laj Pablo sa’ li Areopago

22–28 julio

Hechos 16–21

“Li Dios xb’oqok qe chixpuktesinkil li evangelio”

Chirix naq nakawil ru Hechos 16–21, k’e reetal chan ru naq lix musiq’ahom li Musiq’ej ut eb’ li na’leb’ wankeb’ sa’ li tusleb’ aatin a’in naru nakate’xtenq’a chixkawresinkil aawib’ re li k’utuk. Wi nakawaj xkomon aatenq’ankil, sik’ sa’ “Xb’aanunkil li nak’anjelak choq’ reheb’ li kok’al li toj ka’ch’ineb’ xyu’am” sa’ li hu a’in.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixyeeb’al chan ru naq laj Pablo chanchaneb’ li misioneer sa’eb’ li kutan a’in. Patz’, “Ma eewotzom jun sutaq li evangelio rik’in anihaq?”

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

Hechos 16:25–34

Eb’ li misioneer neke’k’utuk chiruheb’ li kristiaan chirix li Jesus.

Ma neke’xnaw li kok’al li nakatzoleb’ k’a’ru neke’xb’aanu li misioneer? Chan ru naru nakatenq’aheb’ li kok’al chixtawb’al ru naq naru neke’xwotz li evangelio rik’ineb’ li ras riitz’in?

Kok’ k’anjel naru chi b’aanumank

• Tenq’aheb’ li kok’al chixk’utb’esinkil Hechos 16:25–34 naq yookat chixyeeb’al chi k’osb’il ru li seraq’ naq laj Pablo ut laj Silas ke’xwotz li evangelio sa’ li tz’alam (chi’ilmanq ajwi’ “Ch’ol 61: Laj Pablo ut laj Silas sa’ tz’alam,” Eb’ li Esilal sa’ li Ak’ Chaq’rab’, 158–160, malaj li video sa’ LDS.org). Ch’olob’ naq eb’ li misioneer sa’eb’ li kutan a’in neke’k’utuk ajwi’ chiruheb’ li kristiaan chirix li Jesus ut neke’tenq’an chixkawresinkileb’ chi kub’eek xha’eb’.

• Yiib’ li kok’ placa reheb’ li misioneer re naq te’roksi li kok’al, ut tenq’aheb’ chixtz’iib’ankileb’ lix k’ab’a’ chiru li placa. K’ut chiruheb’ li kok’al kok’ ch’ol aatin re li tzol’leb’ li naru neke’xwotz rik’ineb’ li ras riitz’in, jo’eb’ “li Dios a’an li qaChoxahil Yuwa’ aj Rahonel,” “li Dios na’aatinak rik’in jun li yo’yookil profeet,” malaj “li Jesukristo a’an li qaKolonel.”

• Kanab’eb’ li kok’al chi aatinak chirix anihaq li neke’xnaw ru li wan chaq sa’ xmision. Naru neke’xyiib’ junaq jalam-uuch malaj neke’xtz’iib’a junaq ch’ina hu choq’ re jun li misioneer.

Hechos 17:10–12

Eb’ li loq’laj hu neke’xch’olob’ xyaalal li qaChoxahil Yuwa’ ut li Jesukristo.

Us ta wankeb’ li kok’al li nakatzoleb’ toj maji’ neke’xnaw ilok ru hu, naru nakatenq’aheb’ chixraab’aleb’ li loq’laj hu ut chirilb’al chan ru naq neke’xch’olob’ xyaalal li Kolonel.

Kok’ k’anjel naru chi b’aanumank

• K’eheb’ naab’al li loq’laj hu sa’ li tzoleb’aal ut kanab’eb’ li kok’al chixsik’b’al. Tenq’a jun reheb’ li kok’al chirilb’al ru li ch’ol aatin “Yookeb’ chixtz’ilinkil xsa’ li loq’laj hu rajlal kutan” (Hechos 17:11). Kanab’eb’ li kok’al chixk’eeb’aleb’ reetalil li junjunq chi kutan sa’ jun tusleb’ kutan naq yooqeb’ chixka’sutinkil li ch’ol aatin aawik’in.

• Re xk’utb’al chiruheb’ li kok’al naq eb’ li loq’laj hu neke’xch’olob’ xyaalal li qaChoxahil Yuwa’ ut li Jesukristo, tenq’aheb’ chixsik’b’al junjunqeb’ li ch’ol sa’eb’ li loq’laj hu, jo’ Hechos 17 malaj 18, ut chixtawb’aleb’ li aatin Dios malaj Qaawa’ li neke’tawman aran. Wi nakawaj, naru taab’oneb’ li aatin a’an re naq eb’ li kok’al te’xtaw sa’ junpaat. Rajlal naq te’xtaw jun reheb’ li aatin a’an, kanab’eb’ chixwotzb’al k’a’ru neke’xnaw chirix li qaChoxahil Yuwa’ ut li Jesukristo.

Hechos 17:22–31

Laa’in jun ralal li Dios.

Sa’ li Areopago, laj Pablo kixk’uteb’ li yaal chirix chan ru li Dios, kixk’ut ajwi’ li yaal naq laa’o ralal xk’ajol ut naq a’an “moko najt ta wan qik’in chiqajunjunqal” (Hechos 17:27). Chan ru naru nakatenq’aheb’ li kok’al chireek’ankil naq nach’ wankeb’ rik’in lix Choxahil Yuwa’?

Kok’ k’anjel naru chi b’aanumank

• Kanab’eb’ li kok’al chixka’sutinkil li ch’ol aatin “Laa’o elenaqo chaq rik’in li Dios” (Hechos 17:29), ut ch’olob’ naq elk chaq rik’in li Dios naraj naxye naq laa’o li ralal xk’ajol. Ch’olob’ xyaalal reheb’ li junjunq chi kok’al, chi junjunqal, naq a’an ralal xk’ajol li Dios. Patz’ reheb’ k’a’ru neke’reek’a naq neke’rab’i naq a’aneb’ ralal xk’ajol li Dios. Kanab’eb’ chixwotzb’al li neke’reek’a choq’ re li qaChoxahil Yuwa’.

• K’ut xjalam-uucheb’ kok’al rik’ineb’ lix junkab’al (wi naru, oksi xjalam-uucheb’ li kok’al re laa tzoleb’aal). Ch’olob’ naq laa’o ralal xk’ajoleb’ li qana’ ut eb’ li qayuwa’, ut naq chiqajunilo ralalo xk’ajoleb’ li qachoxahil na’ qayuwa’ ut naq yo’ob’tesinb’ilo sa’ musiq’ej.

• B’ichahomaq jun li b’ich li na’aatinak chirix li qaChoxahil Yuwa’, jo’ “Yo’yo lin Dios, ninnaw” (B’ichleb’aal choq’ reheb’ li Kok’al, 5). Rik’in xtenq’eb’ li kok’al, tz’iib’aheb’ aatin malaj yiib’eb’ jalam-uuch sa’ li pizarron li tixk’utb’esiheb’ li k’a’aq re ru li naqatzol chirix li qaChoxahil Yuwa’ sa’ li b’ich.

• Il ru choq’ reheb’ li kok’al eb’ li aatin wankeb’ sa’ Hechos 17:27: “A’an moko najt ta wan qik’in chiqajunjunqal.” Aatinan chirixeb’ hoonal naq xaweek’a naq nach’ wankat rik’in li qaChoxahil Yuwa’, ut kanab’eb’ li kok’al chixb’aanunkil ajwi’ a’an.

winq rik’in jun ch’ina xqa’al sa’ ruq’

Chixjunil li kristiaan a’an ralal xk’ajol li Dios.

reetalil li k’utuk

Xk’utb’al li tzol’leb’

Kok’al ak ninqeb’

Hechos 16:14–15, 25–34; 18:7–8, 24–28

Naru ninwan anajwan jo’ jun misioneer.

Chan ru naru nakatenq’aheb’ li kok’al chi wank jo’ laj Pablo ut chixwotzb’al rik’ineb’ li ras riitz’in li k’a’ru yookeb’ chixtzolb’al chirix li evangelio?

Kok’ k’anjel naru chi b’aanumank

• Kanab’eb’ li kok’al chirilb’al ru Hechos 16:14–15, 25–34; 18:7–8, 24–28 ut chixyiib’ankil jun xtusulaleb’ li kristiaan li ke’tzole’ xb’aan laj Pablo ut laj Apolos chirix li evangelio. Chirix a’an kanab’eb’ chixyiib’ankil jun xtusulaleb’ li kristiaan li naru neke’xwotz wi’ li evangelio. Kanab’eb’ li kok’al chixk’utb’esinkil chan ru naru neke’aatinak rik’ineb’ li kristiaan a’an chirix li Jesukristo malaj xb’oqb’aleb’ chi xik sa’ li iglees. Naru ajwi’ nakakanab’eb’ li kok’al chixtz’iib’ankil kok’ hu b’ar wi’ te’xch’olob’ xyaalal chiruheb’ li kristiaan a’an jun yaalil na’leb’ sa’ li evangelio.

• B’oqeb’ li misioneer li yookeb’ chi k’anjelak sa’eb’ li kutan a’in, li ak xe’q’aj chaq sa’ lix mision, malaj eb’ li misioneer re li teep naq te’wulaq sa’ li tzoleb’aal ut te’aatinaq chirix lix numsihomeb’ naq neke’xwotz li evangelio. Waklesiheb’ xch’ool li kok’al chixpatz’b’al reheb’ chan ru naru neke’xwotz li evangelio rik’ineb’ li ras riitz’in.

Hechos 17:2–4, 10–12; 18:28

Eb’ li loq’laj hu neke’xch’olob’ xyaalal li Jesukristo.

Chixjunileb’ li profeet neke’xch’olob’ xyaalal li Jesukristo. Chan ru naru nakak’ut chiruheb’ li kok’al chixtawb’al resil a’an sa’eb’ li loq’laj hu, us ta ink’a’ naxye lix k’ab’a’ li Jesukristo?

Kok’ k’anjel naru chi b’aanumank

• Patz’ reheb’ li kok’al naq te’ril ru Hechos 17:2–4, 10–12; 18:28, ut kanab’eb’ chixsik’b’al chan ru naq juntaq’eeteb’ li raqal a’an. Jo’ neke’xye li raqal a’an, k’a’ru kitenq’an reheb’ li kristiaan chixpaab’ankil lix evangelio li Jesukristo?

• Kanab’eb’ li kok’al chixwotzb’aleb’ li esilal chirix li Jesus li jwal nawulak chiruheb’ ut xe’xtzol chaq sa’eb’ li loq’laj hu chiru li chihab’ a’in. Chiru kok’ setb’il hu, tz’iib’aheb’ li junjunq raqal reheb’ li loq’laj hu li neke’k’utuk chirix li Kolonel, ut muqeb’ sa’ li tzoleb’aal. Chirix a’an kanab’eb’ li kok’al chixtawb’aleb’. Tenq’aheb’ li kok’al chixsik’b’aleb’ li raqal li te’xtaw sa’ li ch’ina hu ut patz’ reheb’ naq te’xwotz chirib’ileb’ rib’ li k’a’ru naxk’ut li junjunq chi raqal chirix li Jesus.

• Patz’ reheb’ li kok’al naq tate’xtenq’a chixyiib’ankil junjunq li kok’ kaaxukuut li naru te’xjuch’ naq ak xe’ril malaj xe’xtzol chirix li Jesus sa’eb’ li loq’laj hu. Kanab’ chi kutankil chiru chixjunil li chihab’ ut tenq’aheb’ li kok’al chixtawb’aleb’ na’ajej sa’eb’ li loq’laj hu li neke’k’utuk chirix li Jesus.

Hechos 17:22–31

Laa’in jun ralal li Dios.

Chan ru naru nakatenq’aheb’ li kok’al chixjultikankil naq a’aneb’ ralal xk’ajol li Dios?

Kok’ k’anjel naru chi b’aanumank

• K’ut chiruheb’ li kok’al jun li pek ut ch’olob’ naq sa’ lix kutankil laj Pablo, eb’ li kristiaan neke’xloq’oni li pech’b’il dios li yiib’anb’ileb’ rik’in pek malaj jalan chik k’a’aq re ru. Patz’ reheb’ li kok’al naq te’ril ru Hechos 17:27–29. K’a’ru naqatzol chirix li Dios sa’eb’ li raqal a’an? Ch’olob’ naq li elk chaq rik’in li Dios naraj naxye naq laa’o ralal xk’ajol. Patz’ reheb’ li kok’al k’a’ru neke’reek’a naq neke’rab’i naq a’aneb’ ralal xk’ajol li Dios.

• Patz’ reheb’ li kok’al naq te’ril ru Hechos 17:27. Kanab’eb’ chixyiib’ankileb’ sa’ jalam-uuch chan ru naru “te’xtaw chi maayunb’il” li Dios. Jo’q’e reek’ahomeb’ naq “moko najt ta wan rik’ineb’ a’an”?

reetalil li tzolok

Xb’oqb’aleb’ chi tzolok sa’ kab’l

Waklesiheb’ xch’ool li kok’al chixsik’b’al jun li raqal sa’eb’ li loq’laj hu chiru li xamaan a’in li nak’utuk chirix li Jesukristo (naru neke’xb’aanu a’an naq neke’xtzoleb’ xjuneseb’ li loq’laj hu malaj naq neke’xtzoleb’ li loq’laj hu jo’ junkab’al). Sa’ li xamaan chal re, kanab’eb’ chixwotz’b’al li k’a’ru xe’xtaw.

Xchaab’ilob’resinkil li qak’utum

Tenq’aheb’ li kok’al chi tz’olok chi chaab’il. Li ajom naq nakatzoleb’ li kok’al moko ka’ajwi’ ta xk’utb’al li yaal chiruheb’. Tento taatenq’aheb’ ajwi’ chi wulak chi wank jo’ tz’aqal chaab’il kristiaan li neke’xsik’ li yaal xjuneseb’ rib’. Qayehaq, sa’ xna’aj naq ka’ajwi’ taaseraq’i reheb’ li kok’al li resilal laj Pablo naq kijultikan aatin sa’ li Areopago, naru taak’uub’eb’ li kok’ k’anjel, jo’ li yeeb’ileb’ sa’ li tusleb’ aatin a’in, li natenq’an reheb’ chixtawb’aleb’ li yaal xjuneseb’ rib’ sa’eb’ li esil.

perel re kok’ k’anjel: Laa’in jun ralal li Dios