“6–12 mayo. Lukas 12–17; Jwan 11: “Chisaho’q sa’ qach’ool wochb’eenex, xb’aan naq xintaw lin karneer li xsachk chiwu” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“6–12 mayo. Lukas 12–17; Jwan 11,” Kim, Taaqehin—Choq’ reheb’ li komon ut li Junkab’al 2019
Li alalb’ej sachenaq, xb’aan xLiz Lemon Swindle
6–12 mayo
Lukas 12–17; Jwan 11
“Chisaho’q sa’ qach’ool wochb’eenex, xb’aan naq xintaw lin karneer li xsachk chiwu”
Naq nakawil sa’ Lukas 12–17 ut Jwan 11, sik’ rik’in tijok li k’a’ru naraj laa Choxahil Yuwa’ naq taanaw ut taab’aanu. Naq nakatzoleb’ li ch’ol a’in, taaruuq chi teemank aach’ool re xk’ulb’aleb’ li na’leb’ li wankeb’ choq’ aawe.
Xtz’iib’ankil li nakak’oxla
Naru naqak’oxla naq xsachb’al yal jun re jun cient mas chaab’il—a’b’anan ink’a’ naq yooko chi aatinak chirixeb’ li ralal xk’ajol li Dios li raarookeb’ xb’aan (chi’ilmanq Tz. ut S. 18:10). Naq yooko chi aatinak chirix yal ta jun aamej, na’ajman ru sik’ok chi anchal li qach’ool “toj reetal toxqataw chaq” (Lukas 15:4), jo’ chanru kixk’ut li Kolonel sa’ li jaljookil ru aatin chirix li karneer sachenaq. Toja’ naq naru natikla li sahil ch’oolejil, xb’aan naq sa’ choxa “q’axal nim chik li sahil ch’oolej taawanq naq junaq aj maak tixyot’ xch’ool tixjal xk’a’uxl, chiruheb’ li b’elelaju ro’k’aal tiikeb’ xch’ool li moko aajel ta chik ru naq te’xjal xk’a’uxleb’ ” (Lukas 15:7). Wi chanchan naq moko tiik ta ru a’an, us xjultikankil naq maajun wan li “moko aajel ta chik ru naq tixjal xk’a’uxl.” Chiqajunil naqaj ru li kole’k. Ut chiqajunil nokoru chi tz’aqonk sa’ li kolok, ut taasaho’q qach’ool rik’in li junjunq aamej li nakole’ (chi’ilmanq Tz. ut S. 18:15–16).
Li na’leb’ re xtzolb’aleb’ li loq’laj hu aajunes.
Tento naq tink’e inch’ool chirix li k’a’ru wan xwankil chi junelik, ut ink’a’ chirix li k’a’ru re li ruchich’och’ a’in.
K’a’ut naq “at jip” kixye li Dios re jun li winq li kaw nak’anjelak ut kixyiib’ ninqi k’uuleb’aal ut kixnujob’resi rik’in li ruuchinihom lix k’anjel? (chi’ilmanq Lukas 12:16–21). Sa’eb’ li ch’ol a’in sa’ Lukas, li Kolonel kixk’ut junjunq li jaljookil ru aatin li neke’ru chixtaqsinkil li qilob’aal chi junpak’al chik li k’a’ru re li ruchich’och’ toj rik’in li k’a’ru re junelik. Wankeb’ chi tusb’ileb’ arin junjunq reheb’ li jaljookil ru aatin a’in. K’a’ru xyaalalil li junjunq, jo’ nakaye laa’at? K’a’ru nakak’oxla naq yoo chixyeeb’al li Qaawa’ aawe?
-
Li b’ihom maak’a’ xna’leb’ (Lukas 12:13–21)
-
Li xnimal wa’ak (Lukas 14:12–24)
-
Li alalb’ej sachenaq (Lukas 15:11–32)
-
Li mertoom ink’a’ tiik xch’ool (Lukas 16:1–12)
-
Li b’ihom ut laj Lazaro (Lukas 16:19–31)
Chi’ilmanq ajwi’ Mateo 6:19–34; 2 Nefi 9:30; Tzol’leb’ ut Sumwank 25:10.
Li qaChoxahil Yuwa’ nasaho’ sa’ xch’ool naq neke’tawe’ li ani sachenaq.
Ma xak’oxla jun sutaq k’a’ru nareek’a li qaChoxahil Yuwa’ chirixeb’ li ani xe’maakob’, malaj li “sachenaqeb’ ” chi yalaq chan ru? Eb’ laj Fariseo ut eb’ laj tz’iib’ ke’xwech’ rix li Jesus rik’in naq ki’aatinak rik’in xkomoneb’ a’an. Re xsumenkileb’, li Jesus kixye oxib’ li jaljookil ru aatin, li neke’tawman sa’ Lukas 15—li jaljookil ru aatin chirix li karneer sachenaq, li tumin sachenaq, ut li alalb’ej sachenaq.
Naq nakawileb’ ru li jaljookil ru aatin a’in, k’oxla xtz’iib’ankil chan ru naq juntaq’eeteb’ ut chan ru naq jalan jalanqeb’. Jo’ jun eetalil, taaruuq taatz’iib’a k’a’ru kisache’ ut k’a’ut, chan ru naq kitawman, ut k’a’ru ke’xb’aanu li kristiaan naq kitawman. K’a’ru li esilal yoo chixk’eeb’al li Jesus reheb’ li ani “sachenaqeb’ ”—ut jo’kaneb’ ajwi’ li ani ink’a’ neke’xk’oxla naq sachenaqeb’? K’a’ru li esilal yoo chixk’eeb’al reheb’ li ani neke’sik’ok reheb’ li sachenaqeb’?
Junelik mas us wi’chik naq ink’a’ nokosache’. Chirix Lukas 15:7, li Elder James E. Talmage kixtz’iib’a, “Ink’a’ tiik xk’oxlankil naq jun aj maak li jaljo xk’a’uxl taqenaq wi’chik xtiikilal chiru li ani tiik xch’ool li ink’a’ xkanab’ rib’ chi maakob’k” (Jesús el Cristo [1973], 486). A’b’anan chiqajunil nokomaakob’ ut naqaj ru li kole’k, ut li k’ojob’ank ch’oolej neke’xk’e li jaljookil ru aatin re li Kolonel a’an naq li junjunq qe naru chixjalb’al xk’a’uxl ut chi sutq’iik sa’ li tiikilal, xb’aan naq li Dios naraj naq maajun aamej taasachq.
Chi’ilmanq ajwi’ Tzol’leb’ ut Sumwank 18:10–16; Jeffrey R. Holland, “El otro hijo pródigo,” Ensign, julio 2002, 69–72.
Li tumin plaat sachenaq, xb’aan laj James Tissot
K’a’ru yoo chixk’utb’al li Kristo rik’in li jaljookil ru aatin chirix laj mertoom li moko tiik ta xch’ool?
Li Elder James E. Talmage kixch’olob’ naq jun li na’leb’ naqak’ul rik’in li jaljookil ru aatin a’an a’in: “Chiwanq aasak’ahil, xb’aan naq sa’ junpaat taanume’q li kutan tatruuq wi’ chiroksinkil aab’ihomal sa’ li ruchich’och’. Taw aana’leb’ rik’ineb’ li moko tiikeb’ ta ut eb’ laj maak; wi eb’ a’an wankeb’ xna’leb’ re xkawresinkil rib’ choq’ re li chalk re, k’a’jo’ wi’chik naq tento taab’aanu laa’at, li nakapaab’ naq wan k’a’ru taqak’ul sa’ li junelik q’e kutan. Wi ink’a’ xataw aana’leb’ ut aachaab’ilal sa’ roksinkil li “maa’us aj tumin,” chan ru naq taak’eemanq sa’ aawuq’ li b’ihomal ink’a’ nalaj na’oso’? ” (Jesús el Cristo, 489).
Wi ninb’antioxi li osob’tesink nink’ul, tinnach’o’q rik’in li Dios.
Wi ta laa’at jun reheb’ li lajeeb’ li saqlep rix, ma nakak’oxla naq xatsutq’i raj chixb’antioxinkil chiru li Kolonel? K’a’ chik ru chi osob’tesink kixk’ul li jun saqlep rik’in naq kib’antioxin? K’a’ru naxk’ul laa musiq’ xb’aan li b’antioxink nakab’aanu? Maare usaq choq’ aawe wi nakat-ok chixtz’iib’ankil li nakab’antioxi sa’ jun xhuhil li b’antioxink, jo’ xye li Awa’b’ej Henry B. Eyring sa’ li raatin “¡Oh, recordad, recordad” (Liahona, noviembre 2007, 66–69).
Li Jesukristo a’an li wakliik chi yo’yo ut li yu’am.
Li sachb’a-ch’oolej re xwaklesinkil laj Lazaro chiru li kamk kixk’ut xyaalal rik’in li nimla wankilal naq li Jesus a’an tz’aqal li Ralal li Dios ut li Mesias li yeechi’inb’il. K’a’ru li aatin malaj li na’leb’ sa’ Jwan 11:1–46 li naxkawob’resi laa paab’aal naq li Jesukristo a’an “li wakliik wi’chik chi yo’yo ut li yu’am”? Chan ru naq li na’leb’ a’in naxjal laa yu’am ut li k’a’ru nakasik’ ru?
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Ma neke’xtaw ru li komon sa’ laa junkab’al li k’a’ru na’eek’aman naq wan k’a’ru sachso chiqu—malaj naq wanko chi sachso? Rik’in aatinak chirix li k’a’ru xe’xk’ul naru natikla jun seraq’ chirix li jaljookil ru aatin re li karneer sachenaq ut li tumin sachenaq. Malaj ut taaruuq teeb’aanu jun b’atz’unk sa’ li tixmuq wi’ rib’ jun komon ut li xkomoneb’ chik te’xsik’. Chan ru naq li b’atz’unk a’in nokoxtenq’a chixtawb’aleb’ ru li jaljookil ru aatin a’in?
Chan ru naq wan naq laa’o chanchano li yuwa’b’ej sa’ li esilal a’in wi wankeb’ li raarookeb’ qab’aan li sachsookeb’? K’a’ru naru naqatzol rik’in li k’a’ru kixb’aanu li asb’ej, li naru tooxtenq’a re toowanq wi’chik jo’ li Kristo? Chan ru naq li jaljookil ru aatin a’in chanchan li qaChoxahil Yuwa’?
Re xtenq’ankileb’ li komon sa’ li junkab’al chixyu’aminkil li esilal chirixeb’ li lajeeb’ saqlep rix, taaruuq raj taaye reheb’ naq te’xtz’iib’a li b’antioxink aatin chiru kok’ hu, ut te’xk’ojob’ yalaq b’ar sa’ li ochoch. Taaruuq ajwi’ teeb’icha sa’ komonil “K’e sa’ ajl li k’iila usilal,” Eb’ li B’ich, li ajl 153, ut tex’aatinaq chirix li usilal xk’ul laa junkab’al.
Eb’ li wankeb’ sa’ laa junkab’al taaruuq te’ril li video “Lázaro es levantado de entre los muertos” (LDS.org) ut te’xwotz lix nawomeb’ xch’ool chirix li Jesukristo.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Oksiheb’ li seraq’ ut li na’leb’ re xk’utb’aleb’ li jar raqal re li evangelio. Li Kolonel k’iila sut kixk’uteb’ li na’leb’ chirix li evangelio rik’in roksinkileb’ li seraq’ ut li jaljookil ru aatin. K’oxla li na’leb’ ut li esilal chirix tz’aqal aayu’am li taaruuq chixtenq’ankileb’ li wankeb’ sa’ laa junkab’al chixtawb’al ru jun na’leb’ chirix li evangelio (chi’ilmanq Li k’utuk jo’ li Kolonel, 22).
B’ar wankeb’ li b’eleb’, xb’aan xLiz Lemon Swindle