O Eparama ena Buca o Mamire, maivei Grant Romney Clawson

18–24 ni Noveba.

Jemesa

“Ia Dou Muria na Vosa, Ka Kakua ni Rogoca Walega”

Ni bera ni wiliki na ituvatuva oqo, wilika na iVola i Jemesa ka vakarorogo matua ki na veivakauqeti o ciqoma. Na ivakavuvuli cava o kunea rawa ena vakalougatataki iko ka tara cake na nomu lewe ni kalasi? Mo raica ena ituvatuva oqo na ikuri ni vakasama ni veivakavulici.

Vola na Veika o Uqeti Kina

Sureta na Veiwasei

Sureta na lewe ni kalasi mera wasea na veitikina mai na Jemesa e vakauqeti ira kina mera “muria na vosa” (Jemesa 1:22). Ke sega soti ni nodra vakatabakidua, sa rawa mera wasea talega na nodra nanuma ena veika mera sa cakava, vakai ira yadua se vakamatavuale.

Vakavulica na iVunau

Jemesa 1: 5–6

Ni da kerekere ena vakabauta, sa na solia mai na Kalou ena galala.

• Na ivakavuvuli e vakavulici tiko ena Jemesa 1:5–6 a muataki Josefa Simici ki na dua na veisau ni bula vakayalo, ka sa rawa ni vakalougatataki keda yadua ena so na sala. Sa rawa mo vola ena vava na mataqali taro vakaoqo ka kerea na lewe ni kalasi mera tugana e lomadra: Na veivakauqeti cava sa cakava na Jemesa 1:5–6 ki na nomu bula? Na cava e sa sotava o Josefa Simici ena veitikina oqo sa vakavulici iko mo vakasaqara na vuku me baleta na nomu vakatataro? (raica na Josefa Simici—Ai Tukutuku 1:10–17). Na cava o sa sotava oti e vakavulici iko me baleta ni “sa dina na ivakadinadina i Jemesa”? Josefa Simici—Ai Tukutuku 1:26 Sureta na lewe ni kalasi mera wasea na nodra nanuma ni ra sa tugana oti tiko na taro oqo.

• Sa rawa ki na lewe ni kalasi mera cakava na Jemesa 1:5-6 ena nodra vosa ga. Ena vukei ira vakacava oqo mera kila vinaka cake kina na veitikina oqo?

• Me vukea na lewe ni kalasi mera nanuma tiko na yalayala ni Kalou me solia ena galala kivei ira na Luvena ni ra lako yani Vua ena masumasu, kerei ira na lewe ni kalasi mera wasea na gauna a yaco kina na yalayala ena Jemesa 1:5-6 ki na nodra bula. Na cava era sa vulica ni sa kerekere vua na Tamada Vakalomalagi me vakadeitaka nodra vakatataro baleta na dina ni kosipeli?

Jemesa 1:2–4; 5:7–11

Na vosota vakadede ena mua ga meda uasivi sara.

• Me tekivu e dua na veivosaki baleta na ivakavuvuli i Jemesa baleta na vosota ena veitikina oqo, sa rawa mo sureta na lewe ni kalasi mera wasea na gauna era a vosota kina kei na veika era sa vulica mai kina. Mera qai vakasaqara ena Jemesa 1:2-4; 5:7-11 na ivakavuvuli e rawa ni ra bulataka ki na veika era na sotava. Era na rawa ni kunea talega na ivakavuvuli taurivaki oqo ena vidio “Continue in Patience” (LDS.org) se ena vosa nei Peresitedi Dieter F. Uchtdorf “Vosota Tikoga” (Ensign se Liaona, Me 2010, 56–59). Na cava na vuna e yaga kina na vosota ni da saga meda uasivi sara? Na cava sa vukei ira na lewe ni kalasi mera tara cake na nodra vosota ena nodra bula?

Jemesa 1:3–8, 21–25; 2:14–26

“Sa mate vakakina na vakabauta ni sa takali na cakacaka.”

• Dua na sala me veivosakitaki kina na ivakavuvuli i Jemesa baleta na vakabauta kei na cakacaka me wasei na nomu kalasi ena rua na ilawalawa—dua me vakadikeva na vakabauta e cakacakataki kei na dua tale me dikeva na vuna e gadrevi kina na vakabauta ki na noda cakacaka. Me caka oqo, mera na wilika na Maciu 7:21–23; Jemesa 1:6–8, 21–25; 2:14–26; kei na Josefa Simici—Ai Tukutuku 1:19. Me na qai wasea na ilawalawa yadua na veika era sa kunea ka me veivosakitaki na vuna sa gadrevi ruarua kina na vakabauta kei na kena cakacakataki.

• Ni gadrevi mera vukei na lewe ni kalasi mera tugana vakatitobu na malanivosa taleitaki “Sa mate na vakabauta ni sa takali na cakacaka” (Jemesa 2:26), mo vola na yatuvosa oqo ena vava: Na vakabauta ke sega na cakacaka sa vaka ni sega na . Sureta na lewe ni kalasi mera vakasamataka na sala vou eso mera vakacavara kina na yatuvosa, ka mera vola ena vava na nodra vakasama. Ena vinaka talega vei ira na itaviqaravi oqo kera cakacaka vakayarurua se vakailawalawa lalai. Na italanoa a tukuna o Peresitedi Dieter F. Uchtdorf ena “iKuri ni iVurevure” sa rawa me semati ki na nodra kila vinaka na ivakavuvuli oqo. Na cava eda rawa ni cakava meda vakabauti Jisu Karisito tiko ga kina?

Jemesa 2: 1–9

Ni da sa tisaipeli i Jisu Karisito, e dodonu meda lomani ira na tamata kecega, se cava ga na nodra ituvaki ni bula.

• Me vukea na lewe ni kalasi mera vakaraitaka na loloma Vakarisito ki na tamata kecega se cava ga na nodra bula se irairai, sa rawa mo kerea na lewe ni kalasi mera veitarataravi wiliwili mai na Jemesa 1:9-11; 2:1-10; 5:1-6. Me veivosakitaki na taro vakaoqo; Na cava na ibalebale ni “dou sa digitaki ira na tamata”? (Jemesa 2:9) Na cava na vuna eda raici ira kina vakaduidui o ira sa vakailavo, rogo, se kaukauwa maivei ira sa sega ni vakaoqo? Meda na kakua vakacava ni raici ira vakaduidui na tamata era sa yavutaki tu ena kedra dui ituvaki? Ena sala cava o ira sa daumuria na iVakabula ena yalodina era sa vutuniyau duadua vakaidina? (raica na Jemesa 2:5

Jemesa 3

Na vosa eda dau vakayagataka sa tu kina na kaukauwa me vakamavoataka se vakalougatataka na tamata.

• Na raitayaloyalo kaukauwa a vakayagataka o Jemesa sa rawa me veivakavotui ka veivakauqeti me vakayagataki na vosa—na kena a cavuti kei na kena e volai—me laveti ira cake na tamata. Sa rawa mo sureta na lewe ni kalasi mera vakadikeva na Jemesa 3 mera raitayaloyalotaka na ivakamacala e vakayagataki kina na vosa me vakamavoataka se vakalougatataka kina eso; sa rawa ki na so na lewe ni kalasi mera droinitaka na iyaloyalo ni raitayaloyalo oqo. E yaco vakacava na raitayaloyalo oqo me vakamacalataka kina na ivakasala i Jemesa ena wase oqo? Me vakataka, na vosa ena yaco vakacava me vaka na bukawaqa? Na raitayaloyalo cava era rawa ni vakasamataka na lewe ni kalasi mera vakaraitaka kina na kaukauwa dina e tiko ena vosa e cavuti? Sa rawa mo sureta na lewe ni kalasi mera tugana na sala mera na bulataka kina na ivakasala i Jemesa.

Vakayaloqaqataka na Vuli e Vale

Ni gadrevi mera vakayaloqaqataki na lewe ni kalasi mera wilika na 1 kei na 2 Pita, sureta mera vakasaqara na ivakavuvuli vakaivunau ena ivola e rua oqo e kilai vakavinaka baleta na Vakalesuimai ni kosipeli. Era vakadinadinataka vakacava na ivakavuvuli oqo na ilesilesi vakaparofita nei Josefa Simici?

iKuri ni iVurevure

Jemesa

Na vakabauta kei na cakacaka.

E vakavulica o Peresitedi Dieter F. Uchtdorf:

“E dua na itukuni makawa vaka-Jiu ni daucaka sovu ka sega ni vakabauta na Kalou. Ena dua na siga erau a lako tiko kei na dua na rapai, qai kaya, ‘E dua na ka au sega ni rawa tiko ni ciqoma. Eda sa lotu tu ena vica na udolu na yabaki sa oti. Ia ena veivanua kecega o rai kina sa tu kina na ca, cakacaka vakailawaki, sega ni dina, sega ni dodonu, mosi, viakana, kei na ivalavala kaukauwa. Kena irairai ni se sega ni vakavinakataka rawa na vuravura na lotu. O koya au na tarogi iko kina, na cava beka na kena yaga?’

“A sega mada ni sauma na rapai ia a lako tikoga vata kei na daucaka sovu. Me yacova ni rau sa voleka yani ki na dua na rara, era qito tiko kina ena qele na gonelalai era qeleqelea tu.

“E dua na ka au sega ni ciqoma rawa tiko,’ e kaya cake o rapai. ‘Raici ira mada na gone oya. Sa tu vei keda na sovu ena vica na udolu na yabaki, ia era se duka ga na gone oya. Na cava na betena na sovu?’

“E sauma yani na daucaka sovu, ‘Rapai, e sega ni dodonu me bilitaki na sovu me baleti ira na gone duka oqo. E dodonu me vakayagataki mada na sovu me qai rawa na kena inaki.’

“E matadredredre o rapai ka kaya, ‘Donu vinaka’ (“Era na Bula ena Vakabauta na Tamata Dodonu,” Ensign se Liaona, Epr. 2017, 4).

Vakatorocaketaki Noda Veivakavulici

Vakayaloqaqataka na yalo ni veidokadokai. “Vukei ira nomu lewe ni kalasi mera kila vinaka ni o ira yadua era vakayaco-ka ki na yalo ni kalasi. Vakayaloqaqataka mera vukea nomu tauyavutaka e dua na ituvaki rawarawa, veilomani, ka veidokai me ra vakila vakayadua ni sa rawa mera wasea na veika era sotava, taro, ka soli ivakadinadina” (Veivakavulici ena iVakarau ni iVakabula, 15).