Laj Zakeo sa’ xtoonal li sikomoor, xb’aan laj James Tissot

Mayo 20-26

Mateo 21-23; Markos 11; Lukas 19-20; Jwan 12

”We’ chaq aawik’in laa Rey”

Naq yookat chirilb’al ru Mateo 21–23; Markos 11; Lukas 19–20; ut Jwan 12, k’e laa wab’ihom rik’in li na’leb’ nakak’ul rik’in li Santil Musiq’ej. Sik’ sa’ “ Xb’aanunkil li nak’anjelak choq’ reheb’ li kok’al li toj ka’ch’ineb’ xyu’am” sa’ xtiklajik li tzoleb’aal hu a’in re xsik’b’al li k’a’ru tento taawanq sa’ laa k’a’uxl naq yookat chixk’utb’aleb’ li na’leb’ a’an.

Xtz’iib’ankil li nakak’oxla

Xkanab’ankileb’ chi wotzok

K’ut li jalam-uuch natawman sa’ li tusleb’ aatin re li xamaan a’in re Kim, Taaqehin—Choq’ reheb’ li Komon ut li Junkab’al , ut kanab’eb’ li kok’al chixwotzb’al li k’a’ru neke’xnaw chirix li k’a’ru yoo chi k’ulmank sa’ li jalam-uuch.

Xk’utb’al li tzol’leb’

Kok’al toj ka’ch’ineb’ xyu’am

Lukas 19:1–10

Li qaChoxahil Yuwa’ ut li Jesus neke’xnaw wu rik’in ink’ab’a’.

Naq nakawil ru li raatin li Kolonel rik’in laj Zakeo, k’a’ru li esil nakataw li naru chirosob’tesinkileb’ li kok’al nakatzoleb’?

Kok’ k’anjel naru chi b’aanumank

• K’ut li jalam-uuch Zaqueo en el sicómoro (LDS.org). Tenq’aheb’ li kok’al chixtawb’al laj Zakeo ut chixyeeb’al lix k’ab’a’. K’oxlaheb’ eek’asink-ib’ li naru te’xb’aanu li kok’al naq laa’at yookat chixyeeb’al li resilal laj Zakeo ut li Jesus—qayehaq, xaqliik rik’in ru’uj oqej re ilok sa’ xb’eeneb’ li k’iila kristiaan malaj xyeeb’al naq yookeb’ chi taqe’k sa’ ru’uj jun li che’. Ch’olob’ naq li Kolonel kiril laj Zakeo ut naq kixb’oq rik’in xk’ab’a’. Ch’olob’ xyaalal naq li Kolonel naxnaw ajwi’ ruheb’ li kok’al chi junjunq ut naxnaw lix k’ab’a’eb’.

• K’am jun xkaaxukuut jun li jalam-uuch chi yamyo ru sa’ li tzoleb’aal, malaj yiib’ jun rik’in hu. Kanab’eb’ li junjunq chi kok’al chixk’eeb’aleb’ xhoonal re xchapb’al li kaaxukuut chiru lix naq’eb’ ru naq lix komoneb’ neke’xye, “Li qaChoxahil Yuwa’ ut li Jesus neke’xnaw ru [xk’ab’a’ li al].”

• Kanab’eb’ li kok’al chixk’eeb’aleb’ xhoonal re xk’oxlankil naq yookeb’ chi taqe’k sa’ ru’uj jun li che’, jo’ kixb’aanu laj Zakeo. Patz’ reheb’ xkomon li kok’al re li tzoleb’aal naq te’xye, “Li qaChoxahil Yuwa’ ut li Jesus neke’xnaq ru [xk’ab’a’ li al].”

• B’ichahomaq sa’ komonil “Laaʼin jun ralal li Dios,” B’ichleb’aal choq’ reheb’ li Kok’al, 2–3, ut tenq’aheb’ li kok’al chirab’inkil chi us re xk’eeb’al reetal li natenq’an reheb’ chixnawb’al naq li qaChoxahil Yuwa’ naxraheb’ a’an.

Mateo 21:12–14

Li santil ochoch a’an jun na’ajej loq’.

Lix nawom aach’ool chirix li santil ochoch naru naxtenq’aheb’ li kok’al li nakatzoleb’ chixtawb’al ru naq li santil ochoch a’an jun na’ajej loq’.

Kok’ k’anjel naru chi b’aanumank

• K’ut li jalam-uuch Jesús purifica el templo (Libro de obras de arte del Evangelio, ajl 51), ut seraq’i li seraq’ jo’ chanru tz’iib’anb’il sa’ Mateo 21:12–14. Tenq’aheb’ li kok’al chixtawb’aleb’ xjalam-uuch li tumin ut li xul sa’ li jalam-uuch. Chirix a’an aatinanqex chirix k’a’ut naq li Kolonel kiraj naq eb’ laj jalol ru tumin ut eb’ li neke’k’ayin xul ke’el sa’ li santil ochoch.

• K’ut li jalam-uuch reheb’ li santil ochoch (qayehaq, chi’ilmanq Libro de obras de arte del Evangelio, 117–121), ut patz’ reheb’ li kok’al naq te’xwotz li neke’reek’a naq neke’ril li santil ochoch. Ye reheb’ li kok’al naq li eek’ahom a’an, a’an li Santil Musiq’ej li yoo chixyeeb’al qe naq li santil ochoch a’an jun chaq’al ru na’ajej. Patz’ reheb’ li kok’al naq te’wanq jo’ chan raj ru te’wanq chi sa’ li santil ochoch. Qayehaq, naru neke’hasb’ak naq neke’aatinak ut chunlaak rik’in oxloq’. B’ichahomaq sa’ komonil “Saʼ li santil ochoch,” B’ichleb’aal choq’ reheb’ li Kok’al, 99, ut kanab’eb’ li kok’al chixxaqab’ankil xjayalihomeb’ re ok sa’ li santil ochoch sa’ jun kutan.

Li santil ochoch a’an rochoch li Qaawa’.

Mateo 21:28–32

Naru nin’ab’in chiru li Dios.

Li qaChoxahil Yuwa’ naraj naq too’ab’inq chiru. Li jaljookil ru aatin chirixeb’ li wiib’ chi alalb’ej a’an jun hoonal re xk’utb’al lix aajelil ru li ab’ink chiru li Dios.

Kok’ k’anjel naru chi b’aanumank

• Yiib’ jun li jalam-uuch reheb’ li wiib’ chi alalb’ej sa’ li pizarron ut oksiheb’ li jalam-uuch naq yookat chixseraq’inkil li jaljookil ru aatin tz’iib’anb’il sa’ Mateo 21:28–32. B’ar wan reheb’ li alalb’ej kixb’aanu li us? Patz’ reheb’ li kok’al naq te’xye li k’a’ru naru neke’xb’aanu sa’ li rochocheb’ re ab’ink. Kanab’eb’ chixyiib’ankileb’ rib’ sa’ jalam-uuch naq neke’xb’aanu jun reheb’ li k’a’aq re ru a’an.

• Kanab’eb’ li kok’al chixwotzb’al lix k’ulumeb’ naq neke’ab’in chiruheb’ lix na’ xyuwa’ malaj chiru junaq chik laj ilol reheb’ malaj jun aj k’amol b’e. Chan ru naq xe’osob’tesiik xb’aan naq xe’ab’in? Chan ru naru te’ab’inq chi us chiruheb’ li kutan chalel?

Xk’utb’al li tzol’leb’

Kok’al ak ninqeb’

Lukas 19:1–10

Naq tinsik’ li Qaawa’, tintaw.

Naru nakawoksi li esil chirix laj Zakeo re xtenq’ankileb’ li kok’al chixk’oxlankil li k’a’ru naru neke’xb’aanu re nach’o’k chi us chiru li Kolonel.

Kok’ k’anjel naru chi b’aanumank

• Il ru Lukas 19:1–10, ut naq nakawil ru wiib’ oxib’ li raqal, aatinanqex chirix k’a’ru neketzol chirix laj Zakeo. K’a’ru kixb’aanu laj Zakeo re rilb’al li Jesus? Chan ru kisumen naq li Jesus kixye re naq taakub’eeq chaq sa’ ru’uj li che’? Patz’ re li junjunq chi kok’al naq te’xwotz jun xyaalal k’a’ut raj naq taawulaq chiru rilb’al li Jesus. Wi li Kolonel taachalq raj sa’ lix tenamiteb’, k’a’ raj ru te’xb’aanu re xkawresinkileb’ rib’?

• Kanab’eb’ li kok’al chixk’oxlankileb’ li kristiaan li neke’xnaw ru li, jo’ laj Zakeo, maare yookeb’ chixsik’b’al li Kolonel. Patz’ reheb’ li kok’al li naru neke’xb’aanu re xtenq’ankil junaq chi tzolok chirix li Kolonel.

• Kanab’eb’ li kok’al chixwotzb’al xnumsihomeb’ naq xe’reek’a naq yookeb’ chi ile’k ut neke’rahe’k xb’aaneb’ li qaChoxahil Yuwa’ ut li Jesukristo.

Mateo 21:12–14

Li santil ochoch a’an jun na’ajej loq’ li tento twoxloq’i.

Chan ru naru nakatxtenq’a li seraq’ naq li Kolonel kixsaqob’resi ru li santil ochoch re xk’utb’al chiruheb’ li kok’al chirix lix loq’alileb’ li santil ochoch?

Kok’ k’anjel naru chi b’aanumank

• Kanab’eb’ li kok’al chirilb’al ru Mateo 21:12–14. K’ut li jalam-uuch Jesús purifica el templo (Libro de obras de arte del Evangelio, ajl 51), ut patz’ reheb’ b’ar wan li raqal yoo chireetalinkil li jalam-uuch. Patz’ reheb’ naq te’xyiib’ sa’ jalam-uuch chan raj ru rilb’al li santil ochoch naq maji’ naxsaqob’resi ru li Jesus ut chirix naq ak xsaqob’resi ru.

• Kanab’eb’ li kok’al chixwotzb’al li neke’reek’a naq neke’ok sa’ li santil ochoch, naq neke’rula’ani lix sutam li santil ochoch malaj naq neke’ril xjalam-uuch li santil ochoch. K’a’ru xtenq’an reheb’ re xnawb’al naq li santil ochoch a’an jun na’ajej loq’?

• Kanab’ jun malaj junjunqeb’ li saaj chi wulak sa’ li tzoleb’aal ut aatinak chirix chan ru naq neke’xkawresi rib’ re ok sa’ li santil ochoch. Wi wanjenaqeb’ sa’ li santil ochoch, patz’ reheb’ naq te’aatinaq chirix k’a’ru xe’reek’a naq xe’wan chaq aran.

• Set jun li jalam-uuch re junaq santil ochoch chi kok’ putz’ jo’ jorb’a-k’a’uxlej ut k’e re chixjunqaleb’ li kok’al jun lix putz’ulal. Patz’ reheb’ li kok’al naq te’xtz’iib’a chirix lix putz’ulal li jorb’a-k’a’uxlej wan rik’ineb’ jun k’a’aq re ru naru neke’xb’aanu re xkawresinkileb’ rib’ re ok sa’ li santil ochoch. Naq li junjunq chi kok’al te’xwotz lix na’leb’eb’, k’e lix ch’a’alil li jorb’a-k’a’uxlej sa’ xna’aj.

Mateo 23:25–28

Tento naq tiikaqin sa’ lin b’aanuhom ut li wajom.

Li Jesus kixk’ut chiruheb’ laj tz’iib’ ut laj Fariseo chirix lix aajelil ru xyu’aminkil tz’aqal li evangelio—ut ink’a’ ka’ajwi’ xpak’b’al wank chi tiik. K’a’ru naru chi tenq’ank reheb’ li kok’al chixtawb’al ru li yaal a’an?

Kok’ k’anjel naru chi b’aanumank

• Naq yookat chirilb’al ru Mateo 23:25–28 rik’ineb’ li kok’al, wotz li naraj naxye li aatin aj ka’pak’al-u: “Junaq li naxpak’ li wank jo’ aj paab’anel us ta maawa’ aj paab’anel”. K’a’ut naq ink’a’ us wank jo’ aj ka’pak’al-u?

• K’ut chiruheb’ li kok’al jun li sek’ saq ru chirix ut tz’aj lix sa’ re reetalinkil li jaljookil ru aatin wan sa’ Mateo 23:25. Chan ru naru naqanaw chi tz’aqal naq ch’ajb’il qu ut saq qu?

Xb’oqb’aleb’ chi tzolok sa’ kab’l

Tenq’aheb’ li kok’al chixsik’b’al ru jun li na’leb’ malaj ch’ina k’anjel re li tzoleb’aal re xwotzb’al rik’ineb’ lix junkab’al sa’ kab’l.

Xchaab’ilob’resinkil li qak’utum

Tenq’aheb’ lix na’ xyuwa’eb’ li kok’al. “Eb’ li na’b’ej yuwa’b’ej a’aneb’ laj k’utunel re li evangelio q’axal aajeleb’ ru choq’ reheb’ li ralal xk’ajol—a’aneb’ li teneb’anb’ileb’ jo’ ajwi’ li wankeb’ xnimaleb’ xwankil chixtenq’ankileb’ li ralal xk’ajol (chi’ilmanq Deuteronomio 6:6–7). Naq nakatzoleb’ li kok’al sa’ Iglees, sik’ rik’in tijok chanru taatenq’aheb’ lix na’ xyuwa’ sa’ lix k’anjeleb’ li aajel ru” (Li k’utuk jo’ li Kolonel, 25).