“11–17 ni Noveba. Iperiu 7–13: ‘Sa Bete Levu ena Ka Vinaka ena Muri Mai’” Lako Mai, Mo Muri Au—Me Baleta na Matawilivola ni Siga Tabu: Veiyalayalati Vou 2019 (2019)
“11–17 ni Noveba. Iperiu 7–13,” Lako Mai, Mo Muri Au—Me Baleta na Matawilivola ni Siga Tabu: 2019
Sa Masu Vakalougatataki Eparama o Melikiseteki, mai vei Walter Rane.
11–17 ni Noveba.
Iperiu 7–13
“Sa Bete Levu ena Ka Vinaka ena Muri Mai”
Ni ko wilika na Iperiu 7–13, tugana na itukutuku ni Turaga a baleti ira na Yalododonu e Iperiu. Mo vakasaqara talega na Nona itukutuku vei iko kei ira o vakavulica tiko.
Vola na Veika o Uqeti Kina
Sureta na Veiwasei
Ni bera na kalasi, sureta e vica na lewe ni kalasi mera na mai wasea eso na tikina mai na Iperiu 7–13 a vukei ira mera “toro voleka yani [vua na Kalou] e na yalodina kei na vakabauta dina sara” (Iperiu 10:22).
Vakavulica na iVunau
Na bula kilikili ena veiyalayalati kei na veivakalougatataki ni Matabete i Melikiseteki ena veimuataki ki na bula vakacerecerei.
-
Dua na sala me dikevi kina na wase oqo o ya me sureti na lewe ni kalasi mera vola ena vava e vica na itukutuku dina e baleta na Matabete i Melikiseteki (ena kena vakasama, mera na wilika na “Matabete i Melikiseteki” ena Tudei ena Vakabauta, 101–2). Mera vakasaqara sara ena Iperiu 7:1–22 na veimalanivosa e tokona na itukutuku era tiko ena vava. Sa rawa talega mera vakayagataka na iDusidusi ni Ulutaga se na iDusidusi ki na iVolanikalou mera kunea kina na ivolanikalou veitokoni tale eso.
-
Ena Iperiu 7:11 a taroga o Paula, “Ena yaga vakacava me tubu e dua tale na bete me vaka nai valavala i Melikiseteki, ka me sega ni vakatokai me vaka nai valavala i Eroni?” Sa kena ibalebale, na cava na vuna me gadrevi tale kina na Matabete i Melikiseteki me ikuri ki na Matabete i Eroni? Sa rawa ki na lewe ni kalasi mera raica na isaunitaro dodonu e tiko ena Tudei ena Vakabauta, “Matabete i Eroni” kei na “Matabete i Melikiseteki.” Sa rawa talega mo sureti ira mera raica na veivakalougatataki sa noda baleti rau na matabete oqo (raica talega na vosa nei Sister Sheri L. Dew ena “iKuri ni iVurevure”). Era sa sotava vakacava na lewe ni kalasi na veivakalougatataki oqo?
Na cakacaka vakalotu makawa kei na kena ena gauna oqo sa vakanamata tiko vei Jisu Karisito
-
E dina ga ni da sa sega tale ni vakacabora na manumanu, eda sa vakaitavi tikoga nikua ena cakacaka vakalotu, ena sala vata ga, sa vakanamata na yaloda vei Karisito ka vakarautaka na “sala vakadonui vakalawa e drodro mai kina na veivakalougatataki kei na kaukauwa kei lomalagi ki na noda dui bula yadua” (David A. Bednar, “Ka na Bokoci na Nomuni iValavala Ca,” Ensign se Liaona, Me 2016, 60). Sa rawa mo ni vakadikeva vata eso na ivakamacala matailalai me baleta na cakacaka vakalotu ena gauna makawa e tukuni tiko ena Iperiu 8–10 kei na kedra ibalebale ni ivakatakilakila. Me vakataka, na cava na dra ni bulumakau kei na me e matataka? (raica na Iperiu 9:13–14). O cei e matataka tiko na bete levu? (raica na Iperiu 9:24-26). Ena rawa ni veivuke na vidio “Sacrifice and Sacrament” (LDS.org) . Sa vakalougatataki keda vakacava na cakacaka vakalotu ena gauna oqo ka vukea meda vakanamata vei Jisu Karisito? Na cava eda rawa ni cakava me vakaibalebale cake na cakacaka vakalotu ka vakatabakidua vua na iVakabula?
E gadrevi ena vakabauta na vakanuinui tiko ki na yalayala ni Kalou.
-
Ni gadrevi mera vukei na lewe ni kalasi mera kila vinaka na ivakavuvuli nei Paula baleta na vakabauta, sa rawa mo kerei ira mera vakamacalataka na vakabauta ena dua na yatuvosa. Me qai wiliki ka veivosakitaki vakalasi na ibalebale e solia o Paula ena Iperiu 11:1. Mo qai wasea na kalasi ki na vica na ilawalawa lalai ka lesia ki na ilawalawa yadua me vulica e dua vei ira na tamata e tukuni tiko ena Iperiu 11. Sa rawa mera vakayagataka na lewe ni kalasi na ivakamacala e botona se na iDusidusi ki na iVolanikalou mera taleva kina na ka a sotava na tamata o ya ena Veiyalayalati Makawa, ka me dua mai na ilawalawa yadua me mai wasea ki na kalasi na ka era sa kunea. Era sa vakaraitaka vakacava na tamata oqo ni ra sa vakila “sa vakadeitaki na veika sa vakanuinuitaki”? (iVakadewa ni Josefa Simici, Iperiu 11:1 [ena Iperiu 11:1, ivakamacala e botona b]). Na ivakaraitaki cava tale baleti ira na tamata yalodina era rawa ni wasea na lewe ni kalasi? Ena gauna cava eda a vakabauta tikoga kina na yalayala se bera ni yaco?
-
Ena rawa me ka ni lasa me caka e dua na qito me vukea na lewe ni kalasi mera vulica na vakabauta mai na Iperiu 11. Me vakataka, mo wasea na kalasi ki na rua na timi ka taroga na veika e baleta na vakabauta ena saumi mai ena Iperiu 11 (me vakataka, raica na “iKuri ni iVurevure”). Na imatai ni timi e raica rawa na isaunitaro e tokona mai na ivolanikalou ena soli vua e dua na poidi. Kerea na lewe ni kalasi mera veivosakitaka na veika era sa vulica mai na veitikina oqo e vukea mera kila vinaka cake kina na vakabauta.
-
Ni ra sa vulica oti na ivakavuvuli nei Paula baleta na vakabauta ena Iperiu 10:34–38; 11, era na kune vinaka beka na lewe ni kalasi ni ra vulica na vakabauta mai na ivurevure tale eso? Sa rawa mo lesia taumada e vica na lewe ni kalasi mera vulica e dua na taro e baleta na vakabauta me vakataka: Na cava na vakabauta? Eda na taracake vakacava na vakabauta? Ena sala cava eda sa kalougata kina ni da cakacakataka na noda vakabauta? Na cava ena yaco ni da digitaka meda kakua ni cakacakataka na noda vakabauta? Ia, ena kalasi, mera na qai wasea na veika era sa vulica. Se mo sureta na lewe ni kalasi mera cakacaka vata vakailawalawa mera kunea na kena isaunitaro. Eso na ivurevure era rawa ni vakayagataka ena oka kina na Alama 32:21–43; Ica 12; “Faith in Jesus Christ,” Gospel Topics, topics.lds.org; kei na Bible Dictionary, “Faith.” Ni ra sa wasea oti na lewe ni kalasi na veika era sa vulica, kerea mera raica na veika era rawa ni vaqaqacotaka kina na nodra vakabauta. Kerea e vica na lewe ni kalasi me ra wasea na nodra nanuma.
-
Na ivakasala vei ira na Yalododonu ni Iperiu era a temaki mera “suka tani tale” mai na nodra vakabauta sa rawa me yaga sara ki na lewe ni kalasi era rairai sasagataka tiko na nodra ivakadinadina. Me kunei na ivakasala oqo, sa rawa ki na lewe ni kalasi mera wilika na Iperiu 10:34–38 kei na vosa nei Elder Jeffrey R. Holland ena “iKuri ni iVurevure.” Na cava na vuna era sa sega tale ni yalonuidei na tamata e vuravura nikua (raica na Iperiu 10:35) vua na Turaga kei na Nona kosipeli? Na cava eda rawa ni cakava meda tara cake ka tudei tikoga noda vakabauta ka yalonuidei tiko me “[noda] kina na ka ka yalataki [mai vua na Kalou]”? (Iperiu 10:36). Sa rawa ki na vidio “Good Things to Come” kei na “An High Priest of Good Things to Come” (LDS.org) me ikuri ki na veivosaki oqo.
Vakayaloqaqataka na Vuli e Vale
Era sa kila vinaka tiko na lewe ni kalasi na veika a sotava o Josefa Simici ni a wilika na Jemesa 1:5, ka veimuataki yani ki na iMatai ni Raivotu. Sureti ira mera raica na veivakararamataki vou baleta na Jemesa 1:5 ni ra wilika ena macawa oqo ena itukutuku raraba nei Jemesa.
iKuri ni iVurevure
Taro baleta na vakabauta mai na Iperiu 11.
-
E vakamacalataka vakacava na Iperiu 11 na vakabauta? (raica na tikina e 1
-
Na cava a cakava na vakabauta vei Epeli me cakava? (raica na tikina e 4).
-
E tukuni tiko ena Iperiu 11, na ka cava e dredre meda cakava ke sega na vakabauta? (raica na tikina e 6).
-
Na vakabauta cava a vakauqeti Eparama me vakasaqaqara kina? (raica na tikina e 10).
-
Na cava a cakava o Aisake ki na nona vakabauta? (raica na tikina e 20).
-
Na vakabauta cava a vakauqeti Mosese me soro kina? (raica na tikina 24–27).
Na veivakalougatataki ni Matabete i Melikiseteki sa tu me noda kece.
A kaya o Sister Sheri L. Dew, daunivakasala vakacegu ena Mataveiliutaki Raraba ni iSoqosoqo ni Veivukei: “Na veivakalougatataki ni matabete sa vakarautaki tu me nodra o ira yadua na tagane kei na yalewa ivalavala dodonu. Eda na ciqoma kece na Yalo Tabu, rawata na ivakatakila yadua, ka ciqoma na edaumeni ena valetabu, eda na curu mai kina ka ‘vakaiyaragi’ tu ena kaukauwa. Na kaukauwa ni matabete e veivakabulai, veitaqomaki, ka itatarovi vei ira kece na ivalavala dodonu mai na kaukauwa ni butobuto” (“It Is Not Good for Man or Woman to Be Alone,” Ensign, Nov. 2001, 13).
“Mo qai kakua kina ni kauta laivi na nomu yalonuidei.”
E vakavulica o Elder Jeffrey R. Holland:
“E dina sara ni dau dredre—ni bera ni ko lewena na Lotu, ni ko saga tiko mo laki lewena, vakakina ni ko sa lewena oti. Sa dau vaka tu oqori na kena ivakarau, e kaya o Paula, ia kakua ni vakasukasuka. Kakua ni rere se yalolailai. Kakua ni yali nomu yalonuidei. Kakua ni guilecava na ka o a vakila e liu. Kakua ni tawavakabauta na veika vinaka o a sotava. …
“Ena vakatulewa lelevu eso sa gadrevi kina na qaqarauni kei na yalomatua, ia ni dau yaco na kena veivakararamataki, qarauna sara na veitemaki mo vakasuka mai na ka vinaka. Kevaka sa ka dodonu ni ko sa masulaka oti ka nuitaka ka bulataka, mo sa cakava sara ga oqo. Kakua ni guce ni sa veitaqataqai mai na veika dredre. … Mo Sotava na nomu vakatitiqa. Mo vakatulewataka vinaka na ka o ririkotaka. ‘Mo qai kakua ni kauta laivi na nomu yalonuidei.’ Mo tikoga ena kena salatu ka raica na totoka ni bula ni sa cereki vei iko” (“Cast Not Away Therefore Your Confidence,” Ensign, Mar. 2000, 6–11).
Vakatorocaketaki Noda Veivakavulici
Lako mada e liu ki na ivolanikalou Na ivolanikalou e dodonu me ivurevure taumada ni nomu vuli kei na vakavakarau. Na nodra vosa na parofita ena gauna oqo ena rawa me tokona na ivolanikalou vakarautaki (raica na Veivakavulici ena iVakarau ni iVakabula, 17).