Na Koro Tawamudu, maivei Keith Larson

23–29 ni Tiseba.

Ai Vakatakila 12–22.

“O Koya sa Gumatua ena Rawata na Ka Kece Ga Oqo.”

Na cava e vakavulica vei keda na ivalu ena kedrau maliwa na vinaka kei na ca e tukuni tiko ena iVakatakila me baleta na bibi ni noda vakamuria na Karisito ena vuravura oqo? Ni ko sa tugana na ivakavuvuli oqo, sa rawa mo raica na ka era gadreva na nomu lewe ni kalasi. Na dina cava mai na iVakatakila ena vukea mera digitaka na ka dodonu?

Vola na Veika o Uqeti Kina

Sureta na Veiwasei

Ni ra sa vakarau yacova na nomu lewe ni kalasi na itinitini ni nodra vulica na Veiyalayalati Vou, vakayaloqaqataki ira mera wasea na nodra nanuma baleta na Veiyalayalati Vou. E sa vaqaqacotaki vakacava na nodra ivakadinadina mai na vulica na ivolanikalou?

Vakavulica na iVunau

iVakatakila 12:7–11

Eda a rawai Setani “ena vuku ni dra ni Lami, kei na vuku ni vosa [eda] sa tusanaka.”

• Ni da vulica na ka e baleta na iValu mai Lomalagi ena rawa me vukea meda kila vinaka na bula ena vuravura oqo. Sa rawa ki na lewe ni kalasi mera wilika na iVakadewa i Josefa Simici, Ai Vakatakila 12:7–11 (ena Bible appendix) ka raica na sala eda a rawai Setani kina kei na nona ilawalawa ena iValu mai Lomalagi. Na veivakararamataki cava eso eda rawata mai na ivakamacala ni iValu mai Lomalagi e tiko ena Bible Dictionary se Gospel Topics? (topics.lds.org). Na cava eda sa vulica ena vukea meda rawa na meca ena gauna ni noda bula oqo?

• Na cava na ibalebale ni Lami sa “vakamatei mai na ivakatekivu kei vuravura”? Ai Vakatakila 13:8; raica talega na Ai Vakatakila 5:6). Sa rawa mo vukea na nomu lewe ni kalasi mera raica na isaunitaro oqo ena nodra wilika vakalasi na Mosaia 3:13 kei na Mosese 7:47 . Na cava na ibalebale mo rawai Setani “ena dra ni Lami”? (Ai Vakatakila 12:11).

Ai Vakatakila 17-18.

E dodonu meda tawasei keda tani mai na veika butobuto ni vuravura oqo.

• E sega soti ni rogo vinaka meda wilika na nona cakacaka butobuto o Papiloni kei na nona lutu ena Ai Vakatakila 17–18, ia sa ivakasala tiko baleta ni sa rawa me dua o Papiloni me ivakatakilakila ni vuravura butobuto eda bula tiko kina nikua. Sa rawa beka mo vida na veiwase oqo kina ilawalawa lalai ni lewe ni kalasi ka kerea mera vakasaqara na isaunitaro ki na taro vakaoqo: Na cava na vuna era sa kuitaki kina na tamata kivei Papiloni, se veika vakavuravura? Na cava e rui rerevaki kina o Papiloni? Na cava ena yaco vei Papiloni? Na ivakaro cava sa solia tiko o Joni vei keda meda drotani rawa mai na itinitini kei Papiloni?

• Ni ra sa wilika oti na lewe ni kalasi na Ai Vakatakila 18:4, sa rawa mera veivosakitaka na sala mera “lako tani mai” Papiloni ka “kakua ni cala vata kaya.” Me vakataka, na ivolanikalou se nodra itukutuku cava na iliuliu ni Lotu sa vukei keda meda vorata rawa na veivakatovolei kei Papiloni, se o vuravura? Sa rawa me saravi na vidio “Dare to Stand Alone” se “Separating Ourselves from the World” (LDS.org) se wilika na vosa nei Elder Quentin L. Cook e tiko ena “iKuri ni iVurevure.” Na vakasama cava era rawa ni wasea na lewe ni kalasi ena sala me bulataki kina na rua na ivakavuvuli a vakamacalataka tiko o Elder Cook? Ena vakasama cava eda sa “lako tani ” kina maivei Papiloni? (raica, me vakataka na, V&V 133:12–14). Na cava e rawa ni da cakava me da vakayaloqaqataka kina eso mera cakava vakakina?

Ai Vakatakila 19:5–20:15

Sa rawa meda vakavakarau tiko ki na iKarua ni Lako mai ni Turaga kei na Siga ni Lewa.

• Na iKarua ni Lako Mai i Jisu Karisito sa dau vakatokai tiko me “siga i Jiova e levu ka rerevaki” (Joeli 2:31), ka vakakina mai na Ai Vakatakila 19–20, e vakatoka me dua na ivakamacala vinaka. Sa rawa mo vola ena vava eso na ka sa yaco e tukuni tiko ena Ai Vakatakila 19:5-20:15. Kerea na lewe ni kalasi mera vakasaqara na tikina e vakamacalataka tiko na veisiga oqo. Na cava e tukuni tiko kina na siga oqo me levu ka rerevaki? Na cava era vulica na kalasi mai na veitikina oqo baleta na iVakabula kei na kena gadrevi meda veivutuni? Na cava eda sa rawa ni cakava ena gauna oqo meda na maliwai ira kina o ira era na rekitaka na gauna ni Nona lako mai?

• Me uqeta na kena veivosakitaki na ivola ni bula, sa rawa mo sureta na lewe ni kalasi mera cakava e dua na ivola lailai ena kena lobiki vaka-va e dua na pepa. Mera na qai wilika na Ai Vakatakila 20:12–15, tugana na veika era vinakata me volai baleti ira ena ivola ni bula, ka vola na veika oqori ena nodra ivola lailai. (Na ibalebale ni “ivola ni bula” ena rawa me kune ena “iKuri ni iVurevure.”) Ena vakacava beka na noda nanuma keda sa kacivi ki na itikotiko va-Kalou nikua? Sa rawa mo vakayagataka na itukutuku nei Elder Jörg Klebingat “Vakanamata ki na iDabedabe Vakatui ni Kalou ena Yalodei” (Ensign se Liaona, Nove. 2014, 34–37) me tiki ni veivosaki. Sa rawa talega me talevi lesu na itukutuku nei Elder Jeffrey R. Holland “O Koya Mo Dou Qai Vinaka Sara—Vakaoti” (Ensign se Liaona, Nove. 2017, 40–42). Na cava ena solia na itukutuku oqo ki na veivosaki me baleta na vakavakarau ki na Siga ni Lewa?

Ai Vakatakila 21:1-22:5

Kevaka eda sa yalodina, eda na vakalougatataki ena lagilagi ni silesitieli.

• Dina ga sa parofisaitaki tu mai ni iotioti ni gauna oqo ena sinai ena veika butobuto kei na veika rerevaki, na kalougata a raica o Joni vei ira sa yalodina e uabaleta sara na veika rarawa ena yaco taumada. Me vukei ira na lewe ni kalasi mera dikeva na itinitini totoka ki na iVakatakila, sa rawa mo sureti ira mera taleva lesu na Ai Vakatakila 21:1–22:5, mera raica kina na malanivosa eso e uqeti ira mera sasaga yani ki na lagilagi vakasilesitieli. Na yalayala cava sa soli vei ira na yalodina? E vukei keda vakacava na ivakamacala oqo ena gauna eda sotava kina na noda bolebole kei na veivakatovolei nikua?

Vakayaloqaqataki na Vuli e Vale

Mera uqeti na lewe ni kalasi mera vulica na iVola i Momani ena yabaki mai oqo—vakai ira yadua kei na nodra matavuvale— wasea eso na yalayala vakaparofita oqo.

Peresitedi Gordon B. Hinckley: “Au sega ni vakabekataka niu sa yalataka eke vei kemuni yadua kevaka ko ni na [wilika na iVola i Momani], se cava ga na levu ni gauna ko ni sa wilika oti kina, ena yaco mai ki na nomuni bula kei na nomuni itikotiko e dua na ikuri ni vakarau ni Yalo ni Turaga, ka dua na igu kaukauwa mo ni talairawarawa ki na Nona ivakaro, kei na dua na ivakadinadina kaukauwa cake ni sa bula dina tiko na Luve ni Kalou” (“A Testimony Vibrant and True,” Ensign, Aug. 2005, 6).

Peresitedi Thomas S. Monson: “Au vakauqeti keda kece me da vulica ena yalomasumasu ka vakananuma vakatitobu e veisiga na iVola i Momani. Ni da vakayacora vakakina, eda na rawa kina ni rogoca na domo ni Yalo, me da vorata na veitemaki, me da ulabaleta na vakatitiqa kei na rere, ka ciqoma na veivuke mai lomalagi ena noda bula.(“Na Mana ni iVola i Momani,” Ensign se Liaona, Me 2017, 87).

iKuri ni iVurevure

Ai Vakatakila 12–22.

Digitaka na ivalavala dodonu ka sega ni ivalavala butobuto i Papiloni.

E vakavulica o Elder Quentin L. Cook:

“Eda na sega ni lako tani rawa mai vuravura. Na tiko ga e valenilotu e sega ni kena isau. Ena kena vakasama dina, na noda cau ki vuravura sa tiki ni noda bolebole ka sa yaga sara kevaka meda toroya cake na noda taledi. … Sa gadrevi vei ira na lewe ni Lotu mera vakaitavi ena veika ni vuravura ena sala dodonu. Eda na qai veiraurautaka vakacava na gagadre meda cau ki na vuravura ka sega ni rawai ena ivalavala ca kei vuravura? (Raica na V&V 25:10; V&V 59:9.) Oqo e rua na ivakavuvuli ena yaco kina na duidui levu.

“1. Mera na kila na tamata ni ko sa dua na Yalododonu Edaidai yalodina. …

“2. Mo yalodei ka mo bulataka na nomu vakabauta” (“Lessons from the Old Testament: In the World but Not of the World,” Ensign, Feb. 2006, 54–55).

Na ivola ni bula.

Filipai 4:3; Ai Vakatakila 3:5; 17:8; 2 Nifai 29:11; Alama 5:58; Vunau kei na Veiyalayalati 127:6–7, 9; 128:6–7.

“Ena dua na kena vakasama na ivola ni bula sai koya na isoqoni taucoko ni nona vakasama kei na nona itovo e dua na tamata—na ivolatukutuku ni [nona] bula. Ia, e vakaraitaka na ivolanikalou ni sa volai tiko e lomalagi na kedra itukutuku na yalodina, e volai kina na yacadra, vakakina na itukutuku ni nodra cakacaka vakadodonu” (Bible Dictionary, “iVola ni Bula”).

Vakatorocaketaki Noda Veivakavulici

E dodonu vinaka ni da kaya “Au sega ni kila.” “E dau itovonibula me da via sauma na taro kece sara, ena so na gauna ena ganita me da tukuna ga, “au sega ni kila. Me da vulica mai vakataki keda ena macawa oqo na taro oya, me da qai veivosakitaka ena gauna ka tarava.’” (Veivakavulici ena iVakarau ni iVakabula, 24). Mo qai kerei ira na lewe ni kalasi mera vakasaqara ena ivolanikalou kei na ivurevure tale eso ni Lotu na kena isau.