“Mayo 20–26. Mateo 21–23; Marcos 11; Lucas 19–20; Juan 12: ‘Tan-awa, Ang Imong Hari Nagaanhi’” Dali, Sunod Kanako—Alang sa Sunday School: Bag-ong Tugon 2019 (2019)
“Mayo 20–26. Mateo 21–23; Marcos 11; Lucas 19–20; Juan 12,” Dali, Sunod Kanako—Alang sa Sunday School: 2019
Si Zaqueo diha sa Kahoy nga Sikomoro, ni James Tissot
Mayo 20–26
Mateo 21–23; Marcos 11; Lucas 19–20; Juan 12
“Tan-awa, Ang Imong Hari Nagaanhi”
Samtang magbasa ka sa Mateo 21–23; Marcos 11; Lucas 19–20; ug Juan 12, hunahunaa ang mga pangutana nga imong mapangutana nga makatabang nga matubag ang mga panginahanglan sa mga sakop sa imong klase. Ang Espiritu Santo modasig kanimo aron masayud kon hain nga mga pangutana ug mga baruganan, lakip na kadtong nahisgutan niining outline, ang labing makatubag niadtong mga panginahanglan.
Irekord ang Imong mga Impresyon
Awhaga ang Pagpaambit
Atol sa semana sa dili pa magklase, dapita ang pipila ka sakop sa klase nga mangandam sa pagpakigbahin og ilang kasinatian sa pagtuon sa gi-assign nga mga kapitulo niining semanaha. Unsa nga mga panalangin ang moabut kon magtuon sila sa mga kasulatan atol sa semana?
Itudlo ang Doktrina
Ang Manluluwas personal nga nakaila kanato.
-
Tingali nabati sa mga sakop sa imong klase nga napasagdan o nakalimtan usahay sa ilang kinabuhi. Ang istorya bahin ni Zaqueo makatabang nga ilang masabtan nga ang Langitnong Amahan ug si Jesukristo nakaila kanila ug nagpakabana kanila. Aron matabangan ang mga sakop sa klase nga mapahisama kini nga istorya ngadto sa ilang kinabuhi, dapita sila sa paghunahuna sa ilang kaugalingon isip si Zaqueo. Unsa kaha ang iyang nakat-unan mahitungod sa Manluluwas gikan sa iyang kasinatian? Unsa ang atong makat-unan gikan sa mga paningkamot ni Zaqueo mahitungod sa pagtinguha sa Manluluwas?
-
Mahimong makatabang ang paghangyo sa mga sakop sa klase sa paghunahuna sa ubang mga higayon diha sa mga kasulatan diin ang Ginoo mitawag sa mga tawo pinaagi sa ilang ngalan. (Ang ubang mga ehemplo gihatag diha sa “Dugang nga mga Kapanguhaan.”) Mahimo usab nimong dapiton ang mga sakop sa klase sa pagpakigbahin og mga kasinatian nga nagkumpirmar ngadto kanila nga ang Ginoo personal nga nakaila kanila.
Mateo 21:1–11; Marcos 11:1–11; Lucas 19:29–44; Juan 12:12–16
Si Jesukristo mao ang atong Hari.
-
Usa ka yano nga kalihokan ang makasugod og panaghisgutan mahitungod sa madaugon nga pagsulod sa Manluluwas ngadto sa Jerusalem: Pipila ka sakop sa klase mahimong magdrowing diha sa pisara og mga butang nga may kalabutan sa usa ka hari, sama sa korona o trono, samtang ang uban motag-an kon unsay ilang gidrowing. Dayon ang ubang mga sakop sa klase mahimong magdrowing og usa ka nati nga anak sa asna [colt] ug mga sanga sa kahoy. Unsay kalabutan niining mga butanga ngadto sa usa ka hari? Mahimo dayon nimong ipakita ang hulagway bahin sa madaugon nga pagsulod sa Manluluwas ngadto sa Jerusalem gikan sa outline karong semanaha sa Dali, Sunod Kanako—Alang sa mga Indibidwal ug mga Pamilya ug dapita ang mga sakop sa klase sa pagbasa sa Marcos 11:1–11. Giunsa pagkaila niining mga tawo kang Jesus isip ilang Hari? Unsaon nato pagsimba si Jesukristo isip atong Hari pinaagi sa atong mga pulong ug mga aksyon?
-
Aron matabangan ang mga sakop sa klase nga makasabut nga si Jesukristo mao ang atong Hari, mahimo nimo silang hangyuon sa pagribyu sa himno nga “Jesus, Kanhiay Kabus nga Natawo,” Mga Himno ug mga Awit sa mga Bata, nu. 20, o laing himno mahitungod kang Jesus isip atong Hari. Unsa nga mga pulong gikan sa himno ang nagpahinumdom kanato bahin sa mga kamatuoran diha sa Mateo 21:1–11; Marcos 11:1–11; Lucas 19:29–44; ug Juan 12:12–16?
Ang duha ka dagkong mga sugo mao ang paghigugma sa Dios ug paghigugma sa uban sama sa atong kaugalingon.
-
Si Presidente Dieter F. Uchtdorf nagtudlo nga ang paghimo sa ubang mga butang nga maoy sentro sa atong kinabuhi kay sa duha ka dagkong mga sugo susama sa pagtira sa bakante nga bongbong ug magdrowing og mga target palibut sa mga panâ (tan-awa sa “Pagpunting sa Sentro,”Liahona, Ene. 2017, 4–5). Ang paghisgot ba niining analohiya makatabang sa mga sakop sa klase nga makasabut sa Mateo 22:34–40? Usa ka paagi sa pagbuhat niini mao ang pagplastar og dakong papel diha sa salog ug tuguti ang mga sakop sa klase nga magpuli-puli sa paghulog og bolpen o lapis ngadto niini. Dayon mahimo silang magdrowing og mga target diin ang ilang mga bolpen o mga lapis moigo sa papel ug butangi og label ang matag target uban sa usa ka sugo. Human mabasa ang Mateo 22:34–40 nga magdungan, mahimo kang madrowing og bag-ong target nga moliyok sa tanang mga target ug butangi kini og label nga “Higugmaa ang Dios ug Higugmaa ang Imong Silingan.” Sa unsang paagi nga ang pag-focus sa duha ka dagkong mga sugo makatabang kanato sa pagsunod sa ubang mga sugo sa Dios? Unsaon nato pagsiguro nga atong na-focus ang atong pagkamasulundon diha niining duha ka dagkong mga sugo?
Panalipdan kita kon maglikay kita sa pagsunod sa magtutultol nga buta.
-
Makabenepisyo ba ang mga sakop sa imong klase sa paghisgot sa termino nga “magtutultol nga buta,” nga gigamit sa Manluluwas sa paghulagway sa pagkabuta sa nga Pariseo ug mga escriba sa espiritwal nga paagi? (Mateo 23:16). Mahimong maghunahuna ka og paagi sa pagpakita kon unsay mahitabo sa usa ka tawo nga magsunod sa tawo nga dili makakita. O ang klase mahimong maglista diha sa pisara sa mga kinaiya sa usa ka magtutultol nga buta, sama sa gihulagway diha sa Mateo 23:13–33. Sa pagdugang sa lista, ikonsiderar ang pagtan-aw sa dugang nga mga kasulatan nga nagtudlo mahitungod sa espiritwal nga pagkabuta, sama sa 2 Mga Taga-Corinto 4:3–4; 2 Nephi 9:28–32; ug Jacob 4:14. Unsaon man nato sa pag-ila ug paglikay sa magtutultol nga buta?
-
Mahimo nimong tabangan ang mga sakop sa klase nga makasabut nga ang mga escriba ug mga Pariseo mas naka-focus sa bulawan ug sa mga gasa diha sa templo kay sa tinuod nga kahulugan sa templo (tan-awa sa Mateo 23:16–22). Sa pagbuhat niini, ikonsiderar ang pagpakigbahin sa sambingay sa perlas ug sa kahon pinaagi ni Presidente Boyd K. Packer diha sa “Dugang nga mga Kapanguhaan.” Unsa kaha ang makabalda kanato sa pagtagamtam sa tinuod nga mga panalangin sa templo?
Ang Mahinulsulon nga Maniningil og Buhis ug ang Nagminatarung sa Kaugalingon nga Pariseo diha sa Templo, ni Frank Adams
Ang pagdayeg sa mga tawo makapugong kanato nga mahimong maisugon nga mga disipulo ni Jesukristo.
-
Ang ubang mga tawo nga mituo ni Jesukristo mahimong dili andam nga manalipod sa Iyang ebanghelyo, ilabi na diha sa mga katilingban nga misalikway o mibiay-biay sa relihiyusong mga gituohan. Unsa nga mga leksyon nga ang Juan 12:42–43 aduna alang kanato karon? Mahimo nimong dapiton ang klase sa pagsiksik sa mosunod nga mga kasulatan ug moila sa mga tawo nga nagtinguha sa pagpahimuot sa mga tawo ug ang mga tawo nga nagtinguha sa pagpahimuot sa Dios: Exodo 32:1–8; 1 Samuel 15:18–25; Mateo 14:1–10; 1 Nephi 6:1–6; Mosiah 17:1–12; ug Moroni 8:16. Unsa ang atong makat-unan gikan niini nga mga ehemplo? Alang sa dugang pa mahitungod sa atong responsibilidad sa pagpahayag sa atong pagtuo diha sa pampublikong mga kahimtang, tan-awa sa Elder Robert D. Hales, “Pagpreserbar sa Kabubut-on, Pagpanalipod sa Kagawasan sa Relihiyon,” Liahona, Mayo 2015, 111–13.
Awhaga ang Pagkat-on diha sa Panimalay
Ang Manluluwas nanagna nga sa katapusang mga adlaw bisan ang labing pinili mahimong malingla (tan-awa sa Joseph Smith—Mateo 1:22). Aron madasig ang mga sakop sa klase nga magbasa sa Joseph Smith—Mateo 1; Mateo 25; Marcos 12–13; ug Lucas 21 sunod semana, mahimo nimo silang sultihan nga makakita sila diha niining mga kapitulo sa labing importante nga butang nga makalikay sa pagpanglingla sa ulahing mga adlaw.
Dugang nga mga Kapanguhaan
Ang Langitnong Amahan nakaila sa tagsa-tagsa kaninyo.
Si Elder Neal A. Maxwell namahayag: “Ako mopamatuod nga ang Dios nakaila sa usag usa ninyo … sulod sa dugay na kaayo nga panahon (tan-awa DP 93:23). Nahigugma Siya ninyo sulod sa dugay na kaayo nga panahon. Wala lamang Siya mahibalo sa mga ngalan sa tanang mga bitoon (tan-awa sa Salmo 147:4; Isaias 40:26); nakaila Siya sa inyong mga ngalan ug sa tanan ninyong mga kagul-anan ug mga kalipay!” (“Mahinumdom Kon Unsa ka Maloloy-on ang Ginoo,” Liahona, Mayo 2004, 46).
Mga higayon nga ang Ginoo mitawag sa mga tawo pinaagi sa ngalan.
Ang sambingay sa perlas ug sa kahon.
Si Presidente Boyd K. Packer mipakigbahin niining sambingay: “Usa ka negosyante nga tawo nga nagtinguha sa bililhong mga brilyante sa katapusan nakakita sa perpekto nga perlas. Gipakulit niya ang labing maayo nga magkukulit og usa ka talagsaong kahon sa brilyante ug gitabunan ang sulod og blue nga velvet. Iyang gi-display ang iyang perlas nga labing bililhon aron makita sa uban ang iyang bahandi. Nagtan-aw siya samtang miabut ang mga tawo aron makakita niini. Sa wala madugay mipalayo siya sa kasubo. Ang kahon kadto maoy ilang gidayeg, dili ang perlas” (“The Cloven Tongues of Fire,” Ensign, Mayo 2000, 7).
Pagpalambo sa Atong Pagtudlo
Ayaw sulayi pagtudlo ang tanan. “Daghan kaayo ang pwedeng mahisgutan sa matag leksyon, apan dili kinahanglan nga matudlo ang tanan sa usa ka klasehan aron matandog ang kasingkasing sa usa ka tawo—kasagaran ang usa o duha ka importanting mga punto igo na. Samtang imong pamalandungan ang mga panginahanglan sa mga nagkat-on, ang Espiritu motabang kanimo sa pag-ila asa nga mga baruganan, mga istorya, o mga kasulatan ang labing makahuluganon ngadto kanila” (Pagtudlo sumala sa Pamaagi sa Manluluwas, 7).