Ch’olaniheb’ inkarneer, xb’aan xKamille Corry

24-30 junio

Mateo 28; Markos 16; Lukas 24; Jwan 20-21

”Xwakliik chi yo’yo”

Re xtikib’ankil lix kawresinkil aawib’, il ru Mateo 28; Markos 16; Lukas 24; ut Jwan 20–21. Kim, Taaqehin—Choq’ reheb’ li komon ut li junkab’al ut li tusleb’ aatin a’in naru nakate’xtenq’a chixsik’b’al ruheb’ li na’leb’ sa’eb’ li ch’ol a’in li te’wanq xyaalal choq’ reheb’ li kok’al sa’ laa tzoleb’aal.

Xtz’iib’ankil li nakak’oxla

Xkanab’ankileb’ chi wotzok

Li rilb’al jun li jalam-uuch naru naxtenq’aheb’ li kok’al chixjultikankil li k’a’aq re ru xe’xtzol sa’ kab’l ut sa’ jalan chik hoonal. Maare naru taak’ut li jalam-uuch wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al ut patz’ reheb’ li kok’al naq te’xwotz li k’a’ru neke’xnaw chirix li esil na’eetaliman sa’ li jalam-uuch.

Xk’utb’al li tzol’leb’

Kok’al toj ka’ch’ineb’ xyu’am

Mateo 28; Markos 16; Lukas 24; Jwan 20:1–23

Chirix naq tinkamq taawanq wi’chik inyu’am, jo’ kixb’aanu li Jesus.

Lix tojb’al rix li maak xb’aan li Jesukristo, jo’ ajwi’ lix waklijik chi yo’yo, a’an li mas aajel ru li kik’ulman sa’ li ruchich’och’ ut a’an lix k’ojob’ankil lix paab’aaleb’ laj Kristiano. Naq nakawil chirix li wakliik chi yo’yo, tz’il rix chan ru taatenq’aheb’ li kok’al chixk’ojob’ankil lix paab’aaleb’ chirix li Jesukristo.

Kok’ k’anjel naru chi b’aanumank

• Seraq’i li esil chirix lix waklijik chi yo’yo li Jesus rik’in laa waatin. Patz’ reheb’ li kok’al naq te’xk’e hoonaleb’ chirib’ileb’ rib’ re xka’sutinkil aawe li esil. Naru nakawil “Ch’ol 54: Nawakli wi’chik chi yo’yo li Jesus”, Eb’ li Esilal sa’ li Ak’ Chaq’rab’, 139–144, malaj li video sa’ (LDS.org). Ch’olob’ naq rik’in lix kamik li Jesus, lix musiq’ kixkanab’ lix junxaqalil. Naq kiwakli chi’ yo’yo, lix musiq’ ut lix junxaqalil ke’xjunaji wi’chik rib’.

• B’oqeb’ wiib’ oxib’ li komon re li teep chireetalinkileb’ laj puub’, eb’ li anjel, li xMaria Magdalena, laj Pedro, laj Jwan, eb’ lix tzolom ut laj Tomas ut chixyeeb’al li k’a’ru xe’ril li kristiaan a’in chirix lix waklijik chi yo’yo li Jesus.

• K’ut li video “¿Qué sucede después de que morimos?” (LDS.org), ut aatinan chirix junaq kristiaan nakanaw ru li ak kamenaq. Wotz lix nawom aach’ool naq chiqajunilo toowakliiq chi yo’yo sa’ jun kutan. Kanab’eb’ li kok’al chixwotzb’al lix nawom xch’ooleb’.

• Naru taab’icha rik’ineb’ li kok’al Ma yaal naq li Jesus xwakli?” ut “Naq taakʼulunq li Kolonel,”, B’ichleb’aal choq’ reheb’ li Kok’al, 45, 46–47. Patz’ reheb’ li kok’al naq te’xk’oxla chan raj ru te’reek’a naq te’ril li Jesus chi waklijenaq chi yo’yo. Kanab’eb’ chixwotzb’al li k’a’ru neke’xk’oxla sa’ li tzoleb’aal.

Jwan 20:24–29

Naru nawan inpaab’aal chirix li Jesukristo us ta ink’a’ ninru chirilb’al ru.

K’e reetal chan ru naru nakatenq’aheb’ li kok’al chixtawb’al ru k’a’ru li paab’aal ut chan ru naru neke’xk’anjela lix paab’aal chirix li Kolonel.

Kok’ k’anjel naru chi b’aanumank

• K’ut li jalam-uuch Cristo habla a Tomás (LDS.org) naq yookat chixseraq’inkil lix numsihom laj Tomas li natawman sa’ Jwan 20:24–29. Ye wi’chik li seraq’ chalel sa’ li tzolok, a’b’an arin chik taapatz’ reheb’ li kok’al naq te’xye junjunq xch’olob’ankil.

• K’ut jun li kaxon rik’in junaq k’a’aq re ru li ink’a’ naru neke’ril li kok’al ut ch’olob’ chiruheb’ li kok’al chan ru a’an. Patz’ reheb’ ma neke’xpaab’ naq li k’a’aq re ru tz’aqal wan sa’ li kaxon ut k’a’ut. Chirix a’an k’ut chiruheb’ li k’a’aq re ru ut ch’olob’ naq li paab’aal a’an xpaab’ankil k’a’ruhaq li ink’a’ nokoru chirilb’al ru. Li paab’aal mas aajel ru nawan qe a’an chirix li Jesukristo.

Wahe’ li wuq’, xb’aan laj Jeff Ward.

Jwan 21:15–17

Naru nink’ut inrahom choq’ re li Jesus naq nink’anjelak chiruheb’ li kristiaan.

Chan ru naru nakawaklesi xch’ooleb’ li kok’al chixraab’aleb’ ut chixtenq’ankileb’ li wankeb’ sa’ xsutameb’?

Kok’ k’anjel naru chi b’aanumank

• Il ru Jwan 21:15–17 malaj k’ut li video “Apacienta mis ovejas” (LDS.org). Li Jesus ink’a’ kiraj naq laj Pedro taaroksi raj chixjunil lix hoonal chi karab’k. Kiraj b’an naq laj Pedro tixwotz li evangelio ut tixb’oqeb’ chixjunil chi chalk chiru a’an. K’e reheb’ li junjunq chi kok’al jun li ch’ina karneer yiib’anb’il rik’in hu ut patz’ reheb’ naq te’xtz’iib’a chiru a’an li k’a’ru naru neke’xb’aanu re tenq’ank chixwa’tesinkileb’ lix karneer li Jesus.

• Chi rub’elaj, patz’ reheb’ junjunq li kok’al naq te’xwotz li k’a’ru yookeb’ chixb’aanunkil re rahok ut re k’anjelak chiruheb’ li kristiaan, malaj chan ru naq li kristiaan neke’k’anjelak chiruheb’ a’an.

• Tz’iib’a lix k’ab’a’eb’ li junjunq chi kok’al re laa tzoleb’aal chiru kok’ hu setb’il jo’eb’ li karneer ut jek’iheb’ li karneer sa’ li tzoleb’aal. (K’e ajwi’ xk’ab’a’eb’ li kok’al li ink’a’ mas neke’wulak.) Re xch’utub’ankileb’ li karneer, kanab’eb’ li kok’al chixsik’b’al lix k’ab’a’eb’. K’a’ru naru naqab’aanu re k’anjelak chiru junaq li karneer sachenaq li nekenaw ru?

Xk’utb’al li tzol’leb’

Kok’al ak ninqeb’

Mateo 28; Markos 16; Lukas 24; Jwan 20:1–23

Sa’ xk’ab’a’ naq li Jesus kiwakli chi yo’yo, chixjunileb’ te’wakliiq chi yo’yo.

Ak re naq eb’ li kok’al te’xpatz’ k’a’ru nak’ulman chirix li kamk. K’e reetal chan ru naru nakak’ut chiruheb’ li kok’al chirix li wakliik chi yo’yo re naq tixwaklesi lix paab’aaleb’.

Kok’ k’anjel naru chi b’aanumank

• Kanab’eb’ li kok’al chixmutz’b’aleb’ li ru ut chixk’oxlankil naq chunchuukeb’ chixk’atq lix muqleb’aal li Jesus naq yookat chirilb’al ru Jwan 20:1–17 malaj k’os ru li seraq’ chirix lix waklijik chi yo’yo li Jesus (chi’ilmanq ajwi’ “Ch’ol 54: Nawakli wi’chik chi yo’yo li Jesus,” Eb’ li Esilal sa’ li Ak’ Chaq’rab’ 139–144, malaj li video sa’ LDS.org). Chan raj ru rilb’al li Kolonel chi waklijenaq chi yo’yo?

• Patz’ re li junjunq chi kok’al naq tixtzol lix numsihom junaq li kiril li Kolonel chi waklijenaq chi yo’yo ut tixwotz sa’ li tzoleb’aal li k’a’ru xtzol.

• Il jun malaj naab’al reheb’ li video a’in rik’ineb’ li kok’al: “Jesús es puesto en un sepulcro,” “Jesús resucita,” “Cristo se aparece en el camino a Emaús,” ut “El Señor resucitado se aparece a los Apóstoles” (LDS.org).

Jwan 20:24–29

Naru nawan inpaab’aal chirix li Jesukristo us ta ink’a’ ninru chirilb’al ru.

K’a’ru yookeb’ chixb’aanunkil li kok’al li nakatzoleb’ re xkawob’resinkil lix paab’aaleb’ chirix li Jesukristo? Chan ru naru nakatenq’aheb’?

Kok’ k’anjel naru chi b’aanumank

• Kanab’eb’ junjunq li kok’al chixk’eeb’aleb’ xhoonal chirib’ileb’ rib’ re rilb’al ruheb’ junjunq li raqal sa’ Jwan 20:24–29. (Chi’ilmanq ajwi’ li video “Bienaventurados los que no vieron y creyeron,” LDS.org).

• Tz’iib’a li junjunq chi aatin re li ch’ol aatin “Us xaq reheb’ li maak’a’ xe’ril ut xe’xpaab” sa’ jalan jalanq chi kok’ hu. Ut kanab’eb’ li kok’al chixkeeb’aleb’ li aatin chi tustu ru. Kanab’eb’ chi aatinak chirix lix numsihomeb’ naq reek’ahomeb’ lix rahom li Kolonel us ta ink’a’ rilomeb’ ru.

• Kanab’eb’ li kok’al chixyiib’ankileb’ xjalam-uuch li k’a’ru naru neke’xb’aanu re xkawob’resinkil lix paab’aaleb’. Naq yookeb’ chixyiib’ankileb’ li jalam-uuch, wotz li k’a’ru nakab’aanu laa’at re xkawob’resinkil laa paab’aal chirix li Jesukristo.

Jwan 21:1–17

Naru nink’ut lin rahom choq’ re li Jesus naq ninch’olaniheb’ lix karneer.

Eb’ li kok’al naru neke’xtoch’ xch’ooleb’ chi nim li ani wankeb’ sa’ xsutam. Chan ru naru nakawaklesiheb’ xch’ool re xkawob’resinkileb’ li komon sa’ li evangelio?

Kok’ k’anjel naru chi b’aanumank

• Naq maji’ nekeril ru Jwan 21:1–17 sa’ komonil, patz’ reheb’ li kok’al ma wulajenaqeb’ jun sutaq chi karab’k. Chan ru xe’xnumsi chaq? Patz’ reheb’ ma xkara junaq reheb’ a’an “xnimal xk’ihal li kar” (Jwan 21:6).

• Il ru Jwan 21:15–17, a’b’an jal ru lix k’ab’a’ laj Simon rik’in xk’ab’a’eb’ li kok’al. Aniheb’ lix karneer li Jesus? Chan ru naru naqach’olaniheb’ lix karneer?

• Wotz b’ayaq li ch’ina tzakemq rik’ineb’ li kok’al. Naq yookeb’ chi wa’ak, patz’ reheb’ chan ru naq lix wotzb’al li evangelio rik’in junaq a’an chanchan xk’eeb’aleb’ chi wa’ak malaj xch’oolaninkileb’.

Xb’oqb’aleb’ chi tzolok sa’ kab’l

Kanab’eb’ li kok’al chiroksinkil li perel re kok’ k’anjel re li xamaan a’in re xk’utb’al chiruheb’ lix junkab’al chirix li xraqik li xamaan sa’ lix yu’am li Kolonel.

Xchaab’ilob’resinkil li qak’utum

Chawab’i resil li b’oqom re k’anjelak. Naq nakab’oqeb’ li kok’al chixyu’aminkil li neke’xtzol, numsi wi’chik li b’oqom a’an sa’ li tzolok chal re. A’an naxk’ut chiruheb’ li kok’al naq laa’at nakawaj xnawb’al chan ru naq li evangelio yoo chirosob’tesinkil lix yu’ameb’ Naq te’xwotz lix numsihomeb’, te’kawob’resiiq ut te’xtenq’a rib’ chirib’ileb’ rib’ chixyu’aminkil li evangelio.