22–28 julio

Hechos 16–21

“Li Dios xb’oqok qe chixpuktesinkil li evangelio”

Naq nakawil resil lix k’anjel laj Pablo re xjultikankil li evangelio, li Musiq’ej naru chixk’eeb’al sa’ aach’ool li k’oxlahom malaj li eek’ahom. Tz’iib’aheb’ li musiq’anb’il na’leb’ a’in, ut k’e aach’ool chixk’anjelankileb’.

Xtz’iib’ankil li nakak’oxla

Jun reheb’ li raatin li Qaawa’ reheb’ lix apostol sa’ roso’jik lix yu’am aʼan: “Ayuqex bʼiʼ, ut kʼehomaqebʼ choqʼ intzolom chixjunilebʼ li tenamit. Teekubʼsihebʼ xhaʼ saʼ xkʼabʼaʼ li Yuwaʼbʼej, li Kʼajolbʼej ut li Santil Musiqʼej, ut kʼutumaq chiruhebʼ xpaabʼankil chixjunil li xexintaqla wiʼ “ (Mateo 28:19–20). Us ta eb’ li apostol ink’a’ ke’ru chi wulak sa’ chixjunileb’ li tenamit, sa’ Hechos 16–21 naqak’e reetal naq laj Pablo ut eb’ li rech aj k’anjel q’axal us ke’el sa’ xxaqab’ankil li Iglees. Ke’k’utuk, ke’kub’sin ha’, ut ke’xk’e li maatan re li Santil Musiq’ej. Ke’xb’aanu k’iila sachb’a-ch’oolej, ke’xwaklesi jun winq chiru li kamk, ut ke’xye naq taa’uxq jun nimla q’etok paab’ank. (Hechos 20:7–12; 20:28–31). Ut li k’anjel ke’xtikib’, toj yoo chi uxmank rik’ineb’ li yo’yookil apostol anajwan, jo’ ajwi’ rik’ineb’ li tzolom tiikeb’ xch’ool jo’ laa’at, li yookeb’ chi tz’aqonk sa’ xtz’aqob’resinkil ru lix taqlanb’il k’anjel li Kolonel, jo’ chanru taasachq raj xch’ool laj Pablo rilb’al. Maare wankeb’ ani nakanaw ru li ink’a’ neke’xnaw ru li qaChoxahil Yuwa’ ut lix evangelio. Maare xaweek’a naq “nak’atnak sa’ aach’ool” ut nakawaj xwotzb’al rik’ineb’ li k’a’ru nakanaw laa’at chirix (Hechos 17:16). Wi nakab’aanu li kixb’aanu laj Pablo rik’in tuulanil ut kawil ch’oolej re xjultikankil li evangelio, maare taataw ani “teeb’il xch’ool xb’aan li Qaawa’ ” (Hechos 16:14).

Li na’leb’ re xtzolb’aleb’ li loq’laj hu aajunes

Hechos 16–21

Li Musiq’ej tixk’am inb’e naq tinyal inq’e chixwotzb’al li evangelio.

Chixjunileb’ neke’raj ru lix evangelio li Jesukristo, a’ut wankeb’ li k’a’jo’ wi’chik kawresinb’ileb’ chixk’ulb’al chiru li jun siir chik. Xb’aan a’in naq aajel ru naq taawanq li Santil Musiq’ej qik’in naq naqawotz li evangelio—re xk’amb’al qab’e rik’in li ani kawresinb’il. Naq nakawil Hechos 16–21, k’e reetal chan ru naq li Musiq’ej kixk’am xb’e laj Pablo ut eb’ li rech aj k’anjel. K’a’ru li osob’tesink ke’xk’ul rik’in naq ke’xtaaqe li Musiq’ej? Jo’q’e xaweek’a naq li Musiq’ej x’eek’asink aawe naq xayal aaq’e chixwotzb’al li evangelio?

Chii’lmanq ajwi’ Alma 7:17–20; Dallin H. Oaks, “Xwotzb’al li evangelio li k’ojob’anb’il wi’chik,” Jolomil ch’utub’aj-ib’ re octubre 2016; Predicad mi evangelio, 92–93.

Hechos 16–21

Naru ninch’olob’ li evangelio yalaq ta b’ar wankin.

Maare laa’o taaruuq raj taqak’oxla naq rik’in tz’ape’k sa’ tz’alam xb’aan xjultikankil li evangelio, wan rajb’al naq taqakanab’ xjultikankil. A’b’anan choq’ re laj Pablo ut laj Silas, a’an jun k’anjeleb’aal re xjalb’al xch’ool jun aj ilol tz’alam (chi’ilmanq Hechos 16:16–34). Sa’ Hechos 16–21, k’e reetal li k’iila sut naq laj Pablo kiwan xch’ool chixch’olob’ankil lix nawom xch’ool chiru chixjunileb’. K’a’ut nakak’oxla naq k’a’jo’ xkawil xch’ool ut naq maak’a’ xxiw? K’a’ru nakatzol rik’in lix b’aanuhom laj Pablo?

Wankeb’ chik k’iila esil chirix xwotzb’al li evangelio sa’eb’ li ch’ol 16–21. Wi nakatz’ileb’ ru chi us, naru taataw jun li na’leb’ li taak’anjelaq chi us choq’ aawe. Us naq taawileb’ ru li ch’ol a’in chi wank li jayalihom a’in sa’ aak’a’uxl. K’a’ru li na’leb’ nakataw?

Hechos 17:16–34

“Laa’o li ralal xk’ajol li Dios.”

Sa’ Atenas, laj Pablo kixtaw jun tenamit li neke’xpaab’ jalan jalanq paay chik na’leb’ chirix li paab’aal. Eb’ a’an yal neke’raj “rab’inkil yalaq k’a’ru chi ak’ na’leb’,” ut li k’a’ru yoo chixk’utb’al laj Pablo ak’ ajwi’ choq’ reheb’ (chi’ilmanq Hechos 17:19–21). Eb’ a’an neke’xloq’oni k’iila dios, ut sa’ xyanqeb’ wan jun, “li Dios ink’a’ nawb’il ru” yeeb’il re (Hechos 17:23), a’ut eb’ a’an neke’xpaab’ naq eb’ li dios a’aneb’ yal reetalil li k’a’ru wan sa’ choxa ch’och’; ut ink’a’ neke’xpaab’ naq yo’yo ta li Dios chi yaal, chi moko naq wan choq’ qaYuwa’. Il ru li k’a’ru kixye laj Pablo re xtenq’ankileb’ chixnawb’al ru li Dios, ut k’e reetal chan ru naq wan li Dios, jo’ yeeb’il aran. Kʼaʼru naraj naxye choqʼ aawe naq “ralal xk’ajolo li Dios”? (Hechos 17:29). Jo’ nakak’oxla laa’at, chan ru naq li wank choq’ ralal xk’ajol li Dios jalan wi’ rik’in yal wank chi yo’ob’tesinb’il xb’aan li Dios? Wi ta laa’at xaqxookat chaq aran chixk’atq laj Pablo naq yoo chi ch’olob’ank, k’a’ raj ru kaye reheb’ li najteril aj Griego chirix li qaChoxahil Yuwa’? Ma nakanaw ru anihaq li usaq choq’ re rab’inkil lix nawom aach’ool?

Lix loq’al jun aamej, xb’aan xLiz Lemon Swindle

Chi’ilmanq ajwi’ Romanos 8:16; 1 Jwan 5:2; “Somos linaje de Dios” (video, LDS.org).

Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:

Hechos 16–21

Re xtenq’ankileb’ li wankeb’ sa’ laa junkab’al chixk’eeb’al reetal k’a’ru yoo chi k’ulmank sa’eb’ li ch’ol a’in, maare us raj, sa’ rilb’al ru sa’ komonil, naq taak’ut chiru jun reetalil ch’och’ eb’ li tenamit kiwulak wi’ laj Pablo (chi’ilmanq li reetalil ch’och’ sa’ xraqik li tusleb’ aatin a’in).

Hechos 17:11; 18:24–28

Chan ru naru toowanq chi mas wi’chik jo’eb’ laj santil paab’anel sa’eb’ li raqal a’in? Chan ru naq xtzolb’aleb’ li loq’laj hu wulaj wulaj nokoxtenq’a chi wank chi chaab’il qach’ool? (Hechos 17:11). K’a’ru naru taqab’aanu re naq “taqanaw chi us xsa’ li Santil Hu”? (Hechos 18:24).

Hechos 19:1–7

Eb’ li aatin a’in yeeb’il xb’aan li Profeet aj Jose Smith maare te’xtenq’a laa junkab’al naq neke’aatinak chirix Hechos 19:1–7: “Li kub’iha’ rik’in ha’ a’an yal xyijach jun li kub’iha’, ut maak’a’ na’ok wi’ wi ink’a’ na’ux lix yijach chik—a’an, li kub’iha’ rik’in li Santil Musiq’ej. ... “Li yo’laak rik’in ha’ ut rik’in li Musiq’ej” naraj naxye sub’e’k sa’ ha’ choq’ re risinkil li maak, ut xk’ulb’al chirix a’an li maatan re li Santil Musiq’ej. A’in nak’eeman rik’in xk’ehonik li uq’ej, xb’aan li ani wan li wankilal k’eeb’il re xb’aan li Dios” Enseñanzas de los Presidentes de la Iglesia: José Smith, 100), K’a’ru li osob’tesink li nachal qik’in rik’in xk’ulb’al li maatan re li Santil Musiq’ej?

Hechos 19:13–20

K’a’ru ki’eek’asink reheb’ li yeeb’ileb’ resil sa’eb’ li raqal a’in re te’xk’ateb’ lix hu, li “lajeeb’ roxk’aal mil chi tumin” xtz’aq? (Hechos 19:19). Ma wan li ruchich’och’il k’a’aq re ru li wan qe malaj li naqab’aanu, li na’ajman ru naq taqaq’axtesi re taqak’ul li choxahil osob’tesink?

Hechos 20:32–35

Jo’q’e xe’xk’ul laa junkab’al li kixye li Kristo, naq “Q’axal nim li sahil ch’oolejil wank sa’ li k’ehok chiru li wank sa’ li k’uluk”? (Hechos 20:35). Ma wan ani taaruuq chi usilaak rik’in li k’anjel, li hoonal, malaj li maatan li taaruuq chixk’eeb’al laa junkab’al? Jo’ junkab’al, aatinanqex chirix a’in, ut k’uub’ahomaq jun na’leb’ re xtenq’ankil jun eeras eeriitz’in. K’a’ru li naqeek’a naq naqatenq’aheb’ li qas qiitz’in? K’a’ut naq q’axal nim wi’chik li sahil ch’oolejil wank sa’ li k’ehok chiru li wank sa’ li k’uluk?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li tzolok aajunes

Xtz’iib’ankil li na’leb’ nakak’ul. Naq nakak’ul junaq musiq’anb’il na’leb’, tz’iib’a. Jo’ jun eetalil, naru taatz’iib’a li k’a’ru nakak’oxla sa’ xk’atq’ li perel sa’eb’ li loq’laj hu, malaj sa’ li aplicación Biblioteca del Evangelio sa’ laa celular, malaj sa’ jun chik li hu. “Naq nakatz’iib’a li musiq’anb’il eek’ahom, nakak’ut chiru li Qaawa’ naq nakawoxloq’i li na’leb’ naxk’e, ut a’an tatrosob’tesi rik’in xkomon chik li k’utb’esinb’il na’leb’ ” (Li k’utuk jo’ li Kolonel, “Xkawresinkil aawib’ sa’ musiq’ej” ).

Reetalil ch’och’ re lix b’eenik li apostol aj Pablo jo’ aj k’amol aatin.