Ecce Homo, ni Antonio Ciseri

Hunyo 17–23

Mateo 27; Marcos 15; Lucas 23; Juan 19

“Tapus Na”

Sugdi ang imong pagpangandam sa pagtudlo pinaagi sa mainampuong pagbasa sa Mateo 27; Marcos 15; Lucas 23; ug Juan 19. Hinumdumi nga makahimo ka sa paghatag og gamhanang pagsaksi bahin sa Manluluwas ug sa Iyang Pag-ula samtang magpakabuhi ka nga takus sa Espiritu.

Irekord ang Imong mga Impresyon

Awhaga ang Pagpaambit

Mahimong makatabang ang pagsulat diha sa pisara sa pipila ka pulong aron sa pagpahinumdom sa mga sakop sa klase bahin sa mga panghitabo nga gihulagway diha sa mga kapitulo karong semanaha. Hangyoa ang mga sakop sa klase sa pagsulat diha sa pisara sa pipila ka pulong nga naghulagway kon unsay ilang gibati sa dihang nakabasa sila mahitungod niining mga panghitabo. Nganong mibati man sila og ingon niini?

Itudlo ang Doktrina

Mateo 27; Marcos 15; Lucas 23; Juan 19

Ang pagkaandam ni Jesukristo nga mag-antus nagpakita sa Iyang gugma alang sa Amahan ug alang kanatong tanan.

• Aron matabangan ang mga sakop sa imong klase nga makasabut kon sa unsang paagi nga ang mga istorya bahin sa kamatayon sa Manluluwas nagpakita sa Iyang gugma, sulayi ang kalihokan sama niini: Hatagi ang matag sakop sa klase og usa ka kasingkasing nga papel, ug dapita sila sa pagsulat diha sa ilang kasingkasing og mga pulong gikan sa 1 Mga Taga-Corinto 13:4–7 nga naghulagway sa gugmang putli. Dayon hangyoa sila sa pagsiksik sa Mateo 27; Marcos 15; Lucas 23; o Juan 19 ug isulat diha sa laing bahin sa ilang kasingkasing ang pipila ka bersikulo nga nagpakita kon giunsa pagpakita sa Manluluwas ang gugma nga gihulagway diha sa mga pulong nga ilang gipili. Tuguti sila sa pagpakigbahin kon unsay ilang makit-an. Unsa nga mga kasinatian ang nakatabang sa mga sakop sa klase nga makasabut sa gugma sa Manluluwas?

  

  Ang mga sundalo “nanaglukong og mga sampinit, ug kini ilang gipahaum sa iyang ulo” (Marcos 15:17).

• Unsay imong mabuhat sa pag-awhag sa mga sakop sa klase sa pagpakigbahin sa ilang mga pagpamatuod sa unsay ilang nakat-unan karong semanaha? Ikonsiderar ang pagdapit sa mga sakop sa klase sa pagpangita og himno nga naghulagway sa mga panghitabo nga ilang nabasahan o sa ilang mga pagbati mahitungod sa pag-antus ug Paglansang sa Krus sa Manluluwas. Ikonsiderar ang pagkanta og usa o sobra pa niini isip usa ka klase. Sa unsang paagi nga ang pagtuon mahitungod sa katapusang mga oras sa Manluluwas makapadasig kanato nga mosalig ug mosunod Kaniya?

• Ang art makatabang sa mga sakop sa klase sa pag-visualize sa ubang mga panghitabo nga ilang mabasahan karong semanaha (tan-awa sa “Dugang nga mga Kapanguhaan” alang sa gisugyot nga mga hulagway). Tingali mahimo nimong bahinon ang klase ngadto sa mga grupo ug hatagi og usa ka hulagway ang matag grupo. Ang mga grupo mahimong magdungan sa pagbasa sa mga bersikulo nga naghulagway kon unsay gipakita diha sa hulagway. Mahimo nilang hisgutan ang kahulugan sa mga bersikulo ug ipakigbahin kon sa unsang paagi nga ang mga hulagway makatabang kanila nga mas makasabut sa mga bersikulo. Ang matag grupo mahimong mopakigbahin sa ilang mga hunahuna ngadto sa klase.

• Dili kamo makahimo sa paghisgot sa tanang detalye mahitungod sa katapusang mga oras sa Manluluwas isip usa ka klase, apan ania ang usa ka kalihokan nga makatabang nimo sa paghisgot sa mga detalye nga labing makahuluganon ngadto sa mga tawo nga imong tudloan. Dapita ang matag sakop sa klase sa pagpili og kapitulo gikan sa basahunon karong semanaha ug mogahin og pipila ka minuto sa pagbasa niini sa daklit, nga mangita og pulong, mga pulong, o usa ka detalye nga nagtudlo nila og butang nga makahuluganon mahitungod sa Manluluwas ug sa Iyang misyon. Hatagi sila og mga oportunidad sa pagpakigbahin kon unsay ilang nakit-an ug ipasabut nganong makahuluganon kini ngadto kanila.

Mateo 27:14–60

Ang karaang mga propeta nakakita nang daan sa pag-antus ug Paglansang sa Krus sa Manluluwas.

• Tingali makapalig-on kini sa pagtuo niadtong imong tudloan nga masayud nga ang karaang mga propeta nanagna na sa daghang panghitabo sa katapusang mga oras sa Manluluwas. Usa ka paagi sa pagtabang sa mga sakop sa klase nga maribyu kining mga panagna ug makita kon sa unsang paagi kini natuman mao ang paghatag sa matag tawo og usa o sobra pa nga mga kasulatan diha sa “Dugang nga mga Kapanguhaan” ug hangyoa sila sa pagpangita sa mga bersikulo diha sa Mateo 27 nga nagpakita kon sa unsang paagi nga ang mga kasulatan natuman. Mahimo nga magbuhat ka og tsart nga motugma sa mga panagna uban sa mga katumanan niini. Mahimo nimong isugyot nga isulat sa mga sakop sa klase ang mga bersikulo nga naglangkob sa mga panagna diha sa mga margin sa ilang mga kasulatan sa Mateo 27. Unsa ang atong makat-unan gikan niini nga mga panagna? Sa unsang paagi nga kining mga panagna makapalig-on sa atong pagtuo diha ni Jesukristo?

Mateo 27:27–49; Marcos 15:16–32; Lucas 23:11, 35–39; Juan 19:1–5

Ang oposisyon dili makapugong sa buhat sa Dios.

• Ang uban sa mga sakop sa imong klase mahimong nakasagubang og oposisyon—sama sa gihukman o gibiay-biay—sa dihang mipahayag sila sa ilang mga gituohan o misulay sa pagpakabuhi sumala sa unsay ilang gituohan. Ikonsiderar ang pagsugod sa inyong panaghisgutan pinaagi sa paghangyo sa pipila ka sakop sa klase sa pagpakigbahin og mga kasinatian sa dihang nahitabo kini. Sa unsang paagi sila miatubang niini? Dapita ang mga sakop sa klase sa pagbasa sa uban niining mga bersikulo gikan sa Mateo 27; Marcos 15; Lucas 23; ug Juan 19 nga naghulagway sa pagpanggukod nga giatubang sa Manluluwas. Unsa nga mga matang sa oposisyon ang giatubang karon sa buhat sa Dios? Unsa ang atong makat-unan gikan sa mga tubag sa Manluluwas nga makatabang kanato sa pag-atubang og oposisyon? Ang ubang mga kasulatan nga makatabang kanato kon mag-atubang og oposisyon maglakip sa Mateo 5:10; Mga Taga-Roma 12:14; 2 Timoteo 3:10–12; Alma 1:19–28; ug 3 Nephi 12:10–12. Unsa ang atong makat-unan gikan niining mga bersikulo?

Lucas 23:34–43

Ang Manluluwas mitanyag kanato og paglaum ug kapasayloan.

• Makatabang ba kini sa mga sakop sa imong klase sa pagbasa sa istorya bahin sa Manluluwas nga mihangyo sa Amahan sa pagpasaylo sa mga sundalo ug mitanyag og paglaum ngadto sa tulisan diha sa krus? Ikonsiderar ang pagbahin sa klase ngadto sa duha ka grupo ug sa pag-assign og usa ka grupo nga magbasa sa Lucas 23:34–38  ug ang laing grupo sa pagbasa sa Lucas 23:39–43. Ang mga sakop sa matag grupo mahimong maghisgot kon unsay ilang nakat-unan mahitungod sa Manluluwas gikan niining mga bersikulo ug dayon ipakigbahin ang ilang mga hunahuna ngadto sa tibuok klase. Unsaon man nato sa pagsunod ang ehemplo sa Manluluwas?

• Aron matabangan si bisan kinsa sa imong klase nga tingali nagkalisud sa pagpasaylo sa uban sama sa gibuhat ni Jesus, ikonsiderar ang pagpakigbahin sa pamahayag ni Elder Jeffrey R. Holland diha sa “Dugang nga mga Kapanguhaan.”

Awhaga ang Pagkat-on diha sa Panimalay

Aron maawhag ang mga sakop sa klase nga magbasa sa Mateo 28; Marcos 16; Lucas 24; ug Juan 20–21 atol sa sunod semana, hangyoa sila sa paghunahuna kon unsay ilang isulti sa usa ka tawo kinsa miingon, “Kinahanglan ko nga makakita aron motuo.” Sultihi sila nga ang basahunon sa sunod semana makatabang kanila nga matubag kini nga problema.

Dugang nga mga Kapanguhaan

Mateo 27; Marcos 15; Lucas 23; Juan 19

Mga hulagway sa pagpanggukod, pag-antus, ug kamatayon ni Jesus.

• Ang Paglansang (LDS.org ug Libro sa mga Hulagway sa Ebanghelyo, nu. 57; Lucas 23:33–46; Juan 19:23–37)

• Paglubong ni Jesus (LDS.org ug Libro sa mga Hulagway sa Ebanghelyo, nu. 58; Juan 19:38–42)

Karaang mga panagna mahitungod sa paghusay ug pagkamatay ni Jesukristo.

• Isaias 53:5, 7

• 1 Nephi 19:9

• Isaias 50:6

• Salmo 69:21

• Salmo 22:16

• 1 Nephi 19:10

• Salmo 22:18

• Isaias 53:9, 12

• Salmo 22:7–8

• Salmo 22:1

• Isaias 53:9

Ang ehemplo sa Manluluwas sa pagpasaylo.

Si Elder Jeffrey R. Holland nagtudlo:

“May kalabutan gayud sa atong kaugalingong obligasyon nga maghinulsol mao ang pagkamatugtanon ngadto sa uban sa pagbuhat sa samng butang—kinahanglan kitang mopasaylo ingon nga kita gipasaylo. Niini kita moapil sa sukaranan gayud nga baruganan sa Pag-ula ni Jesukristo. Sigurado nga ang labing talagsaon nga gutlo nianang halandumon nga Biyernes, sa dihang ang kinaiyahan mikurog ug ang tabil sa templo natangtang, mao nga kanang dili matukib nga gutlo sa pagkamaloloy-on sa dihang si Kristo miingon, ‘Amahan, pasayloa sila; kay wala sila makasabut sa ilang ginabuhat.’Isip atong manlalaban ngadto sa Amahan, padayon gihapon Siya nga naghimo nianang sama nga pangamuyo karon—alang kaninyo ug kanako.

“Dinhi, sama sa tanang butang, gitakda ni Jesus ang sumbanan nga angayan natong sundon. Ang kinabuhi mubo ra kaayo aron igahin sa pagbaton og kasilag. … Dili kita ganahan nga mahinumduman sa Dios ang atong mga sala, mao nga dunay butang nga sayop kaayo sa atong walay kalooy nga pagsulay sa paghinumdom niadtong sa uban” (“The Peaceable Things of the Kingdom,” Ensign, Nov. 1996, 83).

Pagpalambo sa Atong Pagtudlo

Pagkuha og kalig-on gikan sa Manluluwas. “Sa imong mga paningkamot sa pagpakabuhi ug pagtudlo nga mas sama sa Manluluwas, dili kalikayan nga usahay masayop ka. Ayaw pagpakawala sa kadasig; hinoon, himoa ang imong mga sayop ug mga kahuyang nga mopadangup kanimo ngadto sa Langitnong Amahan ug sa Manluluwas” (Pagtudlo sumala sa Pamaagi sa Manluluwas, 14).