Lako mai, Mo Muri Au
4–10 ni Noveba. Iperiu 1–6: ‘Jisu Karisito, ‘na Vu ni Bula Tawamudu’’

“4–10 ni Noveba. Iperiu 1–6: ‘Jisu Karisito, ‘na Vu ni Bula Tawamudu’’” Lako Mai, Mo Muri Au—Me Baleta na Matawilivola ni Siga Tabu: Veiyalayalati Vou 2019 (2019)

“4–10 ni Noveba. Iperiu 1–6,” Lako Mai, Mo Muri Au—Me Baleta na Matawilivola ni Siga Tabu: 2019

iVakatakilakila
E tucake vata tu na Karisito kei na dua na goneyalewa lailai kei na dua na tagane

Na iBotani mai Kiliati, mai vei Anne Henrie

4–10 ni Noveba.

Iperiu 1–6

Jisu Karisito, “na Vu ni Bula Tawamudu”

Sa rawa mo wasea vei ira na nomu lewe ni kalasi eso na veivakauqeti o a ciqoma mai vua na Yalo Tabu me baleta na Iperiu 1–6. Ni ko cakava o na vakauqeti ira mera vakasaqara mera vakauqeti vakakina ni ra vulica na ivolanikalou.

Vola na Veika o Uqeti Kina

iVakatakilakila
ivakatakilakila ni veiwasei

Sureta na Veiwasei

Eso ena kalasi era na sega ni dau veiwasei vakawasoma era na gadreva beka mera sureti vakatabakidua kei na gauna mera vakavakarau kina. Sa rawa mo vosa vei ira e vica ni vo e dua se rua na siga ni kalasi ka kerea mera na mai wasea e dua na tikina mai na Iperiu 1–6 e vakaibalebale vei ira.

iVakatakilakila
ivakatakilakila ni veivakavulici

Vakavulica na iVunau

Iperiu 1–5

Jisu Karisito, “na Vu ni Bula Tawamudu”

  • Ena rawa vakacava mo vakayaloqaqataka na lewe ni kalasi mera wasea na ivolanikalou e vakaibalebale baleti Jisu Karisito era sa kunea ni ra vuli vakai ira yadua se vakamatavuvale ena macawa oqo? Sa rawa mo vola ena vava e lima na kolomu e matataka na imatai ni lima na wase ena Iperiu. Sureta na lewe ni kalasi mera vola ena kolomu dodonu na veimalanivosa mai na veiwase oqo e vakavulici ira ena veika e baleti Jisu Karisito kei na naba ni tikina era laurai kina. E mana vakacava na noda kila na veika oqo baleta na iVakabula ki na noda vakabauti Koya ka guta meda muri Koya?

  • Iperiu 1–5 e vakayagataka e vica na raitayaloyalo me vakamacalataki kina na iVakabula. Sa rawa mo vakayagataka na raitayaloyalo oqo me vukea na lewe ni kalasi me vakatitobutaka nodra kila vinaka na Nona ilesilesi. Me vakataka, nomu rawa ni kerea e vica na lewe ni kalasi ni vo e vica na siga ki na kalasi mera kauta mai ki na kalasi e dua na ka e vakatakarakarataka e dua vei ira na ivakamacala oqo baleti Jisu Karisito se na Nona ilesilesi mai na Iperiu 1–5 (raica vakabibi na Iperiu 1:3; 2:10; 3:1, 6; 5:9). Sa rawa mera vakamacalataka ki na kalasi na ka e vakavulica na ka o ya me baleti Jisu Karisito ka wilika na kena ivolanikalou donu mai na Iperiu. E veivakauqeti vakacava na dina oqo baleti Jisu Karisito ki na noda bula?

Iperiu 2:9–18; 4:12–16; 5:7–8

A sotava o Jisu Karisito na ka rarawa kecega me rawa ni kilai ira vinaka ka vukei ira era vakararawataki.

  • Era na tiko beka ena nomu kalasi eso era sotava tiko na rarawa ni vakatovolei ka so na gauna era vakila ni ra sa guilecavi ka yalolailai. Sa rawa me veivosakitaki na Iperiu 2:9–18; 4:12–16; 5:7–8 me tarai cake kina na nodra vakabauta ni sa rawa mera gole vua na Tamada Vakalomalagi kei na iVakabula mera vukei. Dua na sala me tekivutaki kina na veivosaki vakaoqo o ya mera sureti na lewe ni kalasi mera vakasamataka e dua na tamata e rarawa tiko ka rairai sa yali na nona inuinui. Na dina cava era sa kunea ena veitikina oqo era rawa ni wasea ki na tamata o ya? Sa rawa mera wasea talega na lewe ni kalasi na gauna a veivakacegui ka tokoni ira kina na iVakabula? Sa rawa mo wasea na vosa nei Peresitedi John Taylor ena “iKuri ni iVurevure” me tiki ni veivosaki.

  • NaIperiu 2:9–18; 4:12–16 ena vukei ira talega na tamata era raica na veivakararawataki e vuravura ka ra taroga tiko se sa kila se kauwai tiko kina na Kalou. Sa rawa talega mera vakasaqara na lewe ni kalasi na veitikina oqo mera kunea na dina ena sauma na vakatataro vakaoqo. Na cava era vakavulica baleta na sala e dau raica kina na iVakabula na nodra rarawa na kawatamata? Ena rawa me veivuke talega mera sureti na lewe ni kalasi mera wasea na ivakaraitaki mai na ivolanikalou a tokoni ira kina na tamata o Jisu Karisito ena nodra rarawa (raica na “iKuri ni iVurevure”) se vakaraitaka na vidio “Mountains to Climb” (LDS.org). Me veivosakitaki vata na ka eda sa vulica ena sala e rawa ni vukei keda kina na iVakabula ni da sotava na bolebole dredre.

Iperiu 3:7–4:2

Na veivakalougatataki ni Kalou sa nodra o ira sa “kakua ni vakaukauwataka na [yalodra].”

  • NaIperiu 3 kei na 4 e tiko kina na nodra vakamasuti na Yalododonu mera kakua ni vakaukauwataka na yalodra ni ra na cata kina na veivakalougatataki sa vinakata na Kalou me solia vei ira. Ni ko ni sa wilika vata vakalasi na Iperiu 3:7–4:2, me veivosakitaki na sala e rawa ni taurivaki vei keda nikua na veika era a sotava na Isireli makawa, me vaka ga a taurivaki vei ira na Iperiu ena Lotu taumada (sa rawa mo raica na lewe ni vuli me baleta na veitikina oqo ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Na cava e vakavuna tiko mera vakaukauwataka na yalodra o ira na tamata ena noda gauna oqo? Na cava eda rawa ni cakava meda vakamalumalumutaka tikoga kina na yaloda ka vakaio ki na loma ni Turaga? (raica na Ica 4:15; Alama 5:14–15).

Iperiu 5:1–5.

O ira sa veiqaravi tiko ena matanitu ni Kalou sa dodonu mera kacivi mai vua na Kalou.

  • Sega ni o ira kece na lewe ni nomu kalasi era lewe ni matabete, ia na itukutuku mai na Iperiu 5 me baleta nodra sa kacivi na lewe ni matabete mai vua na Kalou sa taurivaki talega vei ira kece era sa kacivi ena Lotu. Me vukei nomu lewe ni kalasi mera kila na ibalebale “sa kacivi mai vua na Kalou me vakataki Eroni,” sa rawa mo sureti ira mera taleva lesu na itukutuku kei Eroni ni sa ciqoma na nona veikacivi ena Lako Yani 4:10–16, 27–31; 28:1. Na veivakararamataki cava mai na itukutuku oqo ena vukea meda kila vinaka na Iperiu 5:1–5? Ena gauna cava era a vakadeitaka kina na lewe ni kalasi, oka kina na iliuliu ni tabanalevu ni dua sa kacivi koya na Kalou me cakava e dua na veikacivi? A vukei ira vakacava na veivakadeitaki o ya mera tokona vakavinaka cake e dua ena nona veikacivi? (Sa rawa mo kerei ira na lewe ni kalasi mera kakua ni vakaraitaka na itukutuku ririkotaki.) Era rairai tiko eso na lewe ni kalasi e rawa ni ra vakadinadinataka ni Kalou a vakauqeti ira ni ra vakayacora tiko na nodra veikacivi.

iVakatakilakila
ivakatakilakila ni vuli

Vakayaloqaqataka na Vuli e Vale

Era sa bau vakila mada na lewe ni kalasi ni ra sa vakataki ira sa “tiko vulagi ga ka veilakoyaki e vuravura” (Iperiu 11:13) ena vuku ni nodra vakabauta ni duidui maivei ira era tiko voliti ira? Tukuna vei ira ni ra sa wilika na Iperiu 7–13, era na kunea na nodra ivakaraitaki era sa ciqoma ka taura ena yalodina na yalayala ni Kalou dina ga ni vuqa era tiko voliti ira era tawavakabauta.

iVakatakilakila
ivakatakilakila ni ivurevure

iKuri ni iVurevure

Iperiu 1–6

E kila tu o Jisu Karisito na cava na sotava na rarawa.

E vakavulica o Peresitedi John Taylor: “E a nakiti ena nona gauna vei keda e vuravura na iVakabula, me ‘a temaki ena veika kece sara me vakataki keda,’ ka ‘rawa kina me lomani keda e na noda malumalumu,’ [raica na Iperiu 4:15] ni sa kila na noda ivakatagedegede ni noda malumalumu kei na kaukauwa; na yasadra cecere sara kei na kena veibasai na malumalumu; ia ni sa mai vakaotia rawa na nona itavi me mai vakayacora e vuravura, ena nona a sotava na sasaga dredre e kune kina na veidabui, lasulasu, malumalumu, yalowai ni tamata—ni a sotava na veitemaki kei na lomaocaoca ena kena veivakaraitaki kece sara, ka rawata vakavinaka, e a sa yaco me ‘Bete levu yalodina’ [raica na Iperiu 2:17] me noda daunivakasala e na matanitu tawamudu ni Tamana. E kila vinaka o Koya na ivakarau ni tamata vakayago, ni a sa mai bula vakatamata, e kila na noda malumalumu kei na veika ni veivakaleqai eda dau sota, ka kila vinaka na kena raba kei na titobu, na bibi, kei na cere ni veivakatovolei kei na veitemaki ni tamata e sotava ena bula oqo, ka sa kilai vinaka kina kei na nona sotava me vosota rawa vaka-Tama ka tuakadra” (Nodra iVakavuvuli na Peresitedi ni Lotu: John Taylor [2001], 204–5).

Na ivakaraitaki vakaivolanikalou ni tamata a vakaceguya o Jisu Karisito.

Vakatorocaketaki Noda Veivakavulici

Vakarau taka na vunua ni kalasi me vakilai kina na yalo tabu. Ni ko susuga cake e dua na yalo veivakacegui, dauloloma ena nomu kalasi, sa na rawarawa vua na Yalo Tabu me tara na yalodra o vakavulica tiko. Na cava o rawa ni cakava mo sureta kina na veivakauqeti ni Yalo Tabu ki na nomu kalasi? Ena rawa beka mo moica na ituvatuva ni dabedabe se vakayagataka na iyaloyalo se ivakatagi me sureta kina na Yalo Tabu? (Raica na Veivakavulici ena iVakarau ni iVakabula, 15.)

Tabaka