mga mamumuo sa ubasan

Mayo 13–19

Mateo 19–20; Marcos 10; Lucas 18

“Unsa Pa May Akong Kulang?”

Samtang magtuon ka sa Mateo 19–20; Marcos 10; ug Lucas 18, mainampuong mokonsiderar sa unsay nakat-unan o gibati sa mga sakop sa klase sa ilang kaugalingong pagtuon.

Irekord ang Imong mga Impresyon

pagpaambit nga icon

Awhaga ang Pagpaambit

Mahimong makatabang ang panagsa nga paghisgot sa mga kasinatian sa mga sakop sa klase nga may kalabutan sa nagkadako nga paghatag og gibug-aton karong tuiga sa nagsentro sa panimalay nga pagkat-on sa ebanghelyo. Unsa nga malampusong mga kasinatian ang ilang mapakigbahin? Unsa nga mga babag o mga hagit ang ilang giatubang? Unsa nga tambag ang ilang mahatag sa usag usa?

pagtudlo nga icon

Itudlo ang Doktrina

Mateo 19:3–9

Ang kaminyoon tali sa usa ka lalaki ug usa ka babaye gi-orden sa Dios.

• Sa nagkadako nga paagi, ang panglantaw sa kalibutan bahin sa kaminyoon misimang gikan sa mahangturong kamatuoran. Aron matabangan ang imong klase nga makakat-on mahitungod sa panglantaw sa Dios bahin sa kaminyoon, mahimo nimo silang dapiton sa pagbasa sa Mateo 19:3–9 ug ilista sa pisara ang mga kamatuoran nga ilang makit-an kalabut sa kaminyoon. Mahimo usab nilang ilista ang dugang nga mga kamatuoran nga ilang makit-an diha sa mosunod: Genesis 1:27–28; 1 Mga Taga-Corinto 11:11; Doktrina ug mga Pakigsaad 42:22; 49:15–17; 131:1–4; 132:19; ug Moises 3:18, 21–24. Sa unsang paagi nga kining mga kamatuoran nasuportahan diha sa “Ang Pamilya: Usa ka Pamahayag ngadto sa Kalibutan”? (Liahona, Nob. 2010, 129).

• Unsaon nimo pagtabang sa mga sakop sa klase nga mas maandam sa pagpasabut o pagpanalipod sa mga pagtulun-an sa Ginoo bahin sa kaminyoon? Mahimo nimo silang dapiton sa paglista diha sa pisara sa pipila ka pangutana nga ilang nadunggan mahitungod sa mga pagtulun-an sa Simbahan kalabut sa kaminyoon. Mahimo dayon silang mosugyot og mga tubag niining mga pangutana gamit ang ilang nahibaloan mahitungod sa plano sa kaluwasan ug mga pamahayag gikan sa “Ang Pamilya: Usa ka Pamahayag ngadto sa Kalibutan,” Mateo 19:3–9, ug sa mga pagtulun-an diha sa “Dugang nga mga Kapanguhaan.” Ikonsiderar ang pagdapit sa mga sakop sa klase sa pag-role-play kon unsaon nila pagpasabut ang atong mga gituohan mahitungod sa kaminyoon ngadto sa tawo nga lahi og gituohan.

• Ikonsiderar ang pagpaila sa hilisgutan bahin sa kaminyoon gamit ang mosunod nga kinutlo gikan ni Elder Robert D. Hales: “Walay usa kanato ang makaminyo og perpekto; makaminyo kita og dunay potensyal” (“Pagdawat ug Pagbuntog sa mga Hagit sa Kalibutan Karon,” Liahona, Nob. 2015, 46). Dapita ang mga sakop sa klase nga maghunahuna og minyo nga managtiayon nga ilang gidayeg. Unsa ang mga kinaiya niining managtiayon? Unsa nga mga kinaiya ang gusto sa mga sakop sa klase sa usa ka kapikas, ug unsa nga mga kinaiya nga gusto nilang palamboon aron mahimong maayo nga kapikas? Ikonsiderar usab kon unsa nga mga pamahayag ang imong magamit gikan sa mensahe ni Presidente Russell M. Nelson nga “Celestial nga Kaminyoon” (Liahona, Nob. 2008, 92–95) aron sa pagtabang nga madasig ang mga sakop sa klase nga magtinguha og celestial nga kaminyoon.

mas edaran nga managtiayon diha sa atubangan sa templo

Ang mahangturon nga kaminyoon kabahin sa plano sa Dios.

Mateo 20:1–16

Ang kinabuhing dayon available sa tanan—bisan unsa pa kasayo o kadugay nato gidawat ang ebanghelyo.

• Unsay makatabang sa mga sakop sa imong klase nga magamit ang mga baruganan sa sambingay sa mamumuo diha sa ubasan? Mahimo nimong dapiton ang pipila ka sakop sa klase nga mangandam sa pag-drama sa sambingay nga ipresentar sa klase. Human sa presentasyon, ang mga tawo nga naghulagway sa mga mamumuo mahimong mopakigbahin kon unsay ilang gibati mahitungod sa bayad nga ilang nadawat ug ngano. Unsa may gisugyot niining sambingay mahitungod sa gingharian sa langit? Unsa nga dugang nga mga ideya ang mabatunan sa mga sakop sa klase mahitungod niining sambingay gikan sa mensahe ni Elder Jeffrey R. Holland nga “Mga Mamumuo sa Ubasan”? (Liahona, Mayo 2012, 31–33).

Mateo 19:16–22; Marcos 10:17–27

Ang Manluluwas mogiya kanato aron mas mapaduol ngadto Kaniya samtang mangayo kita sa Iyang tabang.

• Unsaon nimo sa pagtabang sa mga sakop sa klase nga matino ug magamit ang mga baruganan diha sa istorya bahin sa adunahan nga batan-ong lalaki? Usa ka pamaagi mao ang paghangyo kanila nga basahon ang Marcos 10:17–27 ug ikonsiderar kon nakasulay na ba sila nga mobati sama sa adunahan nga batan-ong lalaki. Unsa ang nakatabang kanila nga makasunod sa tambag sa Manluluwas bisan kon kini lisud? Aduna ba sa klase ang mopakigbahin og kasinatian diin siya nangutana, “Unsa pa may akong kulang?” (Mateo 19:20) ug nakadawat og personal nga pag-aghat nga molambo? Unsa nga kalainan ang nahimo niini sa iyang kinabuhi?

Lucas 18:9–14

Kinahanglan kitang mosalig sa kalooy sa Dios, dili sa atong kaugalingong katarung.

• Ang sambingay sa Manluluwas nga nagtandi sa pag-ampo sa Pariseo ngadto sa maniningil og buhis makatabang nimo nga matutokan ang kinaiya nga gikinahanglan sa Ginoo niadtong nagtinguha sa pagsunod Kaniya. Aron matabangan ang mga sakop sa klase nga magamit kining sambingay sa atong panahon, mahimo nimo silang dapiton sa pagsulat og usab sa pag-ampo sa Pariseo sa paagi nga naggamit sa modernong mga detalye apan nagpahayag sa samang mga kinaiya. Mahimo nilang buhaton ang samang butang ngadto sa pag-ampo sa maniningil og buhis ug dayon ipakigbahin kon unsay ilang gisulat. Sa unsang paagi nga ang mga bersikulo 15–17 ug 18–24 dunay kalabutan ngadto sa gitudlo sa Manluluwas niini nga sambingay?

• Sa unsang paagi nga kining mga bersikulo makapadasig niadtong imong tudloan nga magpabiling mapaubsanon sama sa maniningil sa buhis? Tingali ang mosunod nga pamahayag kalabut niining mga bersikulo pinaagi ni Elder Dale G. Renlund makatabang: “Ang mensahe alang kanato klaro: ang naghinulsol nga makasasala mas mapaduol ngadto sa Dios kay sa nagpakatarung sa kaugalingon nga tawo nga mipanghimaraut niana nga makasasala” (“Ang Atong Maayong Magbalantay,”Liahona, Mayo 2017, 31).

pagkat-on nga icon

Awhaga ang Pagkat-on diha sa Panimalay

Aron maawhag ang imong klase sa pagtuon sa Mateo 21–23; Marcos 11–12; Lucas 19–20; ug Juan 12, ikonsiderar ang pagpangutana kanila, “Unsa may inyong buhaton kon kamo dunay usa na lang ka semana nga mabuhi?” Sultihi sila nga kining mga kapitulo nagpadayag sa unsay gibuhat sa Manluluwas sa katapusang semana sa Iyang kinabuhi.

mga kapanguhaan nga icon

Dugang nga mga Kapanguhaan

Mateo 19–20; Marcos 10; Lucas 18

Ang kaminyoon mao ang sentro sa plano sa Dios.

Ang Unang Kapangulohan ug ang Korum sa Napulog Duha ka mga Apostoles miisyu niining pamahayag kalabut sa kaminyoon sa sama nga sekso:

“Among giawhag ang tanan sa paghinumdom sa mga katuyoan sa Langitnong Amahan sa paglalang sa yuta ug pagsangkap sa atong mortal nga pagkatawo ug kasinatian dinhi isip Iyang mga anak [tan-awa sa Genesis 1:27–28; 2:24]. … Ang kaminyoon tali sa usa ka lalaki ug usa ka babaye gipasiugdahan sa Dios ug sentro sa Iyang plano alang sa Iyang mga anak ug alang sa kaayohan sa katilingban. …

“… Ang Dios naglaum kanato nga mosuporta ug mosunod sa Iyang mga sugo bisan pa man sa managlahing mga opinyon ug mga uso sa katilingban. Ang Iyang balaod sa kaputli klaro: ang sekswal nga relasyon tukma lamang tali sa lalaki ug babaye kinsa legal nga naminyo isip bana ug asawa” (“LDS Church Instructs Leaders Regarding Same-Sex Marriage,” Ene. 10, 2014, mormonnewsroom.org).

Dugang nga mga ideya bahin sa kaminyoon.

“Ang Pamilya: Usa ka Pamahayag ngadto sa Kalibutan” mahimong makatabang sa paghisgot nganong ang mga propeta sa Ginoo mipasidaan batok sa bisan unsang butang nga sukwahi sa kaminyoon tali sa usa ka lalaki ug usa ka babaye. Ang mosunod nga mga punto mahimong makatabang usab:

• Ang pamilya usa ka mahangturong konsepto. Kitang tanan kabahin sa pamilya sa Dios, ug ang Iyang plano mao nga ang kalalakin-an ug kababayen-an maminyo ug ma-sealed aron makapuyo sila isip mga pamilya sa kahangturan (tan-awa sa Genesis 2:18, 21–24; 1 Mga Taga-Corinto 11:11).

• Isip kabahin sa plano sa Dios, ang mga bana ug mga asawa gisugo nga magdaghan ug mopuno sa yuta (tan-awa sa Genesis 1:28) ug moamuma sa ilang mga anak diha sa pagkamatarung.

• Ang katapusang katuyoan sa plano sa Dios mao ang kahimayaan, o kinabuhing dayon, diha sa presensya sa Dios, diin ang matinud-anong mga bana ug mga asawa mahimong makaangkon og walay katapusan nga pagbaton og anak ug mahangturong kalipay (tan-awa sa DP 132:19–21). Ang plano sa Dios mao lamang ang paagi sa pagkab-ot sa kahimayaan (tan-awa sa DP 131:1–4).

• Ang Ginoo nagpaabut kanato nga mopakita og gugma ug kalooy niadtong nagpasiugda o mosalmot sa butang gawas sa plano sa Dios alang sa kaminyoon, sama sa panag-ipon nga wala makasal o kaminyoon sa sama nga sekso (tana-wa sa mormonandgay.lds.org). Ang tinuod nga kalooy naglakip sa pagbuhat sa atong pinakamaayo nga mahigugmaon ug mapailubong modapit kanila nga mosunod sa plano sa Dios, nga mao lamang ang plano sa tinuod nga kalipay. Ang paghangup o pag-endorso og mga alternatibo sa plano sa Dios mas makadaut kay sa makatabang.

Pagpalambo sa Atong Pagtudlo

Ang Dios nagkinahanglan sa imong talagsaong mga talento ug mga abilidad. “Makapanalangin ka sa mga anak sa Dios pinaagi sa paggamit sa imong gugma alang sa uban, sa mga gasa nga gihatag sa Dios kanimo, ug sa mga kasinatian sa imong kinabuhi. Samtang matinud-anon ka nga moserbisyo ug magtinguha sa tabang sa Dios, Iya kang palamboon, ug modako ang imong kapasidad sa pagtudlo sa ebanghelyo sumala sa pamaagi sa Manluluwas” (Pagtudlo sumala sa Pamaagi sa Manluluwas, 5).