Li alalb’ej sachenaq, xb’aan xLiz Lemon Swindle

6–12 mayo

Lukas 12–17; Jwan 11

”Chisaho’q sa’ qach’ool wochb’eenex, xb’aan naq xintaw lin karneer li xsachk chiwu”

Rik’in tijok, il ru Lukas 12–17ut Jwan 11 re xsik’b’al chan ru naru nakatenq’aheb’ li kok’al li nakatzoleb’ chixtawb’aleb’ ru li yaal sa’eb’ li ch’ol a’in ut chireek’ankil lix rahom li qaChoxahil Yuwa’.

Xtz’iib’ankil li nakak’oxla

Xkanab’ankileb’ chi wotzok

Jultika reheb’ li kok’al junjunq reheb’ li jaljookil ru aatin ut eb’ li seraq’ neke’tawman sa’ Lukas 12–17 ut Jwan 11 ut kanab’eb’ chixsik’b’al ru junaq ut chixyiib’ankil jun li jalam-uuch re a’an.

Xk’utb’al li tzolʼlebʼ

Kok’al toj ka’ch’ineb’ xyu’am

Lukas 15

Li qaChoxahil Yuwa’ naraj naq chixjunileb’ li ralal xk’ajol te’q’ajq rik’in a’an.

Maare wankeb’ kok’al sa’ laa tzoleb’aal li ink’a’ neke’wulak sa’ li Tzoleb’aal reheb’ li Kok’al chi kok’ aj xsa’. Chan ru naru nakawaklesiheb’ xch’ool li kok’al li nakatzoleb’ chixye’b’al li ruq’eb’ reheb’ a’an rik’in rahok?

Kok’ k’anjel naru chi b’aanumank

• K’e re jun li ch’ina al jun li kok’ tumin, re jun chik k’e lix jalam-uuch jun li karneer, ut re jun chik jun li jalam-uuch re li alalb’ej sachenaq (LDS.org). Seraq’i li oxib’ chi jaljookil ru aatin li neke’tawman sa’ Lukas 15 ut kanab’eb’ li kok’al chixtaqsinkil chi kutankil li kok’ tumin malaj li jalam-uuch naq taaye xk’ab’a’. Naru nakakanab’eb’ li kok’al chixseraq’inkil wi’chik li jaljookil ru aatin chirib’ileb’ rib’ rik’in li raatineb’ a’an.

• Patz’ reheb’ li kok’al naq te’xwotz junaq hoonal naq xe’xtz’eq junaq k’a’ re ru. Ch’olob’ naq eb’ li kristiaan naru neke’sach sa’ musiq’ej naq ink’a’ neke’reek’a lix rahom li Dios malaj naq neke’najto’ chiru a’an. Ch’olob’ xyaalal naq eb’ li jaljookil ru aatin a’an neke’xk’ut naq li Dios naraj naq taqatenq’aheb’ li kristiaan li sachsookeb’ chi q’ajk rik’in a’an.

• Kanab’eb’ li kok’al chixk’oxlankileb’ li kok’al li ink’a’ neke’wulak sa’ li Tzoleb’aal reheb’ li Kok’al. Tenq’aheb’ chixtz’iib’ankileb’ kok’ esil re xb’oqb’aleb’ li kok’al a’an chi chalk sa’ li Tzoleb’aal reheb’ li Kok’al malaj sa’ junaq ch’ina k’anjel re li Tzoleb’aal reheb’ li Kok’al . Chan raj chik ru naru naqatenq’aheb’ li kok’al a’an chireek’ankil lix rahom li qaChoxahil Yuwa’?

Lukas 17:11–19

Naru nink’ut lin rahom choq’ re lin Choxahil Yuwa’ naq ninb’antioxiheb’ li wosob’tesinkil.

Chan raj ru naq li seraq’ reheb’ li laajeb’ saqlep rixeb’ tixwaklesi xch’ooleb’ li kok’al re b’antioxink?

Kok’ k’anjel naru chi b’aanumank

• Ye li seraq’ chirixeb’ li laajeb’ saqlep rixeb’ li ke’k’irtesiik xb’aan li Jesus. K’ut li jalam-uuch natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’alut kanab’eb’ li kok’al chi ajlank toj sa’ lajeeb’ rik’ineb’ li ru’uj ruq’eb’. Chirix a’an patz’ reheb’ naq te’xkub’si b’eleb’ reheb’ li ru’uj ruq’eb’ re xk’utb’al li jun ajwi’ reheb’ li saqlep rix kib’antioxin rik’in li Jesus. Jo’q’e xk’ehomeb’ xb’antioxihom li kok’al reheb’ li ramiiw malaj junaq lix komoneb’ raaro xb’aaneb’?

• Kanab’eb’ junjunqeb’ li kok’al chixk’utb’esinkil li osob’tesihom li neke’xb’antioxi ut patz’ reheb’ lix komoneb’ li kok’al naq te’xq’ehi k’a’ruheb’ li osob’tesihom a’an. Patz’ reheb’ li kok’al naq te’xwotz chan ru naru taqak’ut chiru li qaChoxahil Yuwa’ naq nokob’antioxin xb’aaneb’ li qosob’tesinkil.

Jwan 11:1–46

Naqapaab’ naq li Jesus a’an li Ralal li Dios.

Li xMarta, li ranab’ laj Lazaro, kixye re li Jesus: “Laa’in ninpaab’ naq laa’at li Kristo, li Ralal li Dios” (Jwan 11:27). Li resilal li xMarta ut laj Lazaro naru chixkawob’resinkil lix nawom xch’ooleb’ li kok’al chirix li Jesukristo.

Kok’ k’anjel naru chi b’aanumank

• K’os ru li seraq’ naq li Jesus kixwaklesi chaq laj Lazaro sa’ xyanqeb’ li kamenaq (chi’ilmanq ajwi’ Ch’ol 43: li Jesus naxwaklesi chi yo’yo laj Lazaro,” Eb’ li Esilal sa’ li Ak’ Chaq’rab’,107–109, malaj li video sa’ LDS.org) ut k’ut ruq’ jun li chaqi che’ ut jun li yo’yookil che’. Ch’olob’ xyaalal naq sa’ xk’ab’a’ lix wankilal li Jesukristo, eb’ li kristiaan ak kamenaqeb’ te’wakliiq chi yo’yo ut te’wanq xyu’am chi junelik.

• Tenq’aheb’ li kok’al chixkanab’ankil sa’ xk’a’uxleb’ li ch’ol aatin kixye li Jesus re xMarta: “Laa’in li wakliik chi yo’yo ut li yu’am” (Jwan 11:25). Ch’olob’ naq sa’ xk’ab’a’ lix waklijik chi yo’yo li Kolonel, taqileb’ wi’chik li qaraarookil komon li ak kamenaqeb’.

Xk’utb’al li tzolʼlebʼ

Kok’al ak ninqeb’

Lukas 15

Naru nintenq’a li Jesus chixtawb’aleb’ lix karneer sachsookeb’.

Eb’ li kok’al maare ink’a’ te’xk’e reetal naq wankeb’ xkomon li kok’al li ink’a’ neke’wulak sa’ li Tzoleb’aal reheb’ li Kok’al. Chan ru naru nakawaklesiheb’ xch’ool re naq te’xye’ li ruq’ reheb’ li kok’al a’an?

Kok’ k’anjel naru chi b’aanumank

• K’eheb’ li junjunq chi kok’al chirilb’al ru chi ch’anch’o li jaljookil ru aatin re li karneer sachenaq malaj li jaljookil ru aatin re li kok’ tumin sachenaq, li neke’tawman sa’ Lukas 15:1–10 ut chixwotzb’al li k’a’ru xe’xtzol.

• Tz’iib’aheb’ li k’ab’a’ej a’in sa’ li pizarron: yuwa’b’ej, alalb’ej asb’ej, ut alalb’ej iitz’inb’ej. K’ut li video “El hijo pródigo” (LDS.org) ut xaqab’ jun sutaq naq eb’ li kok’al te’ruuq chixtz’iib’ankil sa’ li pizarron junjunq li reek’ahomeb’ li kristiaan tz’iib’anb’ileb’ xk’ab’a’ sa’ li pizarron.

• Patz’ re jun li ch’ina al naq taa’elq chirix li tzoleb’aal naq lix komoneb’ li kok’al te’xmuq jun li kok’ tumin malaj jun xjalam-uuch jun karneer. Patz’ re li ch’ina al naq taa’ok ut tixsik’ li kok’ tumin malaj li karneer. Jultika reheb’ li kok’al naq eb’ li kristiaan naru neke’kana chi sachso chiruheb’ li rosob’tesihom li evangelio. Kanab’eb’ chixyeeb’al chan ru naru neke’xye’ li ruq’ reheb’ li kristiaan a’an. B’icha rik’ineb’ li kok’al Saʼ raam laj Ilol Karneer,” Eb’ li b’ich,ajl 142, ut ch’olob’ xyaalal naq li sahil ch’oolejil na’eek’aman naq li kristiaan neke’q’aj rik’in li Dios.

• Ch’olob’ naq li Jesus kiroksi li karneer sachenaq, li kok’ tumin sachenaq, ut li alalb’ej sachenaq re reetalinkileb’ li kristiaan li “sachsookeb’ ” xb’aan naq ink’a’ neke’xk’ul li rosob’tesihom li evangelio. Kanab’eb’ li kok’al chixk’oxlankileb’ li kristiaan neke’xnaw ru li ink’a’ neke’wulak sa’ li iglees. K’a’ru naru neke’xb’aanu re xtenq’ankileb’ li kristiaan a’an re te’reek’a lix rahom li qaChoxahil Yuwa’?

Li sachsookil karneerxb’aan xLiz Lemon Swindle

Lukas 17:11–19

Naru nink’ut lin rahom choq’ re lin Choxahil Yuwa’ naq ninb’antioxiheb’ li wosob’tesinkil.

Li resilal li lajeeb’ saqlep rixeb’ naru naq tixwaklesiheb’ xch’ool li kok’al chi b’antioxink chiru li qaChoxahil Yuwa’ xb’aan li rosob’tesinkileb’.

Kok’ k’anjel naru chi b’aanumank

• Ilomaq ru sa’ komonil li seraq’ reheb’ li lajeeb’ saqlep rixeb’. Chan ru naq ki’osob’tesiik li saqleb’ xb’aan naq kib’antioxin? K’a’ut naq aajel ru li b’antioxink chiru li Dios xb’aaneb’ li qosob’tesinkil?

• Kanab’eb’ li kok’al chixyeeb’aleb’ k’a’ru li neke’xb’antioxi li natikla xk’ab’a’ rik’in li junjunq chi leetr sa’ lix k’ab’a’eb’.

• Patz’ reheb’ li kok’al naq te’xtz’iib’a kok’ esil re xb’antioxinkil chiru li qaChoxahil Yuwa’ li osob’tesihom naxk’e reheb’. Naru neke’xt’uyub’ li kok’ esil chixk’atq lix ch’aateb’ re te’xjultika li b’antioxink naq te’tijoq.

Jwan 11:1–46

Naqapaab’ naq li Jesus a’an li Ralal li Dios.

Chan ru naru nakawoksi li seraq’ re xMaria, xMarta, ut laj Lazaro re xtenq’ankileb’ li kok’al chixnawb’al, jo’ li xMarta, naq li Jesus “a’an li Kristo, li Ralal li Dios”? (Jwan 11:27).

Kok’ k’anjel naru chi b’aanumank

• Tz’iib’a sa’ li pizarron junjunq re li raatineb’ li kristiaan sa’ Jwan 11. Kanab’eb’ li kok’al chixq’ehinkil ani kiyehok re li junjunq chi na’leb’ a’an ut patz’ reheb’ naq te’xsik’ sa’ Jwan 11 re rilb’al ma us li xe’xq’ehi. Chan raj ru te’reek’a wi a’aneb’ raj li Jesus, xMarta, xMaria, malaj laj Lazaro? Chan ru naru chiqatenq’ankil xpaab’ankil li Jesus naq ra li qach’ool malaj wan li qaxiw?

• Il ru lix nawom xch’ool li xMarta, li natawman sa’ Jwan 11:20–27. Patz’ reheb’ li kok’al naq te’xsik’ aatin malaj ch’ol aatin li neke’xk’utb’esi lix paab’aal xMarta. K’a’ru naru naqab’aanu re naq taawanq qapaab’aal naq mas ch’a’aj?

• Tenq’aheb’ li kok’al chixkanab’ankil sa’ xk’a’uxleb’ Jwan 11:25. Ch’olob’ naq chiqajunilo toowakliiq chi yo’yo, a’b’an ka’ajwi’ eb’ li tiikeb’ xch’ool te’xk’ul li junelik yu’am ut te’wanq wi’chik rik’in li qaChoxahil Yuwa’ ut li Jesukristo.

Xb’oqb’aleb’ chi tzolok sa’ kab’l

K’e reheb’ li kok’al li hu malaj jun ch’ina cuaderno, li naru te’roksi re xtz’iib’ankil malaj xyiib’ankil sa’ jalam-uuch li k’a’aq re ru neke’xb’antioxi chiru li xamaan a’in.

Xchaab’ilob’resinkil li qak’utum

Li ka’sutink a’an xjayal li tzolok. Eb’ li kok’al te’tenq’aaq xb’aan rab’inkil jun li na’leb’ re li evangelio malaj naq neke’xb’aanu jun li ch’ina k’anjel chi k’iila sut. Ka’sutiheb’ li kok’ k’anjel chi naab’al paay ru.