Xkutankil li Pentecostes, xb’aan laj Sidney King

1–7 julio

Hechos 1–5

“Laa’exaq aj yehol yaal chiwix”

Re xtikib’ankil lix kawresinkil aawib’, il ru Hechos 1–5. Yal aaq’e xtawb’al ru, rik’in li tij, li rajomeb’ ru li kok’al li nakatzoleb’. Kim, Taaqehin—Choq’ reheb’ li komon ut li junkab’al ut li tusleb’ aatin a’in naru nakate’xtenq’a.

Xtz’iib’ankil li nakak’oxla

Xkanab’ankileb’ chi wotzok

Tz’iib’a Anihin laa’in? sa’ li pizarron. K’e naab’al li seraq’ chirix laj Pedro ut patz’ reheb’ li kok’al ani li neke’aatinak wi’ li seraq’ a’an. K’a’ru chik neke’xnaw chirix laj Pedro?

Xk’utb’al li tzol’leb’

Kok’al toj ka’ch’ineb’ xyu’am

Hechos 1:1–11

Li Jesukristo naxb’eresi lix Igleees rik’ineb’ li profeet ut eb’ li apostol.

Li tzolok chirix chan ru naq li Kolonel kixb’eresi lix Iglees sa’ li najter kutan rik’ineb’ li apostol naru naxtenq’aheb’ li kok’al chixtawb’al jun xnawom xch’ooleb’ chirixeb’ li profeet ut eb’ li apostol re li qakutan.

Kok’ k’anjel naru chi b’aanumank

• K’ut li jalam-uuch re jun chi perel sa’ li tusleb’ aatin re li xamaan a’in re Kim, Taaqehin—Choq’ reheb’ li komon ut li junkab’al. Patz’ reheb’ li kok’al k’a’ut naq eb’ li winq yookeb’ chi ilok sa’ choxa naq neke’xk’oxla. K’os ru li seraq’ sa’ Hechos 1:1–11. Chi’ilmanq ajwi’ “Ch’ol 55: Eb’ li apostol neke’xb’eresi li Iglees,” Eb’ li Esilal sa’ li Ak’ Chaq’rab’, 145–147, malaj li video chirix a’an (LDS.org).

• Naq eb’ li nakatzoleb’ yookeb’ chirilb’al li jalam-uuch sa’ li tusleb’ aatin re li xamaan a’in re Kim, Taaqehin—Choq’ reheb’ li komon ut li junkab’al, kanab’ jun li ch’ina al chixchapb’al chi kutankil jun xjalam-uucheb’ li apostol reheb’ li kutan a’in. Ani nab’eresink re li Iglees naq li Kristo moko wan ta sa’ li ruchich’och’? Chan ru neke’xb’eresi li Iglees?

• B’aanu jun li b’atz’unk re juntaq’eetink rik’in wiib’ ch’uut xjalam-uucheb’ li Xb’eenil Awa’b’ejil ut eb’ li Kab’laju chi Apostol reheb’ li qakutankil. Naq te’tawmanq xjuntaq’eetil, ye xk’ab’a’ li apostol malaj awa’b’ej ut ye k’a’ruhaq chirix a’an.

• Chirix jun xjalam-uuch li Jesus, latz k’iila kok’ jalam-uuch re k’a’aq re ru chirix li taak’utuq raj junaq profeet, jo’ li kub’iha’ malaj jun santil ochoch. Kanab’eb’ li junjunq chi kok’al naq’ te’xk’e xhoonal chirib’ileb’ rib’ re rilb’al jun reheb’ li jalam-uuch ut xyeeb’al reheb’ lix komon: “Li profeet naxk’ut chiqu [li na’leb’ chirix li jalam-uuch].”

Hechos 3:1–10

Li qaChoxahil Yuwa’ naru narosob’tesiheb’ li komon wik’in laa’in.

K’a’ru naru nakab’aanu re xtenq’ankileb’ li kok’al chixk’eeb’al reetal chan ru naru neke’rosob’tesi xyu’ameb’ li wankeb’ sa’ xsutam? Tenq’aheb’ chi tzolok rik’in lix b’aanuhom laj Pedro ut laj Jwan naq ke’xk’irtesi jun li winq sik.

Kok’ k’anjel naru chi b’aanumank

• Kanab’eb’ li kok’al chireek’asinkileb’ rib’ jo’ chanru naxye li esil natawman sa’ Hechos 3:1–10, jo’ xteeb’al lix teleb’ re xk’ulb’al li tumin ut pisk’ok xb’aan sahileb’ xch’ool. Chan ru naq li qaChoxahil Yuwa’ kirosob’tesi li winq li ink’a’ naru chi b’eek?

• K’am jun li b’oolx rik’ineb’ li jalam-uuch li naxk’utb’esi chan ru naru naqosob’tesiheb’ ut nokok’anjelak chiruheb’ li komon. Kanab’eb’ li kok’al chixk’eeb’aleb’ xhoonal chirib’ileb’ rib’ chixsik’b’al ru jun jalam-uuch sa’ li b’oolx ut te’xwotz’ chan ru naru neke’rosob’tesi li ras riitz’in chi jo’kan.

• Kanab’eb’ li kok’al chi aatinak chirix junaq hoonal b’ar wi’ xe’xtenq’a junaq.

Hechos 5:1–11

Naru ninwan chi maak’a’ inb’alaq’.

Eb’ li xb’eenil aj Kristiano ke’xk’anjela li chaq’rab’ re q’axtesink re xtenq’ankileb’ li neb’a’. Li wankeb’ xch’och’ ke’xk’ayi ut ke’xk’e li tumin reheb’ li apostol re naq te’xjek’i reheb’ laj santil paab’anel a’ yaal li rajomeb’ ru. Laj Ananias ut xSafira ke’b’alaq’in chirix lix tenq’eb’, ke’xk’oxla naq te’ruuq chixb’alaq’inkileb’ lix moos li Qaawa’.

Kok’ k’anjel naru chi b’aanumank

• Tenq’aheb’ li kok’al chixk’utb’esinkil li esil chirix laj Ananias ut xSafira. Ch’olob’ naq us ta ink’a’ nokokam naq naqaye junaq li tik’ti’, li seraq’ a’in naxk’ut lix aajelil ru li wank chi maak’a’ li b’alaq’ choq’ re li qaChoxahil Yuwa’.

• B’ichahomaq sa’ komonil jun li b’ich li na’aatinak chirix li xmaak’a’il li b’alaq’, jo’ “Joʼ chʼina al li Jesus kiwan” (B’ichleb’aal choq’ reheb’ li Kok’al, 34). Tenq’aheb’ li kok’al chixtawb’al ru naq li wank chi maak’a’ b’alaq’ naraj naxye xyeeb’al junelik li yaal ut ink’a’ xchapb’al li k’a’ru re junaq chik.

• Oksiheb’ li kok’ muñeek yiib’anb’il rik’in hu re xk’utb’esinkil li hoonal b’ar wi’ junaq maak’a’ lix b’alaq’ malaj nab’alaq’in. Kanab’eb’ li kok’al chi xaqliik wi li kristiaan kiwan chi maak’a’ xb’alaq’, malaj te’chunlaaq sa’ li ch’och’ wi li kristiaan kib’alaq’in.

Xk’utb’al li tzol’leb’

Kok’al ak ninqeb’

Hechos 1:8, 22–26

Li Jesukristo naxb’eresi lix Iglees rik’ineb’ li profeet ut eb’ li apostol.

Eb’ li kok’al li nakatzoleb’ naru neke’xtaw ru naq lix Iglees li Kolonel sa’eb’ li kutan a’in b’eresinb’il xb’aaneb’ li profeet ut eb’ li apostol, jo’ sa’ li najter kutan.

Kok’ k’anjel naru chi b’aanumank

• Tz’iib’a sa’ li pizarron Chan ru naq li Jesukristo naxb’eresi lix Iglees naq maak’a’ sa’ li ruchich’och’? Kanab’eb’ li kok’al chixsik’b’al xsumenkil li patz’om a’an naq yookat chirilb’al ru li raatin li Kolonel choq’ reheb’ li apostol li natawman sa’ Hechos 1:8.

• Ilomaq ru sa’ komonil Hechos 1:22–26. Jo’ tzoleb’aal, aatinanqex chirix chan ru naq eb’ li apostol ke’xb’oq jun li ak’ apostol.

• Chi rub’elaj, kanab’ jun li ch’ina al ut lix na’ malaj lix yuwa’ naq te’ril ru jun esil chirix jun li apostol li toj ak’ xb’oqb’al (maare sa’ LDS.org). Kanab’ li ch’ina al chixwotzb’al sa’ li tzoleb’aal li k’a’ru xtzol chaq ut, wi naru, li k’a’ru kixye li apostol chirix lix b’oqb’al sa’ li xb’een raatin sa’ li jolomil ch’utub’aj-ib’.

Eb’ li apostol ke’xb’eresi li Iglees chirix naq li Kristo kitaqe’ sa’ choxa.

Hechos 3:1–10

Li qaChoxahil Yuwa’ narosob’tesiheb’ li was wiitz’in wik’in laa’in, us ta ink’a’ b’ihomin.

Chan ru naru nakak’ut chiruheb’ li kok’al naq naru neke’rosob’tesi li komon, us ta maak’a’eb’ “xplaat chi moko x’oor”? (Hechos 3:6). Chan ru naru nakatenq’aheb’ chirilb’al li hoonal wan reheb’ re k’anjelak chiru li Dios rik’in k’anjelak chiruheb’ li komon?

Kok’ k’anjel naru chi b’aanumank

• Kanab’ jun li ch’ina al naq taaril ru Hechos 3:1–10 ut eb’ lix komon li kok’al te’xk’utb’esi li esil. Wi nakawaj aatenq’, il ajwi’ ru “Ch’ol 56: Laj Pedro naxk’irtesi jun li winq,” Eb’ li Esilal sa’ li Ak’ Chaq’rab, 148–149, malaj li video sa’ LDS.org). Naru ajwi’ nakak’ut li video “Pedro y Juan sanan a un cojo de nacimiento” (LDS.org). Chan ru naq li osob’tesihom kixk’ul li winq a’an jwal nim wi’chik chiru li tumin li kixpatz’?

• Numsi jun li b’oolx sa’ xyanqeb’ li kok’al rik’ineb’ li kok’ tumin. Naq eb’ li kok’al te’xchap li b’oolx, patz’ reheb’ k’a’ raj ru naru neke’xloq’ rik’in li tumin. Chirix a’an xok li b’oolx chiruheb’ ut patz’ reheb’ k’a’ru li osob’tesihom ink’a’ naru chi loq’e’k. Kanab’eb’ chixwotzb’al chan ru naru neke’k’anjelak chiru anihaq chi ink’a’ te’roksi li tumin (Hechos 3:6).

Hechos 2:36–47

Li Santil Musiq’ej naxch’olob’ xyaalal sa’ li waam lix yaalil li evangelio.

Naq eb’ li kok’al te’xtzol xk’eeb’al reetal chan ru naq li Santil Musiq’ej na’aatinak rik’ineb’, te’musiq’aaq chirab’inkil ut k’anjelak jo’ chan ru li musiq’aak te’xk’ul.

Kok’ k’anjel naru chi b’aanumank

• Ilomaq ru sa’ komonil Hechos 2:36–37. K’a’ru na’eek’aman naq li Santil Musiq’ej na’aatinak sa’ li qaam?

• Jo’ tzoleb’aal, yiib’omaq jun li nimla jalam-uuch rik’ineb’ li aatin ¿K’a’ru taqab’aanu? chi tz’iib’anb’il chiru. K’ut li nimla jalam-uuch rajlal xamaan ut k’eheb’ xkomon li na’leb’ jo’ chanru naq eb’ li kok’al naru neke’k’anjelak jo’ chanru te’xtzol sa’ li tzolok rajlal xamaan.

• Kanab’eb’ li kok’al chixtawb’al sa’ Hechos 2:41–47 li k’a’ru chaab’il ke’xb’aanu li kristiaan chirix naq ke’kub’e xha’. K’a’ru li k’a’aq re ru chaab’il naru naqab’aanu re xk’utb’al naq naqab’antioxi li Santil Musiq’ej xqak’ul naq xkub’e qaha’?

Xb’oqb’aleb’ chi tzolok sa’ kab’l

Wakleshiheb’ xch’ool li kok’al chixk’uub’ankil ru chan ru naru neke’k’anjelak chiru li qaChoxahil Yuwa’ naq neke’xtenq’a junaq li komon sa’ lix junkab’aleb’ chiru li xamaan a’in.

Xchaab’ilob’resinkil li qak’utum

Kanab’ sa’ k’a’uxlej jun li raqal reheb’ li loq’laj hu. Sik’ ru junaq li raqal reheb’ li loq’laj hu li nakak’oxla naq naru chixtenq’ankileb’ li kok’al, jo’ li Hechos 2:38 malaj Hechos 3:19, ut tenq’aheb’ chixkanab’ankil sa’ xk’a’uxleb’ junaq li ch’ol aatin re li raqal a’an. Eb’ li k’anjeleb’aal, li reek’asinkileb’ li uq’ej, malaj li eek’asink-ib’ naru ajwi’ naxtenq’aheb’ li kok’al chixkanab’ankil sa’ xk’a’uxleb’ li raqal reheb’ li loq’laj hu.