“9–15 ni Tiseba. Ai Vakatakila 1–11: ‘Na iUkuuku, kei na Kaukauwa, Vua … na Lami ka Sega ni Mudu’” Lako Mai, Mo Muri Au—Me Baleta na Matawilivola ni Siga Tabu: Veiyalayalati Vou 2019 (2019)
“9–15 ni Tiseba. Ai Vakatakila 1–11,” Lako Mai, Mo Muri Au—Me Baleta na Matawilivola ni Siga Tabu: 2019
Na Vakatawa ni Sipi Vinaka, mai vei Del Parson
9–15 ni Tiseba.
Ai Vakatakila 1-11.
“Na iUkuuku, kei na Kaukauwa, Vua … na Lami ka Sega ni Mudu”
Ena rawa ni vukei iko na veivakauqeti vakayalo mo kila ni sa gadreva na Yalo Tabu me vakavulici iko. Na nomu katona ka vakamuria na veivakauqeti oqori e vakaraitaka tiko ni ko mareqeta ka gadreva mo ciqoma vakalevu.
Vola na Veika o Uqeti Kina
Sureta na Veiwasei
Ni ko tekivu veivosakitaka na Ai Vakatakila, ena veivuke vakalevu mo sureta na lewe ni kalasi mera wasea e dua na itukutuku tauyavu era a vulica baleta na ivola na Ai Vakatakila ena nodra a vulica vakai ira yadua se vakamatavuvale. Sa rawa mo ni taleva lesu vata eso na itukutuku era tiko ena Lako Mai, Mo Muri Au—Me Baleta na Tamata Yadua kei na Matavuvale se ni wilika vata ena Bible Dictionary na ivakamacala ni “John” kei na “Revelation of John.”
Vakavulica na iVunau
O Jisu Karisito na Luvena Bula na Kalou sa Bula.
-
Me vaka ni a vakayagataka o Joni na iyaloyalo kei na ivakatakilakila ena Ai Vakatakila 1 me vakamacalataka kina na iVakabula sa tucaketale kei na Nona cakacaka, na vulici ni iwase oqo sa sala cecere me tarai cake na vakabauta ni bula tiko o Koya ka sa dusimaka tiko na Nona Lotu. Sa rawa mera vola ena vava na lewe ni kalasi e vica na malanivosa mai na Ai Vakatakila 1 oka kina na iyaloyalo se ivakatakilakila ka wasea na ka yadua era vakavulici kina baleti Jisu Karisito. Me vakataka, na cava eda vulica mai na veiivakatakilakila oqo me baleta na Nona liutaka tiko o Karisito na Nona Lotu nikua? E vakatauvatani vakacava na nona vakamacalataka na iVakabula o Joni ki na kena ena Vunau kei na Veiyalayalati 110:1–4?
Eda rawa ni ulabaleta yani na bolebole ena vukui Jisu Karisito.
-
Ena dua na sala eda sa vakataki ira na Yalododonu a vola o Joni: eda sotava na veika ca. Sureta na lewe ni kalasi mera vakasaqaqara ena Ai Vakatakila 2–3 ka mera raica rawa na nodra vakatovolei era sa sotava tiko na Yalododonu ena gauna nei Joni, ka vukea mera kila vinaka ni sa kila tu o Jisu na veivakatovolei kei na kaukauwa ni tabana yadua. Sa rawa talega mera wasea na veika era sa sotava ka ra vakila kina ni sa kila vinaka tu na iVakabula na kedra ituvaki duatani. Na ivakasala cava a solia na Turaga vei ira na Yalododonu ena rawa talega me vukea noda ulabaleta na noda sasaga bula tiko?
-
Ena veiwase vata oqo a yalayala veivakauqeti kina na Turaga kivei ira era na ulabaleta rawa. Sa rawa mo sureta na lewe ni kalasi mera veisa ka vakasaqara ena Ai Vakatakila 2–3; 7:13–17 na yalayala oqo ni Turaga. Sa rawa talega mera droinitaka eso na iyaloyalo e tukuna tiko na yalayala oqo, ka qai wasea ki na kalasi na veika era sa raica. E veivakauqeti vakacava vei ira na yalayala oqo mera saga tikoga mera ulabaleta yani na nodra vakatovolei kei na malumalumu?
O Jisu Karisito duadua ga ena rawa me cakava me yaco na ituvatuva nei Tamada Vakalomalagi.
-
Ena veivuke beka e dua na lesoni vakatakarakara mera kila vinaka kina na lewe ni kalasi na ivakatakilakila e tiko ena Ai Vakatakila 5 me baleta na iVakabula ni dolava na ivola sa dregati? Sa rawa mo kauta mai e dua na iloloma e lokataki tu ena kena koniteina me wasei ki na kalasi. Ni bera na kalasi, mo solia vuni ki na tamata yadua na ki ni kena loka. Tukuna ki na kalasi na cava e tiko ena loma ni koniteina, ka me vica na lewe ni kalasi mera saga mera dolava na koniteina ni bera ni dolava o koya e tiko vua na kena ki. Mera qai vakatauvatana na kalasi na lesoni ivakatakarakara oqo ki na Ai Vakatakila 5. E rawa ni veivuke na taro vakaoqo: E tautauvata vakacava na nodra vakabulai na luvena na Tamada Vakalomalagi ki na koniteina lokataki se na ivola dregati? Na cava na vuna me o Jisu Karisito duadua ga e rawa ni dolava na idrega? (raica na vosa e tiko ena “iKuri ni iVurevure”). Na veivakalougatataki cava sa vakatau tiko ki na bula kilikili ni iVakabula me dolava kina na veidrega oqo? (raica na Ai Vakatakila 7:14–17).
-
Me vakataki ira ga na tamata mamarau era tukuni tiko ena Ai Vakatakila 5, sa rawa talega vei keda nikua meda laveta cake na domoda meda vakacaucautaka na iVakabula ni sai Koya Ga sa kilikili kaya me vakabulai keda. Sa rawa talega mera lagata na lewe ni kalasi eso na serenilotu taleitaki ni vakacaucau baleta na iVakabula. Me vakataka, na kena rawa ni lagati na “Glory to God on High” (Serenilotu, naba 67; se sarava na vidio “Worthy Is the Lamb” ena LDS.org) ka raica na dina e vakavulica tiko na serenilotu oqo baleti Jisu Karisito. Na cava soti sa sotavi sa vukei keda meda rawata na ivakadinadina ni veidina oqo? Na tautauvata cava eda sa raica ki na nodrau itukutuku na noda serenilotu ni vakacaucau kei na ivakaro raraba ena Ai Vakatakila 5:9–14? Eda na vakayagataka vakavinaka cake vakacava na serenilotu ena itikotiko kei na lotu meda sokalou ka vakacaucautaka kina na Turaga?
Ni bera ni yaco na iKarua ni Lako Mai, ena vakasokumuna na Turaga o ira sa yalododonu ka vakarautaki ira mera laki tiko vata kei Koya.
-
E vakamacalataka naAi Vakatakila 7 na gauna ni “ikaono ni drega,” ni so sa vakatakilakilataka tiko na noda siga nikua. Sa sauma talega na taro e tiko ena icavacava ni wase 6: “Na siga dina ni nona cudru; ia ko cei ena yatedei me na tu dei rawa?” (tikina 17). Sa rawa ki na lewe ni kalasi mera raica na isaunitaro oqo ena wase 7. Oqo eso tale na taro e rawa ni ra veivosakitaka: Na cava na vuna a tarova kina na Turaga na kena vakarusai ko vuravura ki na dua na gauna? Ena sala cava e yaco kina na cakacaka vakalotu kei na veiyalayalati mena “vaucil [keda] ki na siga ka na sovaraki kina na cudru ni Kalou”? V&V 1: 9 Na cava na noda cakacaka me vakarautaki kina ko vuravura ki na iKarua ni Lako Mai? Vunau kei na Veiyalayalati 1:4–23; 77:8–11 ena rawa me ikuri ni veivakararamataki.
Na raivotu nei Joni e vakavulica na sala e vakabulai ira kina na Luvena na Tamada Vakalomalagi.
-
Eso na lewe ni kalasi era na rairai dredre vei ira mera kila vinaka na ivola ni Ai Vakatakila. Ena rawa me veivuke ke ra raica na ivola nei Joni ni sa lewe tiko ni ituvatuva nei Tamada Vakalomalagi me vakacerecerei ira kina na Luvena. Ni ra wilika na lewe ni kalasi na Ai Vakatakila 1–11 e nodra vale, era a kunea beka eso na dina a vukei ira mera kila vinaka na ituvatuva nei Tamada Vakalomalagi me baleti ira na Luvena (raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Sureti ira me ra wasea na veika era sa raica. Era na raica talega ni na veivuke na kena talevi lesu na wase ena “iKuri ni iVurevure” na kena ulutaga na “iVolanikalou e baleta na ituvatuva ni veivakabulai.” Vakayaloqaqataki ira na lewe ni kalasi mera vakasaqara tikoga na veivolanikalou era vakavulica na dina e baleta na ituvatuva ni veivakabulai ni ra wilika na vo ni Ai Vakatakila, ka solia vei ira na madigi ena veilesoni e tarava mera wasea na veika era sa kunea.
Vakayaloqaqataka na Vuli e Vale
Kerei ira na lewe ni kalasi mera vakasamataka mada na nodra ivakarau ni Siganisucu taleitaki duadua. Sureti ira mera taleva lesu na ituvatuva ni macawa mai oqo me baleta na vakasama me sa usutu ni nodra marau o Jisu Karisito.
iKuri ni iVurevure
iVolanikalou me baleta na ituvatuva ni veivakabulai.
Na Veisorovaki i Jisu Karisito
Bula taumada
Bula vakayago
Bula tarava mai
O Jisu Karisito duadua ga e rawa ni sorovaki keda.
Ni vakamacalataka tiko na bula taumada, a vakavulica kina o Elder Jeffrey R. Holland:
“A soli Koya na Karisito me rokova kina na nodra galala ni digidigi na kawatamata kecega ena gauna mada ga sa sorovaka kina o Koya na nodra ivalavala ca. Ni yaco oqo, ena vakalesua o Koya vei Tamana na lagilagi kece baleta na loloma veivueti vakaoqo.
“Na Veisorovaki tawamudu oqo i Karisito a rawa ena vuku ni (1) O Koya duadua ga na tamata e bau bula e vuravura oqo me tawacala ka sa sega ni oka me mate vakayalo ena vuku ni ivalavala ca, (2) O Koya Duadua ga sa Luvena Duabau na Tamada ka sa tu Vua na ivakarau ni bulavakalou ka soli kina Vua na kaukauwa me rawa na mate vakayago, ka (3) sai Koya duadua ga sa yalomalua sara ka sa yalona dina mai na matabose taumada me lesi taumada tu mai ki na veiqaravi o ya” (“The Atonement of Jesus Christ,” Ensign se Liaona, Mar. 2008, 35).
Vakatorocaketaki Noda Veivakavulici
Vakayagataka na ivolanikalou kei na nodra vosa na parofita edaidai. “Sa vakaroti keda na Turaga me da “veivakavulici vakai [keda] ena ivakavuvuli ni matanitu” (V&V 88:77) ka vakayagataka na ivolanikalou me “vunautaki yani na [Nona] kosipeli” (V&V 42:12 Na ivolanikalou kei na nodra vosa na parofita kei na iapositolo ena gauna oqo sa ra ivurevure ni dina eda vakavulica” (Veivakavulici ena iVakarau ni iVakabula, 21).