rau vosa tiko na goneyalewa daukaulotu vei cauravou

21–27 ni Okotova

1 kei na 2 Cesalonaika

“Kakua ni Veitosoyaki Vakasauri Mai na Lomadei, se Vakataqayataki”

E vakavulica o Alama: “Mo dou kakua talega ni vakararavi vua e dua me nomudou ivakavuvuli se nomudou italatala, ko koya ga sa lesia na Kalou ka sa lako ena nona sala ka muria tiko na nona ivakaro” (Mosaia 23:14). Na cava e vakatura tiko na ivolanikalou oqo baleta na sala mo vakarautaki iko kina mo veivakavulici?

Vola na Veika o Uqeti Kina

ivakatakilakila ni veiwasei

Sureta na Veiwasei

Solia ki na lewe ni kalasi e vica na miniti mera raica mada vakatotolo na 1 kei na 2 Cesalonaika ka raica e dua na tikina e vakauqeti ira. Sureti ira mera wasea na nodra tikina ki vua e dua tale ena kalasi, ka kerea e dua vei ira na veisa oqo mera wasea na ka era sa vulica maivei ira yadua.

ivakatakilakila ni veivakavulici

Vakavulica na iVunau

1 Cesalonaika 1:5–8; 2:1–13

Era vunau na italatala ni kosipeli ena yalodina kei na loloma.

• A tekivuna o Paula na nona iVola vei ira na Cesalonaika ena nona veivakananumi vei ira na Yalododonu ena ivalavala e wasea kina o koya kei na so tale na kosipeli kivei ira. Oqo ena rawa me madigi vinaka vei ira na lewe ni nomu kalasi mera vakadikeva na ivalavala ni nodra veivakavulici kei na vuli vakai ira. Sa rawa mo sureta na lewe ni kalasi mera wilika na 1 Cesalonaika 1:5–8; 2:1–13 ka raica na ivakavuvuli e baleta tiko na wasei mana ni kosipeli. Sa qai rawa mera vola na taro e yavutaki ena veitikina oqo ena vukea mera dikeva na nodra sasaga ni kena vakavulici na kosipeli vei ira na tamata. Me vakataka, ni rawa me tarogi “Au sa ivakaraitaki beka ni veika au sa kila tu?” (raica na 1 Cesalonaika 1:7). Ena vukei keda vakacava na noda muria na ivakavuvuli ena itukutuku oqo me vakavinakataka cake noda qaravi ira eda vakavulica?

• Na kena wiliki na 1 Cesalonaika 1:5–8; 2:1–13 ena rawa me veivakananumi vei ira na lewe ni kalasi o ira na qasenivuli sa Vakarisito era a vakauqeti ira “me vaka na tamana vei ira na luvena” (1 Cesalonaika 2:11). Sureta na lewe ni kalasi mera vakasaqara na itukutuku oqo mera raica kina na ivakarau ni dua na italatala yalodina ka mera vakasamataka e dua na qasenivuli era kila e bulataka tiko na ivakarau o ya. Sa rawa mo kerea na lewe ni kalasi mera vola e dua na ivola se cakava e dua na setivikiti me nei qasenivuli era vakasamataka tiko. Vakayaloqaqataki ira mera vola ena ivola se setivikiti e dua na tikina mai na 1 Cesalonaika kei na kena ivakamacala ni sa ivakaraitaki tiko ni tikina o ya o qasenivuli. Era na rairai vakauqeti mera laki solia na ivola se setivikiti vua na tamata o ya era a volavola kina.

1 Cesalonaika 3:9-13; 4:1-12

Ni da sa muri Jisu Karisito, sa rawa meda bula savasava.

• E vakavulica o Paula vei ira na Yalododonu e Cesalonaika ni “Sa sega ni kacivi keda na Kalou me da dukadukali, me da yalosavasava ga” (1 Cesalonaika 4:7). Me tekivutaki e dua na veivosaki baleta na yalo savasava, sa rawa ki na nomu kalasi se dua ga me lagata na “More Holiness Give Me” (Serenilotu, naba 131). Kerea na lewe ni kalasi mera veivosakitaka na ivakarau ni yalo savasava e tukuni tiko ena serenilotu era taleitaka. Vola ena papa Meu yalo savasava vakalevu, me vakalevu … , ka sureta na lewe ni kalasi mera raica na vosa se malanivosa mai na 1 Cesalonaika 3:9–13; 4:1–12 me vakacavari kina na yatuvosa. Eda na vakatorocaketaka vakacava na ivakarau oqo?

• Vei ira eso, na veisureti vakaoqo mera yalo savasava e vaka mera vakabekataka tu. Ena rawa me veivuke ke ra kila vinaka na lewe ni kalasi ni tarai cake ni yalo savasava e taura na gauna ka gadrevi kina meda “uasivi cake vakalevu sara” ni toso tiko na gauna (1 Cesalonaika 4:10). Me vakamatatataki na cakacaka oqo, sa gadrevi mo sureta e dua na lewe ni kalasi me vakamacalataka e dua na taledi se rawa-ka a yaco a gadrevi kina na gugumatua tikoga ena veigauna, me vakataka na cula lacadrau se vakatagitaka e dua na iyaya ni ivakatagi E tautauvata vakacava oqo ki na sasaga mo yalo savasava? Sureta na lewe ni kalasi mera taleva lesu na 1 Cesalonaika 3:9–13; 4:1–12 ka veivakararamataki me baleta na sasaga ena taura me yaco kina na yalo savasava ena sala a vakamacalataka o Paula. Na cava e sa vukei keda meda toro cake yani meda yalo savasava?

1 Cesalonaika 4:11–12; 2 Cesalonaika 3:7–13

E dodonu meda cakacaka meda na qaravi keda vakai keda kei ira era tiko leqa.

• Na taro vakaoqo ena rawa me vakauqeta na kena veivosakitaki na ivakasala nei Paula me baleta na cakacaka: Na cava ena salamuria mai na vakawelewele? Na cava o nanuma e tukuna tiko o Paula baleta na vosa “tiko malua” kei na “tiko vakamalua”? (1 Cesalonaika 4:11; 2 Cesalonaika 3:12). Sa rawa mo vola na taro vakaoqo ena papa mera tugana na lewe ni kalasi ni ra wilika na 1 Cesalonaika 4:11–12 kei na 2 Cesalonaika 3:7–13. Sureti ira mera veivosakitaka na taro oqo vakayarurua, vakailawalawa, se vakalasi. Na ivolanikalou cava sa vukei keda meda kila vinaka kina na bibi ni cakacaka kei na veivakararawataki ni vakawelewele? (raica na vakatutu e tiko ena “iKuri ni iVurevure”).

2 Cesalonaika 2

E dodonu me yaco taumada na vukitani ni bera na iKarua ni Lako Mai i Jisu Karisito.

• Na kilai vinaka ni Vukitani Levu ena rawa me vaqaqacotaki na nodra ivakadinadina na lewe ni nomu kalasi baleta na Vakalesuimai ni kosipeli i Jisu Karisito. Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale era oka kina e vica na ivurevure baleta na Vukitani. Sa rawa mo sureta e vica na lewe ni kalasi mera vakarau mai me veivakararamataki mai na nodra vulica na ivurevure oqo, se sa rawa mo ni vulica ka veivosakitaka vata ena kalasi. Era tiko talega e vica na vidio baleta na Vukitani ena “iKuri ni iVurevure” me ikuri ni nomuni veivosaki.

• Ena rawa me veivuke na kena veivosakitaki e vica na vosa vakaibalebale era vakayagataka na parofita me vakamacalataki kina na Vukitani, me vaka na vukitani (raica na 2 Cesalonaika 2:3), na dausiga (raica na Emosi 8:11–12), curuma na qelenisipi na wolifa ca sara (raica na Cakacaka 20:28–30), kei na daliga sa qasikanunu (raica na 2 Timoci 4:3–4). Sa rawa mo wasea na lewe ni kalasi vakayarurua ka kerea mera wilika e dua se rua na ivolanikalou oqo (se so tale o sa digitaka) ka vakamacalataka na veika era vakavulica na veitikina oqo baleta na Vukitani Levu. Na cava era a vakavulica na parofita baleta na Vukitani kei na veika ena salamuria mai?

• Me vukei na lewe ni kalasi mera vulica vakalevu na Vukitani Levu, sureta mera raitayaloyalotaka e dua na nodra itokani e sega ni kila vinaka na kena gadrevi na vakalesuimai ni kosipeli. Vola ena papa e dua na jata e rua na kena kolomu ka vola kina Vu ni Vukitani kei na Revurevu ni Vukitani. Sureta na lewe ni kalasi mera vakasaqara vakayarurua se vakailawalawa lalai na wase e kena ulutaga “Na Vukitani Levu” ena Vunautaka na Noqu Kosipeli (tabana e 35–36) me baleta na vu kei na revurevu ni Vukitani ka me volai ena papa. Na veivakararamataki cava mai na jata oqo e rawa mera vakayagataka me vukei nodra itokani me kila vinaka na kena gadrevi na Vakalesuimai?

• Ena yaga beka ki na nomu kalasi ni veivosakitaki na sala meda kakua kina ni “vuki tani”? Sa rawa mo sureti ira mera vakasaqara na 2 Cesalonaika 2 na veivakasala eso mera solia vua e dua na itokani mena vukei koya me kakua ni vukitani.

ivakatakilakila ni vuli

Vakayaloqaqataka na Vuli e Vale

Ni gadrevi mera vakauqeti na lewe ni kalasi mera wilika na 1 kei na 2 Timoci, Taito, kei na Filimoni ena macawa oqo, sureta mera raitayaloyalotaka ni ra sa ciqoma e dua na ivola mai vua e dua na iApositolo e tiko kina e dua na ivakasala me baleta na sala mera cakava kina na nodra veikacivi ni Lotu. Vakatura mera vakasamataka na nodra veikacivi ni ra sa wilika na ivola oqo maivei Paula kivei ira na iliuliu ni Lotu taumada.

ivakatakilakila ni ivurevure

iKuri ni iVurevure

1 kei na 2 Cesalonaika

Na ivolanikalou e baleta na cakacaka kei na vakawelewele.

• Nai Vakatekivu 3:19 .

• Maciu 21:28–32

• Mosaia 2:10–16

• Vunau kei Veiyalayalati 42:42; 58:27; 60:13; 75:29

Na vidio e baleta na Vukitani ena LDS.org

• “Na Vukitani Levu”

• “Vukitani—Janu”

• “Na Vukitani kei na Vakalesuimai—Cava na iBalebale ni Vakalesuimai kivei Au”

Vakatorocaketaki Noda Veivakavulici

Vakayagataka na veimataqali iwalewale eso Ena dau rawarawa me vakamatautaki e dua ga na ivakarau ni veivakavulici, ia na duidui ivakarau ni veivakavulici e curumi ira yadua yani na lewe ni kalasi. Vakasaqara na sala me dau veisau na imoimoi ni nomu veivakavulici, me vakataka na vakayagataki ni vidio, droini, se ivakatagi se solia ki na lewe ni kalasi na madigi mera veivakavulici (raica na Veivakavulici ena iVakarau ni iVakabula, 22).