“1–7 julio. Hechos 1–5: “Laa’exaq aj yehol yaal chiwix” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“1–7 julio. Hechos 1–5,” Kim, Taaqehin—Choq’ reheb’ li komon ut li junkab’al: 2019
Xkutankil li Pentecostes, xb’aan laj Sidney King
1–7 julio
Hechos 1–5
“Laa’exaq aj yehol yaal chiwix”
Naq nakatzol Hechos 1–5, li Santil Musiq’ej naru nakatxmusiq’a chixtawb’aleb’ li yaalil na’leb’ li te’k’anjelaq sa’ laa yu’am. K’e reetaleb’ li jar raqal li neke’xtoch’ aach’ool, ut sik’ chan ru nakatru chixwotzb’al li k’a’ru yookat chixtzolb’al.
Xtz’iib’ankil li nakak’oxla
Ma xak’oxla jun sutaq k’a’ raj ru kixk’oxla ut kireek’a laj Pedro naq a’an, rochb’eeneb’ li jun siir chik chi apostol, naq “yookeb’ chi ka’yank sa’ choxa” naq li Jesus kitaqe’ rik’in lix Yuwa’? (Hechos 1:10). Li Iglees li kik’uub’aak chaq xb’aan li Ralal li Dios yoo chik chi b’eresiik xb’aan li Jesus rik’in xtz’uumal re laj Pedro, lix profeet li Dios. Kikana sa’ xb’een laj Pedro xb’eresinkil li k’anjel re “xtzolb’aleb’ chixjunil li tenamit” (Mateo 28:19). Wi laj Pedro kireek’a naq maak’a’ xna’leb’ malaj naq wan xxiw, ink’a’ natawman reetalil sa’ li hu Hechos. Li k’a’ru naqataw sa’ li hu, a’an resil li yehok nawom ch’oolej chi maak’a’ li xiw, li jalok ch’oolej, li sachb’a-ch’oolejil k’irtesink, li musiq’ejil k’utb’esihom, ut xk’iijik li Iglees. Anajwan, chirix xk’ulb’al li maatan re li Santil Musiq’ej, laj Pedro maawa’ chik laj kar li maak’a’ xna’leb’, li kixtaw li Jesus chire li palaw re Galilea. Maawa’ ajwi’ chik li winq li junjunq xamaan chaq yoo chi yaab’ak xb’aan xyot’ik xch’ool naq kixye chaq naq ink’a’ naxnaw ru li Jesus aj Nazaret.
Sa’ li hu Hechos, taawil li xninqal ru yehom chirix li Jesukristo ut lix evangelio. Taawil ajwi’ chan ru naq li evangelio naru chixjalb’aleb’ li kristiaan—jo’ laa’at ajwi’—chi wank choq’ tzolom li kaweb’ xch’ool, jo’ naxnaw li Dios naq naru te’wanq.
Li na’leb’ re xtzolb’aleb’ li loq’laj hu aajunes.
Hechos 1:1–8, 15–26; 2:1–42; 4:1–13, 31–33
Li Jesukristo naxb’eresi lix Iglees rik’in li Santil Musiq’ej.
Sa’ li hu Hechos, tz’iib’anb’il resil chan ru naq eb’ li apostol ke’xyal xq’e chixxaqab’ankil lix Iglees li Jesukristo chirix lix taqik li Jesukristo sa’ choxa. Us ta li Jesukristo maak’a’ chik sa’ li ruchich’och’, kixb’eresi li Iglees rik’in li na’leb’ k’utb’esinb’il xb’aan li Santil Musiq’ej. K’oxla chan ru naq li Santil Musiq’ej kixb’eresiheb’ li ak’ aj b’eresinel sa’ lix Iglees li Kristo naq nakawileb’ li raqal a’in: Hechos 1:1–8, 15–26; 2:1–42; 4:1–13, 31–33.
K’a’ru junjunq li k’anjel, li b’oqok, malaj li teneb’ank li xk’e li Qaawa’ sa’ aab’een laa’at? K’a’ru nakatzol rik’in lix numsihomeb’ li najteril apostol a’in, chirix chan ru naq naru taak’ame’q aab’e xb’aan li Santil Musiq’ej?
Chi’ilmanq ajwi’ li K’utul Raqal reheb’ li Loq’laj Hu, “Santil Musiq’ej.”
K’a’ut naq wan li maatan re aatinak sa’ jalanil aatinob’aal?
Wankeb’ li neke’k’oxlank re naq li maatan re jalanil aatinob’aal naraj naxye, aatinak sa’ jun li aatinob’aal li ink’a’ tawb’il ru. A’b’anan li profeet aj Jose Smith ki’aatinak chirix li k’a’ru kik’ulman sa’ Hechos 2, ut kixye naq li maatan a’in re li Musiq’ej, “k’eeb’il re taajultikamanq li evangelio chiruheb’ li ink’a’ nawb’il li raatinob’aaleb’, jo’ sa’ xkutankil li Pentecostes. ... Lix yaalalil li maatan re jalanil aatinob’aal, a’an re aatinak rik’ineb’ laj jalanil tenamit.” (Enseñanzas de los presidentes de la Iglesia: José Smith [2008], 407). Sa’ li ninq’e re Pentecostes, jun ninq’e reheb’ laj Judio, ke’chal chaq sa’ naab’al li tenamit toj Jerusalen. Li maatan reheb’ li jalanil aatinob’aal kixkanab’eb’ laj jalanil tenamit chixtawb’al ru li raatineb’ li apostol sa’ tz’aqal li raatinob’aaleb’.
Li xb’eenil na’leb’ ut k’ojob’anb’il k’anjel re li evangelio nikine’xtenq’a chi chalk rik’in li Kristo.
Ma xaweek’a jun sutaq naq “xtoch’e’ aach’ool” jo’eb’ laj Judio sa’ xkutankil li Pentecostes? (Hechos 2:37). Maare wan k’a’ru xab’aanu li xyot’e’ wi’ aach’ool, malaj maare yal nakawaj xjalb’al aayu’am. K’a’ru tento taab’aanu naq nakaweek’a chi jo’kan? Li na’leb’ kixk’e laj Pedro reheb’ laj Judio natawman sa’ Hechos 2:38. K’e reetal chan ru naq li xb’een raqal chi na’leb’ ut k’ojob’anb’il k’anjel re li evangelio (a’aneb’ li paab’aal, li jalb’a-k’a’uxlej, li kub’iha’, ut li maatan re li Santil Musiq’ej—ut a’aneb’ ajwi’ li tzol’leb’ re li Kristo yeeb’ileb’ re) kixtenq’aheb’ li ani ke’xjal xch’ool, jo’ yeeb’il resil sa’ Hechos 2:37–47.
Maare laa’at ak xkub’e aaha’ ut xak’ul li maatan re li Santil Musiq’ej, ut chi jo’kan, chan ru naq toj nakatru chixk’anjelankil li tzol’leb’ re li Kristo? K’oxlaheb’ li aatin a’in, yeeb’il xb’aan li Elder Dale G. Renlund: “Naru tootz’aqob’resiiq wi rajlal naqakanab’ qib’ chiru lix tzol’leb’ li Kristo: rik’in xk’anjelankil li paab’aal chirix li Kristo, xjalb’al qak’a’uxl, xk’ulb’al li loq’laj wa’ak re x’ak’ob’resinkileb’ li sumwank ut li osob’tesink re li kub’iha’, ut xk’ulb’al li Santil Musiq’ej jo’ li qochb’een rajlal . Sa’ xb’aanunkil a’in, noko’ok jo’ chanchan li Kristo ut naru nokokuyuk toj sa’ roso’jik, rik’in chixjunil nachal wi’ li na’leb’ a’an.” (“Eb’ laj Santil Paab’anel toj neke’xyal xq’e,” Jolomil ch’utub’aj-ib’ re abril, 2015).
Chi’ilmanq ajwi’ 2 Nefi 31; 3 Nefi 11:31–41; 27; Brian K. Ashton, “La doctrina de Cristo,”Liahona, noviembre 2016, 106–109.
K’a’ru li “chaab’il ut sahil kutan” ut “li hoonal taa’ak’ob’resiiq wi’ chixjunil li k’a’aq re ru”?
Li “chaab’il ut sahil kutan” a’an li Jun Mil Chihab’, naq li Jesukristo taasutq’iiq sa’ li ruchich’och’. Li “hoonal taa’ak’ob’resiiq wi’ chixjunil li k’a’aq re ru,” a’an naq k’ojob’anb’il wi’chik li evangelio.
Eb’ lix tzolom li Jesukristo k’eeb’ileb’ xwankil chixb’aanunkil li sachb’a-ch’oolej sa’ xk’ab’a’ a’an.
Li winq yeq roq kiraj raj xk’ulb’al b’ayaq xtumin rik’ineb’ li yookeb’ chi ok sa’ li santil ochoch. A’b’anan q’axal nim wi’chik li ke’xyeechi’i lix moos li Qaawa’ re. Naq nakawil ru Hechos 3; 4:1–3; ut 5:12–42, k’oxla chan ru kik’anjelak li sachb’a-ch’oolej li kik’ulman choq’ re:
Li winq yeq roq
Laj Pedro ut laj Jwan
Eb’ li ke’ilok re sa’ li santil ochoch
Eb’ li taqenaqil aj tij ut eb’ laj taqlanel
Xkomoneb’ chik laj santil paab’anel
Chi’ilmanq ajwi’ eb’ li video “Pedro y Juan sanan a un cojo de nacimiento,” “Pedro predica y es arrestado” (LDS.org).
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Jo’q’e naq xqeek’a naq “xtoch’e’ qach’ool” naq wan junaq ani xk’utuk re li evangelio? K’a’ru xyaalalil li eek’ahom a’in? K’a’ut naq aajel ru xyeeb’al, “K’a’ru tinb’aanu?” naq naqak’ul li eek’ahom a’in?
Chan ru naq jalan wi’ li osob’tesink kixk’ul li winq sa’ li santil ochoch rik’in li kiroyb’eni chaq xk’ulb’al? Chan ru naq laa’o xqil li rosob’tesihom li qaChoxahil Yuwa’ chi jalan rik’in li xqoyb’eni?
Li k’a’ru wank we tink’e aawe, xb’aan laj Walter Rane
K’a’ru nakak’oxla chirix lix tiikilaleb’ xch’ool laj Pedro ut laj Jwan? Chan ru naq laa’o nokoru chi wank chi kaw qach’ool sa’ xch’olob’ankil xyaalal li Jesukristo?
Eb’ li komon sa’ laa junkab’al maare te’raj xk’utb’esinkil li resil laj Ananias ut li xSafira rik’in li najteril aq’ej ut junjunq li kok’ tumin. K’a’ru naqatzol rik’in li esilal a’in? A’ yaal jo’ neke’raj ru laa junkab’al, naru tex’aatinaq chirix xmaak’a’il li b’alaq’, chirix xxaqab’ankil xwankileb’ laj jolominel sa’ li Iglees, malaj chirix xq’axtesinkil qib’.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Sik’ ru jun na’leb’. Kanab’eb’ li komon sa’ li junkab’al chixsik’b’al ru jun na’leb’ sa’ Hechos 1–5, re teetzol sa’ komonil.
Lix taqik li Qaawa’ sa’ choxa, xb’aan laj William Henry Margetson