E matadredredre o Jisu ni dabe vata kei na dua na gone matadredredre

Loloma Uasivi, maivei Del Parson

2–8 ni Tiseba

1–3 Joni; Juta

“Sa Loloma na Kalou”

Na itoko kei na ivakarau cava e cecere vei iko ni ko wilika na 1–3 Joni kei na Juta? O na vakayagataka vakacava mo vukea kina na nomu lewe ni kalasi?

Vola na Veika o Uqeti Kina

ivakatakilakila ni veiwasei

Sureta na Veiwasei

Sureta e vica na lewe ni kalasi mera wasea na itoko se dina eso e cecere vei ira ni ra vulica na iVola i Joni kei Juta. Na itukutuku cava mai na ivola oqo a baleti ira vakalevu kei na nodra matavuvale?

ivakatakilakila ni veivakavulici

Vakavulica na iVunau

1 Joni 1:5–10; 2:3–11; 3:1–3; 4:7–21; 5:1–3

Rau sa ivakaraitaki uasivi duadua ni rarama kei na loloma na Tamada Vakalomalagi kei Jisu Karisito.

• O na vukei ira vakacava o vakavulica mera kila na rarama kei na loloma nei Tamada Vakalomalagi ena nodra bula? Ena rawa mo tekivu ena nomu vola na vosa rarama kei na loloma ena papa. Kerea na lewe ni kalasi mera wasea na imatai ni vosa e lako mai na nodra vakasama ni ra vakasamataka na rua na vosa oqo. Sa rawa mo wasea vakailawalawa na kalasi ka lesia ki na ilawalawa yadua e dua vei ira na ivolanikalou oqo: 1 Joni 1:5–10; 2:3–11; 3:1–3; 4:7–12; 4:16–21; 5:1–3. Mera na qai vakasaqara na ilawalawa ena ivolanikalou oqo na ivakadinadina ni rarama kei na loloma ni Kalou kei na veika eda rawa ni cakava meda vakaraitaka kina ni da lomana na Kalou kei ira na Luvena. Mera na qai wasea na lewe ni ilawalawa yadua ki na kalasi na veika era sa kunea. Sa rawa mo sureta na lewe ni kalasi mera wasea na gauna era a vakila kina na rarama kei na loloma nei Tamada Vakalomalagi.

• O na vukei ira vakacava na lewe ni kalasi mera tugana na rarama vakayalo ki na nodra bula? Sa rawa mo sureta na lewe ni kalasi mera raica na rarama ni cina ena siligi e cake se na rarama ni cina mai na dua na rumu ka wasea na ka era kila baleta na rarama ni cina vakayago. E tautauvata vakacava na rarama ni cina kei na rarama vakayalo? Ena rawa me vakasaqarai ena Same 27:1; Joni 1:4–5; 1 Joni 1:5–7; 3 Nifai 11:11; Vunau kei na Veiyalayalati 88:6–13 na ikuri ni veivakararamataki baleta na sala e vakarautaka kina na Kalou kei na Luvena na rarama ki na noda bula. Sa rawa mera wasea talega na lewe ni kalasi na gauna era a vakasaqara ka ciqoma kina na rarama vakayalo ki na nodra bula.

• Era na marautaka talega na lewe ni kalasi ni ra lagata vata se rogoca e dua na sere baleta na rarama, me vakataka na “The Lord Is My Light” (Serenilotu Vakavalagi, naba 89). Na cava e vakavulica na sere oqo baleta na Turaga ni sa vaka e dua na rarama? Na vidio “Choose the Light” (LDS.org) kei na itukutuku nei Elder Robert D. Hales ena “iKuri ni iVurevure” ena rawa me veivakararamataki talega ki na sala me rawati na rarama levu cake ki na noda bula.

1 Joni 2:18–23, 26–28; 4:3; 2 Joni 1:7–11; 3 Joni 1:9–11; Juta

E dodonu meda vaqaqacotaki mai na noda saqata na ivakavuvuli lasu.

• E so beka na lewe ni nomu kalasi se nodra daulomani era sasaga tiko mera vorata na ivakavuvuli lasu e via vakaleqa tiko na nodra vakabauta. Ena rawa me veivuke ena nodra vulica na veika e rau vakavulica o Joni kei Juta baleta na vukitani. Sa rawa mo sureta e veimama ni kalasi mera vakasaqara na ivakamacala baleta na ivakavuvuli lasu se vukitani ena 1 Joni 2:18–23, 26–28; 4:3; 2 Joni 1:7–11; 3 Joni 1:9–11 kei na ikarua ni veimama mera vakasaqara na ivakamacala vata o ya ena Juta. Se rawa mera raica na isau ki na taro vakaoqo: E rau vakamacalataka vakacava o Joni kei Juta na karasito-vakailasu? (raica talega na iDusidusi ki na iVolanikalou (Guide to the Scriptures), “Antichrist,” scriptures.lds.org). E tiko beka e dua na ka ena veitiki ni ivolanikalou oqo e vaka me tautauvata ki na bolebole eda sotava tiko nikua? Eda na vaqaqacotaki keda vakacava ni da saqati ena ivakavuvuli lasu?

• E vakayagataka o Juta na raitayaloyalo taleitaki me vakamacalataki ira na qasenivuli lasu se o ira era “sa vosavakacacataka na ka era sa lecava” (Juta 1:10). Sa rawa mo sureta e vica na lewe ni kalasi mera droinitaka ena papa eso na raitayaloyalo e tukuni tiko ena Juta 1:12–13 ka mera vakilakila na vo ni kalasi na malanivosa cava e droinitaka tiko o lewenikalasi. Era matataka vakacava na raitayaloyalo oqo na qasenivuli lasu kei na karisito-vakailasu? Me vakataka, era bulia vakacava na ivalavala butobuto na “duka e na [noda] kana veilomani”? Na cava e rawa ni da cakava me da vaqaqacotaki keda maivei ira na “dauveivakasewasewani”? (raica na Juta 1:18–21). Na cava a rawa ni vakasalataka o Juta me rawa ni da “lomani ira sara” (Juta 1:22) kina sa dauvakasewasewana na kosipeli?

1 Joni 5

Ni da cakacakataka noda vakabauta na Karisito ka da sa sucu vua na Kalou, sa rawa meda ulabaleta na vuravura.

• Dua vei ira na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale e tukuna tiko meda vakasaqara ena 1 Joni 5 me kunei kina na sala meda vorata rawa kina na vuravura. Sa rawa mo sureta na lewe ni kalasi mera wasea na veika era sa kunea ka vola sara ena papa. (Sa rawa mo solia na gauna ena kalasi mera vakamacalataka vakalekaleka na wase o ya.) Se mo sureti ira mera wilika na tikina eso mai na itukutuku nei Elder Neil L. Andersen “Vakadrukai Vuravura” (Ensign se Liaona, Me 2017, 58–62) ka wasea na veika era sa vulica. Me ivakaraitaki, na veivakararamataki cava era sa rawata mai na italanoa nei Elder Andersen me baleti Peresitedi David O. McKay kei Elderf Bruce D. Porter? Sa rawa mera wasea na lewe ni kalasi na nodra dui ivakaraitaki ni tamata era nanuma era sa saga mera vakadrukai vuravura.

  e tekiduru ena masu e dua na matavuvale

  E rawa ni vukei keda na kosipeli i Jisu Karisito meda kune vakacegu ena vuravura vakaleqai oqo.

3 Joni 1:1–4

Eda na kune reki ni da vukei ira na tamata mera “muria na dina.”

• Era tiko beka eso ena nomu kalasi era rawa ni tukuna na ka a vakila o Joni ni a kaya ni “ka levu na noqu reki” ni rogoca ni ko Keo (dua vei ira na “luvena”) sa muria voli na dina. Era na vinaka cake na lewe ni kalasi ni ra rogoca na veika era sa sotava vakai ira. Sa rawa mo tekivu ena nomuni wilika vata na 3 Joni 1:1–4 kei na ivolanikalou era tiko ena “iKuri ni iVurevure.” Na cava era vakavulica vei keda na ivolanikalou oqo me baleta na ivurevure ni reki dina? Sa rawa mera veivosakitaka na lewe ni kalasi na nodra nanuma vaka-itubutubu, daukaulotu, iluliu ni Lotu, se qasenivuli ni ra sa kila era sa muria tiko na dina o ira era sa vakavulica. Ni bera na kalasi sa rawa mo kerea e vica na lewe ni kalasi mera kauta mai eso na iyaloyalo ni tamata era sa vukea mera lako maivei Karisito ka tukuna na veika era sa sotava.

ivakatakilakila ni vuli

Vakayaloqaqataka na Vuli e Vale

Ena rawa vakacava me vakavulici keda na ivakatakarakara me vakataka na drakoni, manumanu levu vakatabana, kei na lami sa vakamatei me baleta na ituvatuva ni Kalou vei ira na Luvena? Sureta na lewe ni kalasi mera vakasamataka na taro oqo ni ra vulica na iVakatakila ena vica na macawa mai oqo.

ivakatakilakila ni ivurevure

iKuri ni iVurevure

1–3 Joni; Juta

Na rarama sa vakaseyavutaka na butobuto.

E vakavulica o Elder Robert D.Hales na sala meda vakaseyavutaka kina na butobuto mai na noda bula ka lako ena rarama:

“Niu a se cauravou lailai, au dau vodoka na noqu basikeli ki vale ni oti mai na qito basketbol ena bogi. Au dau semata e dua na jenereita lailai e vakatoka na ibulibuli ni pea ena taya ni noqu basikeli. Niu sa qaqia yani, ena moica na taya e dua na idini lailai, ena qai solia mai na kaukauwa vakalivaliva ka waqara mai e dua na rarama ni cina. E rawarawa toka ia e gacagaca mana sara. Ia meu na qaqia yani me rawa ni cakacaka! Au sa vulica totolo sara ni keu na sega ni qaqia na noqu basikeli, ena boko yani na rarama. Au sa vulica talega ni gauna au ‘gumatua ena cakacaka’ [V&V 58;27] ena qaqia, ena ramase cake na cina ka yaco na butobuto e mataqu me seyavu yani.

“Na soli mai ni rarama vakayalo ena yaco mai ena qaqaqi vakayalo ena veisiga. E basika mai ena masumasu, vulici ni ivolanikalou, lolo, kei na veiqaravi—ena bulataki ni kosipeli kei na talairawarawa ki na ivakaro” (“Out of Darkness into His Marvelous Light,” Ensign, Me 2002, 71).

Na ivolanikalou sa baleta na nodra vukei na tamata mera muria na dina.

• Vakarua 6:6-7

• Vakaibalebale 22:6

• Joni 4:36

• 1 Cesalonaika 3:9

• Mosaia 4:14–15

• Alama 17:1–2; 26:11–37

• Vunau kei na Veiyalayalati 18:10–16; 50:22

Vakatorocaketaki Noda Veivakavulici

Masulaki ira nomu lewe ni kalasi. Me vakataka ga na iVakabula ni a masulaki Pita (raica na Luke 22:32), e dodonu mo masulaka na yacadra o vakavulica tiko, ka vakasaqara mo kila na nodra gagadre yadua. Ni ko cakava oqo, na Tamada Vakalomalagi ena “vakarautaka na nodra vakasama” (Alama 16:16) ka vukea mo kila na ka mo vakavulica me sotavi kina na nodra gagadre (raica na Veivakavulici ena iVakarau ni iVakabula, 6).