata era kila sa ivakaraitaki vinaka ni dua se sivia na ituvaki ni loloma e vakamacalataka tiko o Paula. Sa rawa ki na vica na lewe ni kalasi mera vakamacalataka na tamata era sa vakasamataka kei na gauna a vakaraitaka kina na tamata oqo na loloma. Sa rawa me volai vakatikina na ivakamacala nei Paula ena vava ka sureta na kalasi mera wasea na vakasama me baleta na ibalebale ni “dauvosota vakadede” se “sega [ni na] cudrucudru” (1 Korinica 13:4–5). A ivakaraitaki vakacava na iVakabula ena itovo oqo ni loloma? Eda na tara cake vakacava na loloma? Raica na Moronai 7:46–48
Vakayaloqaqataka na Vuli e Vale
Era sa kila tiko beka na nomu lewe ni kalasi ni ivunau baleta na nodra papitaisotaki na mate kei na matanitu lagilagi e tolu era sa tukuni tiko ena iVola Tabu? Vakamacalataka vei ira ni ra na kila na dina oqo ni ra vulica na 1 Korinica 14–16 ena macawa oqo.
iKuri ni iVurevure
Na isolisoli vakayalo o na rairai sega tu ni vakasamataka.
A wasea kina o Elder Marvin J. Ashton na ivakaraitaki oqo e vakatoka “me isolisoli sega ni kilai vakalevu” ni Yalo: “Na isolisoli ni kerekere; na isolisoli ni vakarorogo; na isolisoli ni rogoca rawa ka vakayagataka na domo lailai rogo vinaka; na isolisoli ni rawa ni tagi; na isolisoli ni sega ni via veileti; na isolisoli ni lomavata; na solisoli ni sega ni via vosa wale tikoga; na isolisoli ni vakasaqara na ka savasava; na isolisoli ni sega ni vakalelewa; na isolisoli ni rai vua na Kalou me dusimaki; na isolisoli me dua na tisaipeli; na isolisoli ni karoni ira na tamata; na isolisoli me rawa ni vakasama vakatitobu; na isolisoli me cabo masu; na isolisoli me cavuta na ivakadinadina; kei na isolisoli me ciqoma na Yalo Tabu” (“There Are Many Gifts Ensign, Nov. 1987, 20).
Na ivakaraitaki vakaivolanikalou ni isolisoli vakayalo.
Vakasaqara na isolisoli vakayalo.
A kaya o Peresitedi George Q. Cannon (1827–1901) ena Mataveiliutaki Taumada ni sa noda ilesilesi meda “masu vua na Kalou me solia vei [keda] na isolisoli ena vakadodonutaka na [noda] itovo vakatani. … Era sa nakiti oti mai mera mai vakayagataki ena veika oqo. Sega ni dodonu me kaya e dua na tamata, ‘Oi, au sa sega ni vosota rawa oqo; e sa matau vei au.’ E sega ni yalovakacegu kina o koya, ni vuna na Kalou e sa yalataka me solia na kaukauwa me vakadodonutaki kina na veika oqo, ka solia na isolisoli eso me na vaqeavutaki ira. Kevaka e dua na tamata sa sega vua na vuku, sa nona itavi me kerea vua na Kalou na vuku. Sa vakakina ki na veika kece eso” (Millennial Star, Apr. 23, 1894, 260).
Vakatorocaketaki Noda Veivakavulici
Mo bulataka na ivakavuvuli o vakavulica tiko. Ni ko bulataka na ivakavuvuli o vakavulica tiko ena vukei iko mo vakadinadinataki ira ena kaukauwa levu. E vakavulica o Paula, “Sa lesia vakakina na Turaga me ra bula e na itukutuku vinaka ko ira era sa tukuna na itukutuku vinaka” (1 Korinica 9:14).