Li xkab’ xk’ulunik li Qaawa’, xb’aan laj Harry Anderson

27 mayo-2 junio

Jose Smith--Mateo 1; Mateo 25; Markos 12-13; Lukas 21

”Taak’ulunq chaq li K’ajolb’ej”

K’oxlan chirix li k’a’ru tento te’xtzol li kok’al li nakatzoleb’ chirix Jose Smith—Mateo 1; Mateo 25; Markos 12–13; ut Lukas 21. Naru tawoksi li na’leb’ reheb’ li kok’al ak ninqeb’ re li tusleb’ aatin a’in choq’ reheb’ li kok’al li toj ka’ch’ineb’ xyu’am, ut chika’pak’al.

Xtz’iib’ankil li nakak’oxla

Xkanab’ankileb’ chi wotzok

K’ut jun li jalam-uuch wan rilom rik’ineb’ li junjunq chi seraq’ re li xamaan a’in (jo’ li jalam-uuch reheb’ li lajeeb’ chi tuq’ixq sa’ li tusleb’ aatin re li xamaan a’in sa’ Kim, Taaqehin—Choq’ reheb’ li Komon ut li Junkab’al). Patz’ reheb’ li kok’al naq te’xwotz li k’a’ru neke’xnaw chirix li seraq’ a’an.

Xk’utb’al li tzol’leb’

Kok’al toj ka’ch’ineb’ xyu’am

Jose Smith—Mateo 1:31

Naq maji’ nak’ulun wi’chik li Jesus, li evangelio taajultikamanq sa’ chixjunil li ruchich’och’.

Li Jesus kixye naq maji’ nak’ulun wi’chik, li evangelio taajultikamanq sa’ chixjunil li ruchich’och’. Eb’ li kok’al naru neke’tenq’an chixk’eeb’al chi uxmank li profeetil aatin a’an naq neke’xwotz li evangelio.

Kok’ k’anjel naru chi b’aanumank

• K’ut jun li reetalil li ruchich’och’ malaj xjalam-uuch li ruchich’och’ (chi’ilmanq Libro de obras de arte del Evangelio,  3) ut tenq’aheb’ li kok’al chixyeeb’al: “Li evangelio a’in … taajultikamanq sa’ chixjunil li ruchich’och’ ” (Jose Smith—Mateo 1:31). K’a’ut naq li Dios naraj naq chixjunileb’ li ralal xk’ajol te’rab’i li evangelio?

• Kanab’eb’ li kok’al chi b’eek sa’ lix na’ajeb’ naq yookeb’ chixb’ichankil “Nawaj tinwanq choqʼ jun li misioneer” ut “Bʼoqbʼilo choqʼ xmoos,” B’ichleb’aal choq’ reheb’ li Kok’al, 90, 94–95. Kanab’eb’ li misioneer wankeb’ sa’ xk’anjel malaj li ak xe’xchoy chaq xk’anjel chixseraq’inkil lix numsihomeb’ chirix xwotzb’al li evangelio ut chitenq’ankileb’ li kok’al chixk’oxlankil chan ru naru neke’xwotz li evangelio.

Jalam-uuch xk’ehom chaq li Centro Espacial Johnson de la NASA.

Mateo 25:14–30

Naru nawoksiheb’ li maatan naxk’e we li Dios.

Eb’ li kok’al toj ka’ch’ineb’ xyu’am yookeb’ chixtawb’aleb’ lix maatan ut lix seeb’aleb’. Tenq’aheb’ chixtawb’al ru naq eb’ li maatan ut li seeb’al a’an nachal chaq rik’in li qaChoxahil Yuwa’.

Kok’ k’anjel naru chi b’aanumank

• K’am junjunq li kok’ tumin li naru nakawoksi naq yookat chixseraq’inkil li jaljookil ru aatin chirix li tumin li natawman sa’ Mateo 25:14–30. Naru nakapatz’ reheb’ oxib’ li kok’al naq te’reetaliheb’ li oxib’ chi moos. Ch’olob’ naq sa’ lix kutankil li Jesus, li talento a’an li tumin, a’b’an sa’eb’ li kutan a’in li talento naru naq a’anaqeb’ li qamaatan ut eb’ li qaseeb’al.

• Patz’ reheb’ li kok’al naq te’xye chan ru naq neke’tenq’aak xb’aaneb’ lix na’ xyuwa’, li ras riitz’ineb’, eb’ laj k’utunel, malaj eb’ li ramiiw . K’a’ru lix seeb’aleb’ li kristiaan a’an li neke’tenq’an reheb’ chi k’anjelak chiruheb’ lix komon li kristiaan?

• Tz’iib’a jun li ch’ina esil choq’ reheb’ li junjunq chi kok’al b’ar wi’ taaye reheb’ li maataneb’ malaj li seeb’aleb’ nakawil. Lan rix li junjunq chi kok’ esil jo’ jun maatan ut kanab’eb’ li kok’al chixteeb’al lix “maataneb’.” Waklesiheb’ xch’ool chixchaab’ilob’resinkil lix maatan ut chiroksinkileb’ re k’anjelak chiruheb’ li kristiaan.

Mateo 25:31–46

Li Jesus naraj naq tink’anjelaq chiruheb’ li kristiaan.

Nokok’anjelak chiru li qaChoxahil Yuwa’ ut chiru li Jesukristo naq nokok’anjelak chiruheb’ li wankeb’ chiqasutam. Eb’ li kok’al li toj ka’ch’ineb’ xyu’am naru ajwi’ neke’k’anjelak chiruheb’ li kristiaan.

Kok’ k’anjel naru chi b’aanumank

• K’os ru li jaljookil ru aatin li natawman sa’ Mateo 25:34–46. Tenq’aheb’ li kok’al chixtawb’al ru naq nokok’anjelak chiruheb’ li kristiaan, yooko ajwi’ chi k’anjelak chiru li Jesukristo.

• Chap jun li jalam-uuch re jun li ch’ina al re laa tzoleb’aal rik’in jun xjalam-uuch li Jesus chi muqmu chirix. K’a’ru naru naqab’aanu re k’anjelak chiru li ch’ina al a’in? Isi lix jalam-uuch li ch’ina al ut ch’olob’ naq rik’in naq nokok’anjelak chiqu chiqib’il qib’, yooko ajwi’ chi k’anjelak chiru li Jesus.

• Kanab’eb’ li kok’al chixyiib’ankileb’ rib’ sa’ jalam-uuch naq yookeb’ chi k’anjelak chiruheb’ li kristiaan jo’ chanru naxye li Kolonel sa’ Mateo 25:35–36. Patz’ reheb’ lix komoneb’ li kok’al naq te’xq’ehi li k’a’ru yookeb’ chixyiib’ankil sa’ jalam-uuch

• Kanab’eb’ li kok’al chixwotzb’al lix numsihomeb’ naq junaq xk’anjelak chiruheb’ a’an malaj chiruheb’ lix junkab’aleb’ jo’ tixb’aanu raj li Kristo.

Xk’utb’al li tzol’leb’

Kok’al ak ninqeb’

Jose Smith—Mateo 1:31

Naq maji’ nak’ulun wi’chik li Jesus, li evangelio taajultikamanq sa’ chixjunil li ruchich’och’.

Eb’ li kok’al li nakatzoleb’ naru neke’tenq’an chixjultikankil li evangelio sa’ chixjunil li ruchich’och’ naq maji’ nawulak li xkab’ xk’ulunik li Kolonel.

Kok’ k’anjel naru chi b’aanumank

• Kanab’eb’ li kok’al chixwotzb’al li osob’tesihom ak xk’ulumeb’ malaj li te’xk’ul sa’ xk’ab’a’ naq a’aneb’ komon re lix Iglees li Kristo. Ilomaq ru sa’ komonil Jose Smith—Mateo 1:31, ut patz’ reheb’ li kok’al chan ru naq li evangelio taarosob’tesiheb’ li ralal xk’ajol li Dios chiru chixjunil li ruchich’och’.

• K’ut chiruheb’ li kok’al jun li reetalil ch’och’ re li ruchich’och’ malaj re Guatemala ut tenq’aheb’ chixtawb’al junjunq li na’ajej b’ar wi’ junaq li komon sa’eb’ lix junkab’al malaj junaq li ramiiweb’ xjultika chaq li evangelio chiru lix mision.

• Kanab’eb’ junjunqeb’ li kok’al chi wulak chi kawresinb’ileb’ re xwotzb’al chan ru naq eb’ li komon sa’ lix junkab’al malaj lix xe’tooneb’ ke’xnaw ru li evangelio. Wi naru, patz’ re junaq li komon re li teep li xwan chaq sa’ jun li mision naq tixseraq’i jun lix numsihom chirix xwotzb’al li evangelio.

• Patz’ reheb’ li junjunq chi kok’al naq tixtz’iib’a xk’ab’a’ junaq li naru na’aatinak wi’ chirix li evangelio malaj xb’oqb’al chi xik sa’ li iglees. Patz’ ajwi’ reheb’ li kok’al naq te’xtus rajlil li k’a’ru naru neke’xb’aanu re te’wanq jo’ misioneer ak anajwan.

Mateo 25:1–13

Teneb’anb’il sa’ inb’een lix jalajik inch’ool laa’in sa’ li evangelio.

Li jaljookil ru aatin chirixeb’ li lajeeb’ chi tuq’ixq naxk’ut naq lix jalajik qach’ool sa’ li evangelio ink’a’ naru naqato’oni rik’in jalan chik. Chan ru naru nakatenq’aheb’ li kok’al chixk’ulb’al sa’ xb’eeneb’ li teneb’ahom re lix jalajikeb’ xch’ool.

Kok’ k’anjel naru chi b’aanumank

• Patz’ re jun li ch’ina al ut re jun reheb’ lix na’ xyuwa’ naq te’wulaq chi kawresinb’il re xwotzb’al chan ru naq xe’xtzol chirix li jaljookil ru aatin chirixeb’ li lajeeb’ chi tuq’ixq sa’ kab’l chiru li xamaan a’in.

• Yiib’ xjalam-uuch jun li kandeel rik’in aseeyt sa’ li pizarron ut k’e choq’ xjolomil xnawom ch’oolej. K’e reheb’ li junjunq chi kok’al jun li hu setb’il jo’ jun tz’uqul li aseeyt ut patz’ reheb’ naq te’xtz’iib’a chiru k’a’ru te’xb’aanu re te’jalaaq xch’ool chi us sa’ li evangelio. Letzeb’ lix hu setb’il jo’ jun tz’uqul li aseeyt chiru li pizarron chire li kandeel.

• Kanab’eb’ li kok’al chatenq’ankil chixk’uub’ankil jun xtusulal li ka’a’q re ru li naru neke’xb’aanu re xkawresinkileb’ rib’ choq’ re jun aj ula’ jwal chaab’il. Chan ru naq juntaq’eeteb’ malaj jalaneb’ li k’a’aq re ru a’an rik’in chan ru naru naqakawresi qib’ sa’ musiq’ej re li xkab’ xk’ulunik li Kolonel?

• Chiru oob’ chi setb’il kok’ hu, tz’iib’aheb’ li k’a’aq re ru li ink’a’ naru chi to’onimank. Chiru oob’ chik chi setb’il kok’ hu, tz’iib’aheb’ li k’a’aq re ru li naru chi to’onimank. Junaji ruheb’ li kok’ setb’il hu ut patz’ reheb’ li kok’al naq te’xtuseb’ ru sa’ wiib’ ch’uut. Ilomaq ru sa’ komonil Mateo 25:1–13. K’a’ut naq jwal aajel ru naq ink’a’ taqakanab’ qib’ chiruheb’ li qakomon re xjalb’al qach’ool sa’ li evangelio?

Mateo 25:14–46

Sa’ li raqb’a-aatin sa’ roso’jik, taqak’e re li Qaawa’ li resil li qayu’am.

Chirix li wakliik chi yo’yo, li Dios tixraq aatin chiqix a’ yaal jo’ chanru koo’ab’in chiruheb’ lix taqlahom ut xqak’ulub’a lix mayej li Kolonel re xtojb’al rix li maak. Li jaljookil ru aatin chirixeb’ li talento ut chirixeb’ li karneer ut li chib’aat nokohe’xtzol chirix li raqb’a-aatin a’an.

Kok’ k’anjel naru chi b’aanumank

• B’oq lix yiitoq laa tzoleb’aal chirilb’al ru Mateo 25:14–30 ut li jun jachal chik chirilb’al ru Mateo 25:31–46. Patz’ reheb’ li ch’uut naq te’xk’utb’esi li jaljookil ru aatin chiru li tzoleb’aal.

• Kanab’eb’ li kok’al chirilb’al ru Mateo 25:35–36 chi ka’kab’il ut chixyiib’ankil jun xtusulal li naru neke’xb’aanu re xk’utb’al lix rahomeb’ choq’ re li Jesukristo.

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz rik’ineb’ lix junkab’al chan ru neke’ru chi chaab’ilo’k jo’ misioneer, ut chi aatinak rik’ineb’ lix junkab’al chirixeb’ li kristiaan li naru neke’aatinak wi’ chirix li evangelio.

Xchaab’ilob’resinkil li qak’utum

Rab’inkil malaj xk’utb’esinkil jun li seraq’. Xb’aan naq eb’ li kok’al mas nawulak chiruheb’ li seraq’, sik’ chan ru taak’eheb’ chi tz’aqonk sa’eb’ li seraq’ reheb’ li loq’laj hu li nakawotz. A’aneb’ naru neke’xchap li jalam-uuch malaj k’a’aq re ru, naru neke’xyiib’ li jalam-uuch chirix li seraq’, naru neke’xk’utb’esi, malaj nakate’xtenq’a chixseraq’inkil. Ka’sutiheb’ li esil re xtenq’ankileb’ chixtawb’al lix k’utumeb’ li evangelio aajeleb’ ru.