“29 abril–5 mayo. Jwan 7–10: Laa’in li chaab’il aj k’aak’alenel karneer” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“29 abril–5 mayo. Jwan 7–10,” Kim, Taaqehin—Choq’ reheb’ li komon ut li junkab’al: 2019
Li ani maak’a’ xmaak, xb’aan xLiz Lemon Swindle
29 abril–5 mayo
Jwan 7–10
“Laa’in li chaab’il aj k’aak’alenel karneer”
Naq nakawil Jwan 7–10, naru nakaweek’a lix wankil li Santil Musiq’ej chirixeb’ li na’leb’ sa’eb’ li ch’ol a’in. Wi taatz’iib’a li k’a’ru nakaweek’a, tatxtenq’a chixk’uub’ankil chan ru naq taak’anjela.
Xtz’iib’ankil li nakak’oxla
Us ta li Jesukristo kichal chixk’amb’al li “tuqtuukil usilal” rik’ineb’ li winq (Lukas 2:14), kiwan “jun jachok-ib’ sa’ xyanqeb’ li tenamit sa’ xk’ab’a’ li Jesus” (Jwan 7:43). Eb’ li ke’ilok re li yoo chi k’ulmank, jalan jalanq lix na’leb’eb’ chirix ani li Jesus. Wankeb’ li ke’yehok re, “Chaab’il winq a’an,” ut wankeb’ chik li ke’yehok re, “Naxb’alaq’iheb’ b’an li tenamit” (Jwan 7:12). Naq li Jesus kixk’irtesi jun li mutz’ sa’ li hilob’aal kutan, wankeb’ li neke’yehok re, “Li winq a’in moko rik’in ta li Dios nachalk xb’aan naq ink’a’ naxk’e xloq’al li hilob’aal kutan,” ut wankeb’ chik li ke’xpatz’, “Chanru naq tixb’aanu li xninqal eetalil a’in junaq winq aj maak?” (Jwan 9:16). A’ut sa’ xyi chixjunil li choqink, eb’ li yookeb’ chixsik’b’al li yaal ke’xk’e reetal lix wankil li raatin, xb’aan naq “maajun junaq winq na’aatinak jo’ na’aatinak li winq a’an” (Jwan 7:46). Naq eb’ laj Judio ke’xpatz’ re li Jesus naq “tixye chi ch’olch’o ru” ma a’an li Kristo, a’an kixk’ut jun raqal chi na’leb’ li naru chiqatenq’ankil re taqanaw ru li yaal ut li moko yaal ta: “Eb’ lin karneer neke’rab’i xyaab’ inkux,” chan, ut “laa’in nekeb’innaw ru ut eb’ a’an nikine’xtaaqe” (Jwan 10:27).
Li na’leb’ re xtzolb’aleb’ li loq’laj hu aajunes
Wi ninyu’amiheb’ li yaalil na’leb’ k’utb’il xb’aan li Jesukristo, tin’ok chixnawb’al naq yaaleb’.
Eb’ laj Judio ke’sach xch’ool rik’in xnaab’alil lix nawom li Jesus, xb’aan naq a’an ink’a’ tzolb’il (chi’ilmanq li raqal 15)—malaj ink’a’ rik’in li tzole’k jo’ li k’aynaqeb’ wi’. Naq li Jesus kichaq’ok, kixk’ut jun b’e re xnawb’al li yaal li naru nab’eek wi’ li junjunq, maak’a’ naxye ma tzolb’il malaj b’ar nachal chaq. Rik’in li k’a’ru yeeb’il sa’ Jwan 7:14–17, chan ru naru tat-ok chixnawb’al naq yaal jun li na’leb’ k’utb’il xb’aan li Jesus? Chan ru naq xattenq’aak rik’in xb’aanunkil a’in re xnimankil xnawom aach’ool chirix li evangelio?
Li ruxtaan li Kolonel wan choq’ re chixjunileb’.
Naq yoo chi aatinak chirix li raatin li Kolonel rik’in li ixq li chapb’il sa’ li muxuk sumsu, li Elder Dale G. Renlund kixye: “Yaal, li Kolonel ink’a’ kixk’ulub’a li muxuk sumsu. A’b’an ink’a’ ajwi’ kixjit li ixq. Kixwaklesi b’an xch’ool chixjalb’al lix yu’am. Li ixq kiwaklesiik xch’ool chi jale’k xb’aan lix toq’ob’ahom ut li ruxtaan. Sa’ lix jaltesinkil ru li Santil Hu xb’aan laj Jose Smith nach’olob’aman xyaalal naq chirix a’in ki’ok choq’ jun tzolom: “Ut li ixq kixnima ru li Dios chalen chaq li hoonal a’an, ut kixpaab’ lix k’ab’a’ ” [chi’ilmanq Jwan 8:11, jo’ jaltesinb’il ru xb’aan laj Jose Smith ]” (“Li qaChaab’il aj Ilol Karneer,” Jolomil Ch’utub’aj-ib’ re abril 2017).
Jo’q’e xaweek’a naq chanchanat li ixq, ut xak’ul li uxtaan ruuchil li jite’k rik’in li Kolonel? Jo’q’e xatwan jo’eb’ laj tz’iib’ ut laj Fariseo, ut xajit malaj xatraqok aatin chirixeb’ laa was aawiitz’in, us ta laa’at ajwi’ wan aamaak? (chi’ilmanq Jwan 8:7). K’a’ chik ru naru taatzol rik’in li kixb’aanu li Kolonel rik’ineb’ laj tz’iib’ ut eb’ laj Fariseo, ut rik’in li ixq li chapb’il sa’ li muxuk sumsu? K’a’ru nakatzol chirix lix kuyb’al li maak xb’aan li Kolonel naq nakawileb’ li raqal a’in?
K’a’ut naq ke’po’ xch’ool laj Judio naq li Jesus kixye, “toj maji’aq nayo’laak laj Abrahan, ak Laa’inin chaq”?
“Laa’inin” a’an lix k’ab’a’ li Jehovah li kixk’ut chiru laj Moises, jo’ chanru tz’iib’anb’il sa’ Exodo 3:14. Chi jo’kan, naq li Jesus kixye “Laa’inin,” yoo chixyeeb’al naq a’an li Jehovah, li Dios re li Najter Chaq’rab’. Eb’ laj Judio ke’xk’oxla naq a’an xmajewankil li Dios, ut sa’ lix chaq’rab’ laj Moises, tento raj tixk’ul li kamk chi kutinb’il chi pek.
Sa’eb’ li qach’a’ajkilal, li Dios naru chixk’utb’al rib’ sa’ li qayu’am.
Rik’in naq k’iila sut xb’aan li maak nachal li rahilal, wan naq naru naqak’oxla naq naqak’ul li ch’a’ajkilal sa’ xk’ab’a’ li ink’a’ us xqab’aanu. A’b’anan naq eb’ lix tzolom li Jesus ke’xk’oxla naq jun li winq kiyo’la chaq chi mutz’ rik’in naq a’an malaj lix na’ xyuwa’ xe’maakob’ chaq, li Jesus kixye naq moko yaal ta a’an. Chan ru naq li raatin li Kolonel sa’ Jwan 9:3 naxjal laa na’leb’ chirixeb’ laa ch’a’ajkilal ut lix ch’a’ajkilaleb’ laa was aawiitz’in? Naq nakawil Jwan 9, k’oxla chan ru naq “lix nimal xloq’al li Dios kik’utb’esiik” (Jwan 9:3). Chan ru naq xk’utb’esiik xnimal xloq’al li Dios chawu naq xak’ul laa’at li ch’a’ajkilal?
Us ajwi’ xk’eeb’al reetal naq lix patz’omeb’ li tzolom sa’ Jwan 9:2 naxk’ut naq ke’xpaab’ naq kiwan qayu’am naq maji’ nokoyo’la, jun li na’leb’ li kikana chi sachso sa’ xyanqeb’ laj Kristiano sa’ li nimla q’etok paab’aal, a’ut kik’ojob’aman wi’chik rik’in ruq’ li Profeet aj Jose Smith (chi’ilmanq Tz. ut S. 93:29; Moises 4:1–4; Abraham 3:22–26).
Aniheb’ “jalan chik inkarneer” li yeeb’ileb’ resil xb’aan li Kolonel sa’ Jwan 10:16?
Naq li Kolonel kiwulak sa’ li ch’och’ America chirix lix waklijik chi yo’yo, a’an kixch’olob’ aniheb’ lix karneer li jalaneb’ chik (chi’ilmanq 3 Nefi 15:21–16:5).
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al.
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Chan ru naru taatenq’aheb’ li komon sa’ laa junkab’al chixtawb’al ru li raatin li Jesus sa’ Jwan 7:24? Jun na’leb’ a’an naq tex’elq chaq sa’ kab’l ut teetz’ajni jun reheb’ laa komon. K’a’ru taaruuq te’xk’oxla anihaq chik chirix li komon a’in naq taaril chanru nak’utun? Tz’iib’ahomaq junjunq xchaab’ilal li komon a’in, li ink’a’ naru rilb’al yal rik’in ilok chiru (chi’ilmanq ajwi’ 1 Samuel 16:7).
Chan ru naq wan naq nokowan choq’ moos chiru li maak? K’a’ru li yaalil na’leb’ k’utb’il xb’aan li Jesus li naru chi ach’ab’ank qe?
Li Jesus kixk’irtesi jun li mutz’, xb’aan laj Carl Heinrich Bloch
Chan ru naru taatenq’aheb’ laa junkab’al chirilb’al sa’ xk’a’uxl chan ru naq li Jesus kixk’irtesi li mutz’ sa’ Jwan 9? Taaruuq teeb’aanu sa’ komonil li kik’ulman sa’ li esilal a’in, malaj teek’ut li video “Jesús sana a un hombre ciego de nacimiento” (LDS.org). Xxaqab’ li esil chi kok’ aj xsa’, re teeril jo’ junkab’al eb’ li raqal sa’ Jwan 9. Tz’aama chiruheb’ naq te’xk’e reetal k’a’ru neke’xtzol sa’ li esilal, jo’ k’a’ru xyaalalil naq jalb’il qach’ool chirix lix evangelio li Jesukristo.
Re te’tz’aqonq li komon sa’ li junkab’al sa’ tzolok rik’in li jaljookil ru aatin chirix li chaab’il aj k’aak’alenel karneer, patz’ re li junjunq naq tixtz’iib’a xjalam-uuch a’in: jun aj elq’, jun okeb’aal, jun aj k’aak’alenel karneer, jun tojb’il moos, jun xojb’, ut jun karneer. Patz’ chiruheb’ naq te’ril sa’ Jwan 10:1–18, 27–29, ut aatinanqex sa’ junkab’al chirix li k’a’ru kixk’ut li Kolonel chirix li k’a’ru xe’xtz’iib’a.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Sik’eb’ li aatin ut li ch’uut chi aatin li nawulak chawu. Naq yookat chi ilok, li Musiq’ej naru tixk’ut chawu junjunq aatin malaj ch’uut chi aatin li te’wulaq chawu malaj li chanchan tz’iib’anb’il choq’ aawe laa’at. K’oxla xtz’iib’ankil resil li aatin ut li raqal chi aatin li nawulak chawu sa’ Jwan 7–10.
Ink’a’ chik sachenaq, xb’aan laj Greg K. Olsen