E vola tiko o Paula e dua na ivola mai valeniveivesu

14–20 ni Okotova

Filipai; Kolosa

“Au sa Rawata na Ka Kecega ena Vuku i Karisito o Koya sa Vakaukauwataki Au”

Tekivu ena nomu wilika na Filipai kei na Kolosa, ka tugana ena masumasu na vunau e gadreva na Turaga mo na vakavulica. Me na dusimaki iko na Yalo ni ko vakasamataka na taro kei na ivurevure o na vakayagataka mo vakavulica kina na vunau oqo.

Vola na Veika o Uqeti Kina

ivakatakilakila ni veiwasei

Sureta na Veiwasei

Sureta na lewe ni kalasi mera vola ena vava e dua na vosa se malanivosa e vakamacalataka vakalekaleka na veika era sa vulica mai na Filipai kei na Kolosa ka vakamatatataka na nodra digidigi. Vakayaloqaqataki ira mera wasea na tiki ni ivolanikalou me tiki ni nodra ivakamacala.

ivakatakilakila ni veivakavulici

Vakavulica na iVunau

Filipai 2:1–5, 14–18; 4:1–9; Kolosa 3:1–17

Era sa yaco na tisaipeli i Jisu Karisito mera tamata “vou” ni ra bula ena Nona kosipeli.

• Sa rawa mo vukea na nomu lewe ni kalasi mera raitayaloyalotaka na ibalebale ni “luvata tu na tamata makawa” ka “dou sa vakasuluma oqori sa vou” mai vei Jisu Karisito (Kolosa 3:9–10). Me caka oqo, sa gadrevi mo vakaraitaka e dua na ka e makawa ka dua e ka vou (me vakataka na vuata dreu sivia kei na ka bulabula se isulu makawa kei na kena ka vou). Sa rawa ki na lewe ni kalasi mera veivosakitaka na sala eda rawa ni tamata “vou” kina ni da vakabauti Jisu Karisito ka sa lomada meda bula voli ena Nona kosipeli. Me tiki ni veivosaki oqo, sa rawa mo kerea e veimama ni kalasi me ra vulica na Filipai 2:1–5, 14–18; 4:1–9 kei na ikarua ni veimama me ra vulica na Kolosa 3:1–17, ka raica kina na ivakarau ni “tamata makawa” kei na “tamata vou.” Sa rawa mo sureta e vica na lewe ni kalasi mera wasea na sala a vukei ira kina na vakabauti Jisu Karisito kei na bulataka na Nona kosipeli mera tamata vou kina. Na ivolanikalou tale eso e rawa mo vakadikeva e oka kina na Roma 6:3–7; Mosaia 3:19; kei na Alama 5:14, 26.

Filipai 4:1–13.

Eda rawa ni kune reki vei Karisito, se cava ga na ituvaki ni noda bula.

• E dina ga ni duidui na noda bula maivei Paula, sa rawa meda vuli taucoko mai na nona gadreva me tiko vakacegu ka reki tiko ena ituvaki kece ni nona bula. Me tekivu na veivosakitaki ni ulutaga oqo, sa rawa mo taleva lesu eso na veivakatovolei a sotava o Paula (raica, me vakataka, na 2 Korinica 11:23–28). Mo qai kerea na lewe ni kalasi mera taleva lesu na Filipai 4:1–13 mera raica na ivakasala i Paula a solia ena rawa me vukei keda meda reki, ena gauna mada ga ni veivakatovolei.

  Kevaka e gadrevi me tomani na vakadikevi ni ulutaga oqo, sa rawa mo kerea e dua na lewe ni kalasi me wasea eso na ivakamacala se itukutuku veivakauqeti mai na vosa nei Peresitedi Russell M. Nelson “Reki kei na Bulabula Vakayalo” (Ensign se Liaona, Nove. 2016, 81–84), se mera sarava na kalasi na vidio “Trial of Adversity” (LDS.org). Era a kune reki vakacava na tamata era tukuni tiko ena vosa nei Peresitedi Nelson se na marama ena vidio, se cava ga na dredre ni nodra bula?

• Sa rawa ki na lewe ni kalasi mera kunea na ivakasala e tiko ena Filipai 4 ka na rawa me veivuke ni ra sotava na veivakatovolei. Sa rawa mo solia ki na lewe yadua ni kalasi e dua na kadi ni itukutuku mera na vola kina na veika era na raica. Kerea mera na biuta toka ena vanua mera raica kina ni ra gadreva.

• Eso na gauna ena veilaveti na serenilotu meda kila vinaka kina na ivolanikalou. Me vakataka, ni sa wiliki oti na Filipai 4:7, 13, sa rawa mo ni lagata vata na “Where Can I Turn for Peace?” se na imatai ni qaqani “Lord, I Would Follow Thee” (Serenilotu, naba. 129, 220). Na isema cava era sa raica na lewe ni kalasi ena qaqani sere e rua oqo kei na Filipai 4:7, 13? Sa rawa mera wasea talega na gauna era a vakila kina “na vakacegu ni Kalou, ka uasivita na ka kece ga e kilai vakavinaka” se ena gauna era a vakila ni ra sa vakaukauwataki “ena vuku i Karisito” mera rawata kina e dua na ka a sega ni rawata mera cakava ena sala cava ga. Ena rawa me veivuke na ka a sotava o Elder Jay E. Jensen, e tiko ena “iKuri ni iVurevure,” me vakauqeta na veivosakitaki ni veitikina oqo.

• Ena vuku ni sa tubu cake tikoga na veika tawakilikilia e vuravura nikua, O ira na leweni kalasi na ivakasala nei Paula o ya mera “nanuma” na veika sa savasava, e daulomani, rogorogo vinaka, dodonu, se na ka me dokai (Filipai 4:8). Sa rawa mo lesia ki na lewe yadua ni kalasi (se ilawalawa lalai ni lewe ni kalasi) e dua na yavubula era tiko ena Filipai 4:8 se Yavu ni Vakabauta 1:13. Sa rawa mera vakayagataka na iDusidusi ni Ulutaga mera raica kina na ivolanikalou me baleta na nodra ilesilesi ni yavubula ka wasea ki na kalasi na ka era sa kunea. Sa rawa mera wasea talega na ivakaraitaki ni yavubula o ya ena nodra bula na tamata. Eda na “vakasaqara vakacava na veika vakaoqo”?

Kolosa 1:12–23; 2:3–8

Ni sa “tudei” na noda vakabauta vua na gone turaga ko Jisu Karisito , eda sa vaqaqacotaki meda vorata na veivakauqeti vakavuravura.

• Na ivakadinadina i Paula baleta na iVakabula e tiko ena Kolosa 1:12–23; 2:3–8 sa madigi vinaka vei ira na lewe ni kalasi mera tugana ka vaqaqacotaka na nodra dui vakabauta. Sa rawa ki na lewe ni kalasi mera vakasaqara na veitiki ivolanikalou oqo me kunei kina na veika ena vaqaqacotaka na nodra vakabauti Jisu Karisito. Na cava na ibalebale me da “tauyavutaki ka tarai cake vei [Jisu Karisito]”? (Kolosa 2:7). Na iyaloyalo ni dua na vunikau ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale kei na vidio “Spiritual Whirlwinds” (LDS.org) ena rawa me vukea na lewe ni kalasi mera veivosakitaka na tikina oqo. (Raica talega na Neil L. Andersen, “Covulaca Vakayalo,” Ensign se Liaona, Me 2014, 18–21.) Na cava e rawa ni vakaukauwataka se vakamalumalumutaka na waka ni vunikau? Ena vaqaqacotaki keda vakacava ni da sa “tudei ka tarai cake vei [Jisu Karisito]” meda vorata rawa na veivakauqeti vakavuravura? (raica na Kolosa 2:7–8; raica talega na Ilamani 5:12; Ica 12:4).

• Era sa na kila tiko beka na nomu lewe ni kalasi na nodra filosofi kei na ivakavuvuli na tamata ena rawa me “vakacacana” na nona vakabauti Jisu Karisito e dua na tamata baleta ni ra veisaqasaqa ki na kosipeli dina ka cakava me dredre sara na bulataki ni kosipeli (Kolosa 2:8). Sa rawa vei ira na lewe ni kalasi mera vola eso na kena oqo (e rawa ni veivuke na vakasama oqo e vakatura tiko o Elder Dallin H. Oaks, era tiko ena “iKuri ni iVurevure,”). Mo ni qai veivosakitaka ni na vukei keda na noda sa tudei taki tu ena ivakavuvuli i Jisu Karisito meda muria kina na ivakasala i Paula: “Ia ni dou sa vakabauti Karisito Jisu na Turaga, mo dou ia tiko na ivalavala sa vinaka vua” (Kolosa 2:6). Eda na veitokoni vakacava vakai keda meda sasaga meda muria na iVakabula ka sega ni ivalavala lasu vakavuravura?

ivakatakilakila ni vuli

Vakayaloqaqataka na Vuli e Vale

Era sa bau vakila beka na lewe ni nomu kalasi na veivakacacani ena vuku ni nodra vakabauta na kosipeli? Tukuna vei ira ni 1 kei na 2 Cesalonaika e tiko kina na ivakasala i Paula vei ira na Yalododonu era bula voli ena loma ni veivakacacani kaukauwa ka ra yalodina tikoga.

ivakatakilakila ni ivurevure

iKuri ni iVurevure

Filipai; Kolosa

Na vakacegu sa uasivia na ka kecega sa kilai rawa.

Ena gauna a lewe tiko kina ni Vitusagavulu o Elder Jay E. Jensen a wasea kina na ka a sotava:

“A sucu o Quinton na makubui keirau tagane ka levu sara na leqa e vu mai na nona sucu ka bula walega me ciwa na vula, ena loma ni gauna oqori a curu suka tiko ga kina mai valenibula. Keirau a vakaitikotiko e Argentina kei Sisita Jensen ena gauna ko ya. Keirau a vinakata sara ga vakalevu me keirau tiko vata kei ira na luvei keirau ena gauna ko ya me keirau vakacegui ira ka na vakacegui talega keirau. Oqo na makubui keirau, ka keirau lomana ka gadreva me keirau na tiko volekati koya. Sa rawa ga ni keirau masu, ka keirau sa mani gumatuataka sara!

“Keirau a lako voli kei Sisita Jensen ena veisiko wavoki ena tabana ni kaulotu ena gauna keirau taura kina na itukutuku ni sa leqa o Quinton. Keirau a duri tu ena loma ni valenilotu keirau veimokomoko ka keirau veivakayaloqaqataki. Au vakadinadinataka vei kemuni ni a yaco mai na veivakadeitaki ni Yalo Tabu, e dua na vakacegu ka sivia na veika kecega e kilai rawa ka tomani tiko me yacova mai na siga nikua (raica na Filipai 4:7). Keirau vakadinadinataka talega na isolisoli sega ni vakamacalataki rawa ni Yalo Tabu ena nona bula na luvei keirau tagane kei na vugoi keirau kei ira na luvedrau ka ra se dau talanoataka tu ga ena gauna oqo ena vakabauta, kei na vakacegu kei na yalovinaka na gauna ko ya” (“Na Yalo Tabu kei na iVakatakila,” Ensign se Liaona, Nove. 2010, 78).

Na ivakavuvuli ni kosipeli kei na ivalavala ni tamata.

A raica rawa o Elder Dallin H. Oaks e vica na ivalavala vakavuravura e veibasai kei na dina ni kosipeli (raica na “Veivutuni kei na Veisau,” Ensign se Liaona, Nove. 2003, 37–40):

• Na kena beci na lawa ni tiko savasava

• Na laki lotu e vakavudua ka vakatamata

• Voroki ni Vosa ni Vuku

• Sega ni dina

• Vakasaqara na “laveti cake” ena itutu ni Lotu

• Na ivakarau ni vakararavi ka sega ni lewai koya ga

Vakatorocaketaki Noda Veivakavulici

Vakayagataka na ivakatagi. Na ivakatagi vakalou sa dau sureta na veivakauqeti ni Yalo Tabu. Ena rawa me tauyavutaka e dua na yalo ni vakarokoroko ka vakauqeta na yalodina kei na cakacaka. Mo raica na sala ni “veivakavulici kei na veituberi vakai keda ena same kei na serenilotu” me sa tiki ni nomu kalasi (Kolosa 3:16; raica talega na Veivakavulici ena iVakarau ni iVakabula, 22).