“20–26 mayo. Mateo 21–23; Markos 11; Lukas 19–20; Jwan 12: “We’ chaq aawik’in laa Rey” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“20–26 mayo. Mateo 21–23; Markos 11; Lukas 19–20; Jwan 12,” Kim, Taaqehin—Choq’ reheb’ li komon ut li Junkab’al: 2019
Laj Zakeo sa’ xtoonal li sikomoor, xb’aan laj James Tissot
20–26 mayo
Mateo 21–23; Markos 11; Lukas 19–20; Jwan 12
“We’ chaq aawik’in laa Rey”
Naq maji’ nakawileb’ li na’leb’ sa’ li tusleb’ aatin a’in, chawil Mateo 21–23; Markos 11; Lukas 19–20; ut Jwan 12. Tz’iib’a li musiq’anb’il na’leb’ naru nakawotz rik’in laa junkab’al, malaj sa’eb’ laa tzoleb’aal sa’ li Iglees.
Xtz’iib’ankil li nakak’oxla
Li Kolonel kitz’okak chirix b’eek chalen Betania toj Jerusalen, ut kiwil chaq chi najt jun xtoonal li higo, li chanchan tixk’e xtzakemq. A’b’anan naq kinach’ok li Jesus, kixtaw naq maak’a’ ruuchinihom (chi’ilmanq Mateo 21:17–20; Markos 11:12–14, 20). Naru naqaye naq lix toonal li higo chanchaneb’ laj b’eresinel paab’aal sa’ Jerusalen, aj ka’pak’al-uheb’: maak’a’ ru li k’a’ru neke’xk’ut, ut us ta neke’xye rib’ naq neke’xb’aanu li santilal, maajun musiq’ejil tzakemq neke’xk’e. Eb’ laj Fariseo ut eb’ laj tz’iib’ naab’aleb’ li kok’ taqlahom neke’xpaab’, a’ut ke’sach chiruheb’ li wiib’ xninqal ru chaq’rab’: a’an xraab’al li Dios, ut xraab’aleb’ laa was aawiitz’in jo’ nakara aawib’ laa’at (chi’ilmanq Mateo 22:34–40; 23:23).
Chi junpak’al chik, wankeb’ naab’al li ke’ok chirilb’al naq chaab’il li naruuchini li k’a’ru k’utb’il xb’aan li Jesus. Naq kiwulak Jerusalen, ke’xk’ul rik’in yok’b’il ruq’ che’ li ke’xk’ojob’ chiru li b’e taab’eeq wi’, ut ke’saho’ xch’ool naq ak xwulak li yeeb’il sa’ jun najteril profeetil aatin, “We’ chaq aawik’in laa Rey” (Sakarias 9:9). Naq nakawil li aatin sa’ li xamaan a’in, k’oxla chan ru naq x’uuchin sa’ laa yu’am li k’a’ru kixk’ut li Kolonel ut lix mayej re tojb’al rix li maak, ut chan ru naq laa’at tatruuq chi “uuchink chi naab’al” (Jwan 12:24).
Li na’leb’ re xtzolb’aleb’ li loq’laj hu aajunes
Mateo 23; Lukas 19:1–10; 20:45–47
Li Qaawa’ naraqok aatin, moko chirix ta chan ru na’ilok li junjunq, chirix b’an li rajom lix ch’ool.
Sa’ xkutankil li Jesus, wankeb’ naab’al li neke’k’oxlank re naq eb’ laj titz’ol toj a’aneb’ aj b’alaq’, ut neke’relq’a xtumineb’ li tenamit. Chi jo’kan, sa’ xk’ab’a’ naq laj Sakeo, jun jolomil aj titz’ol toj, wan xb’ihomal, maare mas wi’chik naq ke’xk’oxla a’an chirix. A’b’an li Jesus ki’ilok chiru lix ch’ool laj Sakeo. K’a’ru k’utb’il sa’ Lukas 19:1–10 chirix chan ru naq kiwan xch’ool laj Sakeo? Maare taak’e reetal sa’eb’ li raqal a’in k’a’ru yeeb’il chirix li naxb’aanu laj Sakeo re xk’utb’al chiru li Kolonel naq naxra. K’a’ru li rajom aach’ool laa’at? K’a’ru yookat chixb’aanunkil re xsik’b’al li Kolonel, jo’ kixb’aanu laj Sakeo?
Chi junpak’al li raatin li Kolonel choq’ re laj Sakeo, wan li raatin choq’ reheb’ laj tz’iib’ ut laj Fariseo naq ki’aatinak rik’ineb’. Jo’ kixch’olob’ li Awa’b’ej Dieter F. Uchtdorf, “[Li Jesus] kichal xjosq’il rik’ineb’ laj ka’pak’al-u jo’eb’ laj tz’iib’, eb’ laj Fariseo, ut eb’ laj Saduceo—eb’ li yal neke’k’utun chi tiikeb’ xch’ool re te’nimaaq ru ut te’xk’ul xwankilal ut xb’ihomal li ruchich’och’, us ta yookeb’ ajwi’ chixrahob’tesinkil li ani tento raj xe’rosob’tesi” (“Li wank chi tz’aqal yaal,” Jolomil Ch’utub’aj-ib’ re abril 2015.
Sa’ Mateo 23, li Kolonel kixk’ut junjunq li jaljookil ru aatin re xyeeb’al resileb’ laj ka’pak’al-u. K’oxla xk’eeb’al reetal malaj xtz’iib’ankileb’ li jaljookil ru aatin a’in, ut k’a’ru neke’xk’ut chirix li ka’pak’alil. K’a’ru taawaj xjalb’al sa’ laa yu’am xb’aan lix yehom li Kolonel?
Chi’ilmanq ajwi’ Tzol’leb’ ut Sumwank 88:62–63; 137:9
Mateo 21:1–11; Markos 11:1–11; Lukas 19:29–44; Jwan 12:12–16
Li Jesukristo a’an lin Rey.
Li aatin sa’ Mateo 21:1–11; Markos 11:1–11; Lukas 19:29–44; ut Jwan 12:12–16 naxye resil lix tiklajik li xamaan sa’ xraqik lix yu’am li Kolonel, naq ki’ok rik’in wankilal sa’ Jerusalen. Eb’ li neke’xk’ul choq’ xReyeb’ ke’xk’ut lix paab’aaleb’ naq ke’xyul, (chi’ilmanq Jwan 12:1–8), naq ke’xhel li raq’eb’ ut xxaq’ li kala’ sa’ li b’e taa’ok wi’ sa’ Jerusalen, ut naq ke’xnima ru chi kaw xyaab’eb’ xkux. K’oxla chan ru naq eb’ li raqal li wankeb’ taq’a neke’ru chixchamob’resinkil laa na’leb’ chirix li k’a’ru kik’ulman sa’ xtiklajik lix raqikil xamaan lix yu’am li Kolonel.
-
Chan ru naq kiyule’ jun li rey sa’ najter kutan: 2 Reyes 9:1–13
-
Jun profeetil aatin re najter chirix chan ru naq taa’ok li Rey rik’in wankilal: Sakarias 9:9
-
Xyaalalil li aatin hosanna: K’utul Raqal reheb’ li Loq’laj Hu, “Hosanna”
-
Eb’ li profeetil aatin chirix chan ru naq taachalq wi’chik li Kolonel: Apokalipsis 7:9–10; 19:11–16
Chan ru naru nakak’ul laa’at li Kolonel jo’ laa Qaawa’ ut laa Rey?
Chi’ilmanq ajwi’ “La entrada triunfal del Señor en Jerusalén” (video, LDS.org).
Li wiib’ xninqal ru taqlahom a’aneb’ xraab’al li Dios, ut xraab’aleb’ li was wiitz’in jo’ ninra wib’ laa’in.
Wi wan naq nakaweek’a naq q’axal ch’a’aj xtaaqenkil li Jesukristo, li raatin li Jesus re laj ch’olob’anel chaq’rab’ sa’ Mateo 22 naru tatxtenq’a chirisinkil xch’a’ajkil li wank choq’ tzolom. A’in jun li na’leb’ re taab’aanu chi jo’kan: Tz’iib’a chi tusb’il junjunq reheb’ lix taqlahom li Qaawa’. Chan ru naq li junjunq chi taqlahom li xatz’iib’a naxk’am rib’ rik’ineb’ li wiib’ xninqal ru chaq’rab’ a’in? Chan ru naq xk’oxlankil li wiib’ chi chaq’rab’ a’in tatxtenq’a chixpaab’ankil chixjunil li jun ch’ol chik?
K’a’ruheb’ li reetalil li chaq’rab’ chiru li tel?
Eb’ li eetalil a’in, a’aneb’ kok’ kaax re tz’uum wan wi’ kok’ hu li tz’iib’anb’il wi’ li aatin isinb’il chaq sa’eb’ li loq’laj hu. Eb’ laj Judio ke’xb’ak’ li kok’ kaax a’in chiru k’aam re tz’uum, ut neke’xk’e chiru xpekemeb’ ut sa’ xteleb’ re te’jultiko’q reheb’ li chaq’rab’ (chi’ilmanq Deuteronomio 6:6–8). Xb’aan xq’etq’etileb’, eb’ laj Fariseo ninqeb’ li kaax neke’xb’ak’, re naq chixjunil li tenamit te’ril chan ru naq neke’xra li raatin li Dios.
Li na’leb’ re xtzolb’aleb’ li loq’laj hu sa’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Chan ru naq li xMaria kixk’ut chiru li Kolonel naq naxra? Chan ru naq laa’o naqakʼut chiru naq naqara?
Xch’ajb’al li roq li Jesus, xb’aan laj Brian Call
Chan ru naru naqa’oxloq’i li qas qiitz’in naq neke’xye resil lix paab’aaleb’, malaj naq neke’xkol rix lix paab’aaleb’? K’a’ru li wan sa’ li qatenamit li nokoxram chixyeeb’al malaj chixkolb’al rix li qapaab’aal chirix li Kristo? Re rilb’al junjunq li kristiaan li ink’a’ ke’q’unb’esiik xch’ool xb’aan lix tenamiteb’, chi’ilmanq Daniel 1:3–20; 3; 6; Jwan 7:45–53; 9:1–38; ut Mosiah 17:1–4.
Chan ru naqak’ut naq naqaloq’oni ut naqa’oxloq’i li santil ochoch? K’a’ru naru taqab’aanu re “risinkil” sa’ li qayu’am li k’a’ru naxram qu chirilb’al li santil ochoch jo’ “rochochil li tijok” (Mateo 21;12–13) ut xna’aj li musiq’ejil k’irtesink? Naru teeb’icha “Sa’ li santil ochoch,” B’ichleb’aal choq’ reheb’ li Kok’al, 99.
K’a’ru nakatzol sa’ li jaljookil ru aatin chirix li winq ut li wiib’ ralal li taaruuq chixtenq’ankil laa junkab’al? Jo’ jun eetalil, taaruuq taawoksi li seraq’ a’in re aatinak chirix paab’ank ut li jalb’a-k’a’uxlej chi anchal ch’oolej. Maare eb’ li komon sa’ laa junkab’al te’ruuq chixb’aanunkil li yeeb’il resil sa’ li jaljookil ru aatin, ut li junjunq tixb’aanu ruuchil li wiib’ chi alalb’ej.
K’a’ru junjunq li “k’a’ru re li Dios” (raqal 21) li tento raj taqak’e re?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Roksinkil li jalam-uuch re te’xtaw ru li komon sa’ li junkab’al. “Sa’ li hu Libro de obras de arte del Evangelio ut li Biblioteca multimedia SUD sa’ LDS.org wankeb’ k’iila jalam-uuch ut video li te’ruuq chixtenq’ankil laa junkab’al chixtawb’al ru li na’leb’ malaj li k’a’ru kik’ulman” (Li k’utuk jo’ li Kolonel, 22). Jo’ jun eetalil, li jalam-uuch li wan sa’ li tusleb’ aatin a’in naru nakatxtenq’a chixk’utb’al chan ru naq ki’ok li Kristo rik’in wankilal sa’ Jerusalen.
Ki’ok rik’in wankilal, xb’aan laj Walter Rane