era sara itaba na matavuvale

30 ni Sepiteba–13 ni Okotova

Efeso

“Mera Vakavinakataki Kina ko Ira sa Lotu”

Ena yaco mai na vakasama kei na veivakauqeti baleta na cava kei na sala mo veivakavulici kina ni ko vulica ena masumasu na Efeso, na vosa ni koniferedi sa oti, na ituvatuva oqo, kei na Lako Mai, Mo Muri Au—Me Baleta na Tamata Yadua kei na Matavuvale.

Vola na Veika o Uqeti Kina

ivakatakilakila ni veiwasei

Sureta na Veiwasei

Sa rawa mo sureta na lewe ni kalasi mera vola ena dua na yatuvosa na isoqoni ni dua na ka era sa vulica ena macawa oqo ka qai vakabira na isoqoni oqo ki na papa. Digitaka e vica na isoqoni oqo, ka sureta na lewe ni kalasi era a vola mera wasea na nodra nanuma.

ivakatakilakila ni veivakavulici

Vakavulica na iVunau

Efeso 2:19–22; 4:4–8, 11–16

O ira na parofita kei na apositolo—kei keda taucoko—eda sa vaqaqacotaka ka vakaduavatataka na Lotu.

• E rawa beka mo tara cake vata kei nomu kalasi e dua na ka me vakaraitaka ni Lotu sa “tara cake e na nodra yavu nai apositolo kei na parofita” ka sa “kenai vakadei e na tutu ni vale” na iVakabula? (Efeso 2:20). Sa rawa talega ki na lewe ni kalasi mera dregata vata na buloko se bilo pepa ka tuvanaki ira me dua na valececere se piramidi, kei Jisu Karisito kei ira na parofita mera kena yavu. Mo qai vakaraitaka na cava ena yaco ke sa kau tani na Karisito se ira na apositolo kei na parofita. Na cava e vosa vakaibalebale vinaka kina na ivakadei ena tutu ni vale me baleti Jisu Karisito kei na Nona ilesilesi ena Lotu? (Me baleta na ivakamacala ni ivakadei ena tutu ni vale, raica na “iKuri ni iVurevure.”) Mera vakasaqara na kalasi ena Efeso 2:19–22; 4:11–16 na veivakalougatataki eda sa ciqoma baleti ira na apositolo, parofita, kei na iliuliu tale eso ni Lotu. Na cava eda rawa ni cakava meda tara cake kina na noda bula ena nodra ivakavuvuli?

  vatu ivakadei ni valetabu

  Sa vatu ivakadei ni Lotu o Jisu Karisito.

• Me vakaraitaki na sala e dau rawa ni lecavi kina na vunau ni sega nodra dau veidusimaki na parofita kei na apositolo, sa rawa mo cakava e dua na qito o ya mo talanoa vakalekaleka vua e dua na lewe ni kalasi ka me kua ni dua e rogoca. Mo qai sureta na lewe ni kalasi me tokaruataka na italanoa ki na dua tale na lewe ni kalasi ka tomani yani na italanoa ki na so tale vakayadudua. Mo qai kerea na iotioti ni tamata a rogoca na italanoa me tukuna ki na vo ni kalasi na ka a rogoca. A veisau beka na matata ni italanoa? Na cava beka a rawa ni yaco ke a vakadodonutaka tiko o qasenivuli na cala ena gauna ni talanoa? Na cava e vakavulica vei keda na itaviqaravi oqo na vuna e gadrevi kina na Lotu i Karisito me “tara cake ena nodra yavu na apositolo kei na parofita”?

• Kera a vakarorogo na nomu lewe ni kalasi ki na koniferedi raraba ena iotioti ni gauna ni a sota kina, sureti ira mera wasea na kena a veivuke na veika a vakavulici ena koniferedi me vakayacori kina na inaki e tukuni tiko ena Efeso 4:11–16.

• Sa rawa mo solia e dua na gauna ki na lewe ni kalasi mera vola eso na “cakacaka” se ilesilesi era sa kacivi kina mera vakayacora ena lotu (raica na Efeso 4:1)—me vakataka, na dauveituberi se dauveisiko ni vuvale, dua na itubutubu, dua na tisaipeli i Karisito, kei na so tale. Mera na qai veisau ivola vaka-lewe ni kalasi, wilika na Efeso 4:4–8, 11–16, ka wasea na sala sa veivuke kina na veikacivi kei na ilesilesi ena nodra ivola me vakatataki kina na yagoi Karisito. Eda na cakacaka vata vakacava meda sa duabau ni “sa dua bauga na Turaga, sa dua bauga na vakabauta, sa dua bauga na veipapitaisotaki”?

Efeso 5:22–6:4

Ni da muria na ivakaraitaki ni iVakabula ena vaqaqacotaka na veiwekani vakamatavuvale.

• E dina ga ni ra bulataka tu na kai Efeso e dua na itovo ka sega ni ra dau okati kina vakatautauvata na marama kivei ira na watidra, na ivola oqo era tu kina eso na ivakasala momona me baleti ira na veiwatini ena gauna oqo. Sa rawa mo vola na taro vakaoqo ena papa ka sureta na kalasi mera veivosakitaka ni ra wilika vakailawalawa na Efeso 5:22–33 : A vakaraitaka vakacava na Karisito na Nona lomana na Lotu? Na cava eda rawa ni cakava meda muria kina na Nona ivakaraitaki ena noda itovo vei ira na watida? Sa rawa mo sureta na lewe ni kalasi mera wasea na ivakaraitaki era sa raica kina eso na veiwatini ni sa Vakarisito na nodrau veimaliwai. Eda na vakayacora vakacava na ivakavuvuli oqo ki na veimaliwai vakamatavuvale tale eso?

• Me vaka na ivakasala nei Paula “mo vakarokoroko vei rau na tamamu kei na tinamu” (Efeso 6:2) a baleti ira na gone, sa baleti keda yadua talega, se cava ga na yabaki ni noda bula se ituvaki ni matavuvale. Sureta na lewe ni kalasi mera vakasamataka na sala mera na bulataka kina na ivakasala nei Paula ena Efeso 6:1–3 ki na nodra ituvaki ni bula. Me vakataka, eda na rokovi ira vakacava na noda itubutubu ke sega mada ga ni veidonui na nodra digidigi ki na ivakavuvuli i Jisu Karisito? Sa rawa mo solia e vica na miniti ki na lewe ni kalasi mera vola na ka era na cakava mera rokovi ira vinaka cake na nodra itubutubu.

• Ke ra tiko ena nomu kalasi eso na itubutubu—se ira mera na qai itubutubu—ni gonelalai, ena vinaka vei ira na veivosaki oqo ni Efeso 6:4. Na cava na ibalebale ni nodra susugi cake na gone “ena vunau kei nai vakavuvuli ni Turaga”? Sa rawa ki na lewe ni kalasi sa qase cake na luvedra mera wasea na ibalebale ni ka oqo vei ira kei na sala era sa saga tiko kina mera bulataka na ivakasala oqo ki na nodra matavuvale.

Efeso 6:10–18

Na iyaragi ni Kalou ena taqomaki keda mai na veika butobuto.

• Na cava ena vakauqeta na lewe ni kalasi mera saga mera daramaka na iyaragi taucoko ni Kalou ena veisiga? Sa rawa mo vakarautaka e dua na itaviqaravi era na semata donu kina na kalasi na veitiki ni iyaragi ki na ivakavuvuli se bula dodonu era matataka ena Efeso 6:14–17. Ena veivuke vakacava na veitiki yadua ni yaragi me taqomaki keda mai na veika butobuto? (Ena vuku ni veivuke, raica na “iKuri ni iVurevure.”) Era sa daramaka beka vakacava na lewe ni kalasi na iyaragi oqo? Me tiki ni veivosaki oqo, sa rawa mo wasea na ivakamacala nei Peresitedi N. Eldon Tanner e tiko ena “iKuri ni iVurevure.” Na cava eda rawa ni cakava meda kila ka vaqaqacotaka na malumalumu e tiko ena noda iyaragi?

ivakatakilakila ni vuli

Vakayaloqaqataka na Vuli e Vale

Mera vakauqeti na lewe ni kalasi mera wilika na Filipai kei na Kolosa, sa rawa mo tukuna vei ira ni dua vei ira na Yavu ni Vakabauta e yavautaki tiko ena dua na tikina e tiko ena dua vei rau na ivola oqo. Era na kunea beka ena nodra vuli ena macawa oqo?

ivakatakilakila ni ivurevure

iKuri ni iVurevure

Efeso

Na cava na vatu ivakadei?

Na vatu ivakadei sai koya na isevu ni vatu e vakadavori ena yavu. Sa kena inaki me idusidusi ki na levu kei na vakatikori ni vatu tale eso, ni sa dodonu mera veidonui kei na vatu ivakadei. Ena vuku ga ni taura tu na bibi ni vale, na vatu ivakadei e dodonu me kaukauwa, tudei, ka nuitaki (raica na “The Cornerstone,” Ensign, Jan. 2016, 74–75).

Na iyaragi ni Kalou.

Vauci na tolomudou ena lomadina: Na tiki ni iyaragi sa vaka na beleti e vesuki ena tolo. Na vosa vauci e kena ibalebale talega na vaqaqacotaki, vakaukauwataki, se vakatokonitaki.

Peleti ni Sereda:Na peleti ni sereda e taqomaka na uto kei na gacagaca bibi tale eso.

Vakaivava na yavamudou:Oqo e tukuna tiko na iubi veitaqomaki ni yavadra na sotia.

Sasabai:Na isasabai ena rawa me taqomaka na tiki ni yago cava ga mai na veimataqali ravuravu cava ga.

iSala:Na isala e taqomaka na uluda.

Seleiwau:Na seleiwau eda na valuta kina na meca.

“Vakadikeva na nomu iyaragi.”

A veisureti o Peresitedi N. Eldon Tanner, ka a veiqaravi vaka-daunivakasala ena Mataveiliutaki Taumada, vei ira na lewe ni Lotu mera dikeva mada na kaukauwa ni nodra yaragi ena nodra tugana na nodra sasaga mera bula voli ena kosipeli. A qai vakamacalataka:

“Kevaka … sa malumalumu na noda yaragi, e dua na tikina e sega tu ni taqomaki, e dua na tikina malumalumu ena ravuti, eda sa qai rawa ni vakamavoataki se vakarusai maivei Setani, ni na vakasaqara tikoga me yacova sa kunea na noda malumalumu, ke tiko vei keda.

“Vakadikeva na nomu iyaragi. E tiko beka e dua na tikina e sega tu ni yadravi se taqomaki tu? Vakadeitaka rawa oqo mo semata na tikina e yali tiko. Se cava sara na kena sa vakacacani se luluqa tu na tiki eso ni nomu yaragi, mo nanuma tiko ni sa tu ga vei iko na kaukauwa mo cakava ka veisautaka me taucoko kina na nomu yaragi.

“Ena vuku ni ivakavuvuli cecere ni veivutuni sa rawa me saumaki mai na nomu bula ka tekivu mo vakaisulutaki iko ena yaragi ni Kalou ena vulica na ivolanikalou, masumasu, ka vakadeitaka mo qarava na Kalou ka maroroya na Nona vunau” (“Put on the Whole Armor of God,” Ensign, May 1979, 46).

Vakatorocaketaki Noda Veivakavulici

Saga na loloma sa Vakarisito. Na nomu veimaliwai kei ira na tamata o vakavulica e dodonu me mua ga ena loloma. O iko kei ira na vuli tiko o ni na vakalougatataki ni ko ni masulaka mo ni tara cake na loloma sa Vakarisito ka vakasaqara na sala mo ni vakaraitaka kina (raica na Veivakavulici ena iVakarau ni iVakabula, 6; Moronai 7:48).