28 ni Okotova–3 ni Noveba

1 kei na 2 Timoci; Taito; Filimoni

“Mo Yaco mo Nodra iVakarau Era sa Vakabauta”

Wilika na 1 kei na 2 Timoci; Taito; kei na Filimoni ni ko vakasamataki ira tiko na nomu lewe ni kalasi. Na vakanananu kei na veivakauqeti ena yaco mai ena vukea mo dusimaka na lewe ni kalasi ki na veitiki ni ivolanikalou veidonui ka sureta mai na Yalo ki na kalasi.

Vola na Veika o Uqeti Kina

Sureta na Veiwasei

Ena veivuke ki na lewe ni kalasi mera vakarogoca na nodra dui vosa yadua baleta na nodra rawa-ka kei na bolebole ni ra vulica na ivolanikalou, vakai ira yadua ka vakamatavuvale. Sa rawa mo tekivuna na kalasi ena nomu sureta na lewe ni kalasi mera tukuna na veika sa lako vinaka tiko ena nodra vuli ivolanikalou.

Vakavulica na iVunau

1 kei na 2 Timoci; Taito

Ni da kila vinaka na vunau dina ena vukei keda meda kakua ni lawakitaki?

• Era sa bula donuya tiko na nomu lewe ni kalasi na gauna era sa vakavulica tiko kina e vuqa na vunau lasu. Rau a bula talega o Timoci kei Taito ena gauna vakaoqo, ka rairai ni ivakasala i Paula vei rau ena yaga beka vei ira na nomu kalasi. Eso na itukutuku e tiko kina na ivakasala i Paula era tiko ena “iKuri ni iVurevure.” Sa rawa mo lesi ira yadua na lewe ni kalasi mera wilika e dua na itukutuku oqo ka wasea na ka e vulica o koya me baleta na bibi ni vunau dina (raica talega na Alama 31:5).

1 Timoci 4:10–16

Kevaka eda sa “nodra ivakarau era sa vakabauta,” sa rawa meda muataki ira eso ki vua na iVakabula kei na Nona kosipeli.

• Ena rawa me tiko eso ena nomu kalasi era sega ni kila tiko na kaukauwa ni ivakaraitaki vinaka era sa tuvanaka tiko. Sa rawa mo sureti ira mera talanoataka eso era kila, oka kina na nodra itokani lewe ni kalasi, era sa ivakaraitaki vinaka ni tisaipeli i Karisito. Ena rawa ni vukea na veivosaki ke o vola ena papa na vosa ena tikina 12 e vakamacalataka na sala meda ivakaraitaki vinaka ena—vosa, veivosaki (ka sa kena ibalebale talega na ivakarau se itovo), loloma, yalo, vakabauta, kei na savasava. Sa rawa ki na kalasi mera veivosakitaka na sala meda sa nodra ivakarau era sa vakabauta ena sala yadua oqo.

2 Timoci 1

“Ni sa sega ni solia mai vei keda na Kalou na yalo ni rere; a yalo ni kaukauwa ga, kei na yalololoma, kei na yalomatua.”

• Ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale. era sa sureti na nomu lewe ni kalasi mera raica ena 2 Timoci me baleta na ivakasala nei Paula vei Timoci me vakayaloqaqataki koya ena nona cakacaka vakalotu. Sureta na lewe ni kalasi mera wasea na veivakararamataki era sa kunea, se sa rawa mo solia e vica na miniti mera kunea ka wasea eso na ivakasala nei Paula (wase 1 e tiko kina eso na ivakaraitaki vinaka). Sa rawa mera wasea talega na gauna a vukei ira kina na Kalou mera vorata rawa nodra rere ka solia vei ira “na yalo ni … kaukauwa, kei na yalololoma, kei na yalomatua” (2 Timoci 1:7).

2 Timoci 3

Ena rawa ni vukei keda na vuli ivolanikalou meda vorata rawa na veika rarawa ena otioti ni gauna oqo.

• Ni sa vakaroti Timoci oti baleta na “gauna ni veivakararawataki” sa na yaco mai, a vakadinadinataka kina o Paula na kaukauwa kei na bibi ni ivolanikalou (raica na 2 Timoci 3:1, 14–17). Me tekivu na veivosaki baleta na bibi ni ivolanikalou ena gauna dredre, sa rawa mo sureta na lewe ni kalasi mera taleva lesu na ivakamacala nei Paula baleta na gauna ni veivakararawataki e tiko ena 2 Timoci 3:1–7. Mera na qai vakasaqara ka wasea na ivolanikalou a vukea mera tataqomaki mai na veivakararawataki me vakaoqo (eso era volai tiko ena “iKuri ni iVurevure”). E sa taqomaki keda vakacava noda vulica na ivolanikalou mai na veivakaleqai ena vuravura nikua?

• Na vulica na ivakasala nei Paula me baleta na kaukauwa ni ivolanikalou sa rawa me madigi vei ira na lewe ni kalasi mera veivakayaloqaqataki vakai ira ena nodra sasaga mera vulica na vosa ni Kalou. Sa rawa talega ki na lewe ni kalasi mera wilika na 2 Timoci 3:14–17 ka kila na veivakalougatataki kei na veitaqomaki e yaco mai na vulica na ivolanikalou. Me ra na qai wasea na gauna eso a yaco ki na nodra bula na veivakalougatataki oqo baleta ni ra vulica na ivolanikalou. Sa rawa mo solia na gauna vei ira na lewe ni kalasi mera tugana na ka era rawa ni cakava me vakaibalebale cake nodra gauna ni ivolanikalou, vakai ira yadua ka vakamatavuvale.

Filimoni

Era sa dauveivosoti vakai ira na daumuria na Karisito.

• Ni bera ni tekivu na veivosaki baleta na iVola vei Filimoni, mo kerea e dua na lewe ni kalasi me wasea eso na ivakamacala baleti Filimoni kei na nona italai o Onesimo (e tiko e dua na ivakamacala lekaleka ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Sa rawa mo wasea na nomu kalasi ki na rua na ilawalawa ka solia ki na ilawalawa yadua e dua vei rau na taro oqo: Na veika tautauvata cava o raica vei Paula ni via cakava vei Onesimo kei na ka e vinakata na iVakabula me cakava vei keda? Me vaka ni a dredre sara vei Filimoni me vosota na nona tamata daucakacaka ni sa dro yani, ena rawarawa cake vakacava ki na kosipeli i Jisu Karisito me ia kina na veivosoti? Ni rau sa wasea oti na ilawalawa na veika era sa vulica, mo sureta na lewe ni kalasi mera wasea na veitiki ni ivolanikalou se na gauna a vukei ira mera kila vinaka cake na veivosoti. Ena rawa me veivuke ki na veivosaki oqo na itukutuku nei Elder Kevin R. Duncan ena “iKuri ni iVurevure.”

Vakayaloqaqataka na Vuli e Vale

Me vukea na lewe ni kalasi mera wilika na iVola vei ira na Kai Iperiu, taroga ke ra kila e dua sa vakila ni Kalou sa tu vakayawa, sega ni kauwai, se sega ni torovi rawa. Vakamacalataka ni ra na kunea na tikina eso ena Iperiu 1–6 mera na wasea ki vua e dua me vakaraitaka ni Kalou na Tamada kei Jisu Karisito rau sa Kalou Bula dauloloma e rau vinakata me vukei keda ni da kune rarawa.

iKuri ni iVurevure

1 kei na 2 Timoci; Taito; Filimoni

Na ivakasala nei Paula baleta na vunau dina.

• 1 Timoci 1:1–7; 4:1–2, 6; 6:3–5, 20–21

• 2 Timoci 3:13–17; 4:2–4

• Taito 1:7–9; 2:1, 7–8

Na ivolanikalou era taqomaki keda mai na veivakararawataki ena iotioti ni gauna e tukuni tiko ena 2 Timoci 3:2.

Na Veivakararawataki ena iOtioti ni Gauna	Na iVolanikalou Era Taqomaki Keda
Na Veivakararawataki ena iOtioti ni Gauna Era sa lomani ira ga vakai ira	Na iVolanikalou Era Taqomaki Keda Joni 15:12–13
Na Veivakararawataki ena iOtioti ni Gauna Domona	Na iVolanikalou Era Taqomaki Keda Vunau kei na Veiyalayalati 88:123
Na Veivakararawataki ena iOtioti ni Gauna Boletaki koya	Na iVolanikalou Era Taqomaki Keda Mosaia 2:24–25
Na Veivakararawataki ena iOtioti ni Gauna Dokadoka	Na iVolanikalou Era Taqomaki Keda Alama 5:27–28
Na Veivakararawataki ena iOtioti ni Gauna Vosacacataka na Kalou	Na iVolanikalou Era Taqomaki Keda Vunau kei na Veiyalayalati 63:64
Na Veivakararawataki ena iOtioti ni Gauna Talaidredre vei ira na itubutubu	Na iVolanikalou Era Taqomaki Keda Efeso 6:1-3.
Na Veivakararawataki ena iOtioti ni Gauna Sega ni vakavinavinaka	Na iVolanikalou Era Taqomaki Keda Vunau kei na Veiyalayalati 78:19
Na Veivakararawataki ena iOtioti ni Gauna Tawasavasava	Na iVolanikalou Era Taqomaki Keda Na iVakarua 7:6

Na veilumuti veivakabulai ni Veisorovaki ni iVakabula ena vukei keda meda veivosoti.

E vakavulica o Elder Kevin R. Duncan:

“O koya ena yaco kina, me sega ni dua na tamata bula ena sega, ni dua na gauna me na sotava na vakacaca ni nona sakulevu, itovo ca, se ivalavala ca sara mada ga e dua tale. Oqo e dua na ka eda tautauvata kina.

“E vakavinavinakataki kina na Nona loloma na Kalou me baleti keda na Luvena, sa vakarautaka kina e dua na sala me vukei keda ena noda sokota na veigauna dredre vakaoqo ena noda bula. Sa vakarautaka ko Koya e dua na sala me ra dro kina o ira kece e dau kedra na isamu ni dawa ni nodra cakacala eso tale. Sa vakavulici keda o Koya ni rawa ni da veivosoti! …

“Ena vuqa na yabaki sa oti, niu vakavinakataka tiko e dua na bai, a curuma noqu iqaqalo e dua na memenikau lailai. Au a tovolea ga vakalailai meu kauta laivi na memenikau lailai kau nanuma ni sa rawa, ia kena irairai ni a sega. Ni toso na gauna, a tubu na kuliniyago ka ubia na memenikau lailai, qai vuce tu noqu iqaqalo. E veivakasosataki ka mosi ena so na gauna.

“Ena vica na yabaki i muri au sa mani nanuma meu cakava kina e dua na ka. Na ka ga au qai cakava, au lumuta na vuce ena dua na ilumu ka vadretitaka. Au cakava vakavica na iwalewale oqo. O na sega ni vakasamataka rawa noqu kurabui ena dua na siga niu qai sereka na ivadreti, sa basika tu na memenikau lailai mai na noqu iqaqalo.

“Sa vakamalumutaka na kuliniyago na ilumu ka cakava e dua na idrodro ni ka a vakavuna tu vei au na mosi ena vicavata na yabaki. Ni kau laivi ga na memenikau, sa mamaca vakatotolo na noqu iqaqalo, me yacova nikua, e sega tale ni dua na imawe ni mavoa.

“E tautauvata na kena dau bikai tu ena mosi levu sega ni gadrevi na yalo sega ni veivosoti. Ni da lumuta ena ilumu veivakabulai ni nona Veisorovaki na iVakabula, ena vakamalumalumutaka o Koya na yaloda ka vukei keda me da veisau. Sa rawa Vua me vakabula na yaloda sa mavoa (raica na Jekope 2:8)” (“Na iLumu Veivakabulai ni Veivosoti,” Ensign se Liaona, Me 2016, 33).

Vakatorocaketaki Noda Veivakavulici

Na tubucake vakayalo e yaco e vale. E lekaleka wale nomu gauna kei ira na nomu lewe ni kalasi ena Siga Tabu yadua. Ena vo ni loma ni macawa, e vuqa vei ira ena sotava na veigauna vakayalo e vakaibalebale cake. Taroga na veika ena vakayaloqaqataki ira mera wasea na veika era sa vulica ena taudaku ni kalasi. (Raica na Veivakavulici ena iVakarau ni iVakabula 18