E vunautaka tiko na kosipeli o Jisu Karisito ena vuravura ni yalo.

E Vunau Tiko na Karisito ena Vuravura ni Yalo, maivei Robert T. Barrett

25 ni Noveba-1 ni Tiseba

1 kei na 2 Pita

“Reki ena Reki e Sega ni Cavuti Rawa ka Vinaka Sara”

Nanuma tiko ni nomu inaki o ya mo vakavulici ira na tamata, sega walega ni o vakaraitaka na lesoni. Ni ko wilika na iVola i Pita, nanumi ira yadua na lewe ni kalasi. Na ivakavuvuli cava ena vukea mera tara cake na nodra vakabauta?

Vola na Veika o Uqeti Kina

ivakatakilakila ni veiwasei

Sureta na Veiwasei

Vola ena vava na ulutaga oqo 1 Pita kei na 2 Pita . Solia na gauna vei ira na lewe ni kalasi mera taleva lesu na wase oqo, ka sureta mera vola ena ruku ni ulutaga se malanivosa oqo mai na wase era raica ni vakaibalebale cake. Mo qai vakayagataka na lisi oqori mera sureti kina na lewenikalasi mera wasea na nodra veivakararamataki.

ivakatakilakila ni veivakavulici

Vakavulica na iVunau

1 Pita 1:3–9; 2:19–24; 3:14–17; 4:12–19

Au rawa ni kune reki ena gauna ni veivakatovolei kei na rarawa.

• Ni gadrevi mo vukei ira o vakavulica mera kila vinaka ka bulataka na ivakasala i Pita me baleta na kune vakacegu ena veigauna dredre, sa rawa mo solia na tiki ni pepa eso ki na lewe ni kalasi mera vola kina e dua na malanivosa mai na 1 Pita 1:3–9; 2:19–24; 3:14–17; 4:12–19 me na vukei ira ena gauna ni veivakatovolei se dredre. Ena yasana kadua ni pepa, mera vola kina e dua na gauna ni vakatovolei era a vakila kina na vakacegu se reki. Me so e bole mera wasea nodra malanivosa kei na ka era a sotava, oti mera qai veivosakitaka na kalasi na veika era sa vulica.

• Dua tale na sala me talevi lesu kina na ivakasala nei Pita ena 1 Pita 1:3–9; 2:19–24; 3:14–17; 4:12–19 o ya mo sureta na lewe ni kalasi mera vakasamataka e dua na tamata era kila ni sotava tiko na veivakatovolei. Solia na gauna ena kalasi mera vola e dua na ivola vua na tamata o ya, oka kina na veika dina mai na veitikina oqo ena vakayaloqaqataka na tamata o ya (raica talega na V&V 121:1–8; 123:17). Mera qai veivosakitaka na lewe ni kalasi na dina era sa digitaka.

1 Pita 1:13–20; 2:1–12

Eda sa kacivi meda sa “tamata sa taukena na Kalou.”

• Ni da sa lewe ni Lotu i Karisito, eda sa kacivi meda muri Jisu Karisito. Sa kena ibalebale oqo ni noda digidigi sa dau duidui maivei ira na vo ni tamata. Ena veivuke vakacava na ivakavuvuli nei Pita ena 1 Pita 1:13–20; 2:1–12 me vukei ira o vakavulica mera kila vinaka cake na ilesilesi ni iVakabula ka gadreva mera vakataki Koya vakalevu cake? Sa rawa mo sureta na lewe ni kalasi mera vakasaqara na veitikina oqo ni ra vakasaqara na ivakamacala ni ibalebale ni “tamata sa taukena na Kalou” (1 Pita 2:10) ka qai veivosakitaka na veika era sa kunea. Sa rawa mo vakamacalataka na vosa “taukena” ena 1 Pita 2:9 sa kena ibalebale na “voli oti” se “maroroi” (raica na ivakamacala e botona f). Na cava e vakavulica vei keda na ka oqo baleta na sala sa dau nanumi keda kina na Kalou kei na sala e gadreva o Koya meda bula kina?

1 Pita 3:18–20; 4:6

Sa vunautaki yani na kosipeli vei ira sa mate tu me rawa ni ra lewai vakadodonu.

• Na iMatai ni iVola nei Pita e tiko kina e dua vei ira na vica na itukutuku ena iVola Tabu ki na veisiko yani i Jisu Karisito ki na vuravura ni yalo ni oti na Nona mate—na siga e vukei keda kina na ivakatakila nikua meda kila vinaka cake kina. Ni gadrevi me titobu nodra kila vinaka na lewe ni kalasi na vuravura ni yalo, mo sureti ira mera wilika na ivolanikalou oqo ka vola ena vava na veika era sa vulica: Joni 5:25; 1 Pita 3:18–20; 4:6; Alama 40:7–14, 21; Vunau kei na Veiyalayalati 138:11–32.

  Na itukutuku era tiko ena “iKuri ni iVurevure” e tukuna tiko ni veisiko i Karisito ki na vuravura ni yalo a sega walega ni ra kila vinaka ka vakavulica o ira na Nona iApositolo ia o ira talega na qasenivuli va-Karisito e liu. Na kilai vinaka ni kila-ka oqo a mai yali ena gauna ni Vukitani Levu ka vakalesuimai ena noda gauna oqo ena vukei ira na lewe ni kalasi mera vaqaqacotaka na nodra ivakadinadina baleti Josefa Simici kei na Vakalesuimai ni kosipeli.

• Na veivosakitaki ni 1 Pita 3:18–20; 4:6 ena vukea mera vakauqeti na lewe ni kalasi me taucoko nodra vakaitavi ena cakacaka ni tuva kawa kei na valetabu. Me caka oqo, sa rawa mo wasea na kalasi ki na tolu na ilawalawa ka solia yadua vei ira e dua na taro oqo me baleta na nodra vakabulai na mate: Na cava na ilesilesi ni iVakabula ena nodra vueti na mate? Na cava na nodra itavi o ira era sa mate tu—o ira na yalodina kei ira era a mate ka ra sega tu ni kila na kosipeli? Na cava na noda itavi? Kerea na ilawalawa yadua mera taleva lesu na 1 Pita 3:18–20; 4:6; Vunau kei na Veiyalayalati 128:17–18; 138:11–32, 57–59, ka vakasaqara kina na isau ni nodra taro. Kerea na ilawalawa yadua mera wasea na veika era sa vulica, ka rawa mo wasea na vosa nei Elder D. Todd Christofferson se dua vei ira na vidio oqo era tiko ena “iKuri ni iVurevure.” Na veivakalougatataki cava eda sa vakadinadinataka ni da vakaitavi tiko ena nodra vakabulai na noda qase e liu era sa mate?

2 Pita 1:1–11

Ena kaukauwa i Jisu Karisito, sa rawa meda tara cake na keda ituvaki vakalou.

• Ni gadrevi mera vakayaloqaqataki o ira o vakavulica ena nodra sasaga mera vakataki Jisu Karisito vakalevu cake, mo sureti ira mera raica na ivakarau Vakarisito e tukuni tiko ena 2 Pita 1:1-11. Sa rawa me volai na ivakarau oqo ena vava ka kerea na lewe ni kalasi mera vakamatatataka. Mera na qai veivosakitaka na lewe ni kalasi ni kena tarai cake na ivakarau oqo ena mua ki na vakatorocaketaki na ivakarau tale eso. Solia na gauna mera na tugana na ivakarau era gadreva mera vakatorocaketaka vakalevu cake (raica talega na Vunautaka na Noqu Kosipeli, 126).

e dua na talitali e caka vakamatau sara

Na ivakarau yadua Vakarisito eda vakatorocaketaka ena vukea meda talia e dua na isulu vakayalo ni bula vakatisaipeli.

ivakatakilakila ni vuli

Vakayaloqaqataka na Vuli e Vale

Sa rawa mo tukuna ki na kalasi ni ra na vulica tiko na iVola i Joni ena loma ni macawa oqo. Na ivola oqo ena vukea me vakadodonutaki kina na ivakavuvuli cala baleti Jisu Karisito ka rawa me vaqaqacotaka na noda ivakadinadina ni bula tiko na iVakabula.

ivakatakilakila ni ivurevure

iKuri ni iVurevure

1 kei na 2 Pita

Na cakacaka ni nodra vakabulai na mate sa vakadinadinataka tiko na ilesilesi i Karisito.

E vakavulica o Elder D. Todd Christofferson:

“Era sa dau saga tiko na daunicioloji Vakarisito na taro oqo, Na cava beka na kedra itinitini o ira na bilioni vakabilioni na tamata era a mai bula ka mate ka ra a sega ni kilai Jisu? Ena Vakalesuimai ni kosipeli i Jisu Karisito sa lako talega mai na kena kilai na sala mera vakabulai na a sega ni papitaiso kei na sala me yaco me ‘lewa dodonu ni Kalou e vinaka sara, e Kalou dodonu, e Kalou dauloloma talega’ [Alama 42:15].

“Ia ni se bula tiko, a parofisaitaka o Jisu ni na lako talega me laki vunau vei ira sa mate tu [raica na Joni 5:25]. E kaya vei keda o Pita ni a yaco oqo ena tadrua ni gauna a Lauvako kina na iVakabula kei na Tucaketale [raica na 1 Pita 3:18–19]. A vakadinadinataka o Peresitedi Joseph F. Smith ena dua na raivotu ni a sikova na iVakabula na vuravura ni yalo [raica na V&V 138:30, 33]. …

“Na noda rekitaka meda vakabulai ira sa mate tu, kei na gauna kei na ivurevure eda vakayagataka ena yalayala oqo, sa kena usutu taucoko kina, sa ivakaraitaki ni noda ivakadinadina baleti Jisu Karisito. Sa yaco kina me dua na ivakadinadina kaukauwa eda cakava rawa me baleta ni sa vakalou o Koya kei na Nona ilesilesi. Sa vakadinadinataka, taumada, na Karisito sa Tucaketale; ikarua, na loloma tawayalani ni Nona Veisorovaki; ikatolu, ni sai Koya na ivurevure duadua ga ni veivakabulai; ikava, ni sa mai tauyavutaka o Koya na lawa ni veivakabulai; kei na ikalima, ni na lako tale mai o Koya” (“The Redemption of the Dead and the Testimony of Jesus,” Ensign se Liaona, Nove. 2000, 9–10).

Nodra volavola na qasenivuli Vakarisito taumada (imatai ki na ikatolu ni senitiuri) me baleta na vunau vei ira sa mate tu.

Origeni: “Ni sa yaco o [Jisu] me dua na [yalo], e sega ni solegi ena yago, a bula vata tu kei ira na yalo oqori era sega tu ni vakayago, ni saumakitaki ira oqori era sa vakaio Vua” (ena The Ante-Nicene Fathers, ed. Alexander Roberts and James Donaldson [1907], 4:448).

Hermas: “O ira na iapositolo kei na qasenivuli a vunau ena yaca ni Luve ni Kalou, ni oti nodra moce lutu ena kaukauwa kei na vakabauta na Luve ni Kalou, a vunau talega vei ira a moce lutu talega e liu ni bera o ira” (ena The Apostolic Fathers, trans. J. B. Lightfoot [1898], 472).

Me baleta na vidio ni cakacaka ni tuva kawa (raica na LDS.org).

• “Their Hearts Are Bound to You”

• “All the Families of the Earth”

• “Will I Do My Part?”

Vakatorocaketaki Noda Veivakavulici

Vakatavuvulitaka na “vuna.” “Ena so na gauna era dau vakataroga o ira na vuli—vakabibi o ira na itabagone—se veiwekani vakacava vei ira na ivakavuvuli ni kosipeli kei na vuna me ra talairawarawa kina ena so na ivakaro. Ia, kevaka era kila na ituvatuva tawamudu nei Tamada Vakalomalagi me baleta nodra bulamarau na Luvena, sa yaco me makare cake na inaki ni ivakavuvuli ni kosipeli kei na ivakaro ka vakauqeti vakalevu cake na talairawarawa.” (Veivakavulici ena iVakarau ni iVakabula, 20).