15–21 julio

Hechos 10–15

“Li raatin li Dios yoo chi k’ihank ut chi pukank”

Re xtikib’ankil lix kawresinkil aawib’ re k’utuk, il ru Hechos 10–15. Kim, Taaqehin—Choq’ reheb’ li komon ut li junkab’al naru nakatxtenq’a chixtawb’aleb’ ru li ch’ol a’an, ut li tusleb’ aatin a’in naru naxk’e aana’leb’ re li k’utuk.

Xtz’iib’ankil li nakak’oxla

Xkanab’ankileb’ chi wotzok

Re xtenq’ankileb’ li kok’al chixwotzb’al li yookeb’ chixtzolb’al ut chixnumsinkil, naru taapatz’ reheb’ naq te’xwotz li k’a’ru yookeb’ chixb’aanunkil re xk’utb’al naq neke’xpaab’ li Jesukristo.

Xk’utb’al li tzol’leb’

Kok’al toj ka’ch’ineb’ xyu’am

Hechos 10:34–35

Li qaChoxahil Yuwa’ naxraheb’ chixjunil li ralal xk’ajol.

Jun li tzol’leb’ jwal aajel ru li naru ajwi’ neke’xtaw ru li kok’al toj ka’ch’ineb’ xyu’am a’an naq chixjunileb’ a’aneb’ ralal xk’ajol li Dios ut naq a’an naxraheb’ chixjunil li ralal xk’ajol.

Kok’ k’anjel naru chi b’aanumank

• Naq yookat chirilb’al ru Hechos 10:34–35, k’ut li jalam-uuch Cristo y los niños de todo el mundo (Libro de obras de arte del Evangelio, ajl 116). Ch’olob’ naq sa’ lix kutankil laj Pedro junjunqeb’ li kristiaan ke’xk’oxla naq li Dios ka’ajwi’ naxraheb’ junjunq ch’uut li kristiaan, a’b’an laj Pedro kixtzol naq li Dios naxraheb’ chixjunileb’ li ralal xk’ajol ut naraj naq chixjunileb’ te’xtzol li evangelio.

• Kanab’eb’ li kok’al chixyiib’ankil jun xjalam-uucheb’ ajwi’ a’an. Ch’olob’ xyaalal naq li qaChoxahil Yuwa’ naxraheb’ chi junjunq a’an ut chixjunileb’ li ralal xk’ajol, maak’a’ na’ajman re chan ru rilob’aaleb’ malaj b’ar neke’chal chaq.

• B’icha rik’ineb’ li kok’al jun li b’ich li na’aatinak chirix xraab’aleb’ li qas qiitz’in, jo’ li “Aawik’in tinb’eeq laa’in” (B’ichleb’aal choq’ reheb’ li Kok’al, 78–79). Kanab’eb’ li kok’al chixyeeb’al chan ru naq naru neke’xk’ut xrahom chiruheb’ chixjunil, choq’ reheb’ ajwi’ li ani jalaneb’ chiruheb’ a’an, jo’ kixb’aanu li Jesus.

• Chi rub’elaj, patz’ reheb’ lix na’ xyuwa’ li junjunq chi kok’al naq te’xwotz aawik’in junjunq lix chaab’ilaleb’ lix kok’al. Wotz lix sumehomeb’ sa’ li tzoleb’aal ut ch’olob’ xyaalal naq li qaChoxahil Yuwa’ naxraheb’ li junjunq chi kok’al.

• K’uteb’ li junjunq chi kok’al, chi junjunqal, ut ye, “Li qaChoxahil Yuwa’ naxra [k’ab’a’ej].” Kanab’eb’ li kok’al chixk’eeb’al xhoonaleb’ chirib’ileb’ rib’ chixk’utb’aleb’ rib’ chi junjunqal ut chixyeeb’al li ch’ol aatin a’in.

Hechos 11:26

Laa’in aj Kristiano xb’aan naq ninpaab’ li Jesukristo ut nintaaqe.

Eb’ li kok’al li nakatzoleb’ maare neke’xnaw naq eb’ li komon re li Iglees neke’k’ab’a’iik aj Mormon xb’aan naq naqapaab’ lix Hu laj Mormon, a’b’an ma neke’xnaw naq laa’o ajwi’ aj Kristiano xb’aan naq naqapaab’ li Jesukristo?

Kok’ k’anjel naru chi b’aanumank

• Il ru Hechos 11:26 choq’ reheb’ li kok’al. Ch’olob’ naq li ani naxpaab’ li Jesukristo ut naxtaaqe nak’ab’a’iik aj Kristiano, xb’aan a’an naq laa’o ajwi’ aj Kristiano.

• B’icha rik’ineb’ li kok’al “Lix Iglees li Jesukristo” (B’ichleb’aal choq’ reheb’ li Kok’al, 48). Chan ru tento toowanq naq wanko sa’ li Iglees, sa’ li tzoleb’aal, ut sa’ ochoch xb’aan naq laa’o aj taaqenel re li Jesukristo ut laa’o komon re lix Iglees?

• Kanab’eb’ li kok’al chixb’onb’al li reetalil li perel re kok’ k’anjel re li xamaan a’in ut te’xk’e chiru lix t’ikr re te’xk’am sa’ rochocheb’.

Hechos 12:1–17

Li qaChoxahil Yuwa’ narab’i ut naxsumeheb’ li tij.

Li seraq’ chirix li anjel li ki’ach’ab’an re laj Pedro sa’ li tz’alam naxk’ut chi nim xwankil naq li qaChoxahil Yuwa’ naxsumeheb’ li tij.

Kok’ k’anjel naru chi b’aanumank

• Naq yookat chixyeeb’al chi k’osb’il ru li esil, kanab’eb’ li kok’al chixk’utb’esinkil li seraq’ li natawman sa’ Hechos 12:1–17 chirix naq laj Pedro ki’ach’ab’aak chiru li tz’alam. Chan ru naq li qaChoxahil Yuwa’ kixsume lix tijeb’ li ani yookeb’ chi tijok chirix laj Pedro?

• B’ichahomaq jun li b’ich chirix li tijok, jo’ “Ninmutz’ li wu” (B’ichleb’aal choq’ reheb’ li Kok’al, 18), ), ut yoob’eb’ eekasink-ib’ re xtenq’ankileb’ li kok’al chixtzolb’al chan ru li tijok. Kanab’eb’ li kok’al chixwotzb’aleb’ reetalil li k’a’ru neke’ru wi’ chi b’antioxink chiru li qaChoxahil Yuwa’ ut li k’a’ru naru neke’xpatz’ sa’ tij.

• K’uteb’ xjalam-uuch kristiaan yookeb’ chi tijok (chi’ilmanq, qayehaq, Libro de obras de arte del Evangelio, ajl 111 ut 112) naq yooqat chixwotzb’al resil jun aanumsihom b’ar wi’ li qaChoxahil Yuwa’ kixsumeheb’ laa tij.

  

  Li qaChoxahil Yuwa’ nokoxra ut tixsumeheb’ li qatij.

Xk’utb’al li tzol’leb’

Kok’al ak ninqeb’

Hechos 10:34–35; 15:6–11

“Li Dios juntaq’eet narileb’ chixjunil.”

Aajel ru naq eb’ li kok’al li nakatzoleb’ te’xtaw ru naq li qaChoxahil Yuwa’ naxraheb’ chixjunil li ralal xk’ajol, maak’a’ naxye chan ru rilb’aleb’, b’ar neke’chal, malaj k’a’ru li neke’xsik’ ru.

Kok’ k’anjel naru chi b’aanumank

• Patz’ reheb’ li kok’al ma naru neke’xnaw chan ru junaq li kristiaan ka’ajwi’ rik’in rilb’al ru malaj xnawb’al b’ar nachal chaq. Jo’ naxye Hechos 10:35, k’a’ru tento tixb’aanu junaq re naq “sa taak’ule’q” xb’aan li Dios?

• Il ru Hechos 10:34–35; 15:6–11 rik’ineb’ li kok’al. Ch’olob’ naq sa’ lix kutankil laj Pedro eb’ laj Judio neke’xk’oxla naq li Dios moko naxk’ulub’eb’ ta li kristiaan li moko aj Judio ta (eb’ li kristiaan a’an neke’k’ab’a’iik aj Gentil). A’b’an li Dios kixk’ut chiru laj Pedro naq li Dios naxraheb’ chixjunil li ralal xk’ajol, laj Judio jo’ ajwi’ laj Gentil. B’ichahomaq sa’ komonil “Laa’in jun li ralal li Dios” (B’ichleb’aal choq’ reheb’ li Kok’al, 2–3). Kanab’eb’ li kok’al chixjalb’al rik’in lix k’ab’a’eb’ li aatin laa’in malaj wik’in.

• Patz’ reheb’ li kok’al naq te’xye k’a’ru nawulak chiruheb’ chirix junaq chik li komon sa’ tzoleb’aal. Ch’olob’ naq li ch’ol aatin “Li Dios juntaq’eet narileb’ chixjunil” naraj naxye naq li Dios naxraheb’ chixjunil li ralal xk’ajol, ut xb’aan naq naxraheb’, naraj naq chixjunileb’ li ralal xk’ajol te’rab’i li evangelio.

Hechos 11:26

Jun aj Kristiano a’an li napaab’ank re li Jesukristo ut naxtaaqe.

Chan ru naru nakatenq’aheb’ li kok’al chixtawb’al ru naq li raatineb’ ut lix b’aanuhomeb’ naxk’utb’esi naq a’aneb’ aj Kristiano?

Kok’ k’anjel naru chi b’aanumank

• Kanab’eb’ li kok’al chirilb’al ru Hechos 11:26; 3 Nefi 27:3–8; ut Tzol’leb’ ut Sumwank 115:4. Tz’iib’a Kristiano sa’ li pizarron ut juch’ rub’el b’ar wi’ naxye “Krist.” Patz’ reheb’ li kok’al k’a’ru naraj naxye li wank jo’ aj Kristiano naq neke’xk’oxla.

• Patz’ reheb’ li kok’al naq te’xye k’a’ruhatq li ch’uut li wankeb’ wi’, jo’ lix junkab’aleb’ malaj li Tzoleb’aal reheb’ li Kok’al. Kanab’eb’ chixwotzb’al k’a’ut naq neke’xb’antioxi naq a’aneb’ aj Kristiano ut naq a’aneb’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Chan ru naru naqak’ut chiruheb’ li qas qiitz’in naq laa’o aj Kristiano?

• K’uteb’ k’iila k’a’aq re ru malaj jalam-uuch li te’xk’utb’esi li yaal ka’ajwi’ natawman sa’ lix Iglees li Jesukristo, jo’ jun li jalam-uuch re osob’tesink rik’in li tijonelil. Patz’ re jun li ch’ina al naq tixsik’ ru jun reheb’ li k’a’aq re ru malaj li jalam-uuch ut tixch’olob’ chan ru naq a’an jun li osob’tesihom sa’ li qaIglees. Ch’olob’ naq us ta eb’ laj Kristiano sa’ chixjunil li ruchich’och wankeb’ sa’ jalan jalanq iglees, laa’o wanko sa’ li Iglees kixxaqab’ li Jesukristo sa’ xb’een li ruchich’och’.

• K’ut li video “El cristianismo verdadero” (LDS.org). Kanab’eb’ li kok’al chixyiib’ankileb’ sa’ jalam-uuch li naru neke’xb’aanu re wank jo’ tz’aqal aj Kristiano.

Hechos 12:1–17

Naq nintijok rik’in paab’aal, li qaChoxahil Yuwa’ taasumenq.

K’oxlaheb’ sa’ aach’ool li hoonal naq li qaChoxahil Yuwa’ xsumehomeb’ laa tij. Chan ru naru nakawoksiheb’ li numsihom a’an re xk’utb’al chiruheb’ li kok’al naq li qaChoxahil Yuwa’ taarab’i ut tixsumeheb’ lix tij jo’ chanru naraj a’an ut sa’ lix hoonal a’an?

Kok’ k’anjel naru chi b’aanumank

• Naq yooqat chixyeeb’al li seraq’ rik’in laa waatin, kanab’eb’ li kok’al chixk’utb’esinkil li seraq’ natawman sa’ Hechos 12:1–17 naq li anjel kirach’ab’ laj Pedro sa’ li tz’alam.

• Patz’ reheb’ li kok’al k’a’ru naraj naxye “ink’a’ neke’xkanab’ tijok chirix” (Hechos 12:5) naq neke’xk’oxla. Chan ru ke’sumeek lix tijeb’ li kristiaan? Kanab’eb’ li kok’al chixwotzb’aleb’ li numsihom b’ar wi’ li qaChoxahil Yuwa’ kixsume junaq li tij sa’ junesal malaj jo’ junkab’al. Laa’at ajwi’ naru nakawotz aanumsihom b’ar wi’ a’an kixsume laa tij chi moko jo’ ta li xawoyb’eni malaj xawaj laa’at. Ch’olob’ xyaalal naq li Dios nokoxra ut naq tixsumeheb’ li qatij jo’ chanru ut sa’ li hoonal jwal chaab’il choq’ qe.

Xb’oqb’aleb’ chi tzolok sa’ kab’l

K’e reheb’ li kok’al jun li jalam-uuch malaj junaq chik k’a’aq re ru li naru neke’xk’am sa’ rochocheb’ jo’ xjultikankil reheb’ li komon sa’ lix junkab’aleb’ li tijok sa’ komonil.

Xchaab’ilob’resinkil li qak’utum

Ch’olob’ xyaalaleb’ li osob’tesihom yeechi’inb’il. Naq nakab’oqeb’ li kok’al re li Tzoleb’aal reheb’ li Kok’al chixyu’aminkil junaq na’leb’, wotz li yeechi’ihom li naxk’e li Dios reheb’ li neke’xyu’ami li na’leb’ a’an. Qayehaq, naru taach’olob’ xyaalaleb’ li osob’tesihom yeechi’inb’ileb’ li ak aak’ulum laa’at naq nakasik’ xsumenkileb’ laa patz’om rik’in li tijok.