Jo’kan choowanq laa’o, xb’aan laj Sam Lawlor

8–14 julio

Hechos 6–9

“K’a’ru taawaj tinb’aanu?”

Re xtikib’ankil, il ru Hechos 6–9. Li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naru nakatxtenq’a chixtawb’aleb’ ru li ch’ol a’an. Li kok’ k’anjel choq’ reheb’ li kok’al toj ka’ch’ineb’ xyu’am sa’ li tusleb’ aatin a’in naru neke’oksiman choq’ reheb’ li kok’al ak ninqeb’ ut sa’ ka’pak’alil.

Xtz’iib’ankil li nakak’oxla

Xkanab’ankileb’ chi wotzok

Tz’iib’a sa’ li pizarron junjunq reheb’ xk’ab’a’ li kristiaan wan sa’ Hechos 6–9—maare laj Sawlo malaj laj Esteban. Kanab’eb’ li kok’al chixwotzb’al li k’a’ru neke’xnaw chirix jun reheb’ li kristiaan a’an.

Xk’utb’al li tzol’leb’

Kok’al toj ka’ch’ineb’ xyu’am

Hechos 6–7

Naru tintaaqe li Jesukristo naq ninkol rix li us.

K’a’ru naru neke’xtzol li kok’al rik’in laj Esteban chirix li wank jo’ aj taaqenel re li Jesukristo?

Kok’ k’anjel naru chi b’aanumank

• Tenq’aheb’ li kok’al chixyoob’ankileb’ eek’asink-ib’ li tixk’ul rib’ rik’in junaq li b’ich na’aatinak chirix xsik’b’al ru li k’a’ru us, jo’ li “Saqaq aawu” (B’ichleb’aal choq’ reheb’ li Kok’al, 81). Oksi Hechos 7:51–60 re aatinak rik’ineb’ li kok’al chirix chan ru naq laj Esteban kik’utuk chirix li Jesukristo us ta rik’in xb’aanunkil a’an eb’ lix jolomileb’ laj Judio ke’josq’o’ chi us (chi’ilmanq ajwi’ “Ch’ol 57: Eb’ li winq aj maak neke’xkamsi laj Esteban,” Eb’ li Esilal sa’ li Ak’ Chaq’rab’, 150–151, malaj li video sa’ LDS.org). Chan ru naq laj Esteban kixkol rix li us?

• K’e reheb’ li kok’al k’iila eetalil reheb’ kok’al li tento te’xsik’ ru junaq lix b’eheb’ sa’ xyanq li us ut li ink’a’ us. Patz’ reheb’ li kok’al k’a’ raj ru te’xb’aanu re xkolb’al rix li us.

Hechos 8:26–39

Li Santil Musiq’ej nikinixmusiq’a chixwotzb’al li evangelio rik’ineb’ li kristiaan.

Laj Felipe kixtaaqe lix musiq’ahom li Musiq’ej ut kixtenq’a jun li winq aj Etiopa li jwal ch’a’aj chiru xtawb’aleb’ ru li loq’laj hu. K’a’ru li k’utum wan sa’ li seraq’ a’an choq’ reheb’ li kok’al li nakatzoleb’?

Laj Felipe naxtzol laj Etiopa , xb’aan laj Robert T. Barrett

Kok’ k’anjel naru chi b’aanumank

• Ch’utub’ ru wiib’ li chunleb’aal re xyiib’ankil jun li utz’u’ujinb’il b’eleb’aal. Kanab’eb’ li kok’al chi chunlaak sa’ li utz’u’ujinb’il b’eleb’aal jun re tixk’e ruuchil laj Felipe ut li jun chik li winq aj Etiopia. Chirix a’an, ye li seraq’ chan ru naq laj Felipe kixk’ut li evangelio chiru li winq aj Etiopia.

• Ma aaweek’ahom jun sutaq li Santil Musiq’ej chixyeeb’al aawe naq taawotz li evangelio rik’in anihaq, jo’ ajwi’ lix numsihom laj Felipe nayeeman sa’ Hechos 8:29? Wotz laa numsihom laa’at rik’ineb’ li kok’al.

Hechos 9:1–20

Naq ninsach, li qaChoxahil Yuwa’ nikinixb’oq chixjalb’al ink’a’uxl ut chi jalaak.

Naq li Jesus kixye re laj Sawlo naq tixkanab’ xtaaqenkil lix Iglees li Qaawa’, laj Sawlo sa’ junpaat kixjal xk’a’uxl ut kijala. Chan ru naq li seraq’ a’an naru chixtenq’ankileb’ li kok’al li nakatzoleb’ chirajb’al li jalaak sa’ junpaat naq neke’sach?

Kok’ k’anjel naru chi b’aanumank

• K’os ru li resilal lix jalajik xch’ool laj Sawlo, li natawman sa’ Hechos 9:1–20 (chi’ilmanq ajwi’ “Ch’ol 59: Laj Sawlo natzolok chirix li Jesus,” Eb’ li Esilal sa’ li Ak’ Chaq’rab’, 154–155, malaj li video sa’ LDS.org).

• K’ameb’ li jalam-uuch malaj yiib’ jun xtusulal k’a’aq re ru li najala, jo’ jun li muluq’ut, li nawulak jo’ amoch, malej eb’ li che’ chiruheb’ lix jalajik jalan jalanq. Chan ru kijala laj Sawlo naq ki’ula’aniik xb’aan li Jesukristo?

• Yiib’ xjalam-uuch jun li b’e wiib’ ru chiru li pizarron. Kanab’eb’ li kok’al chixyeeb’al xk’ab’a’eb’ li na’ajej neke’raj xnawb’al ut tz’iib’aheb’ sa’ xb’een lix jalam-uucheb’ li b’e. K’a’ raj ru taak’ulmanq wi naqataaqe li b’e ink’a’ us? Chan ru naq li jalb’a-k’a’uxlej chanchan chik li q’ajk sa’ li chaab’il b’e?

• Ye reheb’ li kok’al naq te’xka’suti li k’a’ru kixye laj Sawlo re li Qaawa’: “K’a’ru taawaj tinb’aanu?” K’a’ru naraj li Qaawa’ naq taqab’aanu?

Xk’utb’al li tzol’leb’

Kok’al ak ninqeb’

Hechos 6–7

Laa’aqin aj yehol esil chirix li Jesukristo.

Chan ru naru nakatenq’aheb’ li kok’al li nakatzoleb’ chi tzolok chirix lix b’aanuhom laj Esteban naq kiwan jo’ aj yehol esil chirix li Jesukristo?

Kok’ k’anjel naru chi b’aanumank

• Il ru rik’ineb’ li kok’al Hechos 6:5–15 ut 7:51–60. Chan ru naq laj Esteban kiwan jo’ aj yehol esil chirix li Jesukristo? Kanab’ jun malaj wiib’ oxib’eb’ li kok’al chixk’oxlankil naq a’aneb’ laj Esteban ut chixwotzb’al li neke’xpaab’ ut k’a’ut naq neke’xpaab’ a’an.

• Kanab’eb’ li kok’al chixk’eeb’aleb’ xhoonal chirib’ileb’ rib’ chirilb’al ru Hechos 6:3–10, ut chixsik’b’al xchaab’ilal laj Esteban li ke’tenq’an re chi k’anjelak.

• Patz’ reheb’ li kok’al naq tate’xtenq’a chixk’oxlankileb’ li hoonal b’ar wi’ neke’ru chi wank jo’ aj yehol esil chirix li Jesukristo ut lix evangelio. Tenq’aheb’ chixk’utb’esinkil junjunq reheb’ a’an. Patz’ reheb’ li kok’al naq te’ril ru Mosiah 18:9. Jultika naq li wank jo’ aj yehol esil chirix li Jesukristo, a’an jun li qayeechi’ihom naq nakub’e qaha’.

• Tz’iib’a sa’ li pizarron eb’ li k’ab’a’ej Esteban ut Felipe. Rub’el li k’ab’a’ej Esteban, tz’iib’a chan ru naru nokowan jo’ jun eetalil choq’ reheb’ li qas qiitz’in. Rub’el li k’ab’a’ej Felipe, tz’iib’a chan ru naru naqawotz li evangelio rik’ineb’ li qas qiitz’in. Chan ru naq li wank jo’ jun eetalil jo’ xmoos li Jesukristo nokoxtenq’a chixwotzb’al li evangelio?

Hechos 8:5–24

Li tijonelil a’an jun xmaatan li Dios moko naru ta chi ajlaak xtz’aq.

Laj tza naxpuktesi naq li k’a’aq re ru re ruchich’och’ neke’xk’e xsahil qach’ool. Chan ru naq li roksinkil li resilal laj Simon naru naxtenq’aheb’ li kok’al chiroxloq’inkil li k’a’ru re li musiq’ej, jo’ li tijonelil ut li rosob’tesihom?

Kok’ k’anjel naru chi b’aanumank

• K’os ru li esil chirix laj Simon, li natawman sa’ Hechos 8:5–24 (chi’ilmanq ajwi’ “Ch’ol 58: Laj Simon ut li tijonelil,” Eb’ li Esilal sa’ li Ak’ Chaq’rab’, 152–153, malaj li video sa’ LDS.org). K’a’ut naq ink’a’ nokoru chixk’ulb’al li tijonelil rik’in li tumin? Chan tz’aqal ru naq jun li winq naxk’ul li tijonelil? (chi’ilmanq Eb’ lix Raqalil li Paab’aal 1:5).

• K’e reheb’ li kok’al jun b’atz’uul tumin ut k’uteb’ xjalam-uuch li k’a’aq re ru li naru naloq’e’ rik’in tumin. Patz’ reheb’ li kok’al jarub’eb’ re lix b’atz’uul tumin te’xk’e raj sa’ xk’ab’a’ li k’a’aq re ru a’an. Chirix a’an k’uteb’ xjalam-uuch li loq’laj wa’ak, jun li santil ochoch (jo’ reetalil li rosob’tesihom li santil ochoch), jun kub’iha’, ut xkomoneb’ chik li osob’tesihom naqak’ul rik’in li tijonelil. Ch’olob’ naq eb’ li maatan a’an re li Dios moko naru ta chi ajlaak xtz’aq ut ink’a’ naru chi loq’e’k rik’in tumin.

Hechos 9:1–20

Naq ninb’aanu li ink’a’ us, li qaChoxahil Yuwa’ nikinixb’oq chixjalb’al ink’a’uxl ut chi jalaak.

Naq li Jesus kixye re laj Sawlo naq tixkanab’ xrahob’tesinkil lix Iglees li Qaawa’, laj Sawlo sa’ junpaat kixjal xk’a’uxl ut kijala. Chan ru naq li seraq’ a’an naru chixtenq’ankileb’ li kok’al li nakatzoleb’ chirajb’al li jalaak sa’ junpaat naq neke’xb’aanu li ink’a’ us?

Kok’ k’anjel naru chi b’aanumank

• Kanab’eb’ li kok’al chixb’asb’al jun perel li hu sa’ xyijach. Patz’ reheb’ naq te’xtz’iib’a Naq maji’ chiru jun jachal ut Chirix naq sa’ junpak’al chik. Il ru rik’ineb’ li kok’al Hechos 8:1–3; 9:1–2; ut 9:17–22, re xsik’b’aleb’ li aatin malaj li ch’ol aatin li te’xch’olob’ rix laj Sawlo naq maji’ ut chirix naq kiril li Qaawa’.

• B’oq junaq li komon re li teep chixwotzb’al li resilal lix jalajik xch’ool ut chan ru naq li wank jo’ komon re li Iglees xjal lix yu’am, jo’ naq kixjal ajwi’ xyu’am laj Sawlo.

• Yiib’ xjalam-uuch li “b’e naxik Damasko” sa’ li pizarron. Kanab’eb’ li kok’al chirilb’al ru Hechos 9:6, 11, 18, 20–22, ut chixsik’b’al li k’a’ru kixb’aanu laj Sawlo re xjalb’al xk’a’uxl ut xsutq’isinkil rib’ rik’in li Kristo, ut tz’iib’aheb’ li kok’ k’anjel a’an chiru li b’e. K’a’ru naqatzol rik’in laj Sawlo chirix chan ru naru nokowulak chi us jo’ li Kristo?

• Kanab’eb’ li kok’al chixyiib’ankil xjalam-uuch li jwal nawulak chiruheb’ sa’ li seraq’ chirix lix jalajik xch’ool laj Sawlo ut chixwotzb’aleb’ lix jalam-uuch sa’ li tzoleb’aal.

Xb’oqb’aleb’ chi tzolok sa’ kab’l

Waklesiheb’ xch’ool li kok’al chi aatinak rik’ineb’ lix junkab’al chirix li ch’ina k’anjel jwal nawulak chiruheb’ sa’ li tzoleb’aal anajwan ut li k’a’ru xe’xtzol.

Xchaab’ilob’resinkil li qak’utum

Tenq’aheb’ li kok’al chixtzolb’aleb’ li loq’laj hu. Eb’ li kok’al toj ka’ch’ineb’ xyu’am maare ink’a’ neke’ru chi ilok ru hu, a’b’an toj chi jo’kan naru nakak’eheb’ chi tz’aqonk chixtzolb’aleb’ li loq’laj hu. Qayehaq, laa’at naru nakawil ru jun li raqal ut nakab’oqeb’ chi xaqliik malaj chixtaqsinkileb’ li ruq’ naq te’rab’i junaq aatin malaj ch’ol aatin li taawaj laa’at naq te’xsik’ (chi’ilmanq Li k’utuk jo’ li Kolonel, 20).