2–8 ni Sepiteba

1 Korinica 14–16

“Ni sa Sega ni Vu ni Veisei na Kalou, sa Vua ni Vakacegu Ga.”

Ni bera ni talevi lesu na ituvatuva oqo, wilika na 1 Korinica 14–16. Vola na veika o a uqeti taumada kina baleta na dina ena vukei ira nomu lewe ni kalasi, ka tomana nomu vakasaqara na ikuri ni veidusimaki ni Yalo ena loma ni macawa.

Vola na Veika o Uqeti Kina

Sureta na Veiwasei

Solia e vica na miniti ki na lewe ni kalasi mera taleva lesu na 1 Korinica 14–16 ka raica e dua na tikina era nanuma ni vakaibalebale cake. Sureti ira mera raica e dua ena kalasi mera na wasea kina na nodra tikina ka vakamacalataka na vuna era digitaka kina

Vakavulica na iVunau

1 Korinica 14

Ni ra soqoni vata na Yalododonu, sa dodonu mera veivakatatataki cake vakai ira.

• Sa rawa mo vakayagataka na ivakavuvuli nei Paula ena 1 Korinica 14 me veivakananumi vei ira na lewe ni kalasi ni sa rawa meda veivakatatataki cake vakataucoko—se veitokoni ka veilaveti—vakai keda ena gauna ni lotu. Dua na sala rawarawa me talevi lesu kina na wase oqo o ya me volai ena vava e dua na taro, e vakaoqo Na cava meda lalawataka ni da dau soqoni vata? Sureta na lewe ni kalasi mera vakasaqara na isaunitaro ena 1 Korinica 14. Ena rawa me kunei na vakasama tale eso ena Moronai 6:4–5 kei na Vunau kei na Veiyalayalati 50:17–23. Ni ra sa wasea na kalasi na veika era sa kunea, sa rawa mo taroga na nodra nanuma baleta na sasaga tiko ni kalasi me rawata na lalawa oqo. Sa rawa mera wasea talega na gauna era a vakila ni ra vakatatataki cake ena dua na ka a wasea e dua na lewe ni kalasi.

• Ni gadrevi mera vukei na lewe ni kalasi mera kila vinaka na ivakasala nei Paula ni sa dodonu mera vakasaqara mera parofisai, mo qai kerea mera tukuna na ibalebale ni vosa parofisai. Sa rawa vei iko se lewe ni kalasi mo ni vola na ibalebale yadua oqori ena vava ka talevi lesu vata na ibalebale ni parofisai ena iDusidusi ki na iVolanikalou kei na ivakasala nei Paula ena 1 Korinica 14:3, 31, 39–40. Na cava eda rawa ni vakuria ki na noda ibalebale mai na veiivurevure oqo? (Raica talega na Ai Vakatakila 19:10.) Na cava eda sa vakauqeti kina meda cakava e na lotu vakakina e vale ena vuku ni ivakavuvuli nei Paula?

1 Korinica 15

Baleta ga ni sa tucaketale o Jisu Karisito, eda na tucaketale vakakina.

• Ena sala cava mo na vakayagataka kina na ivakadinadina nei Paula ena 1 Korinica 15 me vaqaqacotaki kina na nodra ivakadinadina na lewe ni kalasi baleta na Tucaketale? Dua na sala o ya me wasei na kalasi ki na rua na ilawalawa ka kerea e dua na ilawalawa me raica na 1 Korinica 15 me baleta na revurevu ni ka eda na sotava kevaka a sega ni tucaketale o Jisu Karisito. Na ikarua ni ilawalawa me ra raica na veivakalougatataki eda sa ciqoma baleta ni sa Tucaketale o Koya. Mera qai vola na ilawalawa yadua ena vava na veika era sa vulica. Na cava era rawa ni kuria ki na lisi o ya ni ra wilika oti na itukutuku nei Elder D. Todd Christofferson ena “iKuri ni iVurevure”? Me vukei mera vakila na kalasi na Yalo Tabu ena gauna ni veivosaki oqo, sa rawa mo vakaraitaka toka e dua na iyaloyalo ni iVakabula sa tucaketale (raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale).

• Me baleta ga ni a vosa tiko o Paula vei ira na tamata era sega ni vakabauta na tucaketale, ena yaga ki na nomu kalasi mera dramataka na ituvaki vata vakaoqo. Me vakataka, era na vaqaqacotaka vakacava edua na tamata era lomana ena nona vakabauta kina na Tucaketale? Na cava era sa raica na lewe ni kalasi ena 1 Korinica 15 ena vukei ira mera vakamacalataka na kena gadrevi kei na ivakadinadina ni Tucaketale i Jisu Karisito? Na ivolanikalou cava tale e rawa ni ra vakayagataka? (Raica, me vakataka na, Luke 24:1–12, 36–46; Alama 11:42–45.)

• E tukuna tiko vakavica o Paula na tolu na matanitu lagilagi tucaketale ena nona ivola (raica na 1 Korinica 15:40–42 kei na 2 Korinica 12:1–2). Me vukei na nomu kalasi mera kunea na kena vakabibitaki na ivakatakila ni gauna oqo ena ivakavuvuli nei Paula, mo wasea na kalasi ki na tolu na ilawalawa ka solia ki na ilawalawa yadua e dua na tiki ni pepa e vaka na matanisiga (V&V 76:50–70), na vula (V&V 76:71–80), se dua na kalokalo (V&V 76:81–89). Sureti ira mera wilika na veiivolanikalou veisemati mai na Vunau kei na Veiyalayalati 76 ka wasea na ka eda gadreva meda ciqoma kina na duidui lagilagi oqori e tukuna tiko o Paula. Raica talega na Vunau kei na Veiyalayalati 131:1–4; 137:7–10.

  

  “Sa duatani nai ukuuku ni matanisiga” (1 Korinica 15:41).

• Na1 Korinica 15 sa dua na tikina e vica ena ivolanikalou e tukuni tiko kina na papitaiso ena vukudra na mate (raica na tikina e 29; raica talega na V&V 128:18). Sa rawa talega ki na kalasi mera wasea na gauna era a cakava kina na papitaiso kei na cakacaka vakalotu eso me baleti ira nodra qase e liu. Sa rawa mo wasea na veika a sotava o Wilford Woodruff ena “iKuri ni iVurevure” me tiki ni veivosaki. Cava na vuna e tukuna tiko kina o Paula na nodra papitaisotaki na mate me ivakadinadina ni Tucaketale? Ke na veivuke ki na veivosakitaki na vuna e dodonu mera papitaiso kina na mate, raica na “Baptisms for the Dead,” Ulutaga ni Kosipeli, topics.lds.org. E vakamacalataka na vidio “Glad Tidings: The History of Baptisms for the Dead” (LDS.org) na kena vakalesuimai na ivakavuvuli oqo ena noda gauna oqo.

Vakayaloqaqataka na Vuli e Vale

Kerea na kalasi mera vakasamataka na veivakatovolei era sa sotava tiko se na malumalumu e tiko vei ira. Vakamacalataka ni ra wilika na 2 Korinica, era na vulica na veika a vukei Paula me vosota rawa na veivakatovolei kei na sala a raica kina na nona malumalumu.

iKuri ni iVurevure

1 Korinica 14–16

Na Bibi ni Tucaketale

E vakavulica o Elder D. Todd Christofferson:

“Vakasamataka mada vakamalua na vakasakiti ni Tucaketale ena kena vakameautaka vakaoti sara na ivakatakilakila dina i Jisu na kai Nasereci kei na veiqati kei na taro vakavuku eso lelevu ni bula. Kevaka a tucake tale vakaidina saraga o Jisu, e vakamuria koto vakadodonu ni o Koya e sa dua na tamata bula vakalou. E sega tale ni dua na tamata e tu vua na kaukauwa vakaikoya me mai bula tale ni sa mate oti. Baleta ni a tucaketale o Koya, o Jisu a sega ni rawa walega ni mai matai, qasenivuli, ivakavuvuli, se dua na parofita. Baleta ni a tucaketale o Koya, sa dodonu me a dua na Kalou o Jisu, io na Luvena Duabauga sa Vakatubura na Tamada.

“Ia, na ka a vakatavulica o Koya e sa dina; Sa sega ni rawa ni lasu na Kalou.

“Ia, o Koya na Dauveibuli kei vuravura, me vaka a tukuna o Koya.

“Ia, sa ka dina o lomalagi kei eli, me vaka a vakatavulica o Koya.

“Ia, sa dua tiko na vuravura ni yalo, ka a sikova o Koya ni oti na Nona mate.

“Ia, ena lako tale mai o Koya, me vaka erau tukuna na agilosi, ka “vakatulewa vakatakikoya e vuravura taucoko.”

“Ia sa dua tiko na tucaketale kei na icavacava ni veilewai me baleti keda taucoko” (“Na Tucaketale i Jisu Karisito,” Ensign se Liaona, Me 2014, 113).

Na cakacaka vakalotu baleti ira na mate: “Na rarama momoto e siro mai na itikotiko vakatui ni Kalou.”

Oqo e qai matai ni gauna me rogoca kina o Elder Wilford Woodruff ni rawa vei ira na lewe ni Lotu bula me ra ciqoma na cakacaka tabu ni veivakabulai ena vukudra na tubudra ka ra sa yali yani, ka kaya “E vaka sara ga e dua na rarama momoto ki na utoda mai na itikotiko vakatui. E dolava e dua na rara rabailevu ka vaka na tawamudu ki na noda vakasama.” E kaya talega: “E kena irairai vei au ni o koya na Kalou ka vakaraitaka na ivakavuvuli o ya vua na tamata e vuku, dina ka dodonu, ka tu ruarua vua na ivakaraitaki vinaka duadua kei na vakasama vinaka kei na kila. Au vakila ni tu ruarua vua na na loloma, loloma veivueti, dodonu kei na lewa, kau vakila ni dodonu meu lomana vakalevu sara na Turaga me vaka au se sega vakadua ni vakayacora ena noqu bula. … Au vakila niu via kaya aleluia ni sa yaco mai na ivakatakila ka vakarautaki mai kina vei keda na nodra papitaiso na mate. …”

“Na imatai ni ka e curu mai ena noqu vakasama,” e a kaya, “sai koya ni tiko e dua na tinaqu mai na vuravura ni yalo. E a mate niu se qai vula 14. …” E a qai tukuna e muri, me baleta na gauna sa qai rawata kina na isolisoli me vauci tinana vei tamana: “Ena dua ko koya na tiki ni imatai ni tucaketale; ka sai koya duadua ga oqo me na isau ni noqu sasaga ena bula oqo” (Nodra iVakavuvuli na Peresitedi ni Lotu: Wilford Woodruff, [2011], 185–86).

Vakatorocaketaki Noda Veivakavulici

Mo na kilai ira o vakavulica tiko. E sega ni rau tautauvata e rua na tamata; na tamata yadua e duatani nodra tubucake mai, inakinaki, kei na taledi eso. Masulaka mo kila na sala cava mo vakayagataka kina oqo mo cokonaki ira o vakavulica. Ni ko kilai ira vinaka o vakavulica, o na tauyavutaka kina na veigauna ni veivakavulici e vakaibalebale cake ka taleitaki me baleti ira (raica na Veivakavulici ena iVakarau ni iVakabula, 7).