li Kristo ut li ixq li kitawe’ chi muxuk sumsu

Li ani maak’a’ xmaak, xb’aan xLiz Lemon Swindle

29 abril-5 mayo

Jwan 7-10

”Laa’in li chaab’il aj k’aak’alenel karneer”

Naq yookat chirilb’al ru Jwan 7–10, k’oxlaheb’ li kok’al li nakatzoleb’. Naab’al reheb’ li na’leb’ choq’ reheb’ li kok’al ak ninqeb’ re li tusleb’ aatin a’in naru ajwi’ na’oksiman choq’ reheb’ li kok’al toj ka’ch’ineb’ xyu’am, malaj chi jaljo ru.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixwotzb’al k’a’ruhaq xe’xb’aanu chiru li xamaan xnume’ re wank jo’ li chaab’il aj Samaria.

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

Jwan 7:14–17

Li ab’ink chiruheb’ li taqlahom tinxtenq’a chixnawb’al naq yaaleb’.

Li Jesus kixk’ut naq naru naqataw xnawom qach’ool chirixeb’ li yaal li kixwotz naq yooqo chixyu’aminkileb’. Chan ru naru nakawoksi li seraq’ a’in re xk’utb’al chiruheb’ li kok’al naq li tuqtuukilal naqeek’a naq noko’ab’in chiruheb’ li taqlahom nokoxtenq’a chixnawb’al naq yaaleb’?

Kok’ k’anjel naru chi b’aanumank

• K’os ru Jwan 7:17 rik’ineb’ aatin li te’xtaw ru li kok’al. Tenq’aheb’ chixnawb’al naq li ab’ink chiruheb’ li taqlahom nokoxtenq’a chiqeek’ankil qib’ chi nach’ rik’in li Jesukristo, ut choq’ re a’an maare naru nekeb’icha sa’ komonil “Paabʼebʼ li taqlahom” malaj “Tinsikʼ ru li us,” B’ichleb’aal choq’ reheb’ li Kok’al, 68–69, 82–83. Patz’ reheb’ li kok’al naq te’ab’inq chi us re xk’eeb’al reetal chan ru too’osob’tesiiq naq too’ab’inq chiruheb’ li taqlahom.

• Wotz jun aanumsihom b’ar wi’ xatzol naq jun li taqlahom nachal rik’in li Dios xb’aan naq xayu’ami, jo’ xtojb’al li lajetqil malaj xkuyb’al xmaak junaq li xatxmajewa. Kanab’eb’ li kok’al chixk’oxlankil jun li numsihom wanjenaq reheb’ naq ke’ab’in chiru junaq li taqlahom. Patz’, “Chan ru xereek’a chirix naq xe’ab’in?”

• Sik’ ru junjunqeb’ li taqlahom ut kawresi wiib’ li b’atz’unk juntaq’eeteb’ rik’in jalam-uuch li te’reetali li junjunq chi taqlahom. K’e chixjunileb’ li jalam-uuch chi huphu sa’ li ch’och’ ut kanab’eb’ li kok’al chixk’eeb’aleb’ xhoonal chixk’ulb’aleb’ rib’ li taqlahom. Ch’olob’ xyaalal lix aajelileb’ ru li taqlahom ut chan ru naq lix taaqenkileb’ naxkawob’resi lix nawom laa ch’ool.

Jwan 8:29

Li Jesus ki’ab’in chiru lix Yuwa’.

Li Jesukristo junelik kixb’aanu li k’a’ru nawulak chiru lix Choxahil Yuwa’. Chan ru naru nakatenq’aheb’ li kok’al chixtawb’al chan ru naru neke’xtaaqe lix b’aanuhom li Jesus?

Kok’ k’anjel naru chi b’aanumank

• Tenq’aheb’ li kok’al chixka’sutinkil li kixye li Jesus chirix li qaChoxahil Yuwa’ sa’ Jwan 8:29: “Junelik ninb’aanu li nawulak chiru a’an.” Patz’ reheb’ naq te’xwotz li k’a’ru kixb’aanu li Jesus li kisaho’ wi’ xch’ool li qaChoxahil Yuwa’. K’ut chiruheb’ jun li jalam-uuch re Libro de obras de arte del Evangelio re xk’eeb’aleb’ xna’leb’.

• Patz’ reheb’ li kok’al k’a’ru nak’ehok xsahileb’ xch’ool. Chirix a’an patz’ k’a’ raj ru naru te’xb’aanu chiru li xamaan a’in re xk’eeb’al xsahil xch’ool jun li komon sa’ lix junkab’al malaj jun li ramiiw. Kanab’eb’ li kok’al chixyiib’akileb’ rib’ sa’ jalam-uuch naq yookeb’ chixb’aanunkileb’ li kok’ k’anjel a’an re naq te’xk’am sa’eb’ li rochoch ut te’jultikan reheb’.

• Kanab’ jun reheb’ lix na’ malaj xyuwa’ jun li ch’ina al chixwotzb’al junaq xnumsihom b’ar wi’ naq li ch’ina al kixb’aanu k’a’ruhaq ut kixk’e xsahileb’ xch’ool lix na’ xyuwa’. Kanab’ li ch’ina al chixyeeb’al chan ru xreek’a.

Jwan 10:1–18

Li Jesus naxnaw wu ut nikinxra.

Li jaljookil ru aatin re li chaab’il aj k’aak’alenel karneer naru chixtenq’ankileb’ li kok’al chixtawb’al ru naq li Jesus naxraheb’ ut naq naxnaw aniheb’.

Kok’ k’anjel naru chi b’aanumank

• Patz’ reheb’ li kok’al naq te’xyiib’ jun jalam-uuch li tixk’utb’esi k’a’ruhaq sa’ li jaljookil ru aatin re li chaab’il aj k’aak’alenel karneer, qayehaq, jo’eb’ li karneer, jun aj elq’ malaj jun li xojb’. Il ru Jwan 10:1–18 choq’ reheb’ li kok’al, ut patz’ reheb’ naq te’xchap chi kutankil lix jalam-uucheb’ naq te’rab’i xk’ab’a’ li xe’xyiib’ sa’ jalam-uuch. Ch’olob’ naq jo’ li “chaab’il aj k’aak’alenel karneer” naxb’eresiheb’ ut naxraheb’ lix ketomq, li Jesus nokoxra chiqajunilo ut nokoxb’eeresi chi q’ajk rik’in a’an. K’e li raq’ jun li ch’ina al jo’ jun aj k’aak’alenel karneer ut kanab’eb’ li kok’al chixwotzb’al chan ru naq li Jesus chanchan jun laj k’aak’alenel karneer choq’ qe laa’o.

• K’ut li jalam-uuch re li Jesus ut eb’ li karneer sa’ li tusleb’ aatin re li xamaan a’in re Kim, Taaqehin—Choq’ reheb’ li Komon ut li Junkab’al. Chan ru naqanaw naq li Jesus naxraheb’ li karneer? Chan ru naru naqak’e reetal naq eb’ li karneer neke’xra li Jesus?

• Kanab’eb’ li kok’al chixtz’aqob’resinkili ru li perel re kok’ k’anjel re li xamaan a’in.

reetalil li k’utuk

Xk’utb’al li tzol’leb’

Kok’al ak ninqeb’

Jwan 7:14–17

Li ab’ink chiruheb’ li taqlahom tinixtenq’a chixnawb’al naq yaaleb’.

Laa’at ut eb’ li kok’al nakatzoleb’ maare wanjenaq xk’ulumeb’ sa’ xyu’aminkil lix yaalalileb’ li evangelio ut sa’ xtzolb’al naq yaaleb’. Chan ru naru nakatkab’lak sa’ xb’eeneb’ li numsihom a’an naq nakatk’utuk?

Kok’ k’anjel naru chi b’aanumank

• Tz’iib’a li junjunq chi raqal re Jwan 7:14–17 chiruheb’ jalan jalanq kok’ hu ut kut’eb’ chi jalb’ileb’ xtusulal. Patz’ reheb’ li kok’al naq te’xtus ru chi us ut te’ril sa’ Jwan 7:14–17 ma tz’aqal a’an li te’xb’aanu. Kanab’eb’ li kok’al chixch’utub’ankileb’ rib’ sa’ ka’kab’il ut chixwotzb’al rik’ineb’ li rochb’een li k’a’ru neke’xtaw ru sa’ li junjunq chi raqal. Chan ru naq li ab’ink chiruheb’ lix taqlahom li Dios naxtenq’aheb’ chixnawb’al naq eb’ li taqlahom tz’aqal yaaleb’.

• Wotz reetalileb’ sa’eb’ li loq’laj hu lix k’utb’al chan ru naq eb’ li kristiaan ke’osob’tesiik xb’aan xyu’aminkil lix yaalalil li evangelio, jo’ laj Daniel (chi’ilmanq Daniel 6) malaj laj Nefi (chi’ilmanq 1 Nefi 3–4).

• Naq maji’ nawulak xkutankil li tzolok, kanab’ jun reheb’ li ch’ina al chixtz’iib’ankil chirix junaq hoonal naq kixtaw jun xnawom xch’ool chirix junaq taqlahom xb’aan xyu’aminkil. Chiru li tzolok, patz’ re jun li ch’ina al naq tixwotz li xtz’iib’a.

Jwan 8:31–36

Li yaal naru nokorach’ab’.

Sa’ xk’iijikeb’ li kok’al , te’xtaw rib’ rik’ineb’ li kristiaan li neke’xk’oxla naq lix yu’aminkil li evangelio nokoxram. Chan ru naru nakawoksi Jwan 8:31–36 re xsumenkil li na’leb’ a’an?

Kok’ k’anjel naru chi b’aanumank

• Kanab’eb’ li kok’al chirilb’al ru Jwan 8:31–36 ut chixwotzb’al li neke’xk’oxla naq naraj naxye li wank choq’ xloq’b’il moos li maak. Chan ru nokohe’xtenq’a lix k’utum li Jesus chi wank chi ach’ab’anb’il?

• Patz’ re jun li ch’ina al naq tatxtenq’a chixb’ak’b’al jun li k’aam, ramleb’ ja’aj, malaj korb’aat sa’ xkux laa wuq’ laa’at re xk’utb’esinkil chan ru nokowulak choq’ xloq’b’il moos li maak naq nokomaakob’k chi k’ok’ aj xsa’ ut ink’a’ naqajal qak’a’uxl.

• K’ut jun li tz’apleb’ li taareetali li maak ut jun li laaw li taareetali chan ru naq eb’ lix yaalalil li evangelio naru chiqach’ab’ankil. Qayehaq, lix nawb’al chirix lix tojb’al rix li maak xb’aan li Kolonel naru naxk’e qach’ab’ankil re taqajal qak’a’uxl ut taakuye’q li qamaak. Malaj lix nawb’al chirix li Aatin re Chaab’il Na’leb’ naru naxk’e qach’ab’ankil re xkolb’al ru li nak’aytesin.

Li Kristo naq kik’utuk sa’ li santil ochoch

Li Jesus kixk’ut, “ut li yaal taa’ach’ab’anq eere” (Jwan 8:32).

Jwan 10:1–18

Li Jesus chanchan jun aj k’aak’alenel karneer choq’ qe.

Naq yookat chixtzolb’al li jaljookil ru aatin re li chaab’il aj k’aak’alenel karneer, sikeb’ li yaal naxk’ut chirix li qawanjik rik’in li Kolonel. Chan ru naq xnawb’aleb’ li yaal a’an taarosob’tesiheb’ li kok’al?

Kok’ k’anjel naru chi b’aanumank

• Tz’iib’a li chaab’il aj k’aak’alenel karneer ut li yal tojb’il sa’ li pizarron. Ch’olob’ naq jun li yal tojb’il a’an li ani nasik’e’ re xb’aanunkil jun li k’anjel xb’aan tumin. Patz’ reheb’ li kok’al naq te’xk’e rajlil lix jalanileb’ li chaab’il aj k’aak’alenel karneer ut li yal tojb’il neke’tawman sa’ Jwan 10:1–18. K’a’ut raj naq taawaj xtaaqenkil li chaab’il aj k’aak’alenel karneer sa’ xna’aj jun yal tojb’il?

• Yiib’ jun xjalam-uuch malaj k’ut jun li jalam-uuch re jun li okeb’aal. Ilomaq ru sa’ komonil Jwan 10:7–9 ut patz’ reheb’ li kok’al chan ru naq li Jesus chanchan jun li okeb’aal. Jo’ naxye sa’ li raqal 9, k’a’ru li osob’tesihom neke’xk’ul li “neke’ok” sa’ li okeb’aal? Chan ru noko’ok sa’ li okeb’aal li naxk’e li Jesukristo?

reetalil li tzolok

Xb’oqb’aleb’ chi tzolok sa’ kab’l

Tenq’aheb’ li kok’al chixk’oxlankil jun li taqlahom li te’ruuq raj chixpaab’ankil chi tz’aqal. Patz’ reheb’ naq te’xyal xpaab’ankil li taqlahom a’an chiru li xamaan chal re.

Xchaab’ilob’resinkil li qak’utum

Oksiheb’ li musiq’anb’il patz’om. Oksiheb’ li patz’om li tixkanab’eb’ li kok’al li nakatzoleb’ chi xik mas wi’chik chi uub’ej chiru ka’ajwi’ xyeeb’al resil li kik’ulman. Choq’ ruuchil a’an, waklesiheb’ xch’ool chixwotzb’al lix nawom xch’ooleb’ chirixeb’ li yalil na’leb’ re li evangelio. Qayehaq, wi yookex chi aatinak chirixeb’ li taqlahom, naru nakapatz’ reheb’ li kok’al naq te’xwotz chan ru naq xb’aan xpaab’ankileb’ li taqlahom neke’osob’tesiik.

perel re kok’ k’anjel: li Jesus naxnaw wu ut nikinixra.