“Abril 29–Mayo 5. Juan 7–10: ‘Ako Mao ang Maayong Magbalantay sa mga Karnero’” Dali, Sunod Kanako—Alang sa Sunday School: Bag-ong Tugon 2019 (2019)
“Abril 29–Mayo 5. Juan 7–10,” Dali, Sunod Kanako—Alang sa Sunday School: 2019
Kinsa Kaninyo ang Walay Sala, ni Liz Lemon Swindle
Abril 29–Mayo 5
Juan 7–10
“Ako Mao ang Maayong Magbalantay sa mga Karnero”
Ikaw ug ang mga sakop sa imong klase makabaton og mga ideya samtang magbasa sa Juan 7–10 karong semanaha. Hinumdumi nga ang mga ideya niining outline kinahanglang mosuporta imbis nga mohulip sa inspirasyon nga imong madawat pinaagi sa pagtuon sa mga kasulatan.
Irekord ang Imong mga Impresyon
Awhaga ang Pagpaambit
Pahinumdumi ang mga sakop sa klase mahitugod sa kaimportante sa paghimo sa ilang mga panimalay nga sentro sa pagkat-on sa ebanghelyo. Unsa nga mga tudling gikan sa Juan 7–10 ang gihisgutan sa mga sakop sa klase uban sa ilang mga pamilya atol sa semana? Unsa ang mga mensahe nga labing makatabang kanila?
Itudlo ang Doktrina
Si Jesukristo mao ang Manluluwas sa kalibutan.
-
Sa tibuok Juan 7–10, mihimo ang Manluluwas og pipila ka pamahayag nga makatabang sa mga sakop sa klase nga mas makasabut sa Iyang misyon ug mas mahiduol ngadto Kaniya. Ikonsiderar ang pagdapit sa mga sakop sa klase sa pagbasa sa mosunod nga mga tudling sa kasulatan ug ipakigbahin kon unsay gitudlo niini mahitungod sa balaanong misyon sa Manluluwas. Sa unsang paagi nga natuman ni Kristo kining mga tahas diha sa atong kinabuhi?
-
Juan 7:37–39: “Kon adunay tawong giuhaw, umari siya kanako, ug uminom”
-
Juan 8:58: “Sa wala pa si Abraham, mao na ako” (tan-awa sa outline karong semanaha sa Dali, Sunod Kanako—Alang sa mga Indibidwal ug mga Pamilya alang sa mga ideya mahitungod niining bersikulo)
-
Juan 9:8–10, 35–38: “Ang Anak sa Dios”
-
Juan 10:7–9: “Ang pultahan”
-
Juan 10:11–14: “Ang maayong magbalantay sa mga karnero”
-
Kahayag sa Kalibutan, ni Howard Lyon
Kon magsunod kita sa mga pagtulun-an ni Jesukristo, mahimo kitang masayud nga kini tinuod.
-
Ang mga sakop sa klase mahimong mas makasabut kon sa unsang paagi nga ang pagsunod sa usa ka sugo makaugmad og pagpamatuod kon ilang itandi kini nga sumbanan ngadto sa proseso sa pagkat-on og kahanas pinaagi sa personal nga kasinatian. Pananglitan, mahimo nimong dapiton ang mga sakop sa klase kinsa nakahibalo kon unsaon pag-juggle o pagtugtog og instrumento sa musika sa pagpasabut kon giunsa nila pagpalambo kini nga mga kahanas. Sa unsang paagi nga ang pagpraktis nga sila mismo nakatudlo kanila og dugang kay sa magtan-aw lang sa usa ka tawo nga nagpahigayon sa kahanas? Isip usa ka klase, hisguti kon sa unsang paagi nga ang paningkamot nga nalambigit sa pagkat-on og kahanas matandi ngadto sa espiritwal nga sumbanan nga gihulagway sa Manluluwas diha sa Juan 7:14–17. Unsa nga mga kasinatian ang mapakigbahin sa mga sakop sa klase mahitungod sa pagsunod niining sumbanan aron makabaton og espiritwal nga kahibalo?
-
Unsaon man ninyo pagpakita sa mga kamatuoran nga gitudlo diha sa Juan 7:14–17? Usa ka ideya mao ang paghangyo sa mga sakop sa imong klase nga mopakigbahin og mga kasinatian diin nakabaton sila og pagpamatuod sa usa ka kamatuoran sa ebanghelyo pinaagi sa pagsunod niini. Ang istorya nga gisaysay ni Sister Bonnie L. Oscarson diha sa “Dugang nga mga Kapanguhaan” usa usab ka maayong ehemplo. Hatagi ang mga sakop sa klase og panahon sa paghunahuna og usa ka baruganan sa ebanghelyo nga gusto nilang makabaton og mas lig-on nga mga pagpamatuod, ug dayon awhaga sila sa pagtakda og piho nga mga tumong sa pagsunod nianang baruganan sa mas hingpit nga paagi.
Sa atong pagkaila kang Jesukristo, kita makaila sa Amahan.
-
Si Elder Jeffrey R. Holland nakaobserbar: “Ang uban sa kalibutan karon nag-antus gikan sa makapasubo nga sayop nga pagsabut kabahin Niya [ang Dios nga Amahan]. … Daghang mga modernong tawo karon moingon nga sila malagmit mobati og kakomportable diha sa mga bukton ni Jesus, apan sila dili komportable nga maghunahuna sa lisud nga pagpakigharong sa Dios” (“Ang Kahalangdon sa Dios,” Liahona, Nob. 2003, 71). Unsa man ang gitudlo sa mga pulong sa Manluluwas diha sa Juan 8:18–19, 26–29 mahitungod sa koneksyon tali Kaniya ug sa Iyang Amahan? Human mabasa ug mahisguti kining mga bersikulo, ang mga sakop sa klase mahimo nga molista diha sa pisara sa pipila ka butang nga gibuhat, gisulti, o gitudlo ni Jesus. Unsa ang atong makat-unan mahitungod sa Dios nga Amahan gikan niining mga butanga?
Ang kalooy sa Manluluwas gipadangat ngadto sa tanan nga naghinulsol.
-
Niadtong kinsa mibati nga gipanghimaraut tungod sa ilang mga sala, ang istorya bahin sa Manluluwas nga nagtanyag og kalooy ug paghinulsol ngadto sa babaye nga nadakpan tungod sa pagpanapaw mahimong usa ka tinubdan sa kadasig. O, kon ang mga sakop sa klase mibati nga natintal sa pagpanghimaraut sa uban tungod sa ilang mga sala, ang istorya magsilbi isip usa ka pasidaan. Mahimo nimo silang dapiton sa pagbasa sa Juan 8:1–11, nga mangita sa mga tubag sa mga pangutana sama sa mosunod: Unsa may gitudlo niining istorya mahitungod sa kalooy sa Manluluwas? Sa unsang paagi nga ang pagdawat sa Iyang kalooy kon kita makasala makatabang kanato kon kita matintal sa paghukom sa uban? (tan-awa sa Alma 29:9–10).
-
Aron matabangan ang mga sakop sa klase nga makita ang personal nga kamahinungdanon sa Juan 8:1–11, ikonsiderar ang pagbahin sa klase ngadto sa tulo ka grupo—ang usa mag-focus sa mga pulong ug mga aksyon sa mga Pariseo, ang usa mag-focus sa mga pulong ug mga aksyon sa Manluluwas, ug ang usa mag-focus sa mga pulong ug mga aksyon sa babaye. Dapita ang matag grupo sa paghimo og lista sa espiritwal nga mga kamatuoran nga ilang nakat-unan gikan sa pagbasa sa matag bahin sa istorya.
-
Usahay wala kita makabantay sa mga paagi sa atong paghukom sa uban. Ania ang usa ka kalihokan aron makatabang sa mga sakop sa klase nga mabuntog kini nga kalagmitan: Hangyoa ang klase nga tabangan ka nga maghimo og lista sa mga paagi nga atong hukman ang mga tawo (sa ilang panagway, sa ilang kinaiya, sa ilang gigikanan, ug uban pa). Hatagi ang mga sakop sa klase og mga piraso nga papel nga gigunting sa porma sa usa ka bato, ug papilia sila og usa ka paagi sa paghukom sa uban nga ilang gibati nga sad-an sila ug isulat kini diha sa papel nga bato. Unsa ang atong makat-unan gikan sa mga pulong sa Manluluwas ngadto sa mga Pariseo diha sa Juan 8:1–11? Dapita ang klase sa pagsulat diha sa laing bahin sa ilang papel nga mga bato og butang nga makapahinumdom kanila nga dili mohukom (tingali mga pulong gikan sa Juan 8).
Awhaga ang Pagkat-on diha sa Panimalay
Hangyoa ang mga sakop sa klase sa paghunahuna og panahon sa dihang nawad-an sila og butang nga bililhon ngadto kanila. Diha sa mga kasulatan alang sa leksyon sa sunod semana, ilang makat-unan kon unsay bation sa Langitnong Amahan ug ni Jesukristo mahitungod niadtong nangawala.
Dugang nga mga Kapanguhaan
Ang pagsunod og usa ka baruganan makatabang kanato nga makabaton og pagpamatuod bahin niini.
Si Sister Bonnie L. Oscarson miingon:
“Ang Manluluwas mitudlo, ‘Kon tuyuon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios, o nagsulti ba lamang ako sa kinaugalingon kong pagbulot-an’ [Juan 7:17]. Usahay bali ang atong buhaton. Pananglit, atong gamiton kini nga paagi: Malipay kong magsunod sa balaod sa ikapulo, apan kinahanglan ko unang mahibaloan nga kini tinuod. Tingali mag-ampo kita aron makaangkon og pagpamatuod sa balaod sa ikapulo ug nanghinaut nga ang Ginoo mopanalangin kanato niana nga pagpamatuod sa dili pa gayud kita makasulat diha sa resibo sa ikapulo. Kini dili gayud mosalir. Ang Ginoo nagpaabut nga kita mopakita og hugot nga pagtuo. Kinahanglan kanunay kitang mobayad og hingpit ug tinud-anay nga ikapulo aron makaangkon og pagpamatuod sa ikapulo. …
“Buot kong makigbahin og usa ka ehemplo kon sa unsa nga paagi ang pagsunod sa baruganan nakatabang nato nga makabig nianang baruganan. … Ang akong mga ginikanan ug magtutudlo sa simbahan misilsil kanako sa bili sa pagtagad sa akong lawas nga may respeto, pagbaton og limpyo nga hunahuna, ug labaw sa tanan, pagkat-on sa pagsalig sa mga sugo sa Ginoo. Mihukom ko sa paglikay sa mga sitwasyon nga ako nasayud nga adunay alkohol ug sa pagpalayo sa sigarilyo ug mga druga. Kasagaran kini nagpasabut nga dili ko iapil sa mga party, ug panagsa ra kong i-date. Ang paggamit og druga nahimong mas sagad sa mga batan-on, ug ang mga kuyaw wala kaayo mahibaloi sama karon. Daghan sa akong mga kaedad sa kadugayan nag-antus og permanenting kadaut sa pagkayabag sa hunahuna o nagumon sa pagkaadik. Mapasalamaton ko nga natudloan sa pagsunod sa Pulong sa Kaalam diha sa akong panimalay, ug nakaangkon ko og lig-ong pagpamatuod niana nga baruganan sa ebanghelyo samtang ako nagbansay og hugot nga pagtuo ug gisunod kini. Ang nindot nga pagbati nga akong gibati naggagikan sa pagsunod sa tinuod nga baruganan sa ebanghelyo nga gidasig sa Espiritu Santo nga kining baruganan tinuod” (“Magpakabig Kamo,”Liahona, Nob. 2013, 77).
Pagpalambo sa Atong Pagtudlo
Pagpakabuhi nga takus sa giya sa Espiritu. Kon imong sundon ang ebanghelyo, ikaw takus sa pagpakig-uban sa Espiritu, kinsa mao ang labing maayo nga magtutudlo. Samtang magtinguha ka sa Iyang giya, ang Espiritu Santo mohatag kanimo og mga hunahuna ug mga impresyon kon unsaon pagtubag ang mga panginahanglan niadtong imong tudloan (tan-awa sa Pagtudlo sumala sa Pamaagi sa Manluluwas, 5).