Ikaduhang Pag-anhi

Ang Ikaduhang Pag-anhi, ni Harry Anderson

Mayo 27–Hunyo 2

Joseph Smith—Mateo 1; Mateo 25; Marcos 12–13; Lucas 21

“Ang Anak sa Tawo Moabut”

Hinumdumi ang pagsugod sa imong pagpangandam sa pagtudlo pinaagi sa mainampuong pagbasa sa Joseph Smith—Mateo 1; Mateo 25; Marcos 12–13; ug Lucas 21. Pagtinguha og inspirasyon nga ikaw ra, ug dayon ribyuha kining outline alang sa dugang nga mga ideya.

Irekord ang Imong mga Impresyon

pagpaambit nga icon

Awhaga ang Pagpaambit

Paghimo og lista diha sa pisara bahin sa mga sambingay sa Manluluwas nga makita niining basahunon karong semanaha, sama sa kahoy nga igira, ang maayong tawo ug ang tulisan, ang matinud-anon ug dautang mga ulipon, ang napulo ka birhen, ang mga talanton, ug ang mga karnero ug mga kanding. Hangyoa ang mga sakop sa klase sa pagpakigbahin og mga kamatuoran nga ilang nakat-unan gikan niining mga sambingay nga makatabang kanila sa pagpangandam alang sa Ikaduhang Pag-anhi sa Ginoo. Unsa ang ilang gibuhat aron magamit kining mga kamatuoran ngadto sa ilang kinabuhi?

pagtudlo nga icon

Itudlo ang Doktrina

Joseph Smith—Mateo 1:21–37

Ang mga panagna mahitungod sa Ikaduhang Pag-anhi sa Manluluwas makatabang kanato sa pag-atubang sa umaabut uban sa hugot nga pagtuo.

• Ang mga timailhan sa Ikaduhang Pag-anhi sa Manluluwas mahimong lisud masabtan alang sa ubang mga sakop sa klase. Mahimong makatabang kanila ang pagtrabaho diha sa mga grupo ug sa pagtino sa mga timailhan nga ilang makit-an diha sa Joseph Smith—Mateo 1:21–37. Mahimong makatabang usab kini kanila nga mas masabtan ang kaimportante niining mga timailhan kon itandi nila kini ngadto sa mga timailhan sa karsada [road signs]. Nganong importante man ang mga timailhan sa karsada? Unsa ang gisugyot niini mahitungod sa mga timailhan sa Ikaduhang Pag-anhi? Mahimo pa gani nimong hatagan ang matag grupo og mga piraso nga papel sa porma nga mga timailhan sa karsada ug dapita sila sa pagsulat diha sa matag papel og usa ka timailhan nga mag-una sa Ikaduhang Pag-anhi. Tuguti sila nga mopakigbahin sa unsay ilang nakit-an, ug dapita ang klase sa paghisgot og ebidensya niining mga timailhan sa kalibutan karon.

• Diha sa outline karong semanaha sa Dali, Sunod Kanako—Alang sa mga Indibidwal ug mga Pamilya, ang mga sakop sa klase gidapit nga mangita sa tambag niining mga bersikulo kon sa unsang paagi nga kita “dili makuyawan” atol sa mga panghitabo paingon sa Ikaduhang Pag-anhi (tan-awa usab sa pamahayag ni Presidente Thomas S. Monson diha sa “Dugang nga mga Kapanguhaan”). I-display ang hulagway nga nagpakita sa Ikaduhang Pag-anhi (tan-awa sa Ang Ikaduhang Pag-anhi, Libro sa mga Hulagway sa Ebanghelyo, nu. 66), ug dapita ang mga sakop sa klase sa pagpakigbahin og mga bersikulo nga ilang nahinumduman sa ilang personal nga pagtuon. Nganong usa man ka panalangin ang masayud mahitungod sa mga panghitabo paingon sa Ikaduhang Pag-anhi sa Manluluwas?

Joseph Smith—Mateo 1:26–27, 38–55; Mateo 25:1–13

Kinahanglang andam gayud kita kanunay alang sa Ikaduhang Pag-anhi sa Manluluwas.

• Bisan kon gihangyo kita sa Manluluwas nga kinahanglang magmahimong andam alang sa Iyang Ikaduhang Pag-anhi, sayon ra nga malambigit sa inadlaw nga kinabuhi ug dili kaayo maghunahuna mahitungod niini. Ang mga sambingay diha sa Joseph Smith—Mateo 1:26–27, 38–55 ug Mateo 25:1–13 makatabang sa mga sakop sa klase nga mahibalo sa kaimportante sa pagkahimong andam alang sa Ikaduhang Pag-anhi. Dapita ang mga sakop sa klase sa pagpangita niining mga sambingay ug mga pagtandi ug ipakigbahin kon unsay gitudlo niini mahitungod sa pagkahimong andam alang sa Ikaduhang Pag-anhi. Tingali ang usa o duha ka sakop sa klase mahimong moabut nga andam sa usa ka mamugnaong paghulagway sa usa niining mga sambingay.

• Ang sambingay sa napulo ka birhen makatabang sa mga sakop sa klase sa pagpamalandong sa ilang espiritwal nga pagpangandam sa pagsugat sa Manluluwas. Si Elder David A. Bednar mihatag og usa ka interpretasyon sa sambingay nga mahimong makatabang (tan-awa sa “Dugang nga mga Kapanguhaan”). Ang mga sakop sa klase mahimong maghisgot kon unsay atong mahimo sa atong inadlaw nga kinabuhi aron hingpit nga makabig ngadto sa ebanghelyo. Nganong kinahanglan man gayud nga ang matag usa kanato makasinati og pagkakabig alang sa atong kaugalingon? Unsa ang gikadugang sa Doktrina ug mga Pakigsaad 45:56–57 sa atong panabut bahin niining sambingay?

• Mahimong dungan kamong manganta sa mga himno mahitungod sa Ikaduhang Pag-anhi ug maghisgot sa mga mensahe nga gitudlo niini (tan-awa sa “Dugang nga mga Kapanguhaan”).

Mateo 25:14–46

Atol sa Katapusang Paghukom, mohatag kita sa Ginoo og usa ka subay bahin sa atong kinabuhi.

• Ang sambingay sa mga talanton ug ang sambingay sa mga karnero ug mga kanding makapadasig kanato sa paghunahuna mahitungod sa subay bahin sa atong kinabuhi nga atong ihatag sa Ginoo atol sa Katapusang Paghukom. Mahimong basahon ninyo og dungan ang mga sambingay ug dapita ang matag sakop sa klase sa pagpakigbahin og usa ka pangutana nga mahimong ipangutana sa Manluluwas kon mohatag kita og subay bahin sa atong kinabuhi. Hatagi og panahon ang mga sakop sa klase sa pagplano og mga paagi nga ilang lihukon ang mga impresyon nga ilang nadawat atol sa panaghisgutan.

  mga karnero ug mga kanding

  Gigamit ni Kristo ang mga karnero ug mga kanding sa pagtudlo mahitungod sa Katapusang Paghukom (tan-awa sa Mateo 25:31–33).

• Mahimo nimong ribyuhon kauban sa mga sakop sa klase ang kahulugan sa Katapusang Paghukom nga makita diha sa Giya ngadto sa mga Kasulatan, “Paghukom, Ang Katapusan,”. Dayon mahimo nimong hangyuon ang mga sakop sa klase sa pagribyu sa ubang mga kasulatan kon unsay mahitabo sa Katapusang Paghukom, sama sa Alma 5:17–25. Unsa ang gidasig niining mga kasulatan nga atong buhaton aron maandam alang nianang adlawa?

• Aron madasig ang usa ka panaghisgutan mahitungod sa Mateo 25:34–40, mahimo nimong dapiton ang mga sakop sa klase sa pagpakigbahin og mga ehemplo sa mga tawo nga nagpakita sa kalooy nga gihulagway niining mga bersikulo. Hatagi sila og panahon sa pagpamalandong kon kinsa ang mahimong magkinahanglan sa ilang pagserbisyo. Unsa ang praktikal nga mga paagi nga atong mapakaon ang gigutom, masininaan ang hubo, ug mabisitahan ang masakiton?

pagkat-on nga icon

Awhaga ang Pagkat-on diha sa Panimalay

Aron maawhag ang mga sakop sa klase nga magbasa sa Juan 13–17 atol sa sunod nga semana, hangyoa sila sa paghunahuna kon unsay ilang isulti ngadto sa usa ka anak nga lalaki o anak nga babaye sa dili pa siya mobiya sa misyon. Diha sa Juan 13–17, atong mabasa ang katapusang mga instruksyon nga gihatag sa Manluluwas sa Iyang mga disipulo sa wala pa ang Iyang Paglansang sa Krus.

mga kapanguhaan nga icon

Dugang nga mga Kapanguhaan

Joseph Smith—Mateo 1; Mateo 25; Marcos 12–13; Lucas 21

Mga Himno mahitungod sa Ikaduhang Pag-anhi.

• “Karon Kita Maglipay,” Mga Himno ug mga Awit sa mga Bata, nu. 32

• “Duol, Kamo mga Anak sa Ginoo,” Mga Himno ug mga Awit sa mga Bata, nu. 58

Ang lana sa pagkakabig.

Si Elder David A. Bednar misugyot niining posible nga interpretasyon sa sambingay sa napulo ka birhen:

“Ikonsiderar ang lana nga gihulagway nga mao ang lana sa pagkakabig [tan-awa sa Mateo 25:4–9]. …

“Ang lima ba ka but-an nga mga birhen hakog ug dili ganahang mopaambit, o nagpasabut sila og sakto nga ang lana sa pagkakabig dili mahulaman? Ang espiritwal nga kalig-on ba nga miresulta sa padayon nga pagsunod sa mga sugo mahatag sa laing tawo? Ang kahibalo ba nga naangkon pinaagi sa makugihong pagtuon ug pamalandong sa kasulatan mahatag sa tawo nga nanginahanglan? Ang kalinaw ba nga mahatag sa ebanghelyo sa matinud-anong Santos sa Ulahing mga Adlaw mapasa sa indibidwal nga nakasinati og kalisdanan o dakong hagit? Ang klaro nga tubag sa kada usa niining mga pangutana mao ang dili.

“Sama sa gipasabut og maayo sa but-an nga mga birhen, kada usa nato kinahanglan ‘mamalit alang kanato.’ Kining dinasig nga mga babaye wala maghulagway og transaksyon sa negosyo; hinoon, gipasabut nila og maayo ang atong indibidwal nga responsibilidad sa pagpabilin sa atong lamparahan sa pagpamatuod nga magsiga ug magbaton og igong suplay sa lana sa pagkakabig. Kining bililhong lana makuha usa ka tolo kada higayon—‘pagtulun-an human sa usa ka pagtulun-an [ug] lagda human sa usa ka lagda’ (2 Nephi 28:30), nga mapailubon ug makanunayon” (“Nakabig ngadto sa Ginoo,” Liahona, Nob. 2012, 109).

Ayaw kahadlok.

Si Presidente Thomas S. Monson miingon:

“Bisan og ang unos nga mga panganud magpundok, bisan og ang ulan mobundak kanato, ang atong kahibalo sa ebanghelyo ug ang atong gugma sa atong Langitnong Amahan ug sa atong Manluluwas mohupay ug molig-on kanato ug mohatag og kalipay sa atong mga kasingkasing samtang kita maglakaw nga matarung ug mosunod sa mga sugo. …

“Minahal kong mga kaigsoonan, ayaw kahadlok. Pagmaya. Ang umaabut sama sa kahayag sa inyong hugot nga pagtuo” (“Pagmaya,” Liahona, Mayo 2009, 92).

Pagpalambo sa Atong Pagtudlo

Siguroa nga nagtudlo ka sa tinuod nga doktrina. “Pangutan-a ang imong kaugalingon kanunay, ‘Sa unsang paagi ang akong gitudlo makatabang sa mga sakop sa akong klase nga makapalambo og hugot nga pagtuo diha kang Kristo, maghinulsol, maghimo ug motuman og mga pakigsaad uban sa Dios, ug modawat sa Espiritu Santo?’” (Pagtudlo sumala sa Pamaagi sa Manluluwas, 20).