Sa rairai na Karisito vei Paula ena valeniveivesu

23–29 ni Sepiteba.

Kalatia

“Dou Lako Voli e na Yalo Tabu”

Ni ko wilika ena masumasu ka tugana na Kalatia, ena vakavulici iko na Turaga ena ka o gadreva mo vakavulica ki na nomu kalasi. Ni ko vola na veika o sa vakauqeti kina o sa vakaraitaka tiko nomu vakavinavinaka vua na Kalou kei na Nona veivuke (raica na Paul B. Pieper, “Maroroya Me Ka Tabu,” Ensign se Liaona, Me 2012, 109).

Vola na Veika o Uqeti Kina

ivakatakilakila ni veiwasei

Sureta na Veiwasei

Na vulica na ivolanikalou e dauveimuataki ki na veivosaki e vakaibalebale cake vata kei na matavuvale se itokani. A yaco beka oqo kivei ira na lewe ni nomu kalasi ena macawa oqo? Sureti ira me ra wasea na veika era sa sotava.

ivakatakilakila ni veivakavulici

Vakavulica na iVunau

Kalatia 1:6–7; 3:1–5; 4:8–21; 5:1, 13–14

Na kosipeli i Jisu Karisito e solia na bula sereki.

• Na vulici ni dua na ivolanikalou ena rawarawa cake ni da kila tiko na vuna a volai kina. Ena vuku ni ka oqo, ena rairai vinaka mo tekivuna nomuni veivosaki baleta na Kalatia ena taro vakaoqo “Na cava o nanuma a inaki nei Paula me vola kina na ivola oqo?” se “Na leqa cava a saga tiko o Paula me walia?” Sureta na lewe ni kalasi mera vakasaqara na ivakatakilakila ena Kalatia 1:6–7; 3:1–5; 4:8–21. E baleti keda vakacava na itukutuku nei Paula nikua?

• Era nanuma eso na Yalododonu e Kalatia ni sa gadrevi mera bulataka tikoga na lawa i Mosese. Kivei Paula, oqo sa vaka na bula voli ena “ivua ni bobula” ni vakatauvatani ki na bula sereki e solia na lawa i Karisito (Kalatia 5:1). Dina ga ni da dau sega ni sotava vakalevu na leqa oqo nikua, eda sa sotava vata kece e dua na digidigi ena kedrau tadrua na bobula vakayalo kei na bula sereki vei Jisu Karisito. Mera vukei na lewe ni nomu kalasi mera vakadikeva na ivakavuvuli i Paula me baleta na bula galala kei na bobula, sa rawa mo tarogi ira mera tukuna eso na itovo kei na ivakarau ena rawa ni mua yani ki na bobula vakayalo (me vakataka na itovo vakavanua, itovo ca, vakabauta lasu, se vakanamata ki na itovo vakayago ka segai na veisau ni yalo). E tukuna na Kalatia 5:1, 13–14, meda na kunea vakacava na bula galala mai na bobula vakayalo? Era sa sotava vakacava na lewe ni kalasi na bula sereki sa yalataka tiko na kosipeli i Karisito? Sa rawa talega mo sureta na lewe ni kalasi mera wasea na sala mera na kaya kina vua e dua e nanuma tiko ni bulataka na kosipeli e yalana na bula galala ni tamata yadua.

Kalatia 5:16–26

Ke da sa “lako voli ena Yalo Tabu,” eda na ciqoma na “vua ni Yalo Tabu.”

• E vuqa na tamata era sasaga tiko mera kila na veivakauqeti ni Yalo. Ena veivuke naKalatia 5 vei ira na lewe ni nomu kalasi mera kila kina na vua ni Yalo Tabu. Sa rawa mo tekivu ena nomu kerei ira mera vakasaqara ena Kalatia 5:22–25 na vosa a vakayagataka o Paula me vakamacalataka kina na vua ni Yalo Tabu. Na cava na vuna e vosa vakaibalebale vinaka kina na vuanikau me tukuna na veivakauqeti ni Yalo kivei keda? Sa rawa talega ki na lewe ni kalasi mera wasea na kena dina na vuanikau oqo ki na nodra bula se vei ira na tamata era kila. Eso tale na ivurevure me ra dikeva e oka kina na Maciu 7:16–18; Joni 14:26–27; Moronai 7:13–17; Vunau kei na Veiyalayalati 11:12–13; kei na itukutuku nei Peresitedi Gordon B. Hinckley ena “iKuri ni iVurevure.”

  na apolo ena kena vunikau

  Sa rawa meda ciqoma na “vua ni Yalo Tabu” ni da vakasaqara.

• Eso na gauna eda rawa ni vulica e dua na ivakavuvuli ni da vulica na kena veibasai. Me vakataka, ena Kalatia 5:16–26, ni a veidutaitaka o Paula “na itovo vakayago” vata kei “na vua ni Yalo Tabu.” Ni gadrevi mera tugana na lewe ni kalasi na ivakatagedegede cava mera na “lako voli ena Yalo Tabu,” sa rawa mo vakatura mera wilika na Kalatia 5:16–26 ka mera vakadikevi ira vakayadua me vaka e tiko ena Attribute Activity tabana e 126 ni Vunautaka na Noqu Kosipeli. Me vakataka, na iyaya yadua e volai tiko ena tikina e 19–23, mera na vola e dua na taro vakaoqo “Au vuvutaki ira beka na noqu icaba?” se “Au sa vakila beka na loloma ena veisiga?” Na nodra isaunitaro ni vakadikevi ira na lewe ni kalasi me kakua ni wasei, ia sa rawa mo sureti ira mera mera wasea na vakasama se vakanananu mera veivukei kina vakai ira mera “lako voli ena Yalo Tabu.” Ke sa sega na gauna mo vakaotia kina na itaviqaravi oqo ena kalasi, sa rawa mo vakatura ki na lewe ni kalasi mera laki vakacavara mai vale.

Kalatia 6:7–10

Ni da sa kaburaka “na ka ni Yalo Tabu,” eda na tamusuka na kena veivakalougatataki ena kena gauna.

• Na vulici ni Kalatia 6:7–10 ena vukei ira na lewe ni kalasi mera vakasama vakatitobu me baleta na revurevu balavu ni nodra digidigi. Ni gadrevi mera vukei, mo kauta mai eso na veimataqali sorenivuata, vata kei na vuna, vuata, se kakana draudrau era tubu mai na sorenivuata yadua oqo (se kauta mai na kedra iyaloyalo). Sa rawa mera cakacaka vata na lewe ni kalasi mera veisataka donu na sorenivuata ki na ka e tubu mai kina. Sa qai rawa mera wilika na tikina e 7–10 ka veivosakitaka vata na ibalebale ni kakaburaki “ki na [ka] vakayago” vakakina “ki na Yalo Tabu.” (Ena rawa ni veivuke na itukutuku nei Elder Ulisses Soares ena “iKuri ni iVurevure”. Na cava eda na tamusuka ni da kakaburaki ki na ka vakayago? Na cava eda na tamusuka ni da kakaburaki ki na Yalo Tabu? (raica na Kalatia 5:22–23). Sa rawa mo sureta na lewe ni kalasi mera tugana na veivakalougatataki vakayalo era nuitaka tiko mera ciqoma. Na “kakaburaki” cava e rawa mera cakava oqo mera vakarau ciqoma kina na veivakalougatataki oqori? Sa rawa mo sureti ira mera vola na nodra nanuma, kera vinakata, mera na qai wasea.

• Eso na lewe ni kalasi era sa vakila beka na “ceguoca ena caka vinaka” (Kalatia 6:9)—e rairai beka ni ra sega ni vakadeitaka na vua ni nodra cakacaka. Ena rawa me veivuke na veivosakitaki ni Kalatia 6:7–10 . Me vakatakilai na veitikina oqo, sa rawa mo sureta e dua ena kalasi me tukuna vakalekaleka na gauna a gadrevi kina vua me vosota ni saga tiko me vakatubura e dua na itei. Na cava e vakavulica vei keda na ka a sotava na tamata oqo, vata kei na Kalatia 6:7–10, me baleta na noda sasaga meda “lako voli ena Yalo Tabu”? (Kalatia 5:25).

ivakatakilakila ni vuli

Vakayaloqaqataka na Vuli e Vale

Ni gadrevi mera vakayaloqaqataki na lewe ni kalasi mera wilika na iVola vei ira na Efeso, mo tukuna vei ira ni ra na vulica ena ivola oqo na sala mera na “tu dei rawa ka vorata nai lawaki ni tevoro” (Efeso 6:11).

ivakatakilakila ni ivurevure

iKuri ni iVurevure

Kalatia

Na vua ni bulataka na kosipeli.

E vakavulica o Peresitedi Gordon B. Hinckley: “Eda na kila vakacava na veika ni Yalo Tabu? Eda na kila vakacava ni sa mai vua na Kalou? Mai na vuadra. Kevaka e veimuataki ki na tubu kei na torocake, kevaka e veimuataki ki na vakabauta kei na ivakadinadina, kevaka e veimuataki ki na sala vinaka cake ni vakayaco-ka, kevaka e veimuataki ki na savasava vakalou, ia sa vu mai vua na Kalou. Kevaka ena ravuti keda, kevaka ena kauti keda ki na butobuto, kevaka eda na veilecayaki ka lomaleqataki keda kina, kevaka e veimuataki ki na tawavakabauta, sa qai mai vua na tevoro.

Ena dua tale na gauna, a kaya kina o Peresitedi Hinckley: “Ko na kila na veivakauqeti ni Yalotabu mai na vua ni Yalotabu—sai koya e veivakararamataki, e buli keda cake, na veika e nuideitaki ka dodonu ka veilaveti ka veimuataki keda meda vakanananu vinaka cake ka vosa vinaka cake ka veiqaravi vinaka cake sa qai mai vua na Kalou. Na kena e veiravuti, e muataki keda ki na sala tani—oqo sa mai vua na vu-ni-meca. Au vakabauta ni sa matata vinaka o ya, ni rawarawa sara” (Nodra iVakavuvuli na Peresitedi ni Lotu: Gordon B. Hinckley [2016], 121).

Kakaburaki ena Yalo.

E vakamacalataka o Elder Ulisses Soares: “Na kakaburaki ena Yalotabu sa kena ibalebale me na laveti keda cake na noda vakasama, vosa, kei na itovo ki na nodrau ivakatagedegede vakalou na noda itubutubu vakalomalagi. Ia, na ivolanikalou e tukuna tiko ni veika vakayago sa ituvaki vakatamata se itovo ni tamata sa vakavuravura, ka yaco kina vei ira na tamata mera vakauqeti ena gagano, gagadre, dodomo, kei na mamaqusa ni yalo ka sega ni via vakauqeti ena Yalo Tabu. Kevaka eda sega ni qaqarauni, na veivakauqeti o ya vata kei na veivakasaurarataki ni tevoro ena vuravura oqo ena rawa me vakavuna meda susuga cake na itovo sa butobuto ka veilecayaki ka rawa me sa laki tiki ni noda bula” (“Mo Tiko ena Nona Yasana na Turaga!” Ensign se Liaona, Me 2012, 39).

Vakatorocaketaki Noda Veivakavulici

Vukei ira na vuli voli mera veitokoni vakai ira. “O ira yadua ena nomu kalasi era ivurevure ni ivakadinadina, veiliutaki, kei na veika mena qaravi ena bulataki ni kosipeli. Sureti ira mera veiwasei ka veilaveti cake vakai ira” (Veivakavulici ena iVakarau ni iVakabula, 5).