“12–18 ni Okosita. Roma 7–16: ‘Mo Rawa Ga na Ca e na Vinaka’” Lako Mai, Mo Muri Au—Me Baleta na Matawilivola ni Siga Tabu: Veiyalayalati Vou 2019 (2019)

“12–18 ni Okosita. Roma 7–16,” Lako Mai, Mo Muri Au—Me Baleta na Matawilivola ni Siga Tabu: 2019

iVakatakilakila

Roma

12–18 ni Okosita.

Roma 7–16

“Mo Rawa Ga na Ca ena Vinaka”

Wilika na Roma 7–16, ka vola na veivakauqeti o sa ciqoma baleta na sala mera vukei kina na lewe ni kalasi mera vuli mai na ivolanikalou. Ena imatai ni gauna ena vaka toka me dua ga na vakasama rawarawa na nomu vakauqeti, ia ni ko tugana, era na yaco mera itaviqaravi ni vuli e vakaibalebale cake.

Vola na Veika o Uqeti Kina

iVakatakilakila

ivakatakilakila ni veiwasei

Sureta na Veiwasei

Mera na wasea na lewe ni kalasi e dua ga na ka e vakauqeti ira mai na nodra vulica tiko vakai ira yadua se vakamatavuvale na ivolanikalou, ia ena so na gauna ena veivuke me tarogi na nodra vakasama baleta e dua na ka bibi. Me vakataka, sa rawa me wiliki na Roma 10:17 kei na 15:4 ka kerea mera wasea na ivolanikalou e tara cake na nodra vakabauta se solia vei ira na inuinui.

iVakatakilakila

ivakatakilakila ni veivakavulici

Vakavulica na iVunau

Roma 8:14–18

Ena vuku i Jisu Karisito, sa rawa meda taukena na veika kece sa tu Vua na Tamada Vakalomalagi

Eda sa vakabauta oi keda na Yalododonu Edaidai, ni veimalanivosa vakaoqo “eda na taukena na veika ni Kalou” ka “taukei vata kei Karisito” e kena ibalebale ena veivuke i Jisu Karisito, eda sa rawa ni vakataka na Tamada Vakalomalagi ka ciqoma na veika kece sa tu Vua (Roma 8:17; raica talega na V&V 132:19–20). Mera vukei na lewe ni kalasi mera raica na sala e vakavulici kina na ivunau oqo ena loma taucoko ni ivolanikalou, sa rawa mo sureta e veimama ni kalasi mera vulica eso na tiki ni iVola Tabu era tiko ena “iKuri ni iVurevure” kei na ikarua ni veimama mera vulica na veitikina mai na ivolanikalou ni gauna oqo, era tiko talega ena “iKuri ni iVurevure.” Mera qai veivakavulici vakai ira na lewe ni kalasi mai na veika era sa vulica. Solia na gauna mera veivosakitaka na vuna e bibi kina na ivunau oqo. Me vakataka, na duidui cava ena yaco ki na noda bula ni da sa kila ni sa rawa meda “taukena na veika ni Kalou, ka taukei vata kei Karisito”? (Roma 8:17).
Ni da nanuma tiko ni veivakalougatataki tawamudu sa waraki ira tu na yalodina ena rawa me vukei keda ni da sotava na veitemaki se vakatovolei (raica na Roma 8:18). E dua na sala rawarawa me vakaraitaki kina na ivakavuvuli oqo o ya me droinitaki ena vava e dua na siso kauvaro; kerei ira na kalasi mera vola ena dua na yasana eso na veivakatovolei era na sotava na tamata. Mera na qai vakasaqara eso na ivolanikalou ena “iKuri ni iVurevure” ka qai vola ena yasana kadua ni siso kauvaro na veivakalougatataki tawamudu ena yaco kivei ira era sotava na nodra vakatovolei ena yalodina. E tautauvata vakacava na veivakatovolei oqo ki na veivakalougatataki sa yalataki tu? Na cava eda na kaya vua e dua e taroga ke sa yaga dina na yalodina ki na ivakaro ni Turaga?
Na vosa vakaibalebale nei Elder Dallin H. Oaks ena “iKuri ni iVurevure” ena rawa ni vukei ira na lewe ni kalasi mera veivosakitaka na sala eda na rawa kina ni “taukena na veika ni Kalou” (Roma 8:17). Na cava eso na “lawa kei na ivakavuvuli” e tukuna tiko o Elder Oaks?

Roma 8:18, 28, 31–39

“O cei me na tawasei keda mai na loloma i Karisito?

Na veivosakitaki vata ni Roma 8 ena rawa ni madigi donu mera vukei kina na kalasi mera vakila na loloma ni iVakabula. Sa rawa mo vakaraitaka toka na iyaloyalo levu ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale se dua tale na iyaloyalo i Jisu Karisito ni dou wilika vakalasi na Roma 8:18, 28, 31–39 . Na vakasama se vakanananu cava sa yaco vei ira na lewe ni kalasi ni ra wilika oti na veitikina oqo? Sa rawa mo sureta e vica na lewe ni kalasi mera wasea na sala era a rawata kina na ivakadinadina ni dina era sa kunea ena veitikina oqo. Sa rawa mo ni lagata vakalasi e dua na serenilotu (se kerea e dua me lagata se vakatagitaka) na loloma ni Kalou kei Jisu Karisito, me vakataka na “God Loved Us, So He Sent His Son” se “I Stand All Amazed” (Serenilotu, naba 187, 193). Na vosa se malanivosa cava mai na sere oqo ena vukea na lewe ni kalasi mera vakila na loloma nei Tamada Vakalomalagi kei Jisu Karisito?

Roma 13:8–10

Na ivakaro taucoko ni Kalou sa vakayacori taucoko ena ivakaro ni loloma.

Mera vukei na lewe ni kalasi mera raica ni ivakaro taucoko “sa tu vata kecega ena” ivakaro meda lomani ira na wekada (Roma 13:9), sureta mera vola ena vava na ivakaro taucoko era vakasamataka rawa. Wilika vata na Roma 13:8–10 kei na Maciu 22:36–40, ka veivosakitaka vakalasi na veiwekani e tiko ni da lomana na Kalou kei ira na wekada ka muria na ivakaro yadua era volai tiko ena vava. E veisautaka vakacava na dina oqo na ivakarau ni noda nanuma na ivakaro kei na talairawarawa?

Roma 14

E dodonu meda sa kakua ni vakalewa na nodra digidigi na tamata ka kakua ni veivakataotaki tiko vakayalo.

Me tukuni na ibalebale ni Roma 14, sa rawa mo kaya ni so na Yalododonu e Roma era a veibataka na duidui ni nodra ivakarau ni kana, na ka me caka ena siga ni gade ka rokovi, kei na so tale na itovo vakavanua. Na ka cava vakaoqo eda sotava tiko nikua? Sa rawa ki na lewe ni kalasi mera raica na Roma 14 ka soqona vata na ivakasala nei Paula ena dua ga na iyatuvosa. Na ivakasala cava eda rawa ni veiwasei kina baleta na sala meda kakua kina ni dau vakalelewa? Ena rawa me veivuke na itukutuku nei Peresitedi Dieter F. Uchtdorf ena “iKuri ni iVurevure”.

iVakatakilakila

ivakatakilakila ni vuli

Vakayaloqaqataka na Vuli e Vale

Mera vakauqeti na lewe ni kalasi mera wilika na 1 Korinica 1–7, e gadrevi mo tukuna ni tiko kina na ivakasala nei Paula vei ira na lewenilotu era bula voli tiko ena dua na siti makawa ivalavala ca ka vakalou tani levu duadua e vuravura.

iVakatakilakila

ivakatakilakila ni ivurevure

iKuri ni iVurevure

Roma 7–16

Ciqoma “na ka kecega sa tu [vei] Tamaqu” (V&V 84:38).

Mai na iVola Tabu

Mai na ivolanikalou ena gauna oqo

E tukuna o Elder Dallin H. Oaks na vosa vakatautauvata oqo:

“Sa kila tu e dua na tama vutuniyau kevaka mena solia na nona iyau vua e dua na gone se bera ni vakayavutaki tu ena vuku kei na yalomatua, ena rawa me maumau na isolisoli oqo. A kaya kina o tama vei luvena:

“‘Na ka kecega au sa gadreva meu solia vei iko—sega walega ni noqu iyau, ia na noqu itutu kei na kequ irogorogo vei ira na tamata. Na kena sa tu vei au sa rawa meu solia, ia na kequ irogorogo mo sa rawata ga vakai iko. O na rawata na isolisoli ena nomu vulica na veika au sa vulica ka bula voli me vaka au a bula voli kina. Au na solia vei iko na lawa kei na ivakavuvuli niu sa rawata mai kina na noqu vuku kei na irogorogo. Muria na noqu ivakaraitaki, mo kenadau sara me vakataki au, ko na qai yaco mo vakataki au, kei na ka kece sa tu vei au ena nomu’” (“The Challenge to Become,” Ensign, Nov. 2000, 32).

iTaukei vata kei Karisito.

“Era raici ira kece na tamata na Yalododonu Edaidai me luvena na Kalou ena vakasama vakataucoko saraga; era okata me vakalou na tamata yadua ena ituvaki, ivalavala, kei na sasaga. … Me vaka ga ni rawa vua e dua na gone me tauyavutaka na ivakarau ni bula nei nona itubutubu ni toso tiko na gauna, sa vakakina na ituvaki vakalou e rawata na tamata me tarai cake mera sa vakataka na Tamadra Vakalomalagi. … Sa tu vei ira na tagane kei na yalewa na kaukauwa mera vakacerecerei ki na ituvaki sa savasava vakalou” (“Becoming Like God,” Gospel Topics, topics.lds.org).

Vakalewai ira na tamata.

E vakavulica o Peresitedi Dieter F. Uchtdorf:

“Na ulutaga oqo ni noda vakalewai ira na tani e rawa ni vakavuvulitaki ga ena dua na ivunau rua na kena vosa. Ni yaco mai na veicati, kakase, veigaluvi, veivakacacani, sega ni veivosoti, se via veivakacacani yalovinaka vakayagataka na veika oqo:

“Muduka laivi!

“E rawarawa sara. Me da muduka laivi na dau veivakalewai ka vakaisosomitaka na vakasama kei na yalo ni veivakalewai ena lomana na Kalou kei ira na luvena. E Tamada na Kalou. Oi keda na Luvena. Eda veitacini ka veiganeni kece sara. … E kabi toka ena muaimuri ni motoka. … ka kena irairai ni tamata voravora toka na kena draiva, ia e vakavuvulitaka e dua na lesoni bibi na kena malanivosa. E volai toka kina, ‘Kua ni vakalewai au baleta ni duatani na noqu ivalavala ca mai vei iko’” (“O Ira Era Dauloloma Era na Lomani,” Ensign se Liaona, Me 2012, 75).

Vakatorocaketaki Noda Veivakavulici

Vaqara na ivurevure e tokona na ivakavuvuli Me ikuri ni vakasama ni veivakavulici ena ituvatuva oqo, sa rawa mo veisautaka na itaviqaravi mai na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale mo na vakayagataka ena nomu kalasi. (Raica na Veivakavulici ena iVakarau ni iVakabula, 17–18