“Hunyo 3–9. Juan 13–17: ‘Pabilin Kamo diha sa Akong Gugma’” Dali, Sunod Kanako—Alang sa Sunday School: Bag-ong Tugon 2019 (2019)
“Hunyo 3–9. Juan 13–17,” Dali, Sunod Kanako—Alang sa Sunday School: 2019
Sa Paghandum Kanako, ni Walter Rane
Hunyo 3–9
Juan 13–17
“Pabilin Kamo diha sa Akong Gugma”
Samtang ikaw mainampuong magtuon sa Juan 13–17, pamalandunga kon unsaon nimo nga labing mapakita ang gugma ngadto niadtong imong tudloan. Ang Espiritu Santo modala og mga ideya sa imong hunahuna samtang magtuon ka sa mga kasulatan, Dali, Sunod Kanako—Alang sa mga Indibidwal ug mga Pamilya, ug niining outline.
Irekord ang Imong mga Impresyon
Awhaga ang Pagpaambit
Isulat ang mga numero nga 13 hangtud 17 diha sa pisara, nga magrepresentar sa mga kapitulo sa Juan nga gibasa sa mga sakop sa klase karong semanaha. Dapita ang pipila ka sakop sa klase sa pagsulat, tupad sa matag numero sa kapitulo, sa pakisayran sa usa ka bersikulo nga ilang nakita nga makahuluganon ug gustong hisgutan isip usa ka klase.
Itudlo ang Doktrina
Ang Manluluwas mao ang atong ehemplo sa mapainubsanong pagserbisyo sa uban.
-
Aron matabangan ang mga sakop sa imong klase sa pagpamalandong sa kamahinungdanon sa paghugas ni Jesus sa mga tiil sa Iyang mga disipulo, mahimo nimong dapiton daan ang usa ka sakop sa klase sa pagdala sa tahas ni Pedro diha niining istorya ug ipainterbyu sa tibuok klase. Awhaga ang mga sakop sa klase sa pagsiksik sa Juan 13:1–17 ug sa paghunahuna og makahuluganong mga pangutana nga ilang mapangutana kang Pedro. Unsa ang atong makat-unan gikan niining istorya nga mahimong makaapekto kon unsaon nato sa pagserbisyo sa uban?
Ang gugma maoy motino nga kinaiya sa mga disipulo ni Jesukristo.
-
Unsa kaha ang makapaawhag sa mga sakop sa klase nga mahimong mas mahigugmaon? Tingali mahimo nimo silang pangutan-on kon unsaon nila pagkaila nga ang tawo nga ilang mahimamat usa ka sumusunod ni Kristo. Unsa man nga mga hiyas ang ilang nabantayan sa tawo? Mahimo nimo silang dapiton sa pagsiksik sa Juan 13:34–35 aron mahibalo kon unsaon pagkaila sa tinuod nga mga disipulo sa Manluluwas. Unsay atong mabuhat aron mahimo ang gugma nga maoy motino nga kinaiya sa atong pagkadisipulo? Sa unsang paagi nga kining pagtudlo makaimpluwensya sa paagi sa atong pagtratar sa uban, lakip na diha sa social media?
-
Isip usa ka klase, nakakat-on kamo og daghan mahitungod sa kinabuhi sa Manluluwas karong tuiga, lakip na sa daghang ehemplo kon giunsa Niya pagpakita ang Iyang gugma alang sa uban. Usa ka paagi sa pagtabang sa mga sakop sa klase nga makapamalandong sa sugo diha sa Juan 13:34 mao ang pagsulat og Maingon Nga Ako Nahigugma Kaninyo diha sa pisara ug sa paghangyo sa mga sakop sa klase sa paglista og mga ehemplo nga ilang mahinumduman gikan sa Bag-ong Tugon nga nagpakita sa gugma ni Jesus. Dayon mahimo nimong isulat ang Higugmaa Ang Usag Usa diha sa pisara ug hangyoa ang mga sakop sa klase sa paglista og mga paagi nga atong masunod ang Iyang ehemplo sa gugma. Ang pagkanta o pagpaminaw sa himno nga “Maghigugmaay,” Songbook sa mga Bata, nu. 74, o ang pagtan-aw sa usa sa mga video diha sa “Dugang nga mga Kapanguhaan” mahimong usa ka maayong ikadugang niini nga kalihokan.
-
Kon dili kita mobati og ingon ka mahigugmaon ngadto sa uban, unsa may atong mabuhat aron magtinguha sa gasa sa gugma? Unsay ikadugang sa tambag diha sa Moroni 7:48; 8:26 ngadto sa atong panabut bahin niining gasa? Kinsa man ang atong nailhan nga nagkinahanglan nga mobati sa atong gugma?
Ang gugma maoy motino nga kinaiya sa mga disipulo ni Kristo.
Ang Espiritu Santo makapahimo kanato sa pagtuman sa atong katuyoan isip mga disipulo ni Jesukristo.
-
Aron matabangan ang mga sakop sa klase nga makakat-on mahitungod sa lain-laing mga tahas sa Espiritu Santo, ikonsiderar ang pagbahin kanila ngadto sa mga grupo ug sa paghatag sa matag grupo og usa sa mosunod nga mga tudling: Juan 14:16–27; 15:26; ug 16:7–15. Dapita ang matag grupo sa pagsulat diha sa pisara sa unsay ilang nakat-unan mahitungod sa Espiritu Santo gikan niining mga tudling. Ang mga sakop sa klase mahimo nga modugang og ubang mga ideya nga ilang makit-an samtang magtuon sila sa mga kasulatan nga nalista diha sa “Dugang nga mga Kapanguhaan.” Kanus-a kita mibati sa impluwensya sa Espiritu Santo? Unsa nga mga butang o mga visual aid ang imong madala sa klase nga makatabang sa mga sakop sa klase nga masabtan ang mga tahas sa Espiritu Santo?
-
Ikonsiderar ang pagdapit daan sa pipila ka sakop sa klase nga magtuon sa usa sa mga pakigpulong sa kinatibuk-ang komperensya nga gisugyot diha sa “Dugang nga mga Kapanguhaan” (o sa ubang mga pakigpulong sa komperensya nga ilang nahibaloan) mahitungod sa Espiritu Santo. Tuguti sila nga ipakigbahin sa daklit kon unsay ilang nakat-unan ngadto sa klase. Unsay madugang niining mga mensahe ngadto sa unsay atong nakat-unan mahitungod sa Espiritu Santo gikan sa Juan 14–16?
Kon magpabilin kita diha sa Manluluwas, magmabungahon kita ug makabaton og hingpit nga kalipay.
-
Unsay nakat-unan sa mga sakop sa klase karong semanaha gikan sa sambingay sa Manluluwas bahin sa tanom nga parras [vine] ug mga sanga? Ikonsiderar ang pagdala og gamayng tanom ngadto sa klase ug sa paggamit niini aron pagtabang sa mga sakop sa klase nga ma-visualize ang sambingay sa Manluluwas. Human mabasa ang Juan 15:1–12 isip usa ka klase, mahimo nimong hisgutan kon unsay gipasabut sa “pabilin kamo [kang Kristo]” (Juan 15:4). Mahimo nimong dapiton ang pipila ka sakop sa klase sa pagpakigbahin kon giunsa nila pagkahibalo nga ang Juan 15:5 tinuod. (Tan-awa usab sa pamahayag gikan ni Elder Jeffrey R. Holland diha sa “Dugang nga mga Kapanguhaan.”)
Ang Langitnong Amahan ug si Jesukristo hingpit nga nagkahiusa, ug gusto Nila nga magkahiusa usab kita.
-
Tingali dili nimo matudlo ang tanang importante nga mga kamatuoran diha sa Juan 17 sa usa ka panaghisgutan sa klase, apan ania ang usa ka paagi nga matabangan ang klase sa pagtuon sa pipila niini. Ilista diha sa pisara ang mga konsepto gikan sa Juan 17, sama niini:
-
Ang atong relasyon ngadto ni Jesukristo
-
Ang relasyon ni Jesukristo ngadto sa Iyang Amahan
-
Ang atong relasyon ngadto sa tibuok kalibutan
-
Ang atong relasyon ngadto sa usag usa isip Iyang mga disipulo
Dapita ang matag sakop sa klase sa pagpili og usa niining mga konsepto ug sa pagbasa sa Juan 17, nga magsiksik sa mga bersikulo nga may kalabutan niini. Hangyoa ang pipila ka sakop sa klase sa pagpakigbahin kon unsay ilang nakat-unan.
-
Awhaga ang Pagkat-on diha sa Panimalay
Aron maawhag ang mga sakop sa klase nga magbasa sa Mateo 26; Marcos 14; Lucas 22; ug Juan 18 atol sa umaabut nga semana, mahimo nimo silang sultihan nga niining mga kapitulo ilang mabasa ang mahitungod sa usa sa mahinungdanong mga gutlo diha sa plano sa Dios bahin sa kaluwasan.
Dugang nga mga Kapanguhaan
Ang Espiritu Santo.
-
Mga Buhat 2:37–38; Mga Taga-Galacia 5:22–23; 1 Nephi 10:17–19; 2 Nephi 32:3–5; Mosiah 3:19; 3 Nephi 27:20; Moroni 8:26; 10:4–5; Doktrina ug mga Pakigsaad 8:2–3; 42:17
-
Robert D. Hales, “Ang Espiritu Santo,”Liahona, Mayo 2016, 105–7
-
Henry B. Eyring, “Ang Espiritu Santo isip Inyong Kauban,”Liahona, Nob. 2015, 104–7
-
David A. Bednar, “Dawata ang Espiritu Santo,” Liahona, Nob. 2010, 94–97
Pagpabilin kang Kristo.
Nahinumdom nga ang pulong nga pabilin nagpasabut bahin sa kapermanente ug pasalig [commitment], si Elder Jeffrey R. Holland nagtudlo:
“Nan ang buot ipasabut niini mao ang ‘pagpuyo—apan mopuyo sa kahangturan.’ Kana mao ang awhag sa mensahe sa ebanghelyo. … Duol, apan moduol aron sa pagpabilin. Duol uban sa konbiksyon ug paglahutay. …
“Si Jesus miingon, ‘Kay gawas kanako wala gayud kamoy arang mahimo’ [Juan 15:5]. Ako mopamatuod nga mao kana ang kamatuoran sa Dios. Si Kristo mao ang tanan kanato ug kita gayud ‘magpabilin’ diha Kaniya sa kanunay, dili matarug, makanunayon, sa kahangturan. Kay aron ang bunga sa ebanghelyo molipang [mobuswak] ug mopanalangin sa atong kinabuhi, kita kinahanglan gayud nga lig-ong magkupot Kaniya, ang Manluluwas kanatong tanan, ug niining Iyang Simbahan, diin nagdala sa Iyang balaan nga ngalan. Siya ang tinuod nga tanom nga parras nga mao ang atong tinuod nga tinubdan sa kalig-on ug ang mao lamang nga tinubdan sa kinabuhing dayon. Diha Kaniya dili lamang kita molahutay apan usab mopatigbabaw ug magmadaugon niining balaanong kawsa nga dili gayud mopakyas kanato” (“Pabilin Kanako,” Liahona, Mayo 2004, 32).
Pagpalambo sa Atong Pagtudlo
Dapita ang Espiritu. “Walay mortal nga magtutudlo, bisan unsa pa ka hanas o ka sinati, nga makapuli sa Espiritu. Apan kita mahimong mga instrumento sa mga kamot sa Dios aron sa pagtabang sa Iyang mga anak nga makakat-on pinaagi sa Espiritu. Aron sa pagbuhat niini, kita nagdapit sa impluwensya sa Espiritu diha sa atong mga kinabuhi ug nag-awhag niadtong atong gitudloan sa pagbuhat sa ingon. … Ang sagrado nga musika, ang mga kasulatan, mga pulong sa mga propeta sa ulahing mga adlaw, mga pagpahayag sa gugma ug pagpamatuod, ug mga panahon sa hilum nga pagpamalandong tanan makadapit sa presensya sa Espiritu” (Pagtudlo sumala sa Pamaagi sa Manluluwas, 10).