eb’ laj k’anjenel sa’ jun awimq

13–19 mayo

Mateo 19–20; Markos 10; Lukas 18

“K’a’ru maji’ ninb’aanu?”

Naq yookat chixtzolb’al Mateo 19–20; Markos 10; ut Lukas 18, k’oxla rik’in tijok k’a’ru maare xe’xtzol ut xe’reek’a li komon sa’ laa tzoleb’aal naq yookeb’ chi tzolok.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Maare us junjunq sut aatinak chirix li k’a’ru xe’xk’ul li komon sa’ li tzoleb’aal rik’in naq sa’ li chihab’ a’in yoo chi waklesimank li tzolok sa’ li ochoch. K’a’ru li chaab’ilal xe’xk’ul li te’ruuq chixwotzb’al? K’a’ru li ch’a’ajkilal yookeb’ chixnumsinkil? K’a’ru li na’leb’ naru neke’xk’e chirib’ileb’ rib’?

reetalil li k’utuk

Xk’utb’al li tzol’leb’

Mateo 19:3–9

Li sumlaak wan wiʼ jun winq rikʼin jun ixq, kʼojobʼanbʼil xbʼaan li Dios.

• Sa’ li kutan a’in, lix na’leb’ li ruchich’och’ chirix li sumlaak yoo chi najto’k rik’in li junelikil yaal. Re xtenq’ankileb’ li wankeb’ sa’ laa tzoleb’aal chi tzolok chirix li k’a’ru naxk’oxla li Dios chirix li sumlaak, naru taatz’aama chiruheb’ naq te’ril ru Mateo 19:3–9, ut te’xtz’iib’a chiru li pizarron li yaalil na’leb’ neke’xtaw chirix li sumlaak. Neke’ru ajwi’ chixtz’iib’ankil xkomoneb’ chik li yaalil na’leb’ neke’xtaw sa’eb’ li raqal a’in: Genesis 1:27–28; 1 Korintios 11:11; Tzol’leb’ ut Sumwank 42:22; 49:15–17; 131:1–4; 132:19; ut Moises 3:18, 21–29. Chan ru naq eb’ li yaalil na’leb’ a’in k’eeb’ileb’ xwankil sa’ “Li Junkab’al: Jun jek’inb’il aatin choq’ re li ruchich’och’ ”? (Liahona, noviembre 2010, 129).

• Chan ru naru taatenq’aheb’ li komon sa’ li tzoleb’aal re naq kawresinb’ilaqeb’ chixkolb’al rix lix na’leb’ li Qaawa’ chirix li sumlaak? Naru taaye reheb’ naq te’xtz’iib’a chiru li pizarron junjunq li patz’om xe’rab’i chirix li k’a’ru naxye li Kristo chirix li sumlaak. Chirix a’an, te’ruuq chixyeeb’al xsumenkileb’ li patz’om a’an rik’in li k’a’ru neke’xnaw chirix li k’uub’anb’il na’leb’ re li kolb’a-ib’ ut rik’in “Li Junkab’al: Jun jek’inb’il aatin choq’ re li ruchich’och’,” Mateo 19:3–9, ut li k’a’ru k’utb’il sa’ “Xkomon chik li k’anjeleb’aal.” Naru taak’oxla xb’oqb’aleb’ li komon chixb’aanunkil rib’ jo’ yookeb’ chixch’olob’ankil li k’a’ru naqapaab’ laa’o chirix li sumlaak re li ani jalan chik naxk’oxla.

• K’oxla xtikib’ankil li aatinak chirix li sumlaak rik’in li aatin a’in xb’aan li Elder Robert D. Hales: “Maa’ani nasumla rik’in li tz’aqalil re ru, nokosumla b’an rik’in li naru chi wank jo’kan” (“Li xaqliik chiru li ch’a’ajkilal re li ruchich’och’ anajwan,”  Jolomil Ch’utub’aj-ib’ re octubre 2015). Ye reheb’ li komon sa’ li tzoleb’aal naq te’xk’oxla jun sumal li sumsuukeb’ li chaab’il neke’xk’oxlaheb’. K’a’ru li chaab’ilal li wan re li jun sumal a’an? Chan ru te’raj li komon naq taawanq lix sum aatin, ut k’a’ru li chaab’ilal tento raj te’xtaw re naq chaab’ilaqeb’ choq’ sum aatin? K’oxla ajwi’ k’a’ru sa’ li raatin li Awa’b’ej Russell M. Nelson tatruuq chiroksinkil, li wan sa’ “El matrimonio celestial” (Liahona, noviembre 2008, 92–95) re reek’asinkileb’ xch’ool li komon sa’ li tzoleb’aal re te’xsik’ jun li choxahil sumlaak.

jun cheekel winq ut ixq chiru li santil ochoch

Li junelikil sumlaak a’an jun raqal re lix k’uub’anb’il na’leb’ li Dios.

Mateo 20:1–16

Li junelik yu’am wan choq’ qe chiqajunil—maak’a’ naxye ma chi saaj malaj chi cheek xqak’ul li evangelio.

• K’a’ru taatenq’anq reheb’ li komon sa’ laa junkab’al chixyu’aminkileb’ li na’leb’ sa’ li jaljookil ru aatin chirixeb’ laj k’anjenel sa’ li awimq? Naru taatz’aama re junjunq reheb’ li komon naq te’xkawresi rib’ chixk’utb’esinkil li jaljookil ru aatin a’in chriu li tzoleb’aal. Chirix li k’utb’esink, eb’ li ani xe’xk’ul xna’ajeb’ laj k’anjenel te’ruuq chixyeeb’al k’a’ru xe’reek’a chirix lix tojb’aleb’ li xe’xk’ul, ut k’a’ut. K’a’ru naxk’ut li jaljookil ru aatin a’in chirix lix awa’b’ejihom li Dios? K’a’ chik ru li na’leb’ naru neke’xk’ul li komon chirix li jaljookil ru aatin a’in rik’in li raatin li Elder Jeffrey R. Holland, “Los obreros de la viña”? (Liahona, mayo 2012, 31–33).

Mateo 19:16–22; Markos 10:17–27

Li Kolonel tixk’am qab’e chi nach’ok rik’in a’an naq naqapatz’ li qatenq’ankil rik’in.

• Chan ru naru taatenq’aheb’ li komon sa’ li tzoleb’aal chixk’eeb’al reetal ut chixyu’aminkil li na’leb’ sa’ li esilal chirix li saaj b’ihom? Re xb’aanunkil, naru taatz’aama chiruheb’ naq te’ril ru Markos 10:17–27 ut te’xk’oxla ma xe’reek’a junaq sut naq chanchaneb’ li saaj b’ihom? K’a’ru xtenq’ank reheb’ chixtaaqenkil lix na’leb’ li Kolonel, us ta ch’a’aj? Ma wan ani sa’ li tzoleb’aal li naru chixwotzb’al junaq sut sa’ lix yu’am naq xpatz’, “K’a’ru maji’ ninb’aanu?” (Mateo 19:20) ut xk’ul jun musiq’anb’il na’leb’ re taachaab’ilo’q? Chan ru naq xjale’ lix yu’am rik’in a’in?

Lukas 18:9–14

Tento taqakanab’ qib’ chiru li ruxtaan li Dios, moko chiru ta li qatiikilal laa’o.

• Lix jaljookil ru aatin li Kolonel chirix lix tij jun aj Fariseo ut lix tij jun aj titz’ol toj naru tatxtenq’a chixk’utb’al chan ru naq li Qaawa’ naraj naq te’wanq xch’ool li ani neke’xsik’ xtaaqenkil. Re xtenq’ankileb’ li komon chixjuntaq’eetankil li jaljookil ru aatin rik’in li kutan wanko wi’, naru taaye reheb’ naq te’xtz’iib’a chi ak’il lix tij laj Fariseo, rik’in roksinkil li aatin li nayeeman sa’ li kutan wanko wi’, a’ut chi juntaq’eet xna’leb’. Taaruuq ajwi’ te’xb’aanu chi jo’kan rik’in lix tij laj titz’ol toj, ut te’xwotz li k’a’ru xe’xtz’iib’a. Chan ru naq eb’ li raqal 15–17 ut 18–24 neke’xk’am rib’ rik’in li k’a’ru kixk’ut li Kolonel sa’ li jaljookil ru aatin a’in?

• Chan ru naq eb’ li raqal a’in neke’ru chixtenq’ankileb’ li tzolb’ileb’ aab’aan re te’wanq chi tuulaneb’ xch’ool, jo’ chanru naq kiwan laj titz’ol toj? Maare li raatin li Elder Dale G. Renlund chirixeb’ li raqal a’in te’ruuq chixtenq’ankileb’: “Saqen ru li esil choq’ qe laa’o: jun aj maak li yoo chixjalb’al xk’a’uxl jwal wi’chik naxjilosi rib’ rik’in li Dios chiru li ani naxk’oxla rib’ naq tiik xch’ool ut li naxjit laj maak a’an” (“Li qaChaab’il aj Ilol Karneer,”  Jolomil Ch’utub’aj-ib’ re abril 2017).

reetalil li tzolok

Xb’oqb’aleb’ chi tzolok sa’ kab’l

Re xk’eeb’aleb’ xch’ool li ani wankeb’ sa’ laa tzoleb’aal re te’xtzol Mateo 21–23; Markos 11–12; Lukas 19–20; ut Jwan 12, naru taapatz’ reheb’, “K’a’ raj ru taab’aanu wi ta yal jun xamaan chik tatwanq chi yo’yo? Ye reheb’ naq eb’ li ch’ol a’in neke’xk’ut k’a’ru kixb’aanu li Kolonel chiru li jun xamaan naq ok re chi raqe’k lix yu’am.

reetalil li k’anjeleb’aal

Xkomon chik li k’anjeleb’aal

Mateo 19–20; Markos 10; Lukas 18

Li sumlaak q’axal aajel ru sa’ lix k’uub’anb’il na’leb’ li Dios.

Li Xb’eenil Awa’b’ejil ut lix Molameb’ li Kab’laju chi Apostol ke’xjek’i li aatin a’in chirix li sumlaak re winq rik’in winq ut ixq rik’in ixq:

“Naqatz’aama re chixjunileb’ naq te’xk’oxla li rajom li qaChoxahil Yuwa’ naq kixyo’ob’tesi li ruchich’och’ ut kooxkanab’ chi yo’laak ut chi wank sa’ li yu’am a’in jo’ ralal xk’ajol a’an [chi’ilmanq Genesis 1:27–28; 2:24]. ... Lix sumlajik li winq rik’in li ixq k’ojob’anb’il xb’aan li Dios, ut q’axal aajel ru sa’ lix k’uub’anb’il na’leb’ choq’ reheb’ li ralal xk’ajol, ut choq’ re lix chaab’ilal li tenamit. ...

“... Li Dios naraj naq taqak’uula ut taqapaab’eb’ lix taqlahom, maak’a’ naxye k’a’ru li paab’anb’il ut li k’oxlanb’il sa’ li tenamit wanko wi’. Ch’olch’o ru lix chaq’rab’ re saq ru ch’oolej: li aatinank-ib’ ka’ajwi’ us wi b’aanunb’il xb’aan jun winq ut jun ixq li sumsuukeb’ jo’ chanru li chaq’rab’ jo’ b’eelomej ut ixaqilb’ej” (“La Iglesia SUD instruye a los líderes en cuanto al matrimonio entrepersonas del mismo sexo,”10 enero, 2014, mormonnewsroom.org).

Xkomon chik li na’leb’ chirix li sumlaak

“Li Junkab’al: Jun jek’inb’il aatin choq’ re li ruchich’och’ ” naru tatxtenq’a sa’ li aatinak chirix k’a’ut naq eb’ lix profeet li Qaawa’ nokohe’xtij chirix yalaq k’a’ru li ink’a’ naxk’am rib’ rik’in lix sumlajik jun winq rik’in jun ixq. Eb’ li na’leb’ a’in naru te’tenq’anq eere:

• Li junkab’al, a’an jun na’leb’ re li junelik q’e kutan. Chiqajunilo wanko sa’ lix junkab’al li Dios, ut lix k’uub’anb’il na’leb’, a’an naq eb’ li winq ut li ixq te’sumub’amanq ut te’tz’ape’q sa’ junajil re te’wan choq’ junkab’al sa’ li junelik q’e kutan (chi’ilmanq Genesis 2:18, 21–24; 1 Korintios 11:11).

• Jo’ jun raqal lix k’uub’anb’il na’leb’ li Dios, eb’ li b’eelomej ut ixaqilb’ej taqlanb’ileb’ chi k’ihank ut chixnujob’resinkil li ruchich’och’ (chi’ilmanq Genesis 1:28) ut chixk’irisinkileb’ li ralal xk’ajol sa’ tiikilal.

• Li rajom lix k’uub’anb’il na’leb’ li Dios a’an li taqenaqil loq’al, malaj li junelik yu’am, chiru rilob’aal li Dios, b’ar wi’ eb’ li b’eelomej ut ixaqilb’ej li tiikeb’ xch’ool te’ruuq chi wank xk’iijikeb’ ut xsahileb’ xch’ool chi junelik (chi’ilmanq Tz. ut S. 132:19–21). Ka’ajwi’ rik’in lix k’uub’anb’il na’leb’ li Dios naru natawman li taqenaqil loq’al (chi’ilmanq Tz. ut S. 131:1–4).

• Li Qaawa’ naraj naq taqaraheb’ ut taquxtaanaheb’ ru li ani jalan chik neke’xk’ut ut neke’xb’aanu li ink’a’ naxk’am rib’ rik’in lix k’uub’anb’il na’leb’ li Dios choq’ re li sumlaak, jo’ li laq’ab’ank–ib’ ut li sumlaak re winq rik’in winq ut ixq rik’in ixq (chi’ilmanq mormonandgay.lds.org). Li tz’aqal uxtaan naraj naxye xyalb’al qaq’e chixb’oqb’aleb’ rik’in rahok re te’xtaaqe lix k’uub’anb’il na’leb’ li Dios, a’an li jun chi k’uub’anb’il na’leb’ re tz’aqal sahil ch’oolejil. Rik’in xk’ulb’al malaj xk’ulub’ankil jalaneb’ chik li k’uub’anb’il na’leb’ xb’een wa chiru lix k’uub’anb’il na’leb’ li Dios, mas wi’chik li rahob’tesink naqab’aanu chiru li tenq’ank.

Xchaab’ilob’resinkil li qak’utum

Li Dios naraj ru laa seeb’al ut laa na’leb’. “Naru taawosob’tesiheb’ li ralal xk’ajol li Dios rik’in roksinkil laa rahom wan choq’ reheb’ li jun ch’ol chik, eb’ li maatan k’eeb’il aawe xb’aan li Dios, ut li k’a’ru aak’ulum sa’ laa yu’am. Naq nakatk’anjelak chi tiik aapaab’aal ut nakasik’ aatenq’ankil rik’in li Dios, a’an tatxnimob’resi, ut taanimanq aaseeb’al chixk’utb’al li evangelio jo’ kik’utuk li Kolonel” (Li k’utuk jo’ li Kolonel, 5).