“16–22 ni Tiseba. Siganisucu: ‘iTukutuku Vinaka Mo Dou Reki Vakalevu Kina’” Lako Mai, Mo Muri Au—Me Baleta na Matawilivola ni Siga Tabu: Veiyalayalati Vou 2019 (2019)

“16–22 ni Tiseba. Siganisucu,” Lako Mai, Mo Muri Au—Me Baleta na Matawilivola ni Siga Tabu: 2019

iVakatakilakila

na gonelailai o Jisu ena vale ni manumanu

Taqomaki ena Vale ni Susu Manumanu, maivei Dan Burr

16–22 ni Tiseba.

Siganisucu

“iTukutuku Vinaka Mo Dou Reki Vakalevu Kina”

Era sa kaukauwa vakayalo na veivosaki ni kosipeli ni sa kena usutu o Jisu Karisito. Ni ko vulica na sucu kei na ilesilesi i Jisu Karisito ena macawa oqo, vakasaqara na veivakauqeti ni Yalo Tabu mo kila kina na sala me vakausutu vinaka kina na nomu veivosaki ni kalasi baleta na iVakabula.

Vola na Veika o Uqeti Kina

iVakatakilakila

ivakatakilakila ni veiwasei

Sureta na Veiwasei

Sureta na lewe ni kalasi mera wasea na veika era cakava tiko se sa cakava oti vakai ira yadua se vakamatavuvale mera marautaka kina na sucu ni iVakabula ena sala ena kauti ira mai vakavoleka Vua.

iVakatakilakila

ivakatakilakila ni veivakavulici

Vakavulica na iVunau

Maciu 1:18–25; Luke 1:26–38; 2:1–20

A lako sobu mai o Jisu Karisito me mai sucu e vuravura.

Na lako sobu mai e kena ibalebale ni sa lomamu ga mo biuta e dua na itutu cecere se dokai (raica na 1 Nifai 11:14–26). Na Siganisucu sa gauna vinaka meda tugana ka marautaka na nona lako sobu mai na Karisito—ni sa Lomana me biuta na “itikotiko cecere nei Tamana mai lomalagi, me bula na tamata, me mate na tamata” (“Again We Meet around the Board,” Serenilotu Vakavalagi, naba. 186). Me uqeti na veivosakitaki na ulutaga oqo, sa rawa mo tarogi ira na lewe ni kalasi na cava era sa vulica vakai ira yadua se vakamatavuvale ena macawa oqo baleta o cei o Jisu Karisito ni bera ni a mai sucu o Koya (raica na Joni 17:5; Mosaia 7:27; V&V 76:12–14, 20–24; Mosese 4:2). Mo qai vakaraitaka na iyaloyalo e tiko ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale ni ra wilika na lewe ni kalasi na nona sucu na iVakabula (raica na Maciu 1:18–25; Luke 1:26–38; 2:1–20). Na cava na nodra nanuma kei na vakasama ni ra vakatauvatana na lagilagi ni bula taumada ni iVakabula vata kei na Nona mai sucu vakaloloma?
Na taro nei agilosi vei Nifai ena 1 Nifai 11:16 sa rawa me sala vinaka ni kena tekivu e dua na veivosaki ni kalasi, dina ga ni o rawa ni moica na kena vosa. Sa rawa mo vola ena vava Na cava na nona lako sobu mai na Kalou? ka kerei ira na lewe ni kalasi mera tugana na taro oqo ni ra wilika na 1 Nifai 11:17–33. Kerea mera wasea na nodra nanuma baleta na iVakabula era veivakauqeti kina na veitikina oqo. Na iyaloyalo cava o rawa ni vakaraitaka ki na kalasi e tukuna tiko na bula ni iVakabula a vakamacalataka tiko o Nifai? Sa rawa talega mera raica na nona lako sobu mai na iVakabula ni ra sarava na vidio baleta na Nona sucu, me vakataka na “A Gift to the World,” “The Nativity,” “Infant Holy, Infant Lowly (Vidio iVakatagi)—Mormon Tabernacle Choir,” se “He Is the Gift” (e rawa ni ra laurai kece oqo ena LDS.org).
Na sere ivakatagi sa sala totoka ni kena sureti na Yalo ki na nomu kalasi. Sa rawa mo vakatagitaka na serenilotu ni Siganisucu e lagata na Tabernacle Choir (raica na mormontabernaclechoir.org), ka sureta e dua me lagata e dua na sere ni Siganisucu, se mo ni wilika se lagata vata vakalasi e vica na serenilotu (raica na Sere ni Lotu, naba 201–14). Mera raica na lewe ni kalasi na veimalanivosa ena serenilotu oqo kei na ivolanikalou e volai tiko ena serenilotu oqo e vakalevutaka na nodra vakavinavinaka vua na iVakabula ni sa Lomana dina me gole mai ki vuravura.

Luke 4:16–21; Joni 3:16

Sa mai vakacavara o Jisu Karisito na Nona ilesilesi, me rawa kina vei keda meda rawata na bula tawamudu.

Ni gadrevi mera veivosakitaka na lewe ni kalasi na vuna a mai sucu kina o Jisu Karisito, sa rawa mo sureti ira mera vakasaqara ka wasea na ivolanikalou eso e tukuna vakaoti na Nona ilesilesi (me vakataka mo raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale ). Sa rawa talega vei ira na lewe ni kalasi mera veisasa se vakailawalawa lalai ka vakasaqara ka wilika na veitiki ni ivolanikalou. Na cava era sa vulica baleta na ilesilesi i Karisito mai na veitikina era sa kunea? Na cava eda sa vulica mai na ivolanikalou baleta na Nona ilesilesi mai na so na itutu a soli Vua? (raica na Bible Dictionary, “Christ, names of”).
Sa rawa mera vulica na lewe ni kalasi na ilesilesi ni iVakabula ena nodra wilika na “Se Bula Na Karisito: Nodra iVakadinadina na iApositolo” (Ensign se Liaona, Me 2017, e loma ni waqana e liu) ka wasea na itukutuku era raica ni tukuna tiko na vuna a lako mai kina o Koya ki vuravura. Se mera taleva lesu na itukutuku nei Peresitedi Gordon B. Hinckley ena “iKuri ni iVurevure” ka veivosakitaka na veika era sa vulica me baleta na iVakabula. Ena sala cava meda na cakava kina na Siganisucu oqo me gauna ni “vakasama vakanomodi kei na vakanananu malua” vua na iVakabula kei na Nona ilesilesi?
Solia e vica na miniti ki na lewe ni kalasi mera vakasamataka nodra ivakadinadina baleti Jisu Karisito kei na Nona ilesilesi. E rawa beka mera wasea na veika era sa sotava se italanoa mai na bula ni iVakabula sa vakalevutaka na nodra vakabauta se nodra lomani Koya? E sa yaga vakacava na nodra vulica na Veiyalayalati Vou ena yabaki oqo me vakaibalebale cake kina na Siganisucu oqo? Ni gadrevi me talevi lesu eso na itukutuku ni Veiyalayalati Vou era sa vulica na lewe ni kalasi ena yabaki oqo, sa rawa mo vakaraitaka na vidio “For God So Loved the World” se “To This End Was I Born” (LDS.org).

iVakatakilakila

ivakatakilakila ni vuli

Vakayaloqaqataki na Vuli e Vale

Vakatura ki na lewe ni kalasi ni nodra vulica na Ai Vakatakila 12–22 ena macawa oqo ena rawa me vakatitobutaka na nodra vakavinavinakata na itavi ni iVakabula ki na ituvatuva ni veivakabulai ka vakalevutaki kina na ibalebale ni nodra rokova na Siganisucu.

iVakatakilakila

ivakatakilakila ni ivurevure

iKuri ni iVurevure

Siganisucu

Na iusutu dina ni Siganisucu.

E vakavulica oqo o Peresitedi Gordon B. Hinckley:

“Ni sa tukuni ka caka oti na ka kecega, … e sega ni dua na ka e vakasakiti cake, e vakaturaga cake, e totoka cake mai na cakacaka ni loloma soliwale oqo ena nona solia na Nona bula na Luvei Koya sa Cecere Sara, … o Koya ka a siro sobu ena nona lako mai ki vuravura me vaka e dua na gonedramidrami sucu e Peceliema, me vakawai ka sotavi mosi me rawa kina vei ira kece na luve ni Kalou tagane kei na yalewa ena gauna kecega ni veitabatamata, ni ra sa mate taucoko, me ra tucake tale ka bula tawamudu. A cakava o Koya kivei keda na ka eda sega ni rawa ni cakava vakaikeda. …

“Oqo na italanoa veivakurabuitaki ka dina ni Siganisucu. Sa kena ikau na sucu i Jisu mai Peceliema e Jutia. Sa kena ivakamacala na nona veiqaravi yabaki tolu na iVakavuvuli. Na uto vakasakiti ni italanoa na Nona isoro, na ivalavala sega sara ga ni bau nanumi Koya ni nona mate na mosi ena kauveilatai mai Kalivari me isoro ni noda ivalavala ca kece.

“Na kena itinitini na cakamana ni Tucaketale, ka kauta mai na veivakadeitaki ni ‘sa qai mate kecega ena vukui Atama, ena vakabulai kece talega ena vukui Karisito’ (1 Korinica 15:22).

“Ena sega na Siganisucu kevaka a sega na Siganimate. Na gonelailai o Jisu mai Peceliema ena dua walega na gone kevaka a sega na Karisito dauveivueti mai Kecisemani kei Kalivari, kei na qaqa ni Tucaketale.

“Au vakabauta na Turaga o Jisu Karisito, na Luvena na Kalou Bula ka Tawamudu. E sega tale ni dua e sa mai bula e vuravura me tautauvata na nona cecere. E sega tale ni dua me sa bau cakava e dua na isoro se dua na veivakalougatataki e rawa ni vakatauvatani kaya. O Koya na iVakabula kei na Dauveivueti kei vuravura. Au vakabauti Koya. Au vakaraitaka na Nona sa vakalou kau sega ni vakataratututaka se dua na kena veiba. Au lomani Koya. Au cavuta na Yacana ena vakarokoroko kei na qoroqoro. …

“Me sa qai Siganisucu marautaki oqo kivei kemuni yadua. Ia na kena bibi duadua, sa noqu inuinui vei kemuni yadua e dua na gauna, ke dua mada ga na auwa, me gauna ni vakasama vakatitobu ena vakadigagalu kei na railesu ena vakasakiti kei na vakaturaga ni ka oqo, na Luve ni Kalou. Na noda reki tiko ena gauna oqo sa baleta ni a lako mai o Koya ki vuravura. Na vakacegu o ya e lako mai Vua, na Nona loloma tawayalani eda na vakila taucoko, kei na yalo vakavinavinaka levu baleta na veika sa solia wale kivei keda ena dua na isau cecere Vua—sai ira oqo na iusutu dina ni Siganisucu” (“The Wondrous and True Story of Christmas,” Ensign, Dec. 2000, 4–5).

Vakatorocaketaki ni Noda Veivakavulici

Me tiko na nodra gauna ni veiwasei na vuli tiko. “Ni ra wasea na vuli tiko na veika era sa vulica, e sega walega ni ra vakila na Yalotabu ka vaqaqacotaka na nodra dui ivakadinadina, ia era vakayaloqaqataki ira talega na vo ni lewe ni kalasi me ra raica vakataki ira na dina. … Dau solia eso na gauna ni veiwasei vei ira na gonevuli ena veilesoni yadua—ena so na gauna, o na raica beka ni veivosaki sara ga oqo na lesoni.” (Veivakavulici ena iVakarau ni iVakabula, 30).