E vosa tiko o Jisu vua e dua na gonelailai

16–22 ni Sepiteba

2 Korinica 8–13

“Ko Koya sa Solia ena Marau sa Vinakata na Kalou”

Ni ko wilika na 2 Korinica 8–13, vakasamataki ira o vakavulica tiko ka tuvanaka na itaviqaravi ena vukea mera kunea na ivakavuvuli ena veiwase oqo. Mo taleva lesu na ituvatuva oqo baleta na ikuri ni vakasama.

Vola na Veika o Uqeti Kina

ivakatakilakila ni veiwasei

Sureta na Veiwasei

Oqo e dua na sala mera sureti kina na lewe ni kalasi mera wasea na veika era sa vulica mai na 2 Korinica 8–13. Kerea e vica vei ira mera vola ena vava e dua na malanivosa taleitaki era sa wilika, ka kerea na vo ni kalasi mera raica ena ivolanikalou. Sureti ira na itabagone mera wasea na vuna e vakaibalebale kina vakalevu vei ira na veimalanivosa oqo.

ivakatakilakila ni veivakavulici

Vakavulica na iVunau

2 Korinica 8:1–15; 9:6–15

Era marautaka na Yalododonu mera veivakalougatataki ena nodra iyau vei ira na dravudravua kei na vakaleqai.

• Sa vakarota na Kalou vei ira na Nona Yalododonu mera veivuke ena nodra qaravi na vakaleqai, ka sa rawa ki na itukutuku oqo ena 2 Korinica 8–9 me vakauqeta nodra sasaga na lewe ni nomu kalasi. Me vukea mera kunea na itukutuku oqo, mo vola ena vava na taro vakaoqo Cava na vuna meda soli-ka kina? kei na Sala cava meda soli-ka kina? Me veimama ni kalasi mera vakasaqara na isaunitaro ena 2 Korinica 8:1–15, kei na ikarua ni veimama mera vakasaqara ena 2 Korinica 9:6–15. (Sa rawa mo vakamacalataka ni wase 8, tikina e 1–5, a vakamacalataka kina o Paula na nodra ivakaraitaki ni yalo lomasoli na Yalododonu mai Masitonia.) Ena vukei keda vakacava na ivakavuvuli nei Paula meda qaravi ira vakavinaka cake kina na dravudravua kei na vakaleqai?

• Me vukei na lewe ni kalasi mera kila vinaka cake na sala ni Turaga me sotavi kina na nodra gagadre na Nona Yalododonu, e tiko e vuqa na ivurevure ena “iKuri ni iVurevure.” Sa rawa mo lesia e vica na lewe ni kalasi mera taleva lesu e dua se vica na ivurevure oqo ka wasea na ka era sa vakauqeti kina. E rawa beka ki na lewe ni kalasi mera kunea na vakasama eso ena 2 Korinica 8:1–15; 9:6–15 e vakaraitaka tiko ni o ira na Yalododonu ena gauna nei Paula a vukei ira na dravudravua ena sala vata ga eda cakava tiko nikua?

2 Korinica 11:13–33

Era saga na parofita vakailasu mera veidabui.

• Ena vuku ga, me vakataki ira na Yalododonu mai Korinica, eda sa rawa ni rawai taucoko ena ivakavuvuli lasu, sa rawa me na yaga vei keda noda taleva lesu na ivakaro i Paula vei ira mai Korinica me baleti ira na “parofita vakailasu.” Sa rawa mera raica na lewe ni kalasi na ivakaraitaki ni ivakavuvuli lasu sa vakauqeti keda tiko nikua ena itukutuku nei Elder Quentin L. Cook “Gumatua ena iVakadinadina Baleti Jisu” (Ensign se Liaona, Nove. 2016, 40–43). Sa rawa mo lesia e dua me wilika mada e liu na itukutuku oqo ka qai wasea ki na kalasi na ka e vakavulica tiko baleta na sala meda levea kina mai na “veivakataotaki” ka muataki keda tani mai na kosipeli. Na ivakavuvuli kilai levu cava e vuravura nikua e rawa ni muataki keda tani mai na dina ni kosipeli? Kerea na lewe ni kalasi mera taleva lesu na 2 Korinica 11:21–33 ka wasea na ka era sa vulica mai na veitikina oqo me baleti ira “sa italatala i Karisito” dina.

2 Korinica 11:3; 13:5–8

E dodonu meda “dikeva” na noda yalodina tiko ena kosipeli i Jisu Karisito.

• Eso na gauna era sa uabaleti na lewe ni Lotu ena sasaga ni bula—oka kina na veika era rawa ni raica ni ra sasaga tiko ni dua na Yalododonu Edaidai. Sa rawa ni veivuke na ivakasala nei Paula “dou dikevi kemudou, se dou tu ena vakabauta se segai” vei iko kei na lewe ni nomu kalasi mo ni raicamatua “na kena dina kei na kena savasava vei Karisito” (2 Korinica 13:5; 11:3). Sa rawa mo ni wilika vata ka 2 Korinica 11:3 ka veivosakitaka na ibalebale ni malanivosa “na rawarawa duadua kei na kena savasava vei Karisito.” Sa rawa mo kerea na lewe ni kalasi mera raitayaloyalotaka ni ra sa sureti mera vola ena dua na niusipepa e dua na ivakamacala ni kosipeli i Jisu Karisito, ka me 100 ga na vosa. Solia vei ira na gauna mera vola na nodra ivakamacala, ka mera wasea vakai ira yadua na veika era sa vola. Ke ra gadreva na veivuke, mera raica ga na Joni 3:16–17; 3 Nifai 27:13–21; kei na Tudei ena Vakabauta, 76. Sureta na lewe ni kalasi mera tugana mada ke ra sa dina tiko ki na ivakavuvuli bibi ni kosipeli.

• Ni gadrevi mera vukei na lewe ni kalasi mera “dikeva” na sala me rawarawa cake na nodra bula mera tisaipeli vinaka cake, wasea vei ira na itukutuku nei Peresitedi Dieter F. Uchtdorf ena “iKuri ni iVurevure.” Sa rawa ki na lewe ni kalasi mera veivosakitaka na sala mera na cakava kina na veisureti nei Peresitedi Uchtdorf mo “raicamatua na vunau taumada, ivakavuvuli, kei na bulataki ni kosipeli.” Na nodra vakasama cava tale eso na lewe ni kalasi eda rawa ni dikevi keda kina me vakadeitaka noda dina tikoga ki na vakabauta?

2 Korinica 12:5–10

Sa rauti keda vinaka na loloma soliwale ni iVakabula me vukea noda kunea na kaukauwa ni da sa malumalumu.

• Na cava o rawa ni kaya ki na dua na itokani a masulaka tiko me vakacegui mai na dua na malumalumu vakayago ia e nanuma ni masu o ya sa sega ni saumi mai? Sa rawa mo sureta na lewe ni kalasi mera tugana na taro oqo ni ra wilika vakanomodi 2 Korinica 12:5–10. Mera qai wasea na veivakararamataki mai na veitikina oqo ena rawa ni vukea na leqa oqo. Mera na wasea talega na gauna, ena loloma soliwale i Jisu Karisito, era a vaqaqacotaki kina ena nodra malumalumu. A vakauqeti vakacava na nodra bula mai na ka era sotava o ya?

ivakatakilakila ni vuli

Vakayaloqaqataka na Vuli e Vale

Ni gadrevi mera vakayaloqaqataki na nomu lewe ni kalasi, mo taroga ke ra kila e dua sa gole tani mai na kosipeli. Ke sa vakakina, era na gadreva mera wilika na sala a veisureti kina o Paula vei ira mai Kalatia era sa gole tani mai na kosipeli mera lesu mai.

ivakatakilakila ni ivurevure

iKuri ni iVurevure

2 Korinica 8–13

Na ivakarau ni Turaga ena nodra vukei na dravudravua kei na vakaleqai.

• Mosaia 4:16–27; Alama 34:27–29; Vunau kei na Veiyalayalati 104:14–18.

• iVoladusidusi 2: Veiliutaki ena Lotu (2010), 6.1.

• “iKatini kei na Soli Ka,” Me iSakisaki ni iTabagone (2011), 38–39.

• Serenilotu: “Because I Have Been Given Much,” “Lord, I Would Follow Thee,” “Have I Done Any Good?” (Serenilotu, naba 219, 220, 223).

• Na vidio ena LDS.org: “Welfare Facilities––Bishops’ Storehouse,” “The Labor of His Hands,” “Thanks Be to God,” and “Fast Offerings: Are We All Not Beggars.”

• Ulutaga ni Kosipeli, “Welfare,” topics.lds.org.

Eda rawa ni vakarawarawataka noda kila meda bulataka na kosipeli.

E vakavulica o Peresitedi Dieter F. Uchtdorf:

“Kemuni na taciqu kei na ganequ, na bulataki ni kosipeli e sega ni gadrevi me dredre.

“E vakadodonu sara tu ga. E rawa ni vakamacalataki ga vaqo:

• “Ni rogoci na vosa ni Kalou ena inaki gumatua ena vakavuna noda vakabauta na Kalou ka nuitaka na Nona yalayala.

• “Na levu ga ni noda vakanuinui vua na Kalou, na levu ni kena vakasinaiti na yaloda ena loloma ena vukuna kei keda.

• “Ena vuku ni noda lomana na Kalou, eda gadreva me da muri Koya ka veitaudonuitaka na noda ivalavala kei na Nona vosa.

• “Baleta ni da lomana na Kalou, eda vinakata me da qaravi Koya; eda vinakata me da vakalougatataka na nodra bula na tani ka vukei ira na dravudravua kei na vakaleqai.

• “Na levu ni noda lakova na sala ni bula vakatisaipeli oqo, na levu ni noda gadreva me da vulica na vosa ni Kalou.

“Ka na vaka tiko oya, na ikalawa yadua e kauti keda ki na kena e tarava ka vakasinaiti keda ena vakabauta vakalevutaki tikoga, inuinui, kei na loloma cecere.

“E totoka na kena rawarawa, ka totoka na kena yaga.

“Kemuni na taciqu kei na ganequ, kevaka o vakasamataka tiko ni kosipeli oqo e sega tiko ni vinaka vei iko, au sa sureti iko mo kalawa e muri, raica na nomu bula mai na vanua cecere cake, ka vakarawarawataka nomu cakava na bula vakatisaipeli. Vakanamata ki na ivunau, ivakavuvuli, kei na ivakavakayagataki taumada ni kosipeli. Au yalataka ni na tuberi iko ka vakalougatataki iko na Kalou ena nomu sala ki na bula vakasinaiti, ka na yaga vakavinaka cake vei iko na kosipeli.” (“E Yaga,” Ensign se Liaona, Nove. 2015, 22).

Vakatorocaketaki Noda Veivakavulici

Cakacaka vata kei na lewe ni matavuvale. “O ira era veivakauqeti kaukauwa cake ki na dua na tamata—me baleta na vinaka se ca—sai ira era tiko vata ena nona itikotiko. Ena vuku ga ni itikotiko sa yavu ni bulataki ka vulici ni kosipeli, na nomu sasaga mo vaqaqacotaka e dua na lewe ni kalasi ena mana sara ni ko cakacaka vata kei na … lewe ni matavuvale eso ” (Veivakavulici ena iVakarau ni iVakabula, 8).