Jisu Karisito

9–15 ni Sepiteba

2 Korinica 1–7

“Mo Dou Veivinakati kei na Kalou”

Ni ko wilika na 2 Korinica 1–7 ena macawa oqo, vakasamataki ira eso na lewe ni kalasi—ira era gole mai na kalasi kei ira e sega. Ena vakalougatataki ira vakacava na ivakavuvuli ena wase oqo?

Vola na Veika o Uqeti Kina

ivakatakilakila ni veiwasei

Sureta na Veiwasei

Solia na gauna ki na lewe ni kalasi mera wasea na vakasama eso a mana kina na nodra vulica na ivolanikalou.

ivakatakilakila ni veivakavulici

Vakavulica na iVunau

2 Korinica 1:3–7; 4:6–10, 17–18; 7:4–7

Noda veivakatovolei sa rawa ni vure ni veivakalougatataki.

• E rairai tiko beka e dua ena nomu kalasi e sotava tiko e dua na veivakatovolei dredre. Sa rawa me vukei ira na kalasi na veika a sotavi a vakamacalataka o Paula kei na ivakasala e solia tiko ena 2 Korinica mera vakasamataka kina na kalougata e lako mai na nodra vakatovolei. Me tekivu e dua na veivosaki, sa rawa mo kerea e dua na lewe ni kalasi me vakarau tiko mai me mai wasea me baleta na veivakatovolei kei na veivakalougatataki a yaco ena nona bula se kila beka e dua a vosota tu mai na veivakatovolei ka o vuli sara kina vakalevu. Mo qai solia ki na kalasi e vica na miniti mera taleva lesu na 2 Korinica 1:3–7; 4:6–10, 17–18; kei na 7:4–7, mera raica kina na ka a vakavulica o Paula me baleta na inaki kei na veivakalougatataki ni veivakatovolei. (Eso na ivakaraitaki ni nona veivakavulici, raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale.) Kerei ira na lewe ni kalasi mera wasea na veika era sa kunea. Sa rawa mo vakatura mera wilika e cake na tikina era raica kina e dua na ivakavuvuli ka qai wasea na ka a sotava se ivakadinadina e baleta na ivakavuvuli o ya.

• Sa rawa mo solia na gauna ki na lewe ni kalasi mera tugana na sala sa vakalougatataka kina na noda bula na veivakatovolei, oka kina na talevi lesu ni veivakavulici nei Paula ena 2 Korinica 1:3–7; 4:6–10, 17–18; kei na 7:4–7. Ena loma ni gauna oqo mera na vola na sala e rawa ni taurivaki kina na veivakavulici nei Paula ni ra sotava na rarawa ena nodra dui bula.

• Me ikuri ni veivosaki, sa rawa mo ni lagata vata na serenilotu taleitaki ni kalasi e vakadinadinataka na veivakacegui kei na veivakalougatataki e solia na Tamada Vakalomalagi kei na iVakabula ena gauna ni noda vakatovolei—me vaka na “Na Yavu Tudei” (Serenilotu, naba 43). Ni oti na lagasere, sureta na lewe ni kalasi mera raica e dua na malanivosa ena 2 Korinica 1 kei na 4 era nanuma ni veidonui kei na itukutuku ni serenilotu.

2 Korinica 2:5–11

Eda na kune kalougata ka vakalougatataki ira na tamata ni da veivosoti.

• Eda sa sotava kece na gauna ni dua a “veivakararawataki” ki na noda bula se noda matavuvale (tikina e 5). Sa rawa ki na lewe ni kalasi mera vakasaqara ena 2 Korinica 2:5–11, na ivakasala nei Paula me baleta na ka meda cakava vua e dua e vakacudrui keda. Sa rawa mo sureta na lewe ni kalasi mera taleva lesu na Luke 15:11–32; Joni 8:1–11; kei na vosa nei Elder Kevin R. Duncan (raica na “iKuri ni iVurevure”) mera kila vakalevu cake na ka meda cakava vei ira sa ivalavala ca. Eda sa vakamavoataki keda tiko vakacava kei ira na tamata ni da sega ni via veivosoti?

2 Korinica 5:14–21

Ena Veisorovaki i Jisu Karisito, sa rawa meda veivinakati tale kei na Kalou.

• E vuqa na tamata era gole mai ki lotu ena gagadre mera toro voleka vua na Kalou, ka me veivosakitaki 2 Korinica 5:14–21 rawa ni vukei ira. Me tekivutaki, sa rawa ki na lewe ni kalasi mera dikeva na ibalebale ni vosa veivinakati tale, ka vinaka me raici mada na vosa oqo ena ivolavosa. Na veivakararamataki cava e vakarautaka oqo baleta na veivinakati tale kei na Kalou? Na ikuri ni veivakararamataki cava eda na rawata mai na vosa “na Veisorovaki” ena ivolavosa ni iVola Tabu vakavalagi? E vukei keda vakacava na veivakararamataki oqo meda kila vinaka kina na 2 Korinica 5:14–21? Sa rawa mo sureta na lewe ni kalasi mera wasea na nodra nanuma baleta na iVakabula, a rawa kina na nona Veisorovaki meda laki duavata tale kei na Kalou.

2 Korinica 7:8–11

Na rarawa va-Kalou e veimuataki ki na veivutuni.

• E tiko ena2 Korinica 7:8–11 e dua na ivakamacala veivukei baleta na rarawa vakalou kei na kena itavi ena veivutuni. Na cava eda vulica baleta na rarawa vakalou mai na 2 Korinica 7:8–11 kei na vosa nei Peresitedi Dieter F. Uchtdorf ena “iKuri ni iVurevure”? Na cava e bibi kina na rarawa vakalou ki na veivutuni?

• Ena ka marautaki me vakayaloqaqataki e dua na veivosaki raraba baleta na veivutuni. Ke sa vakakina, sa rawa mo cakava oqo: Vola ena papa Na veivutuni sai koya na . Kerea na lewe ni kalasi mera vakasaqara na sala me vakacavari kina na malanivosa oqo, ni ra vakayagataka na veika era vulica mai na 2 Korinica 7:8–11, vakakina mai na ivolanikalou kei na ivurevure tale eso e tiko ena “iKuri ni iVurevure.” Era na vakayagataka vakacava na ivakavuvuli oqo mera vukea kina e dua me kila vinaka na ivakarau ni veivutuni dina?

ivakatakilakila ni vuli

Vakayaloqaqataka na Vuli e Vale

Tarogi ira na lewe ni kalasi kevaka era sa bau masulaka mada me vagalalataki e dua na veivakatovolei se rarawa. Era na kunea ena 2 Korinica 8–13, na ka a cakava o Paula ni a masulaka na ka oqo ka qai sega ni saumi mai na nona masu ena sala a namaka o koya.

ivakatakilakila ni ivurevure

iKuri ni iVurevure

2 Korinica 1–7

Na noda raici ira na tamata me vaka e raici ira na Kalou ena vukea meda veivosoti.

E vakavulica o Elder Kevin R. Duncan: “E dua na idola ni noda vosoti ira na tani sai koya me da tovolea me da raici ira me vaka na nona raici ira na Kalou. Ena so na gauna, e rawa ni dolava na ilati na Kalou ka vakalougatataki keda ena isolisoli me da raica na utona, lomana, kei na yalona e dua tale na tamata a vakacudrui keda. Na rai oqo e rawa ni vakavuna e dua na loloma vuabale me baleta na tamata o ya” (“Na iLumu Veivakabulai ni Veivosoti,” Ensign se Liaona, Me 2016, 34).

Na rarawa vakalou e vakauqeta na veisau kei na inuinui.

E vakamacalataka o Peresitedi Dieter F. Uchtdorf:

“Na rarawa sa vaka na loma ni Kalou e vakauqeta na veisau kei na inuinui ena kaukauwa ni Veisorovaki i Jisu Karisito. Na rarawa vakavuravura ena dreti keda sobu, bokoca na inuinui, ka vakauqeti keda meda soli keda yani meda temaki tikoga.

“Na rarawa sa vaka na loma ni Kalou e veimuataki ki na saumaki mai kei na veisau ni yalo. E vakavurea meda cata sara na ivalavala ca ka taleitaka na valavala dodonu. E vakauqeti keda meda tucake ka lako voli ena rarama ni loloma i Karisito. Na veivutuni dina sai koya na veisau, e sega ni rarawa vakayago se rarawa ni vakasama” (“O Sa Na Rawata ena Gauna Oqo!” Ensign se Liaona, Nove. 2013, 56).

Na cava na veivutuni?

• Isikeli 18:30–31

• Mosaia 3:19; 5:2

• Alama 5:11–21; 42:29–30

• 3 Nifai 9:13–14, 20–22

• Vunau kei na Veiyalayalati 58: 42–43

• Bible Dictionary, “Repentance”

• “Repentance,” Ulutaga ni Kosipel, topics.lds.org

• Dale G. Renlund, “Veivutuni: Dua na Digidigi Rekitaki,” Ensign se Liaona, Nove. 2016, 121–24

E vakavulica o Elder Neil L. Andersen:

“Ni da caka cala, eda sa vuki tani mai Vua na Kalou. Ni da veivutuni, eda sa lesu vua na Kalou.

“Na veisureti ni veivutuni e sega ni domo ni veicudruvi, ia e kerekere ni loloma mo saumaki ka ‘lesu tale’ vua na Kalou [raica na Ilamani 7:17]. Sa veivakayarayarataki ni Tamada dauloloma kei na Luvena e Duabauga meda vinaka cake, meda vueta cake na ituvaki ni noda bula, meda veisau, ka vakila na marau ni kena bulataki na ivunau. Ni da tisaipeli i Karisito, eda marautaka na veivakalougatataki ni veivutuni kei na reki ni da sa vosoti. Era sa na tiki ni noda bula, me bulia na ivakarau ni noda vakasama kei na ka eda vakila. …

“Vei ira e vuqa, na veivutuni e vaka e dua na ilakolako ka sega ni ka ga ni dua na gauna. Ena sega ni ka rawarawa. E bau dredre toka na veisau. E vaka na saqata na matanicagi, se qalova cake na uciwai. A tukuna o Jisu, “Kevaka e dua sa via muri au, me kakua ni muria na lomana, ia me colata na nona kauveilatai, ka muri au” (Maciu 16:24 Na veivutuni sai koya na vukitani mai na so na ka me vaka na cakacaka vakailawaki, dokadoka, cudrucudru, kei na vakasama dukadukali, ka vakanamata yani ki na veika me vaka na dauloloma, nanumi ira na tani, yalomalua, kei na bula vakayalo. O ya na ‘lesu tale’ vua na Kalou” (“Dou Veivutuni … Meu Vakabulai Kemudou,” Ensign se Liaona, Nove. 2009, 40–41).

Vakatorocaketaki Noda Veivakavulici

Oka kina o ira era sasaga bula tiko. Eso na gauna era gadreva na lewe ni kalasi era sasaga bula tiko mera bau lomani talega. Sa rawa mo lesi ira mera na vakaitavi ena lesoni e tarava. Kakua ni yalolailai kera sega ni kauwai taumada mai ki na nomu sasaga. (Raica na Veivakavulici ena iVakarau ni iVakabula, 8–9.)