"29 abril–5 mayo. Jwan 7–10: "Laa’in li chaab’il aj k’aak’alenel karneer" " Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2019 (2019)
"29 abril–5 mayo. Jwan 7–10," Kim, Taaqehin—Choq’ re li Dominkil Tzoleb’aal: 2019
Li ani maak’a’ xmaak, xb’aan xLiz Lemon Swindle
29 abril–5 mayo
Jwan 7–10
"Laa’in li chaa’b’il aj k’aak’alenel karneer"
Laa’at ut eb’ li wankeb’ sa’ laa tzoleb’aal teetaw eena’leb’ naq yookex chirilb’al Jwan 7–10 chiru li xamaan a’in. Chijultiko’q aawe naq eb’ li na’leb’ sa’ li tusleb’ aatin a’in tento te’rochb’eeni li na’leb’ nakak’ul rik’in li Musiq’ej, a’ut ink’a’ te’xk’ul xna’aj.
Xtz’iib’ankil li nakak’oxla
Xkanab’ankileb’ chi wotzok
Jultika reheb’ li komon sa’ li tzoleb’aal naq aajel ru naq li tzolok li na’ux sa’ kab’l a’anaq xch’oolil li tzolok neke’xb’aanu chirix li evangelio. K’a’ruheb’ li raqal sa’ Jwan 7–10 xe’xseraq’i li komon rik’ineb’ lix junkab’al chiru li xamaan a’in? K’a’ru li esil li jwal xtenq’ank reheb’?
Xk’utb’al li tzol’leb’
Li Jesukristo a’an aj Kolol re li ruchich’och’.
-
Chiru chixjunil Jwan 7–10, li Kolonel kixch’olob’ junjunq li aatin li naru chixtenq’ankileb’ li komon sa’ li tzoleb’aal chixtawb ’al ru lix k’anjel ut chi nach’ok rik’in. Naru taapatz’ reheb’ li komon sa’ li tzoleb’aal naq te’rileb’ ru li raqal a’in reheb’ li loq’laj hu, ut te’xwotz k’a’ru k’utb’il aran chirix lix choxahil k’anjel li Kolonel. Chan ru naq li Kristo naxb’aanu li k’anjel a’in sa’ li qayu’am?
-
Jwan 7:37–39: "Li taachaqiq re, chalqaq wik’in ut ... chi’uk’aq"
-
Jwan 8:58: "Toj maji’aq nayo’laak laj Abraham, ak Laa’inin chaq" (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al re rilb’al chik li na’leb’ chirix li raqal a’in)
-
Jwan 9:8–10, 35–38: "Li Ralal li Dios"
-
Jwan 10:7–9: "Li okeb’aal"
-
Jwan 10:11–14: "Li chaab’il aj k’aak’alenel karneer"
-
Xsaqenkil li ruchich’och’, xb’aan laj Howard Lyon
Naq naqayu’ami li k’a’ru kixk’ut li Jesukristo, too’ok chixnawb’al naq yaal.
-
Eb’ li komon sa’ li tzoleb’aal maare te’xtaw wi’chik ru chan ru naq xyu’aminkil jun li taqlahom naxkawob’resi li xnawom ch’oolej wi neke’xjuntaq’eeta a’in rik’in xtawb’al qaseeb’al chirix li k’a’ru ch’a’aj xb’aanunkil. Qayehaq, naru taapatz’ re jun li komon li naxnaw li kemok malaj li wajb’ak chan ru naq xtzol a’an. K’a’ut naq x’ajman ru naq xe’k’anjelak xjuneseb’ re xtzolb’al li k’anjel a’in, ut ink’a’ yal xe’ril jalan chik chixb’aanunkil? Aatinanqex sa’ komonil chirix chan ru naq xtzolb’al jun li k’anjel ch’a’aj chanchan ajwi’ li musiq’ejil na’leb’ kixk’ut li Kolonel sa’ Jwan 7:14–17. K’a’ru xe’xk’ul li komon sa’ li tzoleb’aal li naru te’xwotz chirix xb’aanunkil chi jo’kan re xk’ulb’al li musiq’ejil na’leb’?
-
Chan ru naru taak’ut li yaalil na’leb’ k’utb’il sa’ Jwan 7:14–17? Jun na’leb’ a’an xpatz’b’al reheb’ li komon sa’ laa tzoleb’aal chixyeeb’al resil chan ru naq xe’xk’ul xnawom xch’ool chirix jun na’leb’ re li evangelio naq xe’xyu’ami. Li aatin yeeb’il xb’aan li Hermana Bonnie L. Oscarson sa’ "Xkomon chik li k’anjeleb’aal" naxye resil a’in. Kanab’eb’ li komon sa’ li tzoleb’aal chixk’oxlankil junaq na’leb’ re li evangelio li te’raj xnawb’al xyaalal, ut ye reheb’ naq te’xk’oxla li jayalihom taaruuq te’xb’aanu re xyu’aminkil li na’leb’ a’an.
Naq noko’ok chixnawb’al ru li Jesukristo, noko’ok chixnawb’al ru li Yuwa’b’ej.
-
Li Elder Jeffrey R. Holland kixye: "Sa’ li ruchich’och’ li wanko wi’, wankeb’ li neke’sach xna’leb’eb’ chirix li Dios Yuwa’b’ej. ... Wankeb’ naab’al sa’ li kutan a’in li neke’xye naq sa te’reek’a sa’ ruq’ li Jesus, a’ut xiwxiw neke’xk’oxla xk’ulb’al rib’ rik’in li Dios." ("La grandiosidad de Dios," Liahona, noviembre 2003, 71). K’a’ru naxye li raatin li Kolonel sa’ Jwan 8:18–19, 26–29 chirix a’an ut lix Yuwa’? Chirix rilb’al ru ut aatinak chirixeb’ li raqal a’in, eb’ li komon sa’ li tzoleb’aal naru te’xtz’iib’a chiru li pizarron junjunq li na’leb’ kixb’aanu, kixye, malaj kixk’ut li Jesus. K’a’ru naqatzol chirix li Dios Yuwa’b’ej rik’ineb’ li na’leb’ a’in?
Yeechi’i’inb’il li ruxtaan li Kolonel re chixjunileb’ li neke’xjal xk’a’uxl.
-
Reheb’ li neke’reek’a naq sachb’ileb’ xb’aaneb’ lix maak, li esilal chirix chan ru naq li Kolonel kixyeechi’i li uxtaan ut li jalb’a-k’a’uxlej re li ixq li kitawe’ sa’ muxuk sumsu naru chixwaklesinkileb’ xch’ool. Malaj ut wi eb’ li komon sa’ li tzoleb’aal neke’aaleek re te’raqoq aatin chirixeb’ li ras riitz’in xb’aaneb’ lix maak, li esilal a’in naru chixk’eeb’al xtijb’aleb’. Naru taaye reheb’ naq te’ril ru Jwan 8:1–11, ut te’xsik’ xsumenkil li patz’om jo’ li we’: K’a’ru naxk’ut li esilal a’in chirix li ruxtaan li Kolonel? Chan ru naq xk’ulb’al li ruxtaan naq xoomaakob’ naru nokoxtenq’a naq noko’aaleek re tooraqoq aatin chirixeb’ li qas qiitz’in? (chi’ilmanq Alma 29:9–10). Naru ajwi’ taak’ut li video "Vete y no peques más" (LDS.org).
-
Re xtenq’ankileb’ li komon chixtawb’al ru chan ru nak’anjelak sa’ xyu’ameb’ li aatin sa’ Jwan 8:1–11, naru nakajach li tzoleb’aal sa’ oxib’ jachal—li jun jachal taaril li raatin ut lix b’aanuhomeb’ laj Fariseo, li jun chik taaril li raatin ut lix b’aanuhom li Kolonel, ut li jun chik taaril li raatin ut lix b’aanuhom li ixq. Kanab’eb’ li junjunq ch’uut chixtz’iib’ankil chi tusb’il eb’ li musiq’ejil na’leb’ xe’xtzol rik’in rilb’al ru li junjunq raqal re li esil a’in.
-
Wan naq ink’a’ naqak’e reetal chan ru naq yooko chi raqok aatin chirixeb’ li qas qiitz’in. A’an a’in jun li k’anjel re xtenq’ankileb’ li komon sa’ li tzoleb’aal chi numtaak sa’ xb’een a’in: Ye reheb’ li wankeb’ sa’ li tzoleb’aal naq tate’xtenq’a chixtusb’al chan ru naq nokoraqok aatin chirixeb’ li qas qiitz’in (chirix chan ru neke’ilok, k’a’ru neke’xb’aanu, b’ar xe’chal, ut xkomon chik li na’leb’). K’e reheb’ li komon sa’ li tzoleb’aal eb’ li kok’ hu setb’ileb’ jo’ kok’ pek, ut ye reheb’ naq te’xk’oxla chan ru naq yookeb’ chi raqok aatin chirix li ras riitz’in, ut te’xtz’iib’a a’an chiru li pek hu. K’a’ru naqatzol rik’in li raatin li Kolonel reheb’ laj Fariseo sa’ Jwan 8:1–11? Ye reheb’ li komon sa’ li tzoleb’aal naq sa’ xjunpak’alil li pek hu te’xtz’iib’a k’a’ru taajultikanq reheb’ naq ink’a’ te’raqoq aatin (maare jun aatin sa’ Jwan 8).
Xb’oqb’aleb’ chi tzolok sa’ kab’l
Ye reheb’ li komon sa’ li tzoleb’aal naq te’xk’oxla junaq sut naq xsach chiruheb’ li k’a’ru wan xloq’al choq’ reheb’. Sa’eb’ li raqal re li loq’laj hu choq’ re li xamaan jun chik, te’tzoloq chirix k’a’ru neke’reek’a li qaChoxahil Yuwa’ ut li Jesukristo chirixeb’ li ani sachsookeb’.
Xkomon chik li k’anjeleb’aal
Wi naqayu’ami jun li na’leb’, nokoxtenq’a chixk’ulb’al xnawom qach’ool chirix.
Li Hermana Bonnie L. Oscarson xye:
"Li Kolonel kixk’ut, "Wi junaq taaraj xb’aanunkil li rajom li Dios, tixnaw ma re li Dios li nintzoleb’ wi’ malaj yal injunes wib’ nin’aatinak" [Jwan 7:17]. Wan naq naqaj xb’aanunkil chi q’ajel ix. Qayehaq, maare taqaj xyeeb’al: Tink’ulub’a xpaab’ankil li chaq’rab’ re li lajetqil, a’ut xb’een wa nawaj xnawb’al naq yaal. Maare toj reetal nokotijok re xk’ulb’al jun xnawom qach’ool chirix li chaq’rab’ re li lajetqil, ut naqoyb’eni naq li Qaawa’ toorosob’tesi rik’in xnawom qach’ool chirix, us ta maajun wa xqatoj li lajetqil. Ink’a’ nak’anjelak chi jo’kan. Li Qaawa’ naraj naq taqak’anjela li qapaab’aal. Tento taqatoj li lajetqil chi tz’aqal ut chi tiik re taaruuq taqak’ul xnawom qach’ool chirix li lajetqil. ...
"Nawaj xyeeb’al resil li k’a’ru xink’ul laa’in, li naxk’ut chan ru naq xyu’aminkil jun li na’leb’ nokoxtenq’a chixk’ulb’al li qanawom chirix li na’leb’ a’an. ... Lin na’ inyuwa’ ut eb’ lin k’utunel sa’ li iglees xe’xk’ut chiwu naq aajel ru roxloq’inkil lin junxaqalil, xk’uulankil chi saq ru lin k’a’xul, ut sa’ xb’een chixjunil, xkanab’ankil wib’ chiruheb’ lix taqlahom li Qaawa’. Laa’in xink’e inch’ool naq ink’a’ tin’ok b’ar wi’ xinnaw naq taawanq li uk’a li nakaltesin, ut naq ink’a’ tinwoksi li may ut eb’ li droga. Xb’aan a’in, k’iila sut ink’a’ xinb’oqe’ sa’eb’ li ninq’e, ut ink’a’ jwal xinpatz’e’ xb’aaneb’ li saaj winq. Sa’ li kutan a’an yoo chaq chi nimank roksinkileb’ li droga sa’ xyanqeb’ li ani saaj, ut toj maji’ wan tz’aqal li nawom chirix chan ru naq xiwxiweb’ li droga, jo’ li nawb’il anajwan. Naab’al reheb’ inkomon xe’rahob’tesiik lix k’a’uxleb’ xb’aaneb’ li droga, malaj ink’a’ xe’ru chixkanab’ankil roksinkileb’. Laa’in xinb’antioxi naq xk’utman chiwu xyu’aminkil li Aatin re Chaab’il Na’leb’ sa’ wochoch, ut xintaw xnimal lix nawom inch’ool chirix li na’leb’ a’an re li evangelio naq xink’anjela lin paab’aal ut xinyu’ami. Li chaab’ilal li xweek’a sa’ xyu’aminkil jun yaalil na’leb’ re li evangelio, a’an li Santil Musiq’ej li yoo chixyeeb’al we naq yaal li na’leb’ a’an" ("Convertíos," Liahona, noviembre 2013, 77).
Xchaab’ilob’resinkil li qak’utum
Chatwanq chi k’ulub’ej re xk’ulb’al aab’eresinkil xb’aan li Musiq’ej. Naq nakayu’ami li evangelio, k’ulub’ejat re tat-ochb’eniiq xb’aan li Musiq’ej, a’an laj k’utunel li q’axal chaab’il. Naq nakasik’ aatenq’ankil, li Santil Musiq’ej tixk’e aana’leb’ ut tatreek’asi chixnawb’al chan ru xk’eeb’al li ajb’il ru xb’aaneb’ li tzolb’ileb’ aab’aan (chi’ilmanq Li k’utuk jo’ li Kolonel, 5).